ᤕᤢᤜᤢᤴᤏᤠ 15
15
ᤕᤧᤛᤢᤴ ᤛᤧᤰᤂᤠᤛᤔᤠ ᤆᤧᤸᤗᤧᤰᤛᤣ᤹ᤒᤢᤱ
1ᤕᤧᤛᤢᤖᤧ ᤕᤠᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤛᤧᤰᤂᤠᤛᤔᤠ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱᤀᤠᤖᤥ॥ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤀᤠᤶᤒᤠᤃ ᤀᤡᤰᤔ᤺ᤒᤠᤖᤥ॥ 2ᤀᤡᤱᤃᤠ᤹ᤀᤥ ᤁᤢᤈᤠ᤹ ᤔᤧᤴᤎᤥ᤺ᤰᤔᤏᤠᤒᤠ ᤁᤠᤰ ᤐᤥᤖᤠ᤺ᤰᤜᤠ᤹ᤃ ᤆᤧᤵᤋᤢᤍᤣᤛᤢ᤹ ᤜᤧᤰᤁᤩᤠᤱ ᤁᤢᤈᤠ᤹ ᤁᤧᤎᤥ᤺ᤰᤐᤠᤜᤠ᤹ᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤁᤢᤈᤠ᤹ ᤌᤥ᤺ᤰᤗ ᤑᤠ᤹ᤀᤠᤱ ᤁᤢᤒᤥᤖᤠᤰᤜᤠ᤹ ᤆᤧᤵᤋᤢᤀᤠᤱ ᤛᤠ᤺ᤰᤋᤢᤖᤥ॥ 3ᤐᤥᤖᤠ᤺ᤰᤜᤠ᤹ ᤆᤧᤵᤔᤠᤀᤠᤱ ᤛᤠ᤺ᤰᤔᤏᤠᤒᤠ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱ ᤁᤢᤀᤡᤛᤡᤰ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤣᤗᤡᤃᤧᤴ ᤐᤠ᤺ᤴᤈᤠᤰᤁᤡᤸᤗᤧ ᤋᤃᤡᤛᤠ ᤂᤡᤏᤡ᤹ ᤛᤣᤛᤣ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ 4ᤀᤡᤱᤃᤠ᤹ᤀᤥ ᤘᤕᤧᤶᤔᤧ᤹ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤘᤠ᤹ᤀᤠᤖᤥ॥ ᤛᤡᤱ ᤐᤥᤖᤠ᤺ᤰᤁᤡᤴ ᤆᤧᤵᤔᤠᤀᤠᤱ ᤁᤢᤒᤢᤱᤔᤥᤗᤠᤶ ᤛᤧᤶᤔᤠᤏᤧ ᤑᤠ᤹ᤃᤪ ᤂᤧ᤹ᤕᤥ ᤁᤢᤈᤠ᤹ ᤌᤥ᤺ᤰᤔᤠ ᤔᤧᤛᤢᤰᤏᤧᤴᤗᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ᤀᤠᤱ ᤀᤡᤱᤃᤠ᤹ᤀᤥ ᤔᤧᤴᤘᤠ᤹ᤀᤣ ᤁᤢᤈᤠ᤹ ᤑᤶᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥ 5ᤀᤡᤱᤃᤠ᤹ᤃ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤢᤒᤢᤱᤀᤠᤖᤥ ᤜᤧᤰᤁᤩᤠᤱ ᤂᤡᤏᤡ᤹ᤃ ᤀᤠᤒᤥᤖᤠ᤺ᤰᤏᤡᤱᤗᤥ॥ ᤂᤡᤏᤡ᤹ ᤀᤡᤱᤃᤠ᤹ᤀᤥ ᤁᤧᤘᤕᤡ᤹ᤀᤠᤱ ᤀᤡᤱᤃᤠ᤹ ᤂᤡᤏᤡ᤹ᤀᤥ ᤘᤠ᤹ᤀᤠᤏᤧ ᤑᤠ᤹ᤃᤪ ᤀᤠᤸᤗᤛᤠᤱ ᤕᤖᤡᤰ ᤁᤢᤈᤠ᤹ ᤑᤶᤔᤠ ᤁᤧᤛᤢᤰᤋᤢᤶᤗᤥ. ᤁᤖ ᤀᤡᤱᤃᤠ᤹ᤀᤥ ᤔᤧᤴᤘᤠ᤹ᤀᤣ ᤌᤣᤀᤠᤱ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥ 6ᤀᤡᤱᤃᤠ᤹ᤀᤥ ᤔᤧᤴᤘᤠ᤹ᤔᤏᤠᤒᤠᤱᤃ ᤆᤧᤵᤔᤠᤀᤠᤱ ᤗᤠᤵᤑᤢᤔᤏᤠᤒᤠ ᤁᤧᤜᤣᤒᤠᤀᤠᤱ ᤁᤧᤛᤡᤒᤠ ᤛᤡᤱ ᤐᤥᤖᤠ᤺ᤰ ᤁᤢᤀᤡᤛᤡᤰ ᤐᤥᤱᤗᤥ॥ ᤂᤧᤱᤃ ᤔᤏᤠᤜᤠ᤹ᤖᤧ ᤔᤧᤄᤵᤛᤢᤀᤠᤱ ᤔᤡᤀᤥ ᤔᤧᤜᤠ᤺ᤴᤍᤢᤖᤥ॥ 7ᤂᤡᤏᤡ᤹ ᤀᤡᤱᤃᤠ᤹ᤀᤥ ᤜᤧᤰᤁᤩᤠᤱ ᤀᤠᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ᤀᤥ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤡᤖᤠ᤹ ᤁᤧᤎᤠᤱᤒᤠ ᤐᤠ᤺ᤴᤜᤠ᤹ ᤌᤣ ᤁᤧᤏᤠ᤺ᤰᤋᤢᤶᤛᤠᤱ ᤂᤡᤏᤡ᤹ ᤁᤧᤄᤥᤛᤢᤶᤗᤥ॥ 8ᤕᤖᤡᤰ ᤁᤢᤈᤠ᤹ ᤁᤧᤓᤳᤇᤢᤶᤏᤧ ᤑᤠ᤹ᤃᤪ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤔᤡᤔᤡᤍᤡᤱ ᤁᤧᤈᤥᤃᤢᤶᤔᤠᤱ ᤂᤡᤏᤡ᤹ ᤛᤧᤰᤂᤠᤛᤔᤠ ᤀᤠᤜᤢ᤹ᤛᤠᤶᤒᤠ ᤁᤧᤒᤥ᤺ᤰᤂᤡ᤹ᤖᤥ॥
9“ᤐᤠᤏᤢᤍᤡᤱ ᤐᤠ᤺ᤸᤗᤧ ᤗᤢᤱᤔᤠ᤹ ᤋᤢᤰᤋᤠᤱᤒᤠ ᤁᤢᤀᤡᤛᤡᤰ ᤂᤡᤏᤡ᤹ᤀᤠᤱ ᤗᤢᤱᤔᤠ᤹ ᤋᤢᤰᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤂᤡᤏᤡ᤹ ᤆᤰᤔᤧᤸᤗ᤹ᤀᤣ ᤀᤠᤔᤡ᤺ᤶᤈᤡᤀᤥ ᤘᤕᤧᤶᤔᤧ᤹ᤀᤥ॥ 10ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤀᤡᤱᤈᤠᤱᤅᤡᤴ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤅᤠᤱ ᤀᤡᤱᤃᤠ᤹ ᤁᤢᤔᤡ᤺ᤶᤈᤡᤀᤥ ᤘᤠ᤹ᤀᤠᤒᤠ ᤁᤢᤀᤡᤛᤡᤰ ᤀᤡᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤀᤠᤔᤡ᤺ᤶᤈᤡᤀᤥ ᤁᤧᤘᤕᤡᤒᤠ ᤐᤥᤱᤗᤥ॥ 11ᤀᤠᤛᤡᤰ ᤛᤶᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ᤀᤠᤱ ᤛᤡᤰ ᤐᤛᤶᤛᤶᤗ ᤑᤠ᤹ᤀᤠᤱ ᤁᤴ ᤐᤠ᤺ᤴᤜᤠ᤹ ᤔᤧᤳᤏᤡᤱᤒᤠᤖᤥ॥ 12ᤀᤠᤸᤗ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤏᤡᤱᤒᤠ ᤁᤢᤀᤡᤛᤡᤰ ᤂᤡᤏᤡ᤹ᤀᤠᤱ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤏᤡᤱᤗᤥ॥ 13ᤆᤢᤶᤔᤡᤸᤗᤧ ᤁᤢᤗᤠᤃᤡ ᤜᤡᤱᤔᤴ ᤐᤡᤔᤠᤴᤏᤣ ᤕᤶᤒᤠ ᤔᤡ᤺ᤶᤈᤡᤖᤥ. ᤁᤴᤏᤢ᤺ᤸᤗᤧ ᤕᤶᤒᤠ ᤔᤡ᤺ᤶᤈᤡ ᤘᤣ᤹ ᤜᤥᤵᤗᤥ॥ 14ᤂᤡᤏᤡ᤹ ᤐᤡᤏᤡᤱᤒᤠ ᤀᤠᤀᤡᤱᤈᤠᤱᤅᤡᤴ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤀᤠᤴᤈᤢᤶ ᤁᤧᤒᤥᤰᤂᤡᤖᤥ॥ 15ᤀᤠᤸᤗᤠᤱᤎᤥ ᤀᤡᤱᤃᤠ᤹ ᤛᤧᤘᤠᤖᤥᤒᤠ ᤔᤧᤔᤧᤳᤏᤡᤱᤅᤡᤴᤗᤥ. ᤌᤣᤀᤠᤱᤓᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤆᤥ᤺ᤰᤔᤠ ᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤛᤧᤘᤠᤖᤥᤒᤠᤸᤗᤧ ᤔᤧᤏᤡᤛᤢᤴᤗᤥ॥ ᤁᤖ ᤂᤡᤏᤡ᤹ᤃ ᤀᤠᤴᤈᤢᤶᤏᤡᤱ ᤑᤠ᤹ᤀᤠᤱ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤔᤧᤳᤋᤠᤱᤒᤠ ᤁᤠᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤖᤥ॥ 16ᤂᤡᤏᤡ᤹ ᤕᤠᤵᤔᤡ ᤁᤧᤴᤇᤣᤃᤡᤴ ᤁᤖ ᤀᤡᤱᤃᤠ᤹ ᤂᤡᤏᤡ᤹ ᤛᤣ᤺ᤰᤏᤡᤱ. ᤜᤧᤰᤁᤩᤠᤱ ᤐᤣᤃᤧᤶᤔᤧ᤹ᤀᤠᤱ ᤛᤍᤠᤍᤡᤱ ᤁᤧᤒᤵᤐᤠ ᤁᤢᤈᤠ᤹ ᤑᤳᤇᤧᤶᤔᤧ᤹ ᤑᤠ᤹ᤀᤠᤱ ᤛᤣ᤺ᤰᤕᤢᤰ ᤆᤥ᤺ᤰᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤔᤡᤱᤅᤥ ᤌᤣ ᤁᤧᤏᤠ᤺ᤰᤋᤢᤶᤛᤠᤱ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤧᤒᤡᤖᤡ᤹ᤖᤥ॥ 17ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤁᤠᤛᤡᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤏᤡᤱᤗᤥ॥”
ᤀᤡᤰᤛᤠᤒᤠ ᤔᤏᤠᤜᤠ᤹ᤖᤧ ᤜᤢ᤹ᤛᤠᤶᤒᤠᤜᤠ᤹ ᤔᤧᤈᤡ᤺ᤳᤋᤢᤛᤡ᤹
18“ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤖᤧ ᤁᤧᤶᤈᤡ᤺ᤳᤋᤡᤸᤗᤧ ᤂᤧᤴᤏᤢ ᤋᤃᤡ ᤀᤡᤱᤃᤠ᤹ ᤔᤧᤈᤡ᤺ᤳᤋᤠᤱᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ 19ᤂᤡᤏᤡ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤘᤕᤡᤸᤗᤧᤃ ᤀᤠᤒᤠᤅᤣ ᤂᤢᤏᤡ᤹ ᤔᤏᤠ ᤜᤧᤰᤁᤣᤀᤣ ᤗᤢᤱᤔᤠ᤹ ᤁᤧᤶᤍᤢᤰᤋᤡ᤹ᤔᤧᤴ. ᤁᤖ ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧ᤺ᤴᤏᤡᤱᤗᤥ॥ ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤀᤡᤱᤃᤠ᤹ ᤛᤣ᤺ᤰᤏᤡᤱᤅᤠᤱ ᤘᤠ᤹ᤀᤠᤖᤥ. ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤈᤡ᤺ᤳᤋᤡ᤹ᤖᤥ॥ 20ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤀᤠᤒᤠ᤺ᤴᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ ‘ᤛᤧᤘᤠᤖᤥᤒᤠᤴ ᤁᤢᤴᤍᤠᤱᤒᤠᤴᤏᤢ᤺ᤸᤗᤧ ᤕᤶᤒᤠ ᤔᤣ᤺ᤴᤗᤥ॥’ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ᤀᤣ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤋᤢᤰᤂᤣ ᤁᤧᤶᤈᤠ᤺ᤳᤋᤡ᤹ᤖᤥ॥ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤘᤕᤧᤸᤗᤧᤃ ᤂᤡᤏᤡ᤹ ᤏᤡᤛᤠᤶᤔᤡᤴᤏᤠᤱ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ᤹ᤖᤥ॥ 21ᤂᤡᤏᤡ᤹ᤃ ᤀᤡᤱᤃᤠ᤹ᤀᤡᤴ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤔᤧᤔᤧᤳᤋᤠᤱᤒᤠ ᤁᤢᤀᤡᤛᤡ᤺ᤰᤁᤣ ᤂᤡᤏᤡ᤹ ᤁᤧᤶᤔᤧᤳᤋᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤃ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥ 22ᤀᤡᤱᤃᤠ᤹ ᤋᤩᤠᤱᤅᤠᤱ ᤂᤧᤱᤜᤠ᤹ ᤗᤠᤕᤥᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤶᤔᤧᤳᤇᤡᤱᤒᤠᤴᤏᤡᤸᤗᤧᤃ ᤗᤠᤕᤥᤖᤧᤴ ᤀᤠᤵᤋᤡᤰ ᤔᤧᤱᤄᤥᤛᤢᤶᤒᤠᤖᤥ॥ ᤁᤖ ᤀᤠᤸᤗᤃ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤴᤈᤥ᤺ᤰᤔᤏᤠᤒᤠ ᤗᤠᤶᤛᤡᤱᤔᤠ ᤔᤧᤱᤄᤥᤛᤢᤴᤗᤥ॥ 23ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤆᤡ᤺ᤳᤋᤠ. ᤂᤧᤸᤗᤧ ᤐᤠᤏᤢᤍᤡᤱ ᤀᤠᤶᤒᤠᤀᤠᤱ ᤆᤡ᤺ᤳᤋᤢ᤹ᤖᤥ॥ 24ᤀᤡᤱᤃᤠ᤹ ᤘᤣ᤹ᤜᤠ᤹ᤖᤧ ᤆᤥ᤺ᤰᤔᤠ ᤔᤧᤴᤇᤢᤰᤋᤢᤴᤒᤠ ᤕᤠ᤺ᤶᤒᤰ ᤆᤥᤃᤢᤱ॥ ᤂᤧᤱᤜᤠ᤹ᤖᤧ ᤂᤧᤴ ᤐᤠ᤺ᤴᤜᤠ᤹ ᤔᤧᤴᤏᤡᤛᤢᤴᤏᤡᤸᤗᤧᤃ ᤂᤧᤱᤜᤠ᤹ ᤗᤠᤕᤥᤖᤧ ᤀᤠᤵᤋᤡᤰ ᤁᤧᤄᤥᤒᤠ ᤔᤧᤶᤒᤥ᤺ᤰᤂᤧᤶᤒᤠ ᤘᤕᤧᤖᤥ॥ ᤁᤖ ᤂᤧᤱᤜᤠ᤹ᤖᤧᤃ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣᤴ ᤔᤧᤏᤡᤛᤢᤀᤠᤱ ᤔᤧᤘᤠ᤹ᤛᤠᤱ ᤐᤠᤏᤢᤍᤡᤱ ᤀᤠᤶᤒᤠ ᤏᤢ ᤀᤡᤱᤃᤠ᤹ ᤏᤧᤵᤔᤠᤱ ᤔᤧᤈᤡ᤺ᤳᤋᤧᤳᤇᤡᤃᤧᤀᤠᤱ ᤘᤠ᤹ᤖᤥ॥ 25ᤁᤖ ᤁᤱᤃ ᤂᤧᤱᤜᤠ᤹ᤖᤧ ᤌᤣᤏᤠᤎᤣ ᤔᤧᤈᤡ᤺ᤳᤋᤠᤱᤒᤠᤖᤥ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤁᤧᤖᤧᤒᤠᤖᤥ॥#ᤏᤡᤱ ᤛᤢᤶ ᥉᥋:᥇᥏. ᥌᥏:᥊
26“ᤀᤠᤸᤗ ᤐᤠᤏᤢᤍᤡᤱ ᤐᤠᤗᤠᤶ ᤁᤢᤓᤠ᤹ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤐᤠᤱᤄᤢᤱᤗᤥ॥ ᤂᤢᤏᤧ᤹ᤃ ᤐᤠᤏᤢᤍᤡᤱ ᤐᤠ᤺ᤗᤠᤶᤒᤠ ᤁᤧᤕᤢ᤺ᤒᤠ ᤛᤧᤰᤂᤠᤀᤥ ᤗᤠᤶᤃᤧᤗᤥᤒᤠ ᤛᤣᤛᤣᤔᤠᤱᤗᤥ. ᤂᤢᤏᤧ᤹ᤀᤣ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤖᤡ᤹ᤖᤥ॥ 27ᤜᤧᤰᤁᤩᤠᤱ ᤂᤡᤏᤡ᤹ᤀᤠᤱ ᤀᤡᤱᤃᤠ᤹ ᤀᤠᤕᤠ᤺ᤶᤒᤣᤀᤥ ᤋᤥ᤺ᤴᤍᤡ ᤁᤧᤒᤡᤖᤢᤶᤗᤀᤣ ᤐᤥᤱᤗᤥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ᤃ ᤀᤡᤱᤃᤠ᤹ᤏᤢ ᤁᤢᤜᤣ᤺ᤰᤛᤡᤱᤔᤠᤀᤠᤱᤎᤥᤀᤣ ᤁᤧᤘᤕᤡᤖᤥ॥”
Currently Selected:
ᤕᤢᤜᤢᤴᤏᤠ 15: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.