ᤕᤢᤜᤢᤴᤏᤠ 16
16
1ᤕᤧᤛᤢᤖᤧ ᤀᤠᤸᤗᤛᤠᤱ ᤔᤧᤳᤋᤢᤛᤡ. “ᤕᤠᤵᤔᤡ ᤏᤛᤠᤴ ᤆᤥ᤺ᤰᤔᤠ ᤁᤧᤴᤗᤧᤖᤢᤶᤔᤡᤴᤗ ᤑᤠ᤹ᤀᤠᤱ ᤋᤃᤡᤛᤠ ᤁᤴ ᤐᤠ᤺ᤴᤜᤠ᤹ ᤔᤧᤳᤏᤡᤱᤗ ᤐᤳᤋᤠᤖᤥ॥ 2ᤂᤡᤏᤡ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤁᤧᤶᤗ᤺ᤳᤋᤡ ᤁᤧᤶᤍᤣᤛᤡ᤹॥ ᤜᤧᤰᤁᤩᤠᤱ ᤀᤰᤋᤱᤒᤠ ᤕᤧᤶᤔᤠᤱ ᤋᤠᤖ ᤐᤳ. ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤛᤧᤖᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤆᤥᤃᤢᤶᤒᤠᤖ ᤐᤳᤇᤡᤃᤧ ᤗ᤹ᤖᤡᤰ ᤔᤧᤀᤡ᤺ᤳᤋᤢᤖᤥ॥ 3ᤂᤧᤱᤜᤠ᤹ᤖᤧ ᤐᤠᤏᤢᤍᤡᤱ ᤐᤠᤴ ᤀᤡᤃᤪ ᤀᤡᤱᤃᤠ᤹ ᤕᤠᤵᤔᤡ ᤁᤢᤛᤡᤱ ᤔᤧᤴᤏᤡ᤺ᤳᤋᤠᤴᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤜᤧᤰᤁᤣ ᤁᤧᤶᤔᤧᤳᤋᤡ᤹ᤖᤥ॥ 4ᤁᤴ ᤐᤠ᤺ᤴᤜᤠ᤹ ᤋᤠ᤺ᤴᤍᤡ ᤂᤡᤏᤡ᤹ᤀᤥ ᤁᤧᤳᤋᤡᤸᤗᤧ ᤀᤡᤱᤃᤠ᤹ ᤛᤠᤶᤍᤡᤱ ᤐᤡᤏᤡᤱᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤗ ᤑᤠ᤹ᤀᤠᤱ ᤀᤰᤂᤣ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤋᤃᤡᤃ ᤁᤴ ᤐᤠ᤺ᤴᤜᤠ᤹ ᤔᤧᤔᤧᤳᤏᤡᤱᤅᤡᤴᤗᤥ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤃ ᤂᤡᤏᤡ᤹ᤏᤢᤀᤣ ᤘᤕᤠᤱᤗᤥ॥”
ᤛᤣᤛᤣᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰ
5“ᤁᤖ ᤀᤠᤸᤗ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠᤸᤗᤥ ᤏᤢ᤺ᤱᤅᤠ ᤐᤣ᤺ᤰᤁᤠᤖ ᤐᤳᤋᤠ ᤜᤧᤰᤁᤣᤛᤠᤱ ᤂᤡᤏᤡ᤹ ᤀᤠᤳᤋᤡᤸᤗᤧᤀᤠᤱ ᤀᤠᤳᤋᤠᤴ ᤁᤧᤒᤣ᤺ᤰᤗ ᤁᤧᤒᤵᤐᤣ ᤑᤠ᤹ᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤛᤣ᤺ᤴᤃᤧᤴᤍᤥᤛᤡᤴᤗᤥ॥ 6ᤀᤡᤱᤃᤠ᤹ ᤜᤧᤰᤁᤣ ᤐᤠ᤺ᤳᤋᤢᤱᤒᤠᤸᤗᤧ ᤂᤡᤏᤡ᤹ ᤏᤡᤱᤛᤠᤶᤔᤥ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡ᤹ᤖᤥ॥ 7ᤁᤖ ᤀᤡᤱᤃᤠ᤹ ᤛᤧᤰᤂᤠᤴ ᤔᤧᤳᤏᤡᤱ. ᤀᤡᤱᤃᤠ᤹ᤃ ᤐᤣ᤺ᤰᤁᤠᤒᤠᤴᤏᤣ ᤂᤡᤏᤡ᤹ ᤗᤠᤃᤡ ᤏᤢᤒᤠ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤒᤣ᤺ᤰᤁᤠᤴᤏᤧ ᤑᤠ᤹ᤃᤪ ᤁᤢᤓᤠ᤹ ᤁᤧᤒᤡᤒᤠ ᤛᤣᤛᤣᤔᤠᤱᤅᤡᤴ ᤂᤡᤏᤡ᤹ᤀᤥ ᤔᤧᤕᤢᤏᤧᤴᤗᤥ. ᤁᤖ ᤀᤡᤱᤃᤠ᤹ ᤐᤣ᤺ᤰᤁᤠᤀᤠᤱ ᤂᤢᤏᤧ᤹ ᤂᤡᤏᤡ᤹ᤀᤥ ᤐᤠᤱᤄᤢᤱ ᤕᤢ᤺ᤛᤢᤱᤗᤥ॥ 8ᤂᤢᤏᤧ᤹ ᤕᤢ᤺ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤖᤧ ᤁᤢᤕᤠ᤺ᤶᤒᤣᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤏᤡᤔᤠᤴ ᤜᤧᤰᤁᤩᤠᤱ ᤁᤢᤄᤠᤛᤧᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤡᤷᤒᤣ᤺ᤴ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤰᤋᤢᤛᤡ᤹ᤖᤥ॥ 9ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤏᤛᤠᤴ ᤔᤧᤴᤈᤥ᤺ᤰᤁᤠᤴᤒᤠᤴᤏᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤗᤠᤕᤥᤖᤥ॥ 10ᤀᤡᤱᤃᤠ᤹ ᤐᤠᤏᤢᤍᤡᤱ ᤐᤠ᤺ᤸᤗᤥ ᤐᤣ᤺ᤰᤁᤠᤒᤠᤸᤗᤧ ᤛᤠᤶᤕᤥᤒᤠ ᤁᤧᤒᤥᤰᤂᤡᤖᤥ. ᤜᤧᤰᤁᤩᤠᤱᤎᤥ ᤂᤡᤏᤡ᤹ ᤕᤠᤵᤔᤡ ᤁᤧᤴᤏᤡᤛᤡᤴᤗᤥ॥ 11ᤜᤧᤰᤁᤩᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤕᤢᤰ ᤁᤧᤈᤥ᤺ᤰᤐᤠᤸᤗᤧ ᤁᤢᤄᤠᤛᤧᤴ ᤐᤥ᤺ᤰᤂᤧᤀᤠᤱ ᤘᤠ᤹॥
12“ᤜᤧᤰᤁᤩᤠᤱ ᤀᤡᤱᤃᤠ᤹ᤃ ᤀᤠᤸᤗᤥ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤐᤠ᤺ᤵᤔᤠ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤁᤳᤋᤢᤱᤗᤥ॥ 13ᤁᤖ ᤛᤧᤰᤂᤠᤀᤥ ᤗᤠᤶᤃᤧᤗᤥᤒᤠ ᤛᤣᤛᤣᤔᤠᤱᤅᤡᤴ ᤕᤢᤀᤠᤱ ᤁᤠᤰ ᤛᤧᤰᤂᤠᤀᤥ ᤗᤠᤶᤃᤧᤗᤥᤛᤡ᤹ ᤜᤧᤰᤁᤩᤠᤱ ᤂᤢᤏᤧ᤹ᤃ ᤀᤠᤒᤠᤅᤣ ᤁᤢᤒᤠ᤺ᤴᤜᤠ᤹ ᤌᤣᤀᤠᤱ ᤔᤧᤒᤠ᤺ᤳᤋᤢᤴᤗᤥ. ᤁᤖ ᤂᤧᤵᤛᤢᤒᤠ ᤐᤠ᤺ᤴᤜᤠ᤹ᤖᤰ ᤂᤡᤏᤡ᤹ ᤁᤧᤔᤧᤳᤋᤡ᤹ ᤜᤧᤰᤁᤩᤠᤱ ᤋᤠ᤺ᤴᤍᤡ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤁᤧᤔᤧᤳᤋᤡ᤹ᤖᤥ॥ 14ᤂᤢᤏᤧ᤹ᤃ ᤀᤠᤒᤠ᤺ᤴᤜᤠ᤹ ᤀᤡᤱᤃᤠ᤹ᤗᤠᤶ ᤂᤥᤛᤢᤀᤠᤱ ᤂᤡᤏᤡ᤹ ᤁᤧᤔᤧᤳᤋᤡᤸᤗᤧ ᤀᤠᤔᤡᤔᤡᤍᤡᤱ ᤆᤥᤃᤢ᤹ᤖᤥ॥ 15ᤁᤠᤰ ᤐᤠᤏᤢᤍᤡᤱ ᤐᤠ᤺ᤸᤗᤧ ᤁᤢᤒᤠ᤺ᤴᤜᤠ᤹ ᤀᤡᤱᤃᤠ᤹ᤀᤡᤴᤗᤥ. ᤂᤧᤸᤗᤧᤆᤥᤃᤢᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤀᤡᤱᤃᤠ᤹ᤗᤠᤶᤔᤣ ᤐᤠ᤺ᤴᤜᤠ᤹ ᤋᤣ᤹ᤖᤢᤀᤠᤱ ᤂᤡᤏᤡ᤹ ᤁᤧᤔᤧᤳᤋᤡ᤹ᤖᤥ ᤑᤠ᤹ᤀᤠᤱ ᤐᤠ᤺ᤳᤋᤢᤱᤒᤠᤖᤥ॥”
ᤋᤢᤰᤂᤣᤴ ᤛ᤺ᤵᤔᤠᤀᤥ ᤗᤧᤱ
16ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤛᤵᤑᤠᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤁᤧᤴᤏᤡᤛᤡᤴᤗᤥ. ᤁᤖ ᤕᤠᤱᤛᤡ ᤛᤵᤑᤠᤀᤠᤱᤃ ᤕᤠᤶᤔᤥ ᤕᤠᤵᤔᤡ ᤁᤧᤏᤡᤛᤡ᤹ᤖᤥ॥”
17ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤏᤡ᤹ ᤍᤠᤱᤒᤠᤸᤗᤧ ᤛᤵᤑᤠᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤀᤠᤃᤧᤴᤏᤡᤛᤡᤴ ᤁᤖ ᤕᤠᤱᤛᤡ ᤛᤵᤑᤠᤀᤠᤱ ᤕᤠᤶᤔᤥ ᤕᤠᤵᤔᤡ ᤁᤧᤏᤡᤛᤡ᤹ᤖᤥ ᤗ᤹ᤖᤡᤰ ᤌᤧᤔᤠ ᤐᤠ᤺ᤳᤋᤢᤒᤠᤒᤣ᥅ ᤐᤠᤏᤢᤍᤡᤱ ᤐᤠ᤺ᤸᤗᤥ ᤐᤣ᤺ᤰᤁᤠᤖ ᤐᤳᤋᤠ ᤗ᤹ᤖᤡᤰ ᤌᤣ ᤐᤠ᤺ᤳᤋᤢᤒᤠᤒᤣ᥅ 18ᤕᤠᤱᤛᤡ ᤛᤵᤑᤠᤀᤠᤱ ᤗ᤹ᤖᤡᤰ ᤂᤢᤏᤧ᤹ ᤌᤣ ᤐᤠ᤺ᤳᤋᤢᤒᤠᤀᤡ᥅ ᤀᤠᤏᤡ᤹ ᤌᤣᤀᤠᤱ ᤁᤢᤛᤡᤱ ᤀᤠᤴᤏᤡ᤺ᤳᤋᤢᤶᤔᤡᤴᤗᤥ॥”
19ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤓᤠ ᤐᤠᤴ ᤛᤣ᤺ᤴᤍᤥᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤠ᤹ ᤗ᤹ᤖᤡᤰ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤵᤑᤠᤀᤠᤱ ᤀᤡᤱᤃᤠ᤹ ᤕᤠᤵᤔᤡ ᤁᤧᤴᤏᤡᤛᤡᤴᤗᤥ. ᤁᤖ ᤕᤠᤱᤛᤡ ᤛᤵᤑᤠᤀᤠᤱ ᤕᤠᤶᤔᤥ ᤕᤠᤵᤔᤡ ᤁᤧᤏᤡᤛᤡ᤹ᤖᤥ ᤗ᤹ᤖᤡᤰ ᤐᤠ᤺ᤳᤋᤢᤱᤒᤠᤀᤥ ᤂᤡᤏᤡ᤹ ᤛᤣ᤺ᤴᤃᤧᤍᤥᤀᤠᤛᤡᤖ ᤁᤧᤒᤳᤇᤡᤒᤡ᥅ 20ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤁᤧᤜᤠᤒᤡ᤹. ᤔᤧᤖᤡᤱ ᤁᤧᤎᤰᤋᤡ᤹. ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠᤜᤠ᤹ᤃ ᤔᤧᤛ᤺ᤳᤗᤥ॥ ᤂᤡᤏᤡ᤹ ᤔᤧᤖᤡᤱ ᤁᤧᤎᤰᤋᤡ᤹. ᤁᤖ ᤂᤡᤏᤡ᤹ ᤔᤧᤖᤡᤱ ᤌᤰᤔᤠᤱᤃ ᤛ᤺ᤵᤔᤠᤀᤥ ᤗᤧᤱᤗᤥ॥ 21ᤂᤧᤴ ᤕᤧᤶᤔᤡᤱᤃ ᤛᤠᤘᤠ᤺ᤴᤍᤢᤱᤅᤡᤸᤗᤧ ᤕᤠᤱᤄᤢᤒᤠ ᤔᤧᤴᤇᤢᤔᤠ᤹ᤀᤡᤴ ᤁᤢᤀᤡᤛᤡᤰ ᤐᤥᤱᤗᤥ॥ ᤁᤢᤛ᤻ᤛᤠᤴ ᤛᤠᤘᤠ᤺ᤴᤍᤢ ᤛᤢᤖᤢᤀᤠᤱ ᤁᤠᤰ ᤛᤠᤘᤠ᤺ᤴᤍᤢᤱᤅᤡᤴ ᤏᤡᤱᤘᤠ᤹ ᤑᤣ᤺ᤳᤇᤢ᤹ᤖᤥ. ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤅᤧ᤺ᤰᤘᤠᤎᤡᤰ ᤛᤠᤘᤠ᤺ᤴᤍᤢᤒᤠᤀᤥ ᤛ᤺ᤳᤗᤥ॥ 22ᤂᤡᤏᤡ᤹ ᤗᤠᤃᤡᤀᤠᤱ ᤒᤠᤜᤧᤰᤁᤣ ᤐᤥᤱ—ᤀᤠᤸᤗᤥᤃ ᤔᤧᤖᤡᤱ ᤁᤧᤎᤰᤋᤡ᤹. ᤁᤖ ᤀᤡᤱᤃᤠ᤹ ᤕᤠᤶᤔᤥ ᤂᤡᤏᤡ᤹ ᤋᤢᤶᤛᤧ ᤋᤠᤀᤠᤸᤗᤧ ᤂᤡᤏᤡ᤹ ᤁᤧᤛ᤺ᤳᤋᤡ᤹ᤖᤥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤛ᤺ᤵᤔᤠᤴ ᤏᤠᤵᤔᤠᤀᤠᤱ ᤋᤣ᤹ᤔᤠ ᤁᤧᤴᤇᤢᤰᤋᤡᤴᤗᤥ॥ 23ᤂᤧᤴ ᤕᤧᤴᤏᤥ ᤂᤡᤏᤡ᤹ ᤌᤣᤀᤠᤱ ᤕᤠᤵᤔᤡ ᤛᤣ᤺ᤴᤃᤧᤴᤍᤥᤛᤡᤴᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤔᤡᤱᤅᤥ ᤌᤣ ᤁᤧᤏᤠ᤺ᤰᤋᤢᤶᤛᤠᤱ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤧᤒᤡᤖᤡ᤹ᤖᤥ॥ 24ᤀᤠᤸᤗᤥ ᤌᤠᤖᤡᤰ ᤀᤰᤂᤣᤗ᤹ᤖᤡᤰ ᤀᤠᤔᤡᤱᤅᤥ ᤌᤣᤀᤠᤱ ᤔᤧᤴᤏᤠ᤺ᤰᤁᤣ ᤁᤧᤘᤕᤡ᤹ᤖᤥ॥ ᤂᤡᤏᤡ᤹ ᤏᤠ᤺ᤰᤋᤧᤶᤔᤧ᤹ ᤜᤧᤰᤁᤩᤠᤱ ᤁᤧᤄᤥᤛᤢᤶᤔᤠᤱ ᤁᤧᤛ᤺ᤳᤋᤡ᤹ᤖᤥ॥
25“ᤀᤠᤸᤗᤥᤃ ᤀᤡᤱᤃᤠ᤹ ᤐᤠ᤺ᤶᤑᤪᤧᤶᤔᤥ ᤐᤠ᤺ᤳᤋᤠᤖ ᤘᤠ᤹ᤀᤠᤛᤠᤱ ᤋᤠ᤺ᤴᤍᤡ ᤁᤧᤍᤠᤒᤠ ᤕᤧᤶᤔᤥᤃ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤠᤴᤗᤥ. ᤁᤖ ᤀᤠᤶᤒᤠᤖᤧ ᤁᤢᤕᤠ᤺ᤶᤒᤣᤀᤥ ᤁᤢᤍᤥ᤺ᤵᤔᤠᤀᤣ ᤔᤧᤳᤏᤡᤱᤗᤥ॥ 26ᤂᤧᤴ ᤕᤧᤶᤔᤥ ᤂᤡᤏᤡ᤹ᤀᤣ ᤀᤡᤱᤃᤠ᤹ ᤀᤠᤔᤡᤱᤅᤥ ᤁᤧᤏᤠ᤺ᤰᤋᤢᤶᤗᤥ॥ ᤀᤡᤱᤃᤠ᤹ ᤂᤡᤏᤡ᤹ ᤗᤠᤃᤡ ᤐᤠᤏᤢᤍᤡᤱ ᤐᤠᤴ ᤏᤠ᤺ᤰᤋᤢᤱ ᤐᤡᤏᤡᤱ ᤑᤠ᤹ᤀᤠᤱ ᤔᤧᤒᤠ᤺ᤳᤋᤠᤴᤗᤥ॥ 27ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤠᤱᤒᤠᤴ ᤂᤡᤏᤡ᤹ ᤏᤛᤠᤴ ᤁᤧᤈᤥᤃᤢᤶ ᤜᤧᤰᤁᤩᤠᤱ ᤕᤠᤵᤔᤡ ᤔᤡ᤺ᤶᤈᤡ ᤁᤧᤔᤧᤳᤋᤡᤒᤠᤸᤗᤧ ᤆᤥᤃᤢᤸᤗᤧ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤠᤒᤠᤅᤣ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡ᤹ᤖᤥ॥ 28ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤩᤠᤱᤒᤠᤖᤥ॥ ᤀᤠᤸᤗᤥᤃ ᤀᤡᤱᤃᤠ᤹ ᤕᤠᤶᤔᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤧᤖᤢᤱᤅᤠᤱ ᤐᤠᤏᤢᤍᤡᤱ ᤐᤠ᤺ᤸᤗᤥ ᤏᤢ᤺ᤱᤅᤠ ᤐᤣ᤺ᤰᤁᤠᤖ ᤐᤳᤋᤠᤖᤥ॥”
29ᤜᤧᤰᤁᤩᤠᤱ ᤕᤧᤛᤢᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤸᤗᤥᤃ ᤂᤧᤏᤧ᤹ ᤐᤠ᤺ᤴᤑᤪᤧᤶᤔᤡᤴ ᤀᤥᤃᤵ ᤔᤧᤴᤈᤥ᤺ᤰᤁᤣ ᤁᤢᤍᤥ᤺ᤵᤔᤥ ᤁᤧᤒᤠ᤺ᤳᤗ ᤁᤧᤒᤳᤗᤥ॥ 30ᤀᤠᤸᤗᤥ ᤂᤧᤏᤧ᤹ ᤁᤠᤰ ᤐᤠ᤺ᤴᤜᤠ᤹ ᤁᤧᤏᤡᤛᤢ ᤑᤠ᤹ᤀᤠᤱ ᤀᤠᤏᤡᤃᤣ ᤁᤢᤛᤡᤱ ᤏᤡ᤺ᤳᤋᤢᤶᤒᤠᤖᤥ॥ ᤀᤠᤳᤋᤡᤸᤗᤧᤀᤠᤱ ᤌᤣᤀᤠᤱ ᤛᤣ᤺ᤴᤍᤥᤔᤠ ᤔᤧᤒᤥᤱᤏᤧᤴ. ᤌᤣᤀᤠᤱᤓᤧᤸᤗᤧ ᤛᤣ᤺ᤴᤍᤥᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤁᤧᤏᤡᤛᤢ᤹ᤖᤥ॥ ᤒᤠ ᤁᤴ ᤐᤠ᤺ᤴᤏᤥ ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤩᤧᤒᤠ ᤑᤠ᤹ᤀᤠᤱ ᤀᤠᤏᤡᤃᤣ ᤏᤛᤠᤴ ᤆᤥᤃᤢᤶᤒᤠᤖᤥ॥”
31ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤧ. ᤂᤡᤏᤡ᤹ ᤛᤧᤰᤂᤠᤀᤣ ᤀᤠᤸᤗᤥ ᤏᤛᤠᤴ ᤁᤧᤈᤥᤃᤢᤶᤒᤡ᥅ 32ᤁᤖ ᤀᤠᤸᤗ ᤂᤡᤏᤡ᤹ ᤁᤠᤰ ᤛᤧ᤺ᤔᤠᤀᤠᤱ ᤀᤠᤒᤠᤅᤣ ᤜᤡᤶᤜᤡᤶ ᤐᤣ᤺ᤰᤔᤠ ᤕᤧᤶ ᤋᤠᤖ ᤐᤳᤗᤥ॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤡᤱᤃ ᤋᤩᤧ ᤆᤢᤖᤧᤀᤠᤱ ᤘᤠ᤹ᤖᤥ॥ ᤀᤠᤸᤗ ᤂᤡᤏᤡ᤹ ᤁᤧᤖᤧᤰᤗᤧ ᤕᤠᤵᤔᤡ ᤁᤧᤗᤧᤖᤡᤀᤠᤱ ᤁᤧᤒᤣᤃᤡ᤹ᤖᤥ ᤜᤧᤰᤁᤣᤛᤠᤱ ᤀᤡᤱᤃᤠ᤹ ᤀᤣ᤺ᤰ ᤜᤥ᤺ᤵᤐᤠᤖᤥ. ᤁᤖ ᤀᤡᤱᤃᤠ᤹ᤏᤢ ᤀᤠᤶᤒᤠᤀᤠᤱ ᤘᤠ᤹ᤖᤥ॥ 33ᤀᤡᤱᤃᤠ᤹ᤀᤥ ᤂᤡᤏᤡ᤹ ᤛᤏᤠᤖᤢᤱ ᤁᤧᤄᤥᤛᤢᤶᤗᤖᤥ ᤑᤠ᤹ᤀᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤖᤡᤰ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ ᤁᤧᤍᤢᤔᤢᤶᤗᤥ॥ ᤁᤖ ᤜᤠᤱᤜᤠᤱ ᤗ᤹ᤖᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠ᤺ᤴᤍᤢᤱᤅᤠᤱ ᤘᤠ᤹ᤀᤠᤖᤥ॥”
Currently Selected:
ᤕᤢᤜᤢᤴᤏᤠ 16: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.