1 Timoteo 3
3
Kiak jota wo siunapo ti ijwienjli yi'ne pet ti i'yena napo Sinia' jilis
1Ijiatk'i siu'nie ti po' ni yimi'n ka jikijmaye kiak iwo ti i'yena napo Sinia' jilis, 'yina wuj ti 'es ni itiliaja. 2Jak je iyoyiji ti jikijmaye kia'iyoyi ni i'nio', 'esiji ka ini'ye'en ni siunie iniwoneje, 'nakayeyijna'a ti ja lajak'ipa ka ti'yenaja. Janjwankit siojopa jik'iemjla. Jlosik japoye ni i'nio'. Ti k'iejliyi pa jlam je iyone 'ate ka woyi, 'wenajliyi ti wuj ti i'ye'en t'oniye 'es. Jla'yi ti i'ye'n ilia'm napo ijioyi. Naka ni i'nio' ti 'yijene ti 'yiyasa'n napo ijia. 3Je 'yata ni i'nio', jla'yi ti je naka ni siunie ti inilanejen'ni napo ijia, 'wenajliyi jla'am ti takap'ijliuski. 'Yakama ni i'nio', je itiliaja jana wikiniet'aj. 4Naka i'nio' ti 'yijene ti i'yena ni ji'wet, jilis its'iuye, kajeyepa ti iyo lajaye. 5Kajeyepa ti siuti janakaye siunie je 'yijene ka 'yena ni ji'wet, ¿tepa jawo ka 'najane paka wone ka 'yena napo Sinia' jilis?
6Ijiatjliyi siunie iyo ka 'yena napo Sinia' jilis, je ti'yenajayi'n siunie i'nio' je pajk'i ti ininekial. Iyojonk'iye ka nakaye siunie ti paj, kajeyepa siunie ti je paja ni inamtik ent'a janitonit. Jawoyena 'ate pi imosik siupi iyo pi jiwet'ia ti tena'a. 7Janakaye siunie i'nio', ti siunapo je iyoyi ni inamtik jank'iuye kajeyepa ti jawoyis lajaye. Ja'nakayi ti ja ke tiwet'ianaja ts'iji, ni'ne ka nojwa'm jana jikatsala ni imosik.#Tit 1.6-9
Siunie jota iwoyi siunapo iniuyeje pa Sinia' ni jikijmaye iyo
8Kia'iyojliyi pit siunapo iniuyeje pi Sinia' pi jikijmaye janakaye siunie i'nio' ti t'oniye 'es, ji'lija je itimisiete, je 'yata, ni'ne ka inteliaja ka inkajli jana wikiniet'aj. 9Janakaye siunie ti ja ijiatayi ti janki'me siunie iyo ni ijiatk'i ni kas'wenkinaja, siunie ti je akakiunieje, jla'yi ti lajk'ipa ka t'ajwejli ineyiji pa ka k'iejliyeyi. 10Jana'an ka ti'yena siuti ja ijiatayiji ti ja lajak'ipa paka jitis inwo. Siuti ja lajak'ipa nak 'es k'iye ka kiak tiwonaja ka inoyeje pi Sinia' ni jikijmaye.
11Kia'iyojliyi napo asejnia ti iniuyeje pi Sinia' ni jikijmaye ja ke jiwekie'eja jana i'nioki. Janapokaye napo ti je yimi'n siuniwa ye'laja jiniliaja, je nesi'li'yi pa k'iejliyi, 'wenajliyi ti i'ye'en. Je tak'emiyeje wek siupi k'iejliyi ti iyo ka woyi.
12Jayapiliji'ijyi pet ti jajwil napo ayijnies; ja ke nakaye siunie jijwa'yis 'loj, jla'yi ti ja'najane ka 'yena papo jilis, jla'yi pa ji'wet. 13Siuti 'es pi jikijmaye ti iyoyi napoka, siunapo ijia Sinia' jilis ijiunitieyisi pet, 'yina ijiatayi pet ti jijweye po' ti iyoyisi jlamtikie' pa Sijwajieti Jesús.
Jitis iyo ni sitienkiujnieye ti 'es
14Awotajank'iye ka je pajayinie'e ka ijio'wa, 'yina ajlo'wa ta'a 'ni ip'isinik, 15kajeyepa 'lojwinie'e ka je simajli. 'Yina je sikiwit'a'm siunie iyo ni sikijmaye, ti Sinia' ji'wet jlelets'e'm, ka iyot'e 'ate, Sinia' ti je paj ka netia'n jilis. Jlam ti yints'e'm ka 'yitie pijia'm naka ni siunie ijiatk'i jla'yi ti akiejek'i ape'e. 16'Yaka ti je jlase' ki iyo ni siunie je akakiunieje. Sinia' 'yakajanitts'e'm sa'am ni siunie ti 'es, ti iyo'ate:
Sijwajieti ti inikajanitie, iniwojwa'n i'nioye,
jlampet ti Sinia' iniujwata kisie'e, ti tajli ki a'no', 'yakaja ape'e pet ti Saka'niona,#Rom 1.4
injlojwajnas poli jlele i'wi'in,
sekyi'i ti tijwelajayi pet ape'e wikie'eyi napo i'nio' ti yi' ape'e 'ni ajnat.
Ijiate je takakiunisi,
siuti tikiniejayi 'niji poliyi, 'yina sekyi'i ti isima ilia'm, siunie 'es ti tiwunitie.
Currently Selected:
1 Timoteo 3: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.