ᤕᤠᤁᤢᤒ 1
1
ᤕᤠᤁᤢᤒᤗᤠᤶ ᤛᤧᤘᤠ
1ᤁᤧᤖᤧᤰ ᤗᤠᤈᤣ᤹ᤀᤥ ᤁᤧᤛᤧᤒᤠᤀᤠᤱ ᤁᤧᤘᤠ᤹ᤒᤠ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠ ᤕᤜᤢᤍᤡᤛᤣ.#᥇:᥇ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠ ᤕᤜᤢᤍᤡᤜᤠ᤹—ᤃᤪᤡᤁ ᤐᤠ᤺ᤴᤍᤠᤱᤅᤥ “ᤌᤡᤰ-ᤏᤧᤳ ᤕᤜᤢᤍᤡ ᤛᤢᤘᤠᤱᤜᤠ᤹” ᤐᤥᤱ॥ ᤏᤡᤱᤘᤠ᤹ᤑᤢᤔᤠᤱ ᤏᤢ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤛᤧᤘᤠᤖᤥᤒᤠ ᤀᤡᤱᤃᤠ᤹ ᤕᤠᤁᤢᤒᤖᤧ ᤁᤴ ᤛᤰᤀᤡᤱᤄᤱᤅᤡᤴ ᤜᤠᤰᤏᤡᤱᤒᤠᤖᤥ॥
ᤏᤛᤠᤴ ᤏᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹
2ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤁᤠᤰ ᤐᤖᤡᤰᤗᤧᤴ ᤀᤡᤏᤥᤃᤧᤴ ᤋᤢᤰᤂᤣᤀᤥ ᤁᤧᤎᤩᤧ᤹ᤀᤡᤸᤗᤧ ᤂᤧᤱᤃ ᤛᤠ᤹ᤖᤡᤰ ᤛ᤺ᤵᤔᤏᤠᤒᤠ ᤐᤠ᤺ᤴᤗᤥ ᤑᤠ᤹ᤀᤠᤱ ᤀᤡ᤺ᤳᤋᤧᤶᤔᤧ᤹ᤀᤥ. 3ᤌᤣᤀᤠᤱᤓᤧᤸᤗᤧ ᤀᤠᤰᤂᤩᤠᤖᤡᤰ ᤏᤛᤠ᤺ᤴᤛᤠᤒᤠ ᤁᤧᤈᤥᤃᤡ ᤑᤠᤀᤠᤱ ᤏᤡᤱᤘᤠ᤹ ᤛᤠ᤹ᤔᤥ ᤁᤧᤎᤩᤧ᤹ᤀᤡᤸᤗᤧ ᤂᤡᤏᤡ᤹ ᤏᤠᤛᤡ ᤌ᤺ᤵᤔᤠᤴ ᤐᤥᤖᤥ ᤁᤧᤗ᤹ᤒᤠᤴ ᤁᤧᤏᤡᤛᤢᤶᤗᤥ॥ 4ᤜᤧᤰᤁᤩᤠᤱ ᤏᤠᤛᤡ ᤌ᤺ᤵᤔᤠᤴ ᤁᤢᤗᤡᤱᤍᤥ ᤁᤧᤳᤗ ᤌᤠᤖᤡᤰ ᤐᤥᤖ ᤐᤥᤱᤗᤥ. ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤁᤧᤎᤢᤶᤒᤠ ᤏᤢ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤂᤡᤏᤡ᤹ᤀᤥ ᤁᤢᤗᤡᤱᤍᤥ ᤔᤧᤱᤃᤧᤵᤔᤏᤠᤒᤠ ᤐᤠᤴ ᤌᤣᤀᤠᤱ ᤔᤧᤒᤥᤱᤏᤧᤸᤗᤥ॥
5ᤁᤖ ᤂᤡᤏᤡ᤹ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤆᤠᤜᤠᤒᤠ ᤁᤧᤈᤥᤃᤡᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠ᤺ᤰᤋᤧᤶᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤒᤡᤖᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤁᤢᤕᤠ᤺ᤰ ᤔᤧᤸᤗᤧ᤹ᤀᤣ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤁᤧᤏᤠ᤺ᤰᤐᤠᤜᤠ᤹ ᤁᤧᤖᤧᤰ ᤐᤡᤖᤢᤛᤡ᤹ᤖᤥ॥ 6ᤁᤖ ᤁᤧᤏᤠ᤺ᤰᤐᤠᤸᤗᤧ ᤏᤠ᤺ᤰᤋᤢᤒᤠ ᤐᤠ᤺ᤴᤏᤡᤴ ᤂᤥᤛᤢᤱ ᤑᤠ᤹ᤀᤠᤱ ᤆᤵᤆᤡ ᤔᤧᤴᤈᤥ᤺ᤰᤁᤣ ᤏᤠ᤺ᤰᤋᤢᤖ ᤐᤥᤱᤗᤥ॥ ᤆᤵᤆᤡ ᤁᤧᤈᤥ᤺ᤰᤐᤠᤱᤃ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤔᤢ᤺ᤳᤋᤢᤸᤗᤧ ᤘᤠᤜᤱᤅᤥ ᤁᤧᤒᤥ᤺ᤰᤐᤠ ᤘᤠᤓᤧᤸᤗᤧᤱᤅᤡᤴ ᤁᤢᤀᤡᤛᤡᤰ ᤕᤥ ᤏᤠ ᤌᤥᤒᤠ ᤐᤥᤱᤗᤥ॥ 7ᤜᤧᤰᤁᤣᤗ᤹ᤖᤡᤰ ᤆᤵᤆᤡ ᤁᤧᤈᤥ᤺ᤰᤐᤠ ᤔᤏᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤀᤥᤗᤠᤶ#᥇:᥍ ᤃᤪᤡᤁ ᤐᤠ᤺ᤴᤍᤠᤱᤅᤥ “ᤁᤢᤖᤡᤀᤥᤛ” ᤛᤢᤳᤗᤠᤴ ᤛᤠᤵᤋᤧᤀᤠᤱ ᤐᤳ॥ ᤕᤠᤁᤢᤒᤖᤧ “ᤁᤢᤖᤡᤀᤥᤛ” ᤐᤠ᤺ᤳᤋᤢᤒᤧᤴ ᤕᤧᤛᤢ ᤂᤪᤡᤛ᤻ᤋᤧᤴ ᤔᤧᤳᤋᤢᤒᤠᤖᤥ. ᤁᤖ ᤁᤴ ᤐᤠ᤺ᤳᤗᤠᤀᤥ ᤂᤢᤏᤧ᤹ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤒᤠᤖᤥ॥ ᤌᤣ ᤐᤠ᤺ᤴᤏᤠᤱ ᤂᤥᤛᤢᤱ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤴᤗᤖᤥ॥ 8ᤂᤧᤱᤃ ᤁᤢᤏᤡᤱᤘᤠ᤹ ᤁᤧᤗᤠᤶᤒᤠ ᤔᤏᤠᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤠᤰ ᤆᤥᤃᤢᤒᤠ ᤕᤠ᤺ᤶᤒᤰᤁᤥ ᤆᤥᤃᤢᤱᤒᤡ ᤔᤧᤈᤥ᤺ᤰᤁᤠᤴᤒᤡ ᤗ᤹ᤖᤥ॥
ᤕᤠᤱᤛᤠ᤹ᤔᤠ ᤏᤢ ᤕᤠᤱᤛᤠᤁᤢᤴᤎᤣᤛᤠᤒᤠ
9ᤕᤠᤱᤃᤧᤛᤠ᤹ᤒᤠ ᤏᤛᤠᤏᤡᤒᤠᤴ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢᤸᤗᤧ ᤛ᤺ᤳᤗ ᤐᤥᤱᤗᤥ॥ 10ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠᤴ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤏ᤺ᤶᤏ᤺ᤶᤒᤠ ᤐᤥᤱᤅᤡᤸᤗᤧ ᤛ᤺ᤳᤗ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤡᤃᤧᤗᤧᤶᤒᤠᤀᤠᤱ ᤔᤰᤁᤧᤎᤠ ᤁᤧᤒᤣ᤺ᤰᤐᤠ ᤋᤠᤶᤓᤢᤱ ᤑᤢᤱ ᤁᤢᤀᤡᤛᤡᤰ ᤀᤡᤗᤧᤶᤒᤣ᤺ᤰᤗᤥ॥ 11ᤌᤣᤀᤠᤱᤓᤧᤸᤗᤧ ᤏᤠᤶᤛᤧᤀᤠᤱ ᤏᤠᤶᤗᤠ᤺ᤱᤔᤠᤸᤗᤧ ᤕᤠ᤺ᤴᤛᤢᤱᤅᤡᤴ ᤜᤣᤛᤢ᤹ ᤜᤧᤰᤁᤩᤠᤱ ᤑᤢᤱᤅᤡᤴᤏᤠᤱ ᤔᤰᤌᤠᤀᤠᤱ ᤏᤢᤒᤠ ᤁᤢᤎᤠ᤺ᤵᤔᤧᤴ ᤐᤣ᤺ᤰᤗᤥ॥ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤕᤠᤱᤛᤠᤁᤢᤴᤎᤣᤛᤠᤒᤠᤴᤏᤠᤱ ᤂᤢᤏᤧ᤹ ᤕᤠ᤺ᤶᤒᤰ ᤆᤥᤃᤢᤖ ᤐᤳᤋᤡᤸᤗᤧᤀᤣ ᤛᤡ ᤐᤣ᤺ᤰᤗᤥ॥
ᤀᤡᤏᤥᤃᤧᤴ ᤋᤢᤰᤂᤣ ᤏᤢ ᤜᤱᤛᤠ᤹ᤔᤠ
12ᤀᤡᤏᤥᤃᤧᤴ ᤋᤢᤰᤂᤣᤴ ᤏᤠᤛᤡ ᤁᤧᤎ᤺ᤵᤐᤧᤱᤃ ᤔᤢ᤹ᤀᤡᤛᤠᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤏᤡᤱᤘᤠ᤹ᤛᤠ᤹ᤔᤠᤀᤥ ᤌᤠ᤺ᤸᤗᤧ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤐᤥ᤺ᤰᤂᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤔᤡ᤺ᤶᤈᤡ ᤁᤧᤔᤧᤵᤐᤠᤜᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥᤃᤢᤒᤠ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧᤴ ᤋᤡᤆ᤺ᤴ ᤂᤧᤸᤗᤧ ᤂᤥᤛᤢ᤹ᤖᤥ॥ 13ᤜᤧᤰᤁᤩᤠᤱ ᤜᤱᤛᤠ᤹ᤔᤥ ᤁᤧᤎᤠᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤱᤛᤠ᤹ᤖᤠᤱᤗᤥ ᤑᤠ᤹ᤀᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤒᤠ᤺ᤳᤋᤢᤴᤗᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤑᤧᤴᤐᤠᤴ ᤗᤠᤶᤒᤠ ᤜᤱᤔᤧᤛᤠ᤹ᤏᤧᤴᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤜᤱᤔᤧᤛᤠ᤹ᤖᤢᤴᤇᤡᤴᤗᤥ॥ 14ᤁᤖ ᤁᤠᤰ ᤔᤏᤠᤜᤠ᤹ ᤀᤠᤒᤠᤅᤣ ᤑᤧᤴᤏᤡᤱᤘᤠ᤹ᤀᤡᤸᤗᤧ ᤔᤢᤖᤠ ᤔᤧᤳᤋᤢᤛᤡᤀᤠᤱ ᤜᤱᤛᤠ᤹ᤔᤥ ᤔᤧᤎᤠᤖᤥ॥ 15ᤁᤴ ᤑᤧᤴᤏᤡᤱᤘᤠ᤹ᤀᤡᤸᤗᤧ ᤀᤠᤏᤡ᤹ ᤀᤠᤕᤢᤰᤁᤠᤱ ᤗᤠᤕᤥ ᤆᤥ᤺ᤰᤔᤠ ᤀᤠᤒᤠᤱᤗᤥ. ᤜᤧᤰᤁᤩᤠᤱ ᤗᤠᤕᤥᤸᤗᤧ ᤀᤠᤏᤡ᤹ ᤛᤡᤔᤧᤴᤏᤥ ᤀᤠᤍᤣ᤹ᤖᤥ॥
16ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤀᤡᤱᤗᤧᤰᤁᤥ ᤔᤧᤎᤩᤧᤶᤔᤡᤴᤏᤧ᤹ᤀᤥ॥ 17ᤁᤠᤰ ᤏᤢᤒᤠ ᤏᤢ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤐᤷᤎᤠ᤺ᤶᤔᤡᤱᤃ ᤌᤠ᤺ᤱ ᤋᤠᤱᤛᤠᤰᤐᤥ ᤁᤧᤀᤥ᤺ᤵᤐᤠ ᤀᤥ᤺ᤳᤋᤡᤜᤠ᤹ ᤁᤧᤈᤥ᤺ᤰᤐᤠ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤕᤢᤖᤥ॥ ᤂᤧᤴ ᤀᤥ᤺ᤳᤋᤡᤜᤠ᤹ᤃ ᤛᤠᤶᤒᤪᤡ᤺ᤵᤐᤠ ᤁᤢᤀᤡᤛᤡᤰ ᤗᤧᤱᤒᤣ᤺ᤰ. ᤁᤖ ᤂᤢᤏᤧ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤱᤏᤧᤴᤗᤥ॥ 18ᤂᤢᤏᤧ᤹ ᤆᤥᤃᤢᤒᤠ ᤏᤠᤘᤠᤃᤧᤴ ᤆᤀᤡ᤺ᤳᤋᤥ ᤁᤠᤰᤏᤢ ᤋᤃᤡ ᤁᤧᤍᤢᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤆᤠᤛᤥᤰ ᤁᤢᤀᤡᤛᤡᤰ ᤀᤠᤒᤥᤱᤗ ᤑᤠ᤹ᤀᤠᤱ ᤀᤠᤒᤠᤅᤣ ᤁᤢᤏᤡᤱᤘᤠ᤹ᤀᤡᤸᤗᤧ ᤛᤧᤰᤂᤠᤒᤠ ᤁᤢᤒᤠ᤺ᤴᤈᤠᤰᤗᤠᤶ ᤁᤢᤛ᤻ᤛᤠ ᤀᤠᤈᤥᤃᤧᤀᤠᤱ ᤘᤠ᤹॥
ᤂᤧᤶᤔᤠ ᤏᤢ ᤆᤥ᤺ᤰᤔᤠ
19ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤏᤠᤄᤧᤶᤔᤠᤀᤥ ᤁᤧᤖᤧᤰ ᤆᤠᤳᤋᤧᤶᤔᤧ᤹ᤀᤥ. ᤁᤖ ᤐᤠ᤺ᤵᤔᤠᤀᤥ ᤏᤢ ᤛᤡᤰ ᤐᤥ᤺ᤰᤔᤠᤀᤥ ᤛᤢ᤺ᤛᤧᤶᤔᤧ᤹ᤀᤥ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 20ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤡᤰᤁᤡᤸᤗᤧ ᤀᤠᤵᤑᤠᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤛᤠᤶᤕᤥᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤴᤇᤢᤰᤋᤢᤶᤔᤡᤸᤗᤥ॥ 21ᤂᤧᤸᤗᤧᤆᤥᤃᤢᤸᤗᤧ ᤋᤠᤵᤑᤧ᤺ᤶᤒᤠ ᤏᤢ ᤛᤡᤰᤁᤧᤗᤧ᤺ᤱᤒᤠ ᤐᤠ᤺ᤴᤜᤠ᤹ ᤗᤧᤖᤧᤶᤍᤣ᤺ᤛᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤛᤡᤰᤗᤢᤱᤔᤥ ᤗᤣ᤺ᤳᤋᤢᤒᤠ ᤂᤡᤏᤡ᤹ ᤋᤠᤱᤛᤧ᤺ᤵᤔᤠ ᤁᤧᤛᤢᤰᤐᤠ ᤁᤢᤒᤠ᤺ᤴᤈᤠᤰᤁᤡᤴ ᤂᤡᤏᤡ᤹ ᤏ᤺ᤶᤏ᤺ᤶᤔᤠᤱ ᤋᤠ᤺ᤰᤋᤧᤶᤔᤧ᤹ᤀᤥ॥
22ᤁᤖ ᤐᤠ᤺ᤴᤈᤠᤰᤁᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤆᤥᤃᤧᤶᤔᤧ᤹ᤀᤥ॥ ᤐᤠ᤺ᤴᤈᤠᤰ ᤁᤧᤄᤧᤶᤒᤠᤖᤰ ᤁᤧᤒᤥ᤺ᤰᤂᤡ᤹ᤏᤧ ᤑᤠ᤹ᤃᤪ ᤀᤠᤒᤠᤅᤣ ᤀᤡᤱᤃᤧᤗᤧᤰᤁᤠᤛᤡ᤹ᤖᤥ॥ 23ᤐᤠ᤺ᤴᤈᤠᤰᤁᤡᤴ ᤁᤧᤄᤧᤵᤛᤢᤶ ᤁᤖ ᤂᤧᤴ ᤁᤢᤀᤡᤛᤡᤰ ᤁᤧᤴᤈᤥᤃᤢᤶᤔᤡᤴᤏᤧ ᤑᤠ᤹ᤃᤪ ᤛᤧᤸᤗᤧᤱᤄᤥᤀᤥ ᤂᤡᤏᤡ᤹ ᤏᤠᤖᤠ ᤀᤥᤃᤧᤔᤧᤳᤋᤢᤶᤒᤠ ᤁᤢᤀᤡᤛᤡᤰ ᤆᤥᤰᤗᤥ॥ 24ᤂᤡᤏᤡ᤹ ᤀᤠᤒᤠᤅᤣ ᤀᤥᤃᤧᤔᤧᤳᤋᤠᤛᤡᤀᤠᤱ ᤀᤠᤏᤡᤃᤣ ᤀᤠᤰᤋᤱᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤁᤧᤏᤡᤛᤢᤶᤒᤠᤴ ᤁᤧᤒᤣᤃᤡᤏᤢᤔᤧ᤺ᤴᤏᤣ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤗᤥ॥ 25ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧᤀᤠᤱ ᤆᤥ᤺ᤰᤕᤢᤶᤓᤥ ᤁᤧᤒᤡᤒᤠ ᤛᤣᤛᤣ ᤛᤠᤶᤕᤥᤌᤡᤶᤔᤡᤴ ᤂᤧᤵᤛᤢᤀᤠᤱ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤴ. ᤁᤖ ᤂᤧᤸᤗᤧ ᤆᤰᤔᤧᤸᤗ᤹ᤀᤣ ᤏᤢᤖᤡᤰ ᤀᤥᤔᤧᤳᤋᤢᤀᤠᤱ ᤂᤧᤵᤛᤢᤒᤠ ᤐᤠ᤺ᤴᤜᤠ᤹ ᤆᤥᤃᤢ᤹. ᤂᤧᤸᤗᤧ ᤆᤥᤃᤢᤒᤠ ᤁᤠᤰ ᤁᤢᤕᤠ᤺ᤶᤒᤰᤁᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤢ᤹ᤀᤡᤛᤠᤶ ᤐᤡᤖᤢ᤹ᤖᤥ॥
26ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤛᤠᤶᤕᤥᤛᤠᤒᤠ ᤆᤥ᤺ᤰᤁᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢ᤹. ᤁᤖ ᤁᤢᤗᤧᤛᤥ᤺ᤵᤐᤧᤴ ᤕᤢᤰᤁᤥ ᤔᤧᤃᤳᤋᤢᤴᤏᤧ ᤑᤠ᤹ᤃᤪ ᤂᤧᤱᤃ ᤀᤡᤱᤗᤧᤰᤛᤡᤱᤅᤠᤱ ᤂᤧᤸᤗᤧ ᤁᤢᤛᤠᤶᤕᤥ᤺ᤱᤃ ᤜᤏᤧᤖᤰ ᤐᤥᤱᤗᤥ॥ 27ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤧᤴᤍᤡᤱ ᤆᤥᤃᤢᤒᤠ ᤛᤢᤳᤌᤥ ᤏᤢ ᤛᤣᤛᤣᤒᤠ ᤛᤠᤶᤕᤥᤛᤠᤒᤠ ᤐᤥᤱᤔᤠᤱᤃ ᤒᤠ ᤁᤴᤗᤥ—ᤕᤧᤳᤇᤠᤒᤠᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ ᤂᤢᤏᤡ᤹ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ᤀᤥ ᤁᤶᤒᤪᤠᤱ ᤔᤧᤵᤔᤠᤛᤡ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤵᤔᤡ ᤁᤧᤈᤡ᤺ᤶᤒᤠ ᤐᤠ᤺ᤴᤜᤠ᤹ᤗᤠᤶ ᤔᤠ᤺ᤱᤄᤠ ᤘᤠ᤹ᤔᤠᤖᤥ॥
Currently Selected:
ᤕᤠᤁᤢᤒ 1: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.