Tito 3
3
Siunie 'es ka woyi napo Sinia' jilis
1Ja wone'ate ti ja jloye, “K'iuyeyi napo anechiyasas wus,#Rom 13.1-7; 1 P 2.13-17 siu'neje napo yi kiajwe. Siu'nie jawo ka woyeyi, 'esiji ka woyeyi. Ja inwakajla ta'a siunie ti jawoyeyi ti 'es. 2Ká ayeyiji'ni ni askiecha, kamaja. P'elisi'n napo as'lejwas; siuti jawayejiap papo, nikajanitieyi siunie jiwoyeyi ti je nitonitie.”
3Ti pajk'i kassoski'lajne'n, je awoki kats'iukie niwa Sinia' jlamtis, akamak'iji'n. 'Yina ti 'loj siuniwa kasteliaja, sakeyis ti ijwienjli je k'iejliyik'i, niwaka'ne ti iyo jikipijnasats'e'm 'yina ti awak kiajwe. Wuj ti je 'es ki awoki; awoki ni solsijnieye; kasse'waja napo si'lijwas, kia'iyojliyisi pet ti ne'wats'e'm.
4'Yina ti Sinia', ti Sijwajieti, iyoyeyi kap'elisijne'n napo i'nio', lapakawo wuj ti yimi'n, 5sekyi'i kasjwajieten'ne. Je ka pakaye kat'emina ka iyoki pi k'iejliyi ka sikijmayeja' ka wujwa ka 'esie ti kasjwajiete'n, 'wenajliyi jla'am siunie ti jikap'ijliuskiye po', naka'ne ti kasts'esi. Sekyi'i ti kasleja ki iyo niwa sakeyis, sekyi'i ti ekiajlayi'iji ni awoki siunie iyo ti 'nelanjie'e atajlaja'm jana set. Jlampet siojona Sinia' jikimet ti 'es janaka pet ti iwints'e'm ni si'wasankiye ti ink'ie'. 6Jla'yi ti Sinia' wuj ti isiayi sitipe'e jana jikimet ti 'es ti itiajlate pa Sijwajieti Jesús. 7Nak kasts'isisi ki iyo ni jikap'ijliuskiye, it'imina ti yikialts'e ka itiejek janak si'wasankiye ti t'on, jana anejejwiyejenk'iye.
8Awo'ate ijiatk'i kiaka. Tempi it'imina ti kia awo'naja ka ajalaskine napo i'nio', siunapo iyoyi ki inamtik, ka inkatate ka woyi siunie 'es ka inkimk'iji'n. 'Niwaka ti iniuyeje napo i'nio' 'yina ti isis. 9'Yenpe siunie jiwo, ti jlamtiyeta, 'nakayi siuti ja ti'yena, ja 'naka pet ti ja'wenaye siuniwa inamtis ti laj lajaye iyot'iyipi papo pajt'ipi, jla'yi ti iniewitis, siu'neje na ti initajlatisi naka Moisés jika'neyasajnaye. Ijiate ti i'nio' je iniuyeje, kajeyepa je isis siuniwa tajle. 10Siunie ti jlam ti it'imina ti tejets'i wita'm napo Sinia' jilis, nak ja jloyeyi ti jawo jlosikie' ka ilek'i ni jike' iyone. Siuti ja ke inlek'i, ja ekiajlayina'aja ti ajloye. 'Yina siuti je iyoyiyi ka k'iu'wa'm sekjane'yi ka leyeyi jiwekie'e, 'yiniye ti ja ke a'we'en 'yina je iyo'ate ka je ti'niejenaja pa ka tiwonaja.#Mt 18.15-17 11'Esiji ka 'najane paka wone, ti siunie i'nio' kiak iyo, jlosik je ijyiwitayiji. Lajk'ipa ka 'nakajanit'i ape'e, niwaka jla'am siuniwa iyoyi ti je isis. Yiyits'i ti yiyeyi kisie'e, ti ijiate ti po' ni jitis iyo.
Siu'nie Pablo takajlunie ti yin jlaja
12Siuka nak ijliutiejenie'e 'ni Artemas jane'yi pa, ni'ne ka 'nakaye Tíquico,#Hch 20.4; Ef 6.21-22; Col 4.7-8 ke int'o'nina'a. Jlam woni'ni 'ate ka na'am 'yenk'i siunie'e, ti jayi ts'iji yi'i jlaja ajnat Nicópolis, 'yina ti sek awotaja ka yiji ka wi'yitipata. 13'Esiji ka ijiatayi ka noyeje siojo tamti'ni ape'e napo jitis po' jle' iyo'ate Zena, siu'neje ja Apolos, ti iyo kant'iskiujni'n, 'nakayi ti japoye paka 'esieyi 'najk'i. 14Jlampet papo si'lijwas 'esiji ka ini'neyasane siunie 'es jikijmaye. 'Esiji ka pajlata ape'e, siupi k'iejliyi pi isitia'n, ni jikiecha ti je i'win pet paka k'iejliyeyi. Siuti kiak janiwonisi wuj ti 'es kajeyepa ti napoka ti ijia jitiej jawoma.
Pablo yin jlaja ti itijwile papo, jla'yi pi jikap'ijliuskiye
15Pajlat napo si'lijwas ti yi' ijiap itijwi'la pit. Kia'iyo pit ti ya'am siojopo yi' ajap si'lijwas, ti kassemi'n, ti kasseniji ki iyo ni 'es sitienkiujnieye, atejwile pit.
'Esiji ka jlam kiajatak'i niwa jlomas ka Sinia' imp'elisina', ti apejlanit'i astepe'e.
Currently Selected:
Tito 3: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.