Hechos 2
2
Sinia' jikimet ti 'es yiyi papo Sinia' jilis
1Ti yiyet'iyipi siojopa jloma inlakijnieye jle' iyo'ate Pentecostés, wikie'eyi papo i'nio' Sinia' jilis initotisk'i wita'm. 2'Yakelitk'i papo i'nio' siupi iyo pi ipi'yayis ti tal poliyi iyo'ate na jlajwu ti wujwi pi jla'lap iyo. Itijwayiji'n kiajwe japa 'wuk siupi yiyits'i. 3Sekyi'i ti 'yakaja t'ipi siupuwa jwat jla'al 'yiniye puwa impajnatis ti ijwienjlijamk'i ape'e papo i'nio'. 4Sinia' jikimet ti 'es tipoyijits'i, sekyi'i ti ji'lija 'wenayeyi. Lapakawo ka kiak je iwo, ti jlam jla'am siojopa Sinia' jikimet ti 'es ti ji'lij iwijnamk'i, it'imina ti kia'iyo.
5'Yina po' siupapo Judíojos yiji jlaja Jerusalén, 'yina po'neje papo Judíojos ti yijijyi'n puwa ajnatis 'wenayi ti yapilisi jlaja Jerusalén ti yiyits'i, ti je paj ka leyi ti iyunitis pi Sinia'. 6I'nio' ijios ti ipi'yayet'iyisipi siupi iyo ti pesieje. Istieyeyi'i'ni paka jitienkiujnieye iwonisi kajeyepa ti ipi'ya papo i'nio' ti iyo siupi ji'lijis pet. 7Jnots'inayijits'i'ni papo i'nio', jlampa ininekiajlayisi ti ini'yasis ti iyo'ate:
—Te'eyi ¿me jet'e Galilea jlele 'napok siu'napo tamtits'ijin'ni? 8¿Tepat'e iyo ti 'yijene siukia si'lij? 9Siuti atajla 'niji yi'i jana Partia, 'nak awak'i. Siu'neje napo tajle jana Media, Elam kia'iyojliyi. Mesopotamia, Judéaja, siu'neje napo tal Capadóciaja. Siu'neje napo tal Póntojo, siu'neje napo tal Ásiaja. 10Frigia jlele, Panfilia jlele, siu'neje Egipto jlele, siu'neje napo tajlits'i siuniwa iniujwape'n pet jana Libia, ti je tojwape'n jana Cirene. Po'neje napo tal 'niji Rómaja. 11'Yina siu'neje napo ti ijiate ti Judíojose, siu'neje napo jlam iniwojwa'n jiwekie'aja Judíojosa'. Po' napo ijia tajla'm jana Creta, siu'neje napo tal Arábiaja. ¡Ji'wena', 'yejne'n, si'lij 'wenayeta lapakawo ti anipe'yaki 'yakaj iyo ki si'lij ti ijwilis siuniwa iyo ni Sinia' ti wuj ti isis!
12'Yakelit papo i'nio'. Je 'yaka paka jitienkiujnieye inojwatits'i. Jak je iyoyiji ka je ininekiajlisi, ti iyoyits'iate:
—¿Tepit'i iyo ti kia'iyo?
13Po' papo ijia iliakiyis ti iyo'ate:
—¡Ijiujme'n!
Pedro iyo jlamtikie'
14Sekyi'i Pedro takasitiet'ipi, kia'iyojliyi siojopo ijia itijwa'm sikioye ijwienjli tom'niji injlojwajnas, ka kia'iwo ka inilaki ti tamtiyet'ipi, ti iyo'ate:
—'Napo Judíojos, siu'neje ti asa'am ti as'wet jla'a Jerusalén, k'iuyek'imna'a siunie jayo ti jayamti. 15Siunapo jijwela' ka ijnojme'n, jlajmi woyeyi, je ijiujme'n. Kiliejie'e je tojk'iji. 16Ji'wenaye'ne siunie iyo, naka ni ijwilt'ipi pa Sinia' jijwejlanik jiwo Joel, ti iyo'ate:
17“Siunie jawo, siuniwa jlomas jantome jlaja, iyo pi Sinia',
jasia'yi ape'e wikie'eyi napo i'nio' jana isimet ti 'es.
Siunapo asles ayijnies, asles asejnia,
siunie janamtiyisi ya'm ti jantalk'i.
Siunapo aska jwemik japoye siunie ja ti'wenkinaja'm ti janeyis jitieyija'm.
Jijwejlikis ja tiwenaja'm pet napo kijilas.
18Jlampet napo ikawos, siunapo ayijnies jla'yi napo asejnia,
isimet ti 'es jasia'yi ape'e ka netiejenie'e janak jlomaye,
jawoyi jika'niyeja' siuniwa yamtis.
19Ja'winkina siuniwa ja'nakaj poliyi ti jankelitk'i napo i'nio',
jla'yi siuniwa ja'nakaj pet 'ne ajnat'e ti a'tisk'iji'n,
'woyis siu'neje ni jwat, ja ke jlasiye ni tosieja.
20Siunie kilie' ajnatiok jamp'one,
siunie we'la janwo'ate ni 'woyis.
Kiak jawo ka majletiejejna'a ka neyi janak Saka'niona jika jlomaye ti ja wujwa,
ti ja ke jlasiye ni jawo ti ja ti'wena.
21'Yina i'nio' na jantajne'n k'iye ni Saka'niona, nak janjwa'a.”#Jl 2.28-32
22Pedro yinat'iyi ape'e ti iyo'ate:
—'Yina k'iuyek'imna'a ti asa'am ti Israel jlele'ase'm, siunie jayo ti jayamti, ti jajwi'il siunie Jesús Nazaret jlele. 'Najanayi ti jlam ti lajk'ipa ka k'iejliyeyi paka Sinia' iwet'ianaja'm, 'yaka ji'wena' ni iyo ti ilisane niwak siuniwa isis tajle pa Sinia', ti kaskelit ti a'wena, siu'neje niwa a'wena ti a'tisk'iji'n. 23Je woyejliyi ti tekiajlaja'ase, kajeyepa ti pajk'i ta'a jlam pa Sinia' ti itime siupi janwone;#Lc 24.25-26 siupi jiwonayi ti jik'iejwata'yi japa cruz ti jiliana', ti jijliuyeyeje papo i'nio' siupapo lajk'iyi paka woyi, ti je isis. 24'Yina Sinia' iniujwa'n kisie'e ti tajle ni a'no', ijwiejiete ki iyo ni t'a'ti ti tajle ni jiliaye, kajeyepa ti siunie inlaye je ijlie'ne'ni pet. 25Siupa anechiyas David t'ipi ti ijwi'il ja Jesús ti iyo'ate:
“A'we'en ni 'Yaka'niona ti yi' ijiap,
t'as yi'pe ti to'm ijwiyeje,
ja ke k'iejliyeyi paka iwit'ia ka inek'i.
26Tempi it'imina ti jinikanitieyi po' ni ijiusik,
jla'am akelisienjli'ni, jlomas ti anejejwijyi'n.
27Ja ke siliyi'i pa a'no',
jla'yi ti ja ke e'nate ni 'yajwes ka insotieje, ni akawo ti 'es.
28Pajk'i ti jipayiji its'ioye siunie 'nayi tejeyi jana in'wasankiye.
Jampok'i ni inikanitieyi siuti jle' ijiap.”#Sal 16.8-11
29'Napo i'lijwas, ijiatk'i siunie jayo ti jajwi'il pa sitis t'ipi David, jla'am je k'iejets'i'ni ti 'ya'al. Jleli yik'i 'na siu'nie awak'i. 30David injwejlanik jiwojimpe, it'imina ti 'yijene ta'a pi iyone siupi jitieyiji, kajeyepa ti Sinia' ijwijla'm ti iyo'ate, “Jayone anechiyasa' pa janjwanjli napo ales ti jantal aswa'am.”#2 S 7.12-13 31'Yinit'iyijpe pa David ka in'we'en ta'a siupi Sinia' iyo kanwo. 'Yina ti iyo'ate:
“Ja ke siliyi'i pa a'no',
jla'yi ni 'yajwes ja ke e'nate ka insotieje.”
Pak ijwi'il pi Injwajieti ti Sinia' jijliujwanik ti jano kisie'e ti jantajli puwa a'no'l.
32“Je int'ayeyiji'n jla'am ja Jesús ti Sinia' iniujwa'n kisie'e 'neyek'i, 'yina sampe ti a'wena, jlam je iyo ti ijiatk'i. 33Jak je iyoyiji'ni paj ti Sinia' yamayi pijia'm, ti yi'neje'n ni ji'wet, ti itiujmat jijweyeje, 'yina yikiajle jana jikimet ti 'es. Sekyi'i ti isiaye sitipe'e, yame ki iyo niwa jlamtis, 'naka'ne siunie ji'wena' jla'yi ti jipe'yaye. 34David je jla'am ka nek ka napi poliyi, jla'am ti ijwi'il ti iyo'ate:
“Saka'niona iyone'ate pi 'Yaka'niona:
Wejen'ne ijwiyeje,
35sipo', jayi'n asatis kiajwe napo akojwas.”#Sal 110.1
36“It'imina ti asa'am Israel jlele'ase'm, 'esiji ka 'najanayi, siunie Jesús ti jik'iejwata'yijpe jana cruz, Sinia' iyojwa'n anechiyasa', jla'yi ti jijliujwanik ti Injwajieti.”
37Siupapo nojweje, ti ipi'yayeyis ti kia'iyo, je jlase' pi iyo ti iyo jijliak'aliye. Ijioyisi'ne ja Pedro, siu'neje japo injlojwajnas, ti i'yase'n ti iyo'ate:
—I'lijwas, ¿tepat'e ka iniwonataja?
38Pedro isiujlie papo ti iyo'ate:
—Woye asosikis ink'iejyisa', janwopi pa ka ijiatayi, pak tiniejienajape, ti janetijnapeje ni Sijwajieti Jesús jle', ja 'nakayeyijna'a ka Sinia' inetiajnat niwa askeyis iyo. Sekjane'yi ka wena'asemna'a jana Sinia' jikimet ti 'es. 39Asa'am ti askimeta siuniwa ijwi'il ni Sinia', asles kia'iyojliyi jikimet, siu'neje napo i'nio' ji'wetis tose, kayot'itie 'ate siunapo Saka'niona Sinia' iyo ka intane.
40Pa'a ja Pedro ti tamti, sekyi'i ti kiak t'ipa iyoyeyipi ti ijliuye papo:
—¡Tajlayi napok i'nio' ti je isis! ¡Nijwajieta'!
41Ijiatjliyi siupapo je takakiunisi siupi iyo ti tamti, papok tiniejienajan'ne. Pak siupa jloma ti tres mil papo i'nio' ti t'opiyiji papo Sinia' jilis. 42Ilisanisiji siupa jika'neyasajnaye siojopo injlojwajnas, inik'isajasi siupuwa jikijmatis, yamjliyi ti iyoyis t'ajlayeja', jla'yi ti inikijwanis ti ti'yekiujni'n.
Iyot'iyipi siupapo inia'an Sijwajieti kawos
43Wikie'eyi papo i'nio' jnots'ijnits'i siupa iyo japo injlojwajnas, ti je yi'i japa ka jlomaye ka ti'wena siupuwa iyo ti a'tisk'iji'n, siu'neje puwa ti inia'an k'iye siupuwa ja'nakaj. 44Wuj ti ijniul wita'm siupapo Sinia' jilis, inik'isajasi siupuwa jikijmatis.#Hch 4.32-35 45Iyot'iyipi pa iwi'in pa jika ajnat, wikie'eyi siupuwa i'wi'in jikijmatis iwin'ni, japak iwijnamk'i siupapo jwajla'a je i'win pet. 46Kiajatak'i'ni puwa jlomas initotk'i'ni wita'm kiajwe japa Sinia' ji'wuk yi'i japa Jerusalén. Ni'ne ti yinisi 'wet'e siuti ti'yekiujni'n inikijwanisie. 'Yina siuti kiak iniwonisi sekyi'i jijweye poye, pakata jla'am ti 'yuyits'i pa 'es ti iyoyisi. 47Jla'am iyunitisjli pa Sinia', wikie'eyi papo i'nio' ti ijiunit, ti isis. Kiajatak'i'ni puwa jlomas Sinia' jla'm iyomjliyi'iji papo jilis, ti tijwajyi'n.
Currently Selected:
Hechos 2: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.