Hechos 28
28
Pablo ti yiye Máltaja, ajnat ti i'niat itijwape'n
1Jlampa ajwayejajyi ki siwet'ia iyo, a'yasajan'ne japo i'nio' ji'wet'ise' jlajak ajnat. Ijwilts'em'ne ki jle' ijio'we ti iyo'ate Malta, ajnat ti i'niat itijwape'n. 2I'yen selia'm japoka, ijlianayi'i sik'ioye ki jwat, jlam'ne ki pejla je 'yotatayik'i pet ti neki'n, kejlikiamt'e techajaja'n jakayi, sekyi'i tanayits'i'ni ka tieye'e ki jwat ijlianisi'i sik'ioye. 3'Yina Pablo yama ti iyojyin'ni kiwa jlosili, ti ijliane'e'ni ki jwat. Yiyi ti iyoyetaja ka inene ki t'ajlet, je 'esiji ti pajat'ipi ki injla, ti iliatayi ki jwat ti yiye'e siukiwa yiji ti tijwanaja'a a'la' jlosili, tisiojmayet'iyipi ilia'm ki Pablo jikio', ti yokie. 4Siojopo i'nio' sek ji'wet'e, ti i'winayis ja Pablo ti injla 'yakapalk'i'ni ki jikio', sekyi'i iyoyis'ne 'ate:
—Kalankijieta t'e siu'nie i'nio', 'yina ti tijwajyi siukia jiwet'ia iyotaja, ti yi'i i'niati, ijiate nakayeta lapakawo ti je ijiat ka jiwet'ia je poye. 'Ni i'nio' ja'na'al kajeyepa napoka jla'am napo jika diosis ka inwotajna'a lajaye, ti janejni siukia iyo.
5Pablo itietayija'm ki jwat ki injla, 'yina ka k'iejliyeyi paka iwo ka inlate, siukia yine'e ki injla ti yokie. 6I'yenisieta'ni kant'ikiek'i pi jikio', ni'ne ka nek wat isia'm ka jiyel inetia'n. Je 'esiji ti itilajayisiap ka ilate, sekyi'i ti 'wena iyoyeyisi, ijwilayis ka diosa' ja Pablo.
7Jlajak siujlieja ajnat ti i'niat itijwape'n, sekp'an 'yakamaja'ape siojowa ajnatis jikimet pet siojo i'yena siujlieja ajwel'ni isi', jle' iyo'ate Publio ja i'yena. Jaka'ne siojo iyo si'weta' paj ti saka jlomas najapeja. 8Jakap'anepe ti Publio jinia' je 'es'ni, ti inlaye yi'i, jla'yi ti ijliam'ni. Pablo yama ti i'yene, t'ajla ape'e jla'yi ti jikio' yina ape'e, sekyi'i tijwa'ne. 9'Yijenisi pet pi iyonisi siojopo sek ji'wet'e, sekyi'i ti yamayisiji siojopo kia'iyo je isis, 'yina Pablo ijwiejiete'n jakayi. 10-11Sekyi'i ti ijiatayiji ti ti'yenats'e'm.
Pablo 'nes Rómaja
Najape kiwa we'lajas atejwa isia'm ti sek awak'i, ti akinieja'nijne. Akiniek'i siujlieja kasejkana tal Alejandríaja, ti sek yajap'eje'n ti wi'yitipat'ipi, siojowa tewitanajak'i puwa diosis jle' iyo'ate Castor, siupa jikiecha jle' Pólux. 12Awakieyi jlaja isi' jle' iyo'ate Siracusa, saka jlomas najape ti sek kas'wanjle'e, 13sekyi'i akinieja'nijne ti ajnayejayijk'i ki jikius, paj ti awakieyi'ijyi siujlieja ajnat jle' iyo'ate Regio. Siukia ti jlomaye'eje, yejwutije ki iniwuk, jiwekie'eja ti awaki jlaja Puteoli. 14Sekyi'i japo si'lijwas Sinia' jilis pet japok'ne japo je kaswe'en paj ti saka jlomas ijwienjli sikio' itij'we times tom'niji ti sek awak'i.
Kiak iyo ki si'niayi ti jiwekie'aja ti a'nesa Rómaja. 15Jlamp'an 'ne pajp'ank'i ti t'ijiets'e japo si'lijwas Sinia' jilis ti ja'nisa'ni, namat'ipi selia'm ts'e yi'i jlaja Foro de Apio, awaki jlaja In'ya'a Ji'wet Najape'eje'n, sek ani'wenajayi'iji napo ijia. Pablo, ti i'wina japoka si'lijwas, iyoye jinikanitiejayi pa Sinia', sekyi'i ti jijweye poye'eje. 16Ti awakie Rómaja, tokis jika anechiyas je isiwitayi ja Pablo, sekyi'i ti tijwankitaja ja tena'a, tokis ijwienjli na ti'yenkinaja.
Pablo iyo jlamtikie' yi'i jlaja Roma
17Jlampa jlomas najapeja kiwa tomk'i ti Pablo 'nes Rómaja, takajlunieyi siojopo Judíojos jlamt'iyijpe ti anechiyasas, ti sek ji'wet'e. Initaj jiwekie'e ti Pablo iyonayi 'ate:
—Ja 'najanayi pet ti lajatak'iyi paka iyo ka je 'esie ilia'm napo si'lijwas Judíojos, ni'ne ka niwakaye 'neje siupa iyot'iyipi papo saka kijilas mases, ka itie'yi ilia'm. Ti a Jerusalenne, sek senisi'i ti isimayisk'i'm, ti sekiajlisi japo Románojos. 18Japoka'ne siojopo ti si'yasis'ni ka itis iwo paka poye. Iyoyistaje'ni ka jikio' ilanisk'i'm, kajeyepa ti je i'winis paka itis iwo, je 'yu'we ka siliana. 19'Yina ti jitiej je ilienisk'i'm, sekyi'i a'yasane'ne pet ka soki 'ne Rómaja, ka sitiunije na saka anechiyas ka'ye'n siupa itis iyo, k'iejliyi pet pa janwonk'i ti jla'am.#Hch 25.11 Ijiate lajk'iyi paka itis ineyi ilia'm japo i'witijwas, siujlieja ajnat a'yi. 20It'imina ti 'aj'lase, ti awojonk'iye pet ka ini'wena jla'yi ka 'yakamtijniena. Siuti Israel jika kia'lists'e'm, ti po' siunie anejejwikink'iye, 'naka'ne ti it'imink'i siuniwa iyo ti sits'ijwana
21Yiyik'i wekie'e ja Pablo ti tamti, sekyi'i iyoyis'ne 'ate:
—Lajk'iyipa ka imp'esinikie' ka i'wina ilia'm ka tijliukts'e, ka intajle jana ajnat Judea, ka injwe'el siupa ates iyo, ni'ne ka poye paka Judíoja' ka inamti'ni ka k'iejliyeyi paka je 'esie ka woyi. 22Awoktajan pet k'iye ka ipi'yak siupa atankiujnieye jiwone, kajeyepa ti wikie'eyi ape'e 'na ajnat ti ijwela ka je 'esie siupa aka'neyasajnaye ink'ie'.
23Jakiak siojokia jloma ti yitinisi k'iye, ti 'loj japo Judíojos ti ijioyi'ni ja Pablo siupa yi'i. Yapijle'e ti yamtiyi k'iye japo i'nio' kiwa Sinia' jlamtis ti ijwi'il pa Sinia' jika anechijiayas. 'Yiyasane kiwa Sinia' jlamtis kajeyepa ti ijialaskintaja pet ka intant'iejesi pa Jesús, ti yijnapeje pa Moisés jika'neyasajnaye, siu'neje puwa injwejlanawos jilisajnat'ipi. 24Po' papo je takakiuni siupa iyo ja Pablo ti tamti, 'yina po'neje pet siupapo 'yakaja'ayi ti je isimits'i siukiwa iyo ja Pablo. 25'Yina ti je ijniul wita'm, jlampa iniuyeyis kisie'e. Pablo iyo'ne 'ate:
—Ijiatp'anejepe ti jlam je iyo siojopa Sinia' jikimet ti 'es ti iyo'ate, siupuwa jlamtis ti Sinia' jijwejlanik jiwo Isaías ti ijwilt'ijiampe pet papo astese'l, ti iyo'ate:
26“Maj joyi siunapo i'nio', sekjane'yi ka wonayijna'a 'ate:
'Wanjliyi ka ape'yaye, 'yina ja ke 'najanayi;
'wanjliyi ka 'yena'ni, 'yina ja ke a'wena'.
27Je k'ase ki iyo ni jlosik napo i'nio',
ip'ionk'i ape'e niwa jik'iot tiojwa'l,
jitiete kia'iyojliyi je 'alk'i ape'e,
ti je iyojonk'iye ka i'wenis, jla'yi ka impe'yayis,
ti je iyojonk'iye ka 'najanisi,
'nakayi ti ja ke inapilisk'i, ka ijwiejiete'n,” iyo ni Sinia'.”#Is 6.9-10; Mt 13.11-15; Jn 12.37-40
28Pablo yini'ne ape'e ti iyo'ate:
—'Esiji ka 'najanayi paka wonayi, siujlie'e injwajieti ti tajle pa Sinia' tijliuki siunapo i'nio' je Judíojos, napokata ti jank'iuye jla'am.#28.28 v 29 laja siojo iyo'ate: Ti Pablo yiyeyik'i ti kia'iyo, yama'ni, jlam iniewitisjli (28.28).
30Sek jla'a niwak Pablo jlamtis ti iyo jakiaka jloma. Times niwa najkapis 'wanjli wita'm ti Pablo sek yi'i, siujlieja 'wuk yikiajwe ti takat'i'ni ape'e. 'Es ti i'ye'n ilia'm siojopo iyo ka ijnoyi. 31Jlam ikatatjliyi ti iyo jlamtikie', ti ijwil pa Sinia' jika anechijiayas, jla'yi ti taka'neyasane pa Saka'niona Jesús ti Sijwajieti. Siupa iyoyi jlam k'ejma ti lajk'ipa ka intom'ni k'iye ti iyo jlamtikie'.
Currently Selected:
Hechos 28: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.