Gálatas 2
2
Pablo siupapo injlojwajnas ijia isi'm ilia'm
1Najkapis times sikio' itij'we ijniujlits'i tom'niji kiwa yam'niji, ekiajlayi'iji ti ajo Jerusalenne, ti ya'yi ja Bernabé, sekyi'i ti ane ja Tito ka 'nonin sek'i. 2Jlam je ak jiwek, 'yina ti Sinia' po' ki iyonk'i ka yik, jak je iyoyiji ti aye sekaja. Ajnayi japoka ti i'yena pet japo ijia Sinia' jilis pet ti a'nalkit, ti akamtijnienk'iye, siunie ti awoyi'ni yamtikie' ti ajwejla'm napo i'nio' ti je Judíojos. Kajeyepa ti awo ka pi'ya ka woyits'i 'ate “'Esiji” siukia awoyi ti 'nelanjie'e, ni'ne ka jwajla'aja ti je 'esi'n siukia awoyi. 3'Yina ti jlaja 'esiji kajeyepa ti siojo sa'yi Tito, 'wanjliyi je Judíojata, je iyoyisi wek ka 'nejejienits'i ka kiak tiwonaja siunie iyoyisi'ni ti jlamis ti t'isie'n jiwa yiwajats'i'ni.
4'Yina po' siojopo i'nio' ijwil ka Sinia' jilisa', 'yu siwa'm ti anojokk'i wita'm, ti je inikajanitts'e'm, 'yina takajla'n sikiajwe ti isiowal'ni sek'i, ti iyo ka kaspe'ya siunie ajwela ti sa'am ti akiniek'i ni iyo pi Jesús. 'Yina ti naka ti iyoyisijyi'n ka intajlatts'e'm, jla'yi ti jawoyisi jiwek ji'niayija', ka kasjlojiene ni iyo pit ni Moisés jika'neyasajnaye siuniwa 'yijie'ne ni i'nio' ka woyi, ti iyo ka wonts'e jikipijnasats'e'm niwaka wask'i'nelaja siuniwa ti Jesús pajk'i ti kasjwajiete. 5'Yina je kasjlan'ni siunie iyonisi ni jitienkiujnieye ti iyotaja ka kasnetiajnate'n. Tepa jawo ka yine 'ate, ti awo ka ilisaniji ask'ioye ni iniu'we pet niwa Sinia' jlamtis ti isis kajeyepa ti ijiatk'i, jlam niwaka, jla'yi ka je int'eki aska kiowe'e ka ne'yasap.
6Ka kia'iwo ka poye paka k'iejliyeyi paka injwelisk'i'm ka yoyi japoka i'yena pet japo ijia Sinia' jilis. (Ijiatataja wek ti ijwilis ijia jika anechiyasas, 'yina ti ya'am je nak ka i'ye'en. Sinia' kia'iyo je i'ye'en paka t'oniyeja' pa.#Deut 10.17)
7Tojwayi ts'iji ki iyo siunie iyoyistieje ka woyisi ka inanisin'ni sik'ioye, ti jlamis ti i'yena japo ijia Sinia' jilis pet, siukia awoniji'ni lajk'iyi paka iwoyisi. Najata jla'am ti a'we'en ti je sakakiuyis ti Sinia' jla'am ti yikialk'i siu'nie isijmaye iyo ti awo yamtikieyi siunapo i'nio' ti je Judíojos siuniwa Sinia' jlamtis, iyoye pet 'ate ja Pedro ti kia'iyo ti iyo jlamtikieyi pet napo Judíojos. 8'Yina je 'wena paka injlo' ja Pedro, Sinia' jla'am ti isi'me ti iyoyi jijliujwanikie', ti ijliuyi napo Judíojos, iyoyi pet 'ate awoyi ti ajna'yi pet siunapo je Judíojos, Sinia' jla'am 'neje ti siwojwa'n jijliujwanikie'.
9Jak je iyoyiji japo Santiago, Pedro, Juan, ti jlam ti ijia, isi'me ka 'yena ka inkie ape'e, jla'yi ka 'net pijia'm napo Sinia' jilis, je kaskakiuk kajeyepa ti 'yijene pi iyone ti jla'am pa Sinia' ti yikialk'i ni siu'nie. Jak je iyoyiji ti i'winayis ti kia'iyo, isieja sikioyejiamk'i, naka 'neje ni Bernabé, kajeyepa ti ijwilis ijiate ti isim selia'm ka ijwienjli iniuk'i ti jasimak'iji'n. Sekyi'i iyoyis'ne 'ate, “'Esiji ka in'wenayeyi pet siunapo je Judíojos, jlampet ti sa'am kiak jayoki, ja'wijnaki pet napo Judíojos.” 10Ti yinayisi ape'e iyoyis'ne 'ate, “Astaj wunitieyipe pet siunapo i'nio' p'ijliusis pet, ti yi' asap.” Sekyi'i ti kiak awo'ni pet, “Ijiatp'ane, 'esiji.” Jlam'ne jlam pajk'i ta'a ti isiowe ka iniuyeje napoka.
Pablo iyo jlosikie' pa Pedro ti iyoyi siupa je 'es Antioquíaja
11'Yina siuti Pedro ijioye pet Antioquíaja, sek ene'e'ne ti ajwejla'm ka leyi siunie iyo, ti wuj ti je 'es. 12Ti 'nelanjie'e 'esiji kajeyepa ti isijwane japo je Judíojos. Je 'es ti 'nesa'ni pet siojopo yamk'ijin'ni pet ja Santiago, ti kia'iyoyetaja ti yame ni Sijwajieti Jesús iyo pit. Sekyi'i iliyi ti isijwane, kajeyepa ti iyoyits'i 'ate, “Siunapo Sinia' jilis je 'es ka je kiak tiwonaja siu'nie awoki ti ts'isie'n jijwa'al tejwak'i, 'esiji ka wikie'eyeyi.”
13Jak je iyoyiji siojopo ijia Judíojos ti i'winayis ja Pedro ti kiak iniwone, sekyi'i ti kia'iyoyeyisi iniuyeyisi pet. 'Yina Bernabé kia'iyojliyi ti ikajlis siunie iyonisi ti ik'emijietis. 14Sekyi'i a'we'en ti kia'iyo ti yameje'n siunie iyoyisi, ti je ijlieneje siunie iyo ni ijiate ti 'es Sinia' jlamtis, 'yina kiak awoniji'ni ja Pedro ti ene jitieyi'i japo i'nio', “A'm ti Judío'a'm, 'yiniye ka je Judíoja'a'm jle' kiowe'e napoka ti ijiate jla'am ti je Judíojos, jlam jiniwone wek ka je ama ka Judíoja'a'm. Jlam'ne amata pet, ¿yot'iyi'ni ti jit'ijie'ne napo i'nio' je Judíojos ka kiak iniwonisi iyo ni jiwoyeyi?
15“Sa'm ijiate ti Judíojosts'eme, je sa'am siunapo ti tiwonaja'ni 'ate inke' liajnis, siunapo je Judíojos ti je yiyi ki iyo ni Moisés jika'neyasajnaye. 16'Yina lajk'ipa ka je 'najane paka wone ti lajk'ipa ka ne'yi paka Moisés jika'neyasajnaye inlesajne'n 'nakayi, 'wenajliyi jla'am pa ti itienkiuni pa Sijwajieti Jesús, ti je 'yakakiu. 'Yina je 'wena 'neje pet paka itiajlataja siunie ti Sinia' ka lesajne'n ni sitis iyo, naka ti atankiunieje ni Jesús ti je akakiuk, je ka intajle siuka ya'm ape'e ki iyo ni inka'neyasajnaye siunie iyo ka iyoki, ka sek ine'yi ka Sinia' inetiajnat pi sitis iyo. Siunie awone je nak kant'emina ka Sinia' inlesajne'n pi i'nio' siunie ti jantej'we ka woyi siunie iyo ka tiwoki ni Moisés jika'neyasajnaye.#Sal 143.2; Rom 3.20-22
17“Siuti najata jla'am, ti a'yena siunie ti Sinia' ijialts'e pi sitis iyo kajeyepa ti atankiunieje pi Sijwajieti, nak 'yakajk'i ti ak'iujiek'i ni ji'wet napoka i'nio ti je Judíojos, ka yo'ate siunapo inkeyis jiliajnis. Nak ajwe'el ti awo'ate, ¿pakat'e jla'am pi Sijwajieti ti kaswojwa'n inkeyis jiliajnasats'e'm? ¡Jeyi kat'aja! 18Kajeyepa siuti jajwel ka iwit'iane siunie ti je akakiuni ti 'es, niwaka niwa tajle pit ni Moisés jika'neyasajnaye, 'yina ayi ts'iji ekiajla'aja pijia'm, nak yam ya'am ti akajanit ti itis poyi ilia'm naka inka'neyasajnaye.”
19Siuti ya'am masak'i'm jitieyi'i nak inka'neyasajnaye, tepa jawo ka kiak je iwo ti jilianikk'i'm, sekyi'i nak tajleje pit ti si'wasana'aja, sekyi'i Ika'niona pa Sinia'. Kajeyepa ti 'yiniye ka iliaye inoyi wita'm pi Sijwajieti ti tik'iejwata'a japa cruz, 20'yina je'ne ka yama ka si'wasa'n, 'wenajliyi ti jla'am pi Sijwajieti ti yi' iwia'am ti si'wasankit.#Fil 1.21 Siunie awo ti si'wasa'n, 'nakayi si'wasa'n kajeyepa ti itienkiujnieye yiyi ni Sinia' jlas, 'yina ti je akakiu ti jla'am ti semi'n, jla'yi ti ininekial itipe'e ka tiliana, ti iyo ka sijwajiet. 21Je akawona pi Sinia' jikap'ijliuskiye ti yink'i'm, kajeyepa siut'itiejpe ka nakaye Moisés jika'neyasajnaye ka 'esieyi ni i'nio' jitieyi'i pi Sinia', lajta'ne lajaye siupi iyo siuti tiliana pa Sijwajieti.
Currently Selected:
Gálatas 2: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.