LUKA 2
2
Jesuh’ Suahna
(Mat 1:18-25)
1Tua hun laitakin gam tampi a uk Sisar Augustas in ama ukna gam sung mi a phazah a kitheih nadingin mi khempeuh min sazian a kilak nadingin thu a pia hi. 2Kuirinias in Syria gam a uksawn hun laitakin hih bangin mi phazah kisimna thu hong piang hi. 3Tua ahih manin amau khua ciatah min pia dingin mi khempeuh a pai uh hi. 4Josef zong David’ suante khat ahih manin Galilee gam sung Nazareth khua panin David’ suahna khua ahi Judea gam Bethlehem khua-ah a pai hi. 5Tua bangin min sazian kikhumsak dingin a pai ciangin tenpih dingin zuthawl a piaksa a lawmnu Mary tawh a paikhawm uh hi. A lawmnu naupaii hi a, 6Bethlehem khua-ah a tam sungun a nausuah ding hun hong tung hi. 7Zintun nading mun dang khempeuh mi dim khinta ahih manin ganbukah tung uh a, a tacil ahi ta pasal khat nei-in, puan tawh tunin gan annekna kuang sungah a sial hi.
Tuucingte le Vantung Mite
8Tua hun laitakin gamlakah a tuuhonte a giahpih tuucing pawlkhat a om uh hi. 9Amaute kiangah Topa’ vantungmi khat hong kilang a, Topa’ minthanna vang in amaute hong taan ahih manin a lau mahmah uh hi. 10Ahi zongin vantungmi in, “Lau kei un. Mi khempeuh a lungdamsak ding thuthak hoih khat note a’ ding ka hong puak hi. 11Tuni-in David khuapi sungah, note a hong honkhia ding Khrih Topa a suak hi. 12Amah na theih nading uh a lim hih bang hi ding hi: Puan tawh kitun naungek khat, gan annekna kuang sungah a kisial na mu ding uh hi,” a ci hi.
13Tua khit phetin tua vantungmi tawh vantung mihonpite thakhatin hong omin Pasian phatna la sa uh a,
14“Van a sang belna-ah a om
Pasian’ min thang hen la,
ama pahtak leitung mite tungah
nopna om ta hen,” a ci uh hi.
15Vantung mite vantungah a ciahkik khit uh ciangin tuucingte in, “Bethlehem khua-ah pai-in, Topa’ hong gen hih thupiang va en ni,” a kici uh hi. 16Amaute nawhpai mahmah uh a, Mary le Josef le gan annekna kuang sungah a kisial naungek a mupah uh hi. 17Tua bangin naungek a muh uh ciangin, vantungmi in amaute kiangah hih naungek tawh kisai thu a gente a gensawn uh hi. 18Hih tuucingte’ thugen a za mi khempeuh in lamdang a sa uh hi. 19Mary in ahihleh a lungsimah hih thute ciamtehin a ngaihsunsun hi. 20Tuucingte zong ciahkik uh a, amaute tungah a kigensa bangin a zaksa le a muhsa uh thute hangin Pasian’ min a phat uh hi.
Vun A Ki-atna le Minphuahna
21Naungek a vun a ki-at ni hun nipikal khat a cin khit ciangin, amah a kipaii ma-in a min dingin vantungmi in a piaksa ahi Jesuh, a min dingin a phuak uh hi.#Siam 12:3; Luk 1:31.
Jesuh, Biakinn-ah Apna
22Moses Thukham sungah a kigelhna tawh kizui-in Josef le Mary a kisiansuah ding uh hun hong tung hi. Tua ahih manin Topa tungah naungek a ap dingin Jerusalem-ah a paipih uh hi. 23Bang hang hiam cih leh Topa’ Thukham sungah, “Ta pasal masa peuhmah Topa tungah ki-ap ding hi,” ci-in kigelh hi.#Pai 13:2,12. 24Topa Thukham sungah a kigelhna tawh kizui-in biakna-in vakhu nih ahi a, kawl vakhuno nih ahi zongin a pia dingin zong a pai uh ahi hi.#Siam 12:6-8.
25Jerusalem khua sungah Simeon a kici mi khat na om hi. Amah a thuman, a biakna mi mahmah khat hi a, Israel mite a kihotkhiat hun ding a ngakngak mi khat ahi hi. Kha Siangtho in a ompih mi khat hi a, 26Topa’ hong ciamsa Khrih a muh matengin a sih loh nading thu zong ama tungah Kha Siangtho in na genkhin hi. 27Kha Siangtho’ makaihna tawh biakinn sungah Simeon a pai hi. A nu le a pate in thukham sunga om ngeina bangin Topa tungah naungek a ap dingin biakinn-ah a hong paipih uh ciangin, 28Simeon in naungek la-in a ang-ah tawi-in Pasian’ tungah lungdamna ko a,
29“Topa aw, na thuciamna
tu-in nong tungsak a,
na nasempa keima lungsim
nong nuamsak hi.
30Ka mit mahmah tawh
nong hotkhiatna ka mukhin a,
31minam khempeuh’ muhin
nong tungsak a,
32Gentail mite in
khuavak a muh nading le
nangma mi Israel-te
a minthan nadingin
na vaihawm hi,” a ci hi.#Isa 42:6; 49:6; 52:10.
33Naungek’ nu le pate in, hih bangin Simeon in naungek’ thu a genna a zak uh ciangin lamdang a sa mahmah uh hi. 34Tua ciangin Simeon in amaute thupha a piak khit ciangin naungek’ nu Mary kiangah, “Hih naungek pen, Israel mite sungah mi tampi in siatna a ngah nading, le mi tampi in hotkhiatna a ngah nading ahi hi. Mi tampi in hih naungek nial ding uh a, 35mite’ lungsimtawng a kilatna hong hi ding hi. Dahna lungkhamna in namsau hiam bangin nangma lungsim mahmah zong hong sunkham ding hi,” a ci hi.
36Tua laitakin Asher minamte sung panin Fanuel’ tanu Anna minnei kamsang numei khat a om hi. Amah a khangham mahmah khat hi a, a nungak laitakin a neih a pasal tawh kum sagih sung a tenkhop khit ciangin, 37kum sawmgiat le kum li sung meigongin a om ahi hi. Amah pen biakna a nusia ngei lo mi khat hi a, a sun a zanin Pasian bia-in an tangin thu a ngenngen mi khat ahi hi. 38Tua bangin Jesuh a ki-ap hun laitakin hih kamsangnu hong pai-in Pasian tungah lungdamna ko a, Jerusalem a suahtak nading lamenin a ngak mi khempeuh tungah hih naungek’ thu a gen hi.
Nazareth khua-ah Ciahkikna
39Amaute in Topa’ Thukham tawh kizui-in hih ding a kisam khempeuh a bawl khit uh ciangin Galilee gam, amau khua Nazareth-ah a ciahkik uh hi.#Mat 2:23. 40Tua naupang hong khangin hong thahat hi. Lungpilna tawh kidim a, Pasian in thupha a pia hi.
Biakinn sungah Naupang Jesuh
41Kumsimin Jerusalem khua-a Paisan Pawi a kibawlna-ah Jesuh’ nu le pa a pai zel uh ahi hi.#Pai 12:1-27; Thkna 16:1-8. 42Jesuh, kum sawm le nih a phak ciangin a ngeina bangin tua pawi-ah a thumun a pai uh hi. 43Tua pawi vengin a ciahkik uh ciangin Jerusalem khua-ah naupang Jesuh kinusia kha hi. A nu le a pa in a nusiatlam uh thei lo uh hi. 44Amaute’ honlak mahah a omomin ngaihsun uh ahih manin ni khat lam paikhin uh a, tua ciangin a lawmte le a tanaute lak khawng a zong pan uh hi. 45Amah a muh zawh loh uh ciangin Jerusalem-ah kileh kikin a zong uh hi. 46A ciahzawh uh a ni thum ni ciangin biakinn sungah amah mu uh a, siate lakah tu-in a thugen uh ngai-in, thu zong dong zelin a om a mu uh hi. 47Amah in pilna tawh thu genin a dawnna a za mite khempeuh in lamdangsa mahmah uh hi. 48A nu le a pa in a muh uh ciangin lamdangsa uh a, a nu in, “Ka ta aw, bang hangin hong hici bawl na hi hiam? Na pa tawh lungkham mahmahin nang ka hong zong uh hi,” a ci hi.
49Jesuh in a nu le a pa kiangah, “Bang hangin kei hong zong na hi uh hiam? Ka Pa’ inn sungah ka om ding lamtak thei lo na hi uh hiam?” ci-in a dawng hi. 50Ahi zongin bang a cihnopna ahi hiam, ci-in a nu le a pa in thei lo uh hi.
51Tua ahih ciangin a nu le a pa zui-in Nazareth khua-ah ciahkik a, amaute’ thu mangin tua lai-ah hoihtakin a om hi. A nu in hih thu khempeuh a lungsim sungah ngaihsunsun hi. 52Jesuh a pumpi le a pilna khang a, ama gamtatna in Pasian le mite a lungkimsak semsem hi.#1Sam 2:26; Pau 3:4.
Currently Selected:
LUKA 2: TDB
Highlight
Share
Copy
Want to have your highlights saved across all your devices? Sign up or sign in
Tedim (Chin) Bible © Bible Society of Myanmar, 2011.