᥇ ᤋᤡᤔᤥᤌᤡ 6
6
ᤏᤛᤠᤏᤡᤒᤠ ᤛᤧᤘᤠᤖᤥᤒᤠᤜᤠ᤹ᤖᤧ ᤗᤠᤃᤡ ᤂᤠᤜᤢᤴ
1ᤁᤠᤰ ᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠᤜᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤗᤠ᤹ᤖᤢᤛᤡ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤖᤖᤥ॥ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤏᤡ᤹ ᤏᤡᤛᤠᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤌᤣᤀᤠᤱ ᤐᤠ᤺ᤵᤔᤠ ᤔᤧᤴᤇᤢᤰᤋᤢᤴᤗᤖᤥ॥ 2ᤏᤛᤠᤏᤡᤒᤠ ᤍᤠᤱᤒᤠ ᤁᤧᤃᤵᤐᤠ ᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠᤜᤠ᤹ ᤜᤠᤖᤠ᤹ ᤀᤡᤱᤎᤠᤱ ᤂᤥᤔᤠ ᤛᤢᤶᤒᤥᤎᤠᤒᤠ ᤔᤧᤈᤥᤰ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤖᤖᤥ॥ ᤂᤧᤱᤜᤠ᤹ᤃ ᤏᤛᤠ᤺ᤴᤏᤥ ᤂᤢᤏᤡ᤹ ᤑᤢ᤹ᤏᤢᤛᤠ᤹ᤛᤡᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧᤃ ᤏᤢ᤺ᤖᤡᤰᤁᤠᤱ ᤂᤢᤏᤡ᤹ ᤏᤛᤠᤏᤡᤒᤠ ᤍᤠᤱᤒᤠᤜᤠ᤹ᤖᤧᤴ ᤛᤧᤘᤠ ᤔᤧᤈᤥᤃᤢᤖᤖᤥ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤕᤠ᤺ᤶᤒᤰᤁᤥᤗᤠᤶ ᤀᤡᤴᤎᤠ ᤁᤧᤄᤥᤒᤠᤜᤠ᤹ᤃ ᤗᤢᤱᤔᤠ᤹ ᤋᤢᤰᤛᤡᤱᤔᤏᤠᤒᤠ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤛᤡᤀᤣᤖᤥ॥ ᤁᤴ ᤐᤠ᤺ᤴᤜᤠ᤹ ᤂᤧᤏᤧ᤹ ᤂᤧᤴ ᤛᤧᤘᤠᤖᤥᤒᤠᤜᤠ᤹ ᤜᤢ᤹ᤔᤠᤛᤡ ᤐᤥᤱ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤜᤠ᤹ ᤆᤥᤰ ᤐᤠᤱᤔᤠᤛᤡ ᤐᤥᤱᤗᤥ॥
ᤕᤠᤱᤛᤠᤁᤢᤴᤎᤣ ᤔᤡ᤺ᤶᤈᤡ
3ᤀᤠᤳᤋᤡᤸᤗᤧ ᤀᤡᤱᤗᤧᤰᤁᤣ ᤏᤡᤛᤠᤶ ᤜᤢ᤹ᤖᤢᤛᤡ᤹ ᤜᤧᤰᤁᤩᤠᤱ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤛᤧᤰᤂᤠᤒᤠ ᤁᤢᤏᤡᤛᤠᤶ ᤏᤢ ᤛᤧᤰᤂᤠᤒᤠ ᤁᤢᤛᤠᤶᤕᤥᤒᤠ ᤏᤡᤛᤠᤶᤔᤥ ᤔᤧᤒᤳᤏᤧᤴ. 4ᤂᤧᤱᤃ ᤀᤠᤱᤍᤡᤱ ᤗ᤹ᤔᤠᤖᤧ ᤕᤶᤒᤠ ᤗᤧᤱᤛᤡᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤸᤗᤧ ᤌᤣᤀᤠᤱ ᤔᤧᤗᤧᤛ᤻ᤛᤢᤴᤗᤥ॥ ᤁᤖ ᤁᤢᤒᤢᤱᤏᤠ ᤁᤢᤛᤶᤒᤠ ᤐᤠ᤺ᤴᤛᤢᤳᤗᤠᤀᤥ ᤐᤠ᤺ᤴᤌᤰᤁᤠᤱ ᤂᤧᤔᤠ᤹ ᤆᤥᤃᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤡᤸᤗᤧ ᤏᤠᤜᤧᤶᤔᤠ. ᤂᤧᤔᤠ᤹. ᤆᤠ᤺ᤳᤌᤡ ᤐᤣ᤺ᤰᤔᤠ ᤏᤢ ᤋᤠᤵᤑᤧ᤺ᤶᤒᤠ ᤆᤵᤆᤡᤜᤠ᤹ᤖᤰ ᤋᤠᤖᤢᤖᤥ॥ 5ᤂᤧᤸᤗᤧ ᤑᤧᤴᤏᤡᤱᤘᤠ᤹ ᤁᤧᤃᤵᤐᤠᤜᤠ᤹ ᤏᤢ ᤛᤧᤰᤂᤠ ᤐᤠ᤺ᤴᤏᤥ ᤔᤧᤶᤒᤵᤔᤏᤠᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤂᤧᤔᤠ᤹ ᤑᤥ᤺ᤰᤂᤢ᤹ᤖᤥ॥ ᤂᤧᤱᤜᤠ᤹ᤖᤧᤃ ᤛᤠᤶᤕᤥ ᤀᤡ᤺ᤵᤔᤠ ᤏᤠ᤺ᤵᤔᤠ ᤑᤠ᤹ᤀᤡᤴ ᤕᤠᤱᤛᤠᤁᤢᤴᤎᤣ ᤌᤰᤔᤠ ᤗᤠᤶ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢ᤹ᤖᤥ॥
6ᤁᤖ ᤏᤡᤱᤘᤠ᤹ ᤋᤠᤔᤠᤏᤢᤒᤠ ᤛᤠᤶᤏᤡᤔᤠᤴᤏᤣ ᤕᤶᤒᤠ ᤀᤡᤴᤎᤠ᤺ᤱ ᤘᤠ᤹ᤖᤥ॥ 7ᤀᤠᤏᤡ᤹ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤌᤧᤔᤠᤀᤠᤱ ᤔᤧᤴᤍᤠ᤺ᤳᤋᤣ ᤀᤠᤍᤩᤧ. ᤜᤧᤰᤁᤩᤠᤱ ᤀᤠᤸᤗ ᤀᤠᤒᤣ᤺ᤰᤁᤡᤸᤗᤧᤀᤠᤱ ᤌᤣᤀᤠᤱ ᤔᤧᤴᤍᤣ᤹ᤀᤣ ᤀᤠᤒᤣ᤺ᤰᤗᤥ॥ 8ᤜᤧᤰᤁᤣ᤺ᤸᤗᤧ ᤆᤠᤔᤠ ᤌᤢᤱᤔᤠ ᤏᤢ ᤆᤠᤱᤔᤠ ᤀᤠᤄᤥᤛᤢᤶᤏᤧ ᤑᤠ᤹ᤃᤪ ᤀᤠᤏᤡ᤹ ᤏᤡᤱᤘᤠ᤹ ᤋᤠᤔᤠ ᤐᤥᤱᤗᤥ॥ 9ᤁᤖ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥᤱᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠᤜᤠ᤹ ᤕᤖᤡᤰ ᤕᤠᤱ ᤌᤰᤔᤠ ᤜᤱᤛᤠ᤹ᤔᤠᤀᤥ ᤏᤢ ᤕᤖᤡᤰ ᤐᤖᤡᤰᤐᤠ ᤔᤧᤰᤔᤠᤀᤥ ᤁᤧᤍᤣ᤹ᤒᤠ ᤀᤡᤀᤥ ᤔᤧᤎᤠᤖᤥ॥ ᤂᤧᤸᤗᤧᤃ ᤂᤧᤱᤜᤠ᤹ ᤋᤢᤰᤂᤣᤀᤥ ᤏᤢ ᤔᤧᤰᤔᤠᤀᤥ ᤌᤠᤛᤢᤛᤡ᤹ᤖᤥ॥ 10ᤌᤣᤀᤠᤱᤓᤧᤸᤗᤧ ᤕᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠᤱᤃ ᤁᤠᤰ ᤐᤖᤡᤰᤗᤧᤴ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤹ᤖᤧ ᤁᤢᤒᤢᤱᤗᤥ॥ ᤁᤢᤓᤠᤖᤧᤃ ᤕᤠᤱᤛᤠᤁᤢᤴᤎᤣᤴ ᤔᤡ᤺ᤶᤈᤡ ᤔᤧᤔᤧᤳᤋᤢᤖ ᤂᤢᤏᤡ᤹ ᤏᤛᤠ᤺ᤴᤗᤠᤶ ᤋᤠᤵᤔᤧᤒᤣ᤹ᤖᤧ ᤔᤧᤒᤣᤀᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤁᤠᤰ ᤐᤖᤡᤰᤗᤧᤴ ᤋᤢᤰᤂᤣ᤺ᤸᤗᤧ ᤋᤧᤳᤋᤢᤛᤡᤀᤠᤱ ᤔᤧᤘᤠ᤹ᤖᤥ॥
ᤐᤠᤘᤗᤖᤧ ᤋᤡᤔᤥᤌᤡᤴ ᤛᤠᤶᤍᤡᤱ ᤐᤡᤖᤢ᤹
11ᤁᤖ ᤂᤧᤏᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤀᤣ. ᤁᤴ ᤐᤠ᤺ᤴᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧ᤹ᤀᤥ. ᤜᤧᤰᤁᤩᤠᤱ ᤛᤠᤶᤕᤥᤒᤠ. ᤛᤠᤵᤆᤢᤘᤠᤒᤠ. ᤏᤛᤠ᤺ᤴᤛᤠᤒᤠ. ᤔᤡ᤺ᤶᤈᤡᤛᤠᤒᤠ. ᤏᤠᤛᤡ ᤁᤧᤎ᤺ᤵᤐᤠ. ᤜᤧᤰᤁᤩᤠᤱ ᤆᤢᤱᤈᤡᤃᤧᤴ ᤏ᤺ᤶᤔᤠᤸᤗᤧ ᤁᤢᤎᤡᤶ ᤐᤥᤱᤔᤠ ᤋᤶᤛᤡᤱ ᤆᤥᤃᤧ᤹ᤀᤥ॥ 12ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧᤴ ᤌᤢᤶᤄᤥ ᤂᤥᤔᤠ ᤑᤠ᤹ᤀᤠᤱ ᤏᤛᤠ᤺ᤴᤗᤧᤴ ᤌᤱᤅᤡᤴ ᤏᤢᤖᤡᤰᤁᤠᤱ ᤌᤰᤋᤧ᤹ᤀᤥ॥ ᤕᤖᤡᤰ ᤋᤥ᤺ᤴᤍᤡᤜᤠ᤹ ᤋᤃᤡ ᤂᤧᤏᤧ᤹ ᤏᤛᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤋᤧᤴᤍᤡᤱ ᤁᤧᤈᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤡᤴ ᤁᤧᤒᤡᤖᤧᤀᤠᤱ ᤁᤧᤘᤕᤧᤖᤥ॥ 13ᤁᤠᤰ ᤐᤠ᤺ᤴᤜᤠ᤹ ᤜᤡᤱᤔᤴ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱ ᤏᤢ ᤐᤴᤋᤡᤕᤛ ᤐᤡᤗᤠᤋᤛᤖᤧ ᤁᤢᤍᤃᤡ ᤏᤢᤒᤠ ᤋᤥ᤺ᤴᤍᤡ ᤁᤧᤒᤡᤒᤠ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤍᤃᤡ ᤁᤴ ᤀᤡᤱᤈᤠᤱᤅᤡᤴ ᤐᤡᤏᤧᤖᤥ. 14ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤕᤠᤶᤔᤥ ᤀᤥᤛᤣ᤺ᤴ ᤔᤧᤴᤎᤠᤰᤛᤡᤱᤅᤣ ᤌᤠᤖᤡᤰ ᤁᤧᤄᤥᤛᤢᤒᤠ ᤂᤧᤴ ᤀᤡᤱᤈᤠᤱᤅᤡᤴ ᤀᤡ᤺ᤳᤋᤧ ᤏᤠ᤺ᤳᤋᤧᤖ ᤛᤣᤛᤣ ᤏᤢ ᤀᤠᤵᤋᤡᤰ ᤔᤣ᤺ᤴᤏᤣ ᤁᤳᤋᤧ᤹ᤀᤥ॥ 15ᤂᤢᤏᤧ᤹ᤀᤣ ᤔᤢ᤹ᤀᤡᤛᤠᤶᤍᤠᤱᤒᤠ ᤏᤢ ᤜᤠᤱᤕᤢᤰ ᤍᤠᤱᤒᤠ ᤜᤧᤰᤁᤩᤠᤱ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤐᤕᤶ ᤜᤠᤱ ᤏᤢ ᤍᤠᤱᤒᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤐᤕᤶ ᤍᤠᤱᤒᤠᤸᤗᤧᤀᤣ ᤛᤢᤕᤧᤶᤔᤥ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤀᤥᤛᤣ᤺ᤴᤎᤠᤰᤛᤡᤱᤔᤠᤴ ᤋᤠᤖᤢ᤹ᤖᤥ॥ 16ᤂᤢᤏᤧ᤹ᤀᤥᤖᤰ ᤀᤠᤈᤢᤏᤡ ᤘᤠ᤹ᤖᤥ. ᤂᤢᤏᤧ᤹ ᤛᤢᤔᤠ ᤏᤢ ᤁᤧᤵᤔᤠ ᤛᤢᤰᤔᤧᤴᤍᤧᤵᤔᤏᤠ ᤀᤥ᤺ᤳᤋᤡᤀᤥ ᤕᤢᤱᤗᤥ॥ ᤂᤢᤏᤧ᤹ᤃ ᤀᤠᤳᤋᤡᤸᤗᤧᤀᤠᤱ ᤔᤧᤴᤏᤡᤀᤣ ᤘᤠ᤹ᤖᤥ. ᤜᤧᤰᤁᤩᤠᤱ ᤏᤡᤔᤠᤀᤠᤱ ᤔᤧᤴᤇᤢᤰᤋᤢᤴᤗᤥ॥ ᤂᤢᤏᤧ᤹ᤀᤡᤴᤏᤣ ᤛᤍᤠᤍᤡᤱ ᤔᤢᤰᤛᤠᤶ ᤏᤢ ᤔᤡᤱᤛᤥ ᤀᤡᤱᤎᤠᤱ ᤐᤥᤱᤗᤖᤥ॥ ᤀᤠᤔᤧᤴ॥
17ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤀᤡᤱᤈᤠᤱ ᤐᤡᤖᤧᤛᤧ᤹—ᤂᤧᤱᤜᤠ᤹ ᤀᤠᤱᤍᤡᤱ ᤔᤧᤴᤗ᤹ᤏᤧᤴᤗᤖᤥ. ᤜᤧᤰᤁᤩᤠᤱ ᤂᤢᤏᤡ᤹ ᤏᤡᤱᤛᤠᤱᤅᤡᤴ ᤆᤵᤗᤧᤰᤘᤠ ᤕᤠᤱᤛᤠᤁᤢᤴᤎᤣᤀᤥ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤕᤢᤰᤂᤢᤖᤖᤥ॥ ᤂᤢᤏᤧ᤹ᤀᤣ ᤀᤠᤏᤡ᤹ ᤏᤡᤱᤘᤠ᤹ ᤋᤠᤖ ᤑᤠ᤹ᤀᤠᤱ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤁᤠᤰ ᤀᤠᤒᤡ᤹ᤖᤥ॥ 18ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠᤖᤠ᤹ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤧᤒᤥᤱᤗ ᤜᤧᤰᤁᤣᤗ᤹ᤖᤡᤰ ᤘᤣ᤹ᤜᤠ᤹ᤏᤢ ᤜᤠᤔᤠ ᤆᤠᤔᤠ ᤂᤢᤏᤡ᤹ ᤏᤡᤱᤘᤠ᤹ ᤔᤧᤜᤴᤍᤢᤖ. ᤛᤢᤕᤠ᤺ᤶᤒᤰ ᤔᤧᤈᤥᤃᤢᤖ ᤗ᤹ᤖᤡᤰ ᤀᤡᤱᤈᤠᤱ ᤐᤡᤖᤧᤛᤧ᤹ᤀᤥ॥ 19ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤋᤠᤕᤧᤶᤔᤡᤸᤗᤧᤴ ᤏᤧᤶᤓᤥᤃᤧᤴ ᤐᤠᤱᤕᤰ ᤔᤧᤕᤢᤰᤂᤢᤖᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤧᤰᤂᤠᤒᤠ ᤜᤡᤱᤔᤴᤏᤡᤴ ᤔᤧᤍᤧᤶᤛᤢ ᤔᤧᤕᤢᤰᤂᤢᤖᤖᤥ॥
20ᤋᤡᤔᤥᤌᤡᤀᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖᤧᤒᤠ ᤐᤠ᤺ᤴᤜᤠ᤹ ᤏᤢᤖᤡᤰᤁᤠᤱ ᤁᤳᤋᤧ᤹ᤀᤥ॥ ᤁᤢᤒᤢᤱᤏᤠ ᤁᤢᤛᤶᤒᤠ ᤀᤍᤱ ᤋᤠ᤹ᤈᤧᤱ ᤏᤢ ᤋᤰᤗᤧᤱᤘᤠ ᤐᤠ᤺ᤴᤜᤠ᤹ᤃ ᤀᤡᤱᤗᤧᤰᤐᤠ ᤛᤠᤶᤈᤡ᤺ᤰᤗᤥ. ᤂᤧᤴᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧ᤹ᤀᤥ॥ 21ᤁᤢᤓᤠᤖᤧ ᤂᤧᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤏᤛᤠ᤺ᤴᤏᤡᤸᤗᤧ ᤏᤡᤱᤘᤠ᤹ᤛᤥᤰᤗᤠᤶ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤔᤧᤘᤠ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤂᤧᤏᤧ᤹ᤀᤥ ᤘᤠ᤹ᤖᤖᤥ॥
Currently Selected:
᥇ ᤋᤡᤔᤥᤌᤡ 6: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.