MARKA 16
16
Thawhkikna
(Mat 28:1-10; Luk 24:1-12; Joh 20:1-10)
1Sabbath ni a bei khit ciangin Magdala khuami Mary, James nu Mary, le Salome-te in Jesuh’ luang a va zut nadingun paknamtui a va lei uh hi. 2Nipi ni zingsang tung nisuah phetin hanah a pai uh hi. 3Amaute khatlekhat kikum uh a, “Han kongvang hukna suangtum kua’n hong likkhiatsak ding ahi hiam?” a ci uh hi. 4Tua laitakin a khuadak uhleh a suangtum a kilikkhia khinsa-in a mu uh hi. (Tua suangtum a gol mahmah khat ahi hi.) 5Han sungah a lut uhleh, a taklam pang uhah, puanpak a silh tangval khat a tu mu uh a, lamdangsa-in a lau uh hi.
6Tua tangvalpa in, “Lamdangsa kei un. Singlamteh tungah a kithat Nazareth khuami Jesuh na zong uh hi. Amah kithokiksak khin a, hih lai-ah om nawn lo hi. Amah a kisialna mun hong en un. 7Tu-in pai unla, Peter le Jesuh’ nungzui dangte kiangah hih thu va gen un. Note tungah hong gensa bangin Galilee gam amaute mai-ah pai hi; tua lai-ah amah na mu ding uh hi, ci hi, ci un,” a ci hi.#Mat 26:32; Mrk 14:28. 8Amaute in lamdangsa-in lau uh ahih manin han panin taisuak pah uh a, kuamah dang kiangah hih thu gen lo uh hi.
Magdala khuami Mary tungah Jesuh Kilang
(Joh 20:11-18)
9(Sihna panin Jesuh a thawhkik khit ciangin ama sung pan dawi sagih a hawlkhiatna, Magdala khuami Mary tungah Nipi ni zingsang tungin kilang masa hi. 10Tua nu zong hong pai-in a dah a kapin a om Jesuh’ lawm luite kiangah hih thu a va gen hi. 11Ahi zongin Jesuh a nuntakna thu le tua nu mahmah in a muh khitna thu a genna a zak uh hangin, a thugen um zo lo uh hi.)
Nungzui Nihte tungah Jesuh Kilang
(Luk 24:13-35)
12(Tua khit ciangin khuapi panin khuaneu-ah nungzui nihte a pai laitakun amaute tungah a mel tuam khatin Jesuh kilang hi. 13Hih tegel zong kileh kikin a lawm dangte uh kiangah gen uh a, ahi zongin amau’ thugen, na um lo uh hi.)
Jesuh in Sawm le khatte Sawl
(Mat 28:16-20; Luk 24:36-49; Joh 20:19-23)
14(Tua khit ciangin a tawpna-ah, an a nek laitakun nungzui sawm le khatte mahmah kiangah a kilang hi. A kithawhkiksak khit ciangin amah a mu mite’ thugen um lo uh ahih manin a lungkhauhna uh le a up lohna hangun amaute a taii hi. 15Tua khit ciangin amaute tungah, “Leitung khempeuhah note pai kawikawi unla, mi khempeuh tungah Lungdamna Thu na hilh ta un.#Sawl 1:8. 16Lungdamna Thu umin tui a kiphum mi peuhpeuh in hotkhiatna ngah ding a, a um lo mi peuhpeuh in mawhsakna thuak ding uh hi. 17A um mite tungah hih vangliatna limte kipia ding hi: Keima hangin dawi hawlkhia thei ding uh a, pau dangte pau thei ding uh hi. 18Gul a lawn’ hangun bangmah ci lo ding uh a, gu tui a dawn hangun zong bangmah ci lo ding uh hi. Cinate tungah a khut uh nga ding uh a, cinate dam ding uh hi,” a ci hi.)
Vankahna
(Luk 24:50-53; Sawl 1:9-11)
19(Tua bangin Topa Jesuh in amaute tungah thu a gen khit ciangin vantungah kilato-in Pasian’ taklamah a tu hi.#Sawl 1:9-11. 20Nungzuite zong mun khempeuhah pai-in thu a hilh uh hi. Topa in zong amaute’ nasep seppih a, a thuhilhnate uh man hi, ci-in a lahna-in amaute tungah vangliatna limte a pia hi.)
Currently Selected:
MARKA 16: TDB
Highlight
Share
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.