1 Corintios 15
15
Sijwajieti iniu kisie'e ti tajli puwa a'no'ol
1I'lijwas, 'nakayi awotajank'iye ka ataj enayi'ni 'ate siukia Sinia' jika'niye ti ijwi'il jana injwajieti, ti awoyi pet yamtikie'ase. 'Yina 'naka'ne 'ni siu'nie ti jikimape ilia'm, siu'nie ti i'netiets'i pijia'm. 2Siuti ja ke aleyeyi niwak Saka'niona jlamtis siuniwa ti awoyipe yamtikie'ase, ijiate jijwaye. Jlampet ti jaleyeyi, kiak ja ke awoyeyi siunie awo'nase, kajeyepa ti je ijiate ka ijiatayiji ka atankiunieyi pi Sinia'.
3Ta'ape ti 'eyasanayi siunie ti kia'iyo akimpe ilia'm. 'Yina nak 'eyasanayijpe: ti Sijwajieti jla'am ti iniwe'n ape'e niwa sakeyis, pakayi ti 'ya'al, iyo niwa inamtis t'ipi ti yi'i ni ji'wet.#Is 53.5-12 4Ti kia'iyojliyi niwaka 'neje inamtis ti ijwi'il ti titijik k'iye, sekyi'i jlomas najape iniu kisie'e ti tajli pi a'no'.#Sal 16.8-10; Mt 12.40; Hch 2.24-32 5Siu'neje ti inikajanitia'm ja Pedro,#Lc 24.34 sekyi'i ti tomayik'i japo itijwa'm ni sikioye times tom'niji t'eyasajnas ti inikajanitia'm.#Mt 28.16-17; Mc 16.14; Lc 24.36; Jn 20.19 6Paj'ni ape'e kia'iyo ini'wenkinaja'ajme japok i'nio' ti 'yakamt'i ape'e japo quinientos (500). 'Yina pajk'i ti 'yajle'n papoka i'wint'iyispe, 'yina je pini 'neje siupapo 'wasajne'n siu'nie jloma. 7Paj ti kia'iyo init'i'wenkinaja'ajme ja Santiago, sekyi'i japokayet'ijyi pet injlojwajnas ti ini'wenkijna'm.
8Sekyi'i atome'ni pet jlaja ti kia'iyo ini'wenkink'i'm, awoye 'ate siunie kia'le ti je wakalta'aja ti yiji'n.#Hch 9.3-6 9Ya'am ti je ts'esijiyi, je awoye 'ate siunapo injlojwajnas, ijiate ti je ani'nojonit'iyi ka yi'i naka kayo injlojwanikiek'i'm, kajeyepa ti ijiate wuj ti atape ilia'm napo Sinia' jilis.#Hch 8.3 10'Yina lapakawo ti Sinia' ijiate ti sip'elisi'n it'imina ti awo injlojwanik'i'm; 'yina je ka sip'elisine wek, kajeyepa ti ya'm ijiate ti akijme'n. Aka'm ape'e siunapo ijia injlojwajnas, kia'awo akijme'n, 'wanjliyi je yamata ka yama siu'nie awoyi, Sinia' jikap'ijliuskiye naka jla'am ti iyoyi siu'nie awoyi ti akijme'n. 11Siunie ti ijiate ti laja po', je ka nakaye ka ya'm ijiatayi ka isijmaye poye, ni'ne ka napokaye ijia, 'yina jla'm ijiate wek jla'am siunie ti ajwela ni inka'niye ti 'es, siunie ti je kakiunieyi.
Siunapo iyoyi ni inamtik janok'i kisie'e ti jantajli niwa a'no'ol
12Jlam'ne siunie saka'niye, ti ajwela pi Sijwajieti ti iniu kisie'e ti tajli pi a'no', 'yina ¿yot'iyi'ni ti po' siunapo ti asa'am ti jijwela' siunapo 'yajle'n je iniuk'i kisie'e ka intajli ni a'no'? 13Siuti kiak iyo napoka 'yajle'n je iniuk'i kisie'e, tepa jawo ka kiak je iwo pit pa Sijwajieti. 14Jlamt'itie ka kia'iwo ka Sijwajieti je ino kisie'e ka intajli pi a'no', 'yina siunie awoki samtikie' kia'iyo lajta pet lajaye, siu'neje ki iyo ni sitienkiujnieye ti 'es. 15Siut'itie ka ijiatayi kiak iwoyi ka je inok'i kisie'e napoka 'yajle'n ka je intajli ni a'no', 'yina siuti sa'am ti akinieje naka ti ajwela 'yina jlam kask'emijieta wek. Jlam'ne ki iyo ni awoki ti je kaskajla ti ajwela ti ijiatk'i, naka ti Sinia' iniujwa'n kisie'e pi Sijwajieti. 16Kajeyepa, siut'itie ka jet'i inok'ipe kisie'e siunapo 'yajle'n, 'yina Sijwajieti 'wena je iyota pet, pajk'i ka je ino pet kisie'e; 17ka kia'iwo ka je ino kisie'e pi Sijwajieti, 'yina siunie astankiujnieye ti 'es, kia' iyotaja pit lajta lajaye. Kia'iyojliyi je tiajlatieje ni aske'. 18Siuti kiak jiwoyeyi, siupapo 'yalt'ijyimpe ti kia'iyo je 'yakakiuyis pi Sijwajieti, 'yajle'n ti 'yajlene. 19Jlam ka ijiatayi ka jla'akataja siujlie'e si'wasankiye jli yits'e ti awak'i ape'e 'ni ajnat ka sinijijwiye iyinaja ti ak'iukie pi Sijwajieti, nak ijiattajaja ka iwieki ni sip'elisieye ka kia'inwo.
20'Yina ijiate ti Sijwajieti iniu kisie'e ti tajli pi a'no', 'yina jla'am ti iniane k'iye siunapo 'yajle'n ti kia'iyo janok'i kisie'e ts'ijiye. 21Iyoye'ate siunie ti i'nio' ijwienjli siupa ti it'imina ni ajnat ti siunie inlaye i'yakajna'm, 'yina kia'iyoyiyi pet naka, ti kia'iyo ijwienjli pi i'nio' ti it'imina ti siupapo 'yajle'n iniuk'i kisie'e ti tajli ni a'no'. 22Iyoye pet 'ate pa Adán t'ipi ti wikie'eyi napo i'nio' jiliaye iniuyi wita'm ti jla'am ti tajle, 'yina kiak iyo pit ni Sijwajieti ti wikie'eyi napo i'nio' siunapo its'iuye ji'niayi janjwanjli ti jantajas jana ji'wasankiye ti t'o'n.#Rom 5.12-18 23'Yina jansesk'i siunie janwoyi niwaka. Siunie iniane paka Sijwajieti; siunie tomik'i naka ti Sijwajieti janapimet, sekyi'i napokaye pet siunapo jika kia'lis jla'am. 24Sekyi'i nakaye pet ti iyo'ate yiyi ni jlaj ni ajnat, sekyi'i ti nakaye pet ni siunie ti iyo'ate ka Sijwajieti intat tajak'i isia'm napoka siunapo iniwojwa'n anechiyasisa', siu'neje niwa iyoyisi, siu'neje niwa injweyejes ti yiji ni poli, jla'yi ti janekial ni jika anechijiayas ni Sinia'. 25Jana'an ti Sijwajieti jane'yiji'n jana ji'wet ti jawo anechiyasa', paj ka kia'iwoyenie'e siunie jawoyi ti Sinia' janen kiajwe siunapo jikojwas.#Sal 110.1; Ef 1.20-22; Heb 8.1; 10.12-13 26Siu'neje ni jitiejiejwa ti t'on pijiame naka ni inlaye. 27Siuniwa inamtis iyo'ate, “Sinia' jla'am yin kiajwe niwa jisietis wikie'eyi niwa wask'i'nelaja.”#Sal 8.6 'Yina siuti iyo'ate, “wikie'eyi niwa wask'i'nelaja”, 'yakajk'i ti Sinia' je Jla'am ka ine kiajwe pi Sijwajieti, kajeyepa ti Sinia' jla'am ti yin kiajwe wikie'eyi niwa wask'i'nelaja. 28Siuka kia' iwotajanie'e ka pajlatatajna'a niwa wask'i'nelaja ka ine kiajwe ni Sijwajieti, sekjane'yi siunie Sijwajieti, ti Jla'am ti Sinia' Jlas, jlama ti ja'no kiajwe ni Sinia', jlam ti yin kiajwe wikie'eyi niwa wask'i'nelaja. Sekjane'yi ka ijiatayijijna'a ka ijnok'i ti jla'am ti jikijmatis.
29Po 'neje siunie jikiecha ti jajwi'il. ¿Tepi iyo siunapo ti ininajie'n ape'e napo 'yajle'n, tent'i siupa ijwi'il ka 'esieyi ti kiak iniwonisi? Siuti ja ke inok'i kisie'e papoka 'yajle'n, ¿yot'iyi'ni ti ininajiejne'n ape'e siupapo 'yajle'n? 30'Yina ¿tepat'e awoki ti sa'am? ¿Yot'iyi'ni niwa jlomas ti awaki ni siwet'ia?
31I'lijwas, niwa jlomas ti ajyi ni iliaye, yot'iyi'ni ka ijwik 'naka, ti wuj ti ate'mase, ti asa'am ti jiwenak'i'm siunie inikanitiejeye iyo, ti kasjwanjliyik'i ti awo pi iyo ni Sijwajieti Jesús ti Saka'niona. 32Je ijwienjliyiji ka je itie'ni ilia'm siunapo i'nio' yi' Éfesojo ti iyo'ate niwa k'iwajlas ti jwesis. Siut'itie ka ijiatayi ka je inok'i kisie'e siunapo 'yajle'n, ¿tent'i siupa ka 'yakajli, siukia kia'iyo ka je itiu'm iliame naka? Jlam je iyotaja siunapo ti iyo'ate, “¡Nisiama ja'yekiunie, jla'yi ti ja'yaki, jlam'ne siojona kajlomata ja kasno'we!”#Is 22.13
33Ká akamats'iji'n. Iyo siuniwa inamtis ti po' pi iyo'ate, “Siunapo 'najajnajwas ti je i'nio'l, napok 'yakajyi'n niwak isis inkeyis tiwonaja.” 34Apilieyi siunie jiwonayi ni asosik ti 'es, 'yina leyets'i siunie asoski'la, kajeyepa ti pot'e siupa ti asa'am ti je itiant'iejeje pa Sinia'. I'lij kiak ke iyone pa ti awojonk'iye ka 'yajwejlanatak'iji wita'm.
¿Tepat'e ja t'isie'n jawo siupapo i'nio mases ka inotiek'ina kisie'e?
35Ent'a japoye pa jawo'ate, “¿Tepat'e janwo siupapo i'nio mases ka inotiek'ina kisie'e? ¿Siupa t'isie'n janwo?” 36¡Ijiat ti 'ne'lia wat siupa ka kiak iwo ka i'yasane! Siunie i'nio' ti takawijna'n, siuti itietatajak'i jana jlaki' jana inseliaki, e'tieje ti 'nesk'i pijia'm kajeyepa ti netianataja'm siojona t'aj. 37Siojona ti t'otie isia'm je janak inwomki ka jla'm iwo jiwek'iate ka 'nes pijia'm, 'wenajliyi jla'am siojona jlo' janak tajla'm, siuti 'nesatak'i pijia'm ti janaka ipiata tiok ni'ne ka ne'yi japa inwomkiye ka jloye. 38'Yina ti jla'am pi Sinia' ti ipiujunit, iyone pi iyone japa inseliaki ka k'iejliyeyi, jak je iyoyiji siojopa jlo' ti netianataja'n ajnat kiajwe 'nesa pijia'm, 'wena je ijio'we siupa Sinia' iyone ka k'iejliyeyi.
39Je wikie'eyi kanjwanjlik'i niwa wask'i'nelaja. Siunie t'isie'n ni i'nio' 'wenayi pet, siuniwa pini' yi' ape'e 'ni ajnat, siuniwa ajwejnas, siuniwa si'yus, wikie'eyi ti t'isie'n 'wenayik'i. 40Siuniwa ijia kiak iyoyiyi pet ti po' siuniwa wask'i'nelaja yi' poliyi, po'neje siuniwa yi' ajnat'e. 'Yina siunie k'iejliyi ti 'es siuniwa yi' poliyi je iyo'ate pet ni k'iejliyi siuniwa yi' ajnat'e. 41Siunie jla'al ni kilie'e 'wenayiji pet, je iyo'ate ni jla'al pet ni we'la, siuniwa katese'l kia'iyojliyi. Ijwil ti iyo ti 'najliyeta niwaka katese'l, 'yina jla'al ijwienjliyik'i.
42'Yina kiak jawoyiyi pet siupapo i'nio mases, ka kia'iwotajanie'e ti jantajli pi a'no'. Inia'an ti titijik k'iye siunie je t'o'n; siunie ti jano kisie'e, naka pet siunie ti ja ke i'nal ka paja. 43Siunie ti titijik k'iye laj lajaye; jlampet ti iniu kisie'e, nak jiwunitieyi po'. Siunie ti titijik k'iye laj jit'iuniye; jlampet ti iniu kisie'e, nak jijweye po' pet. 44Siunie tip'ona'a ti inlesanik; ti jano kisie'e Sinia' jikimet japak jawo ji'wasankiye pet. Siuti po' siunie jiwats'o, 'yina kia'iyo po' siunie ink'ie' ti tajli pet janak Sinia' jikimet.
45Siuniwa Sinia' jlamtis ti yi'i ni ji'wet iyo'ate, “Siupa i'nio' ti 'nelanjie'ajat'ipi, pi Adán, pak inlesanik ti ji'wasankiye po'”. Jlampet siupa Adán siupa 'wanjli isia'm, pak tajle pet siojopa Sinia' jikimet, ti iyo in'wasankiyeja'. 46'Yina je ka nakaye ka ina'an siunie inlesanik ti tajle janak Sinia' jikimet. Siunie inia'an naka siunie inlesanik ti jiwats'o. Sekyi'i ti nama pet siunie inlesanik ti tajle pet jana Sinia' jikimet. 47Siupi i'nio' ti 'nelanjie'ajat'ipi 'yina tajle ni ajnat, 'yina je 'wena taj'le 'neje ti tiwokieyi i'nioye.#Gén 2.7 Jlampet siupa i'nio' ti tomayi pijia'm, tal poliyi pet. 48Siunapo i'nio' ti tajli pit 'ni ajnat, pak ijwilk'i siupa ti kia'iyo ti titiajlaja'm pi ajnat ti tilisanaja. 'Yina kiak iyo pit siunapo ji'wet ni poli, pak ijyiwitk'i siupa i'nio' ti tal poliyi. 49Siuti sa'am ti soniyejwa' siupa i'nio' t'ipi ti tajle ni ajnat, 'yina kiak jayoki'ni pet siupi i'nio t'ipi tal poliyi ja soniyejayi wita'm pet.
50I'lijwas, siunie awo ka 'najanayi naka, ti siunie i'nio' ti jiwats'o ja ke ijnoyi ni Sinia' jika anechijiayas, jlampet ni siunie ti je t'o'n je 'wet siunie ti ja ke paja ka 'na'al. 51-52'Yina 'yena siunie Sinia' je 'yakajanitk'i ti 'yakajanitk'i'm ya'am: awo'ate, ja ke kaswikie'eyi ti jaliki 'ni ajnat. Jawo'ate iyo ni i'nio' ti i'wisi'n niwa jitiase', ti je 'yakaja pi iyo ti i'wisi'n, ka jla'm iyokiena wek 'ate siupi ja kask'iejliyi ti ja ke iyok'iate siupa paj ts'isie'n. Pakayi ti ja pesiejayi siojopa 'woso' trompeta ti japakatajayiji ti ja pesiejayi. Sekjane'yi ka inoyek'ina'a kisie'e siunapo i'nio mases, ja ke inekiajlayi'ina'a ka wo'ate ti iliyi 'ni ajnat. Ts'isie'n ja ke iwoyena'a 'ate iyo ti 'nelanjie'e, 'wena ja kask'iejliyi.#1 Ts 4.15-17 53Siuti sa'am ti inlesajnats'e'm ti je kast'o'n ja kas'wujienaja siunie t'o'n, 'yina siunie ts'isie'n ti jlaj po' ja ti'wujienaja siunie ti ja ke paja ka netia'n.#2 Co 5.4 54Ka kas'wujienajtaje siunie ti t'o'n ti sa'am ti je kast'o'n ti inlesajnats'e'm, siu'neje ka ti'wujienajtaje siunie ti je paj ka 'na'al niwa ts'isienis, sekjane'yi ka inkajak'iyijna'a ti yiyi siunie k'ie ti iyot'iyipi niwa inamtis, ti iyo'ate, “Titietaja isia'm jakia 'najlati, lajk'ipa.”#Is 25.8
55“Am ti 'najlati'a'm, ¿tepi ijiojwi pi ajweye pi jijwel ka akients'e, ti ja kastatek'i isia'm?
¿Tepi ijiojwi siupi ajweye, ti jakients'e, ti jijwel ka kaslaki siunie anis?”#Os 13.14 56Siojona 'najlati iyoyi jlanisie' siunie inke' ti je 'es, ti 'yiti'ni siwa'm, 'yina siunie ti iyo jweyeja' ni inke', naka siunie Moisés jika'neyasajnaye.#Rom 5.12-13 57¡'Yina ijiatayi wek ya'am pa Sinia' ti iyo sijweyeja', it'iminayi pet ti atataja isia'm naka, ka lajak'i pet pa Saka'niona Jesús ti Sijwajieti paka ti kasts'esi!
58I'lijwas ti yimijna'yase'm, tempi it'imina ti kiak awo'nase, 'esiji ka kiajatajak'i'ni niwa jlomas ti jawoyeyi ká aleyeyi, ja kat'ajayi pet ti jani'netie'yi siunie ti jiniuyeyeje ni Saka'niona. Jlam'ne 'najanayi pi jiwonayi siunie askijmaye ti jiwoyeyi ti asa'am ti Sinia' jilists'ase'm ti je wekie'e, laja po'.
Currently Selected:
1 Corintios 15: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.