᥇ ᤕᤢᤜᤢᤴᤏᤠ 2
2
ᤀᤠᤏᤡ᤹ ᤁᤢᤓᤠ᤹ ᤁᤧᤒᤡᤒᤠ ᤂᤪᤡᤛ᤻ᤋ
1ᤀᤠᤔᤡ᤺ᤶ ᤀᤠᤛ᤻ᤛᤠᤛᤣ. ᤂᤡᤏᤡ᤹ ᤗᤠᤕᤥ ᤔᤧᤈᤥᤃᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥ ᤁᤖ ᤁᤢᤓᤠᤖᤧ ᤗᤠᤕᤥ ᤔᤧᤈᤥᤃᤢᤛᤠᤱ ᤀᤠᤏᤡ᤹ ᤗᤠᤃᤡ ᤁᤧᤒᤠ᤺ᤵᤐᤠ ᤁᤧᤒᤡᤒᤠ ᤛᤠᤶᤕᤥᤒᤠ ᤕᤧᤛᤢ ᤂᤪᤡᤛ᤻ᤋᤧᤴ ᤀᤠᤏᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤀᤠᤄᤥᤛᤢᤶᤗ ᤑᤠ᤹ᤀᤠᤱ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢ᤹ᤖᤥ॥ 2ᤀᤠᤏᤡ᤹ ᤗᤠᤕᤥᤴ ᤗᤧᤵᤔᤡ ᤐᤡᤔᤠᤖᤧ ᤗᤠᤃᤡ ᤂᤢᤏᤧ᤹ ᤛᤡᤍᤢᤱᤈᤓᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤕᤥᤖᤧ ᤗᤠᤃᤡᤖᤰᤃ ᤔᤣ᤺ᤴ. ᤁᤖ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤖᤧ ᤗᤠᤃᤡᤀᤠᤱ ᤂᤢᤏᤧ᤹ ᤛᤩᤧᤒᤠᤖᤥ॥
3ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤏᤧ ᤑᤠ᤹ᤃᤪ ᤂᤢᤏᤧ᤹ ᤏᤢ᤺ᤖᤡᤰᤁᤠᤱ ᤁᤢᤛᤡᤱ ᤀᤠᤏᤡ᤺ᤳᤋᤢᤶ ᤁᤧᤗ᤹ᤒᤠᤴ ᤛᤧᤰᤂᤠ ᤀᤠᤏᤡᤛᤢᤶᤗᤥ॥ 4ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱ ᤗ᤹ᤖᤡᤰ ᤁᤧᤒᤠ᤺ᤵᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤜᤠ᤹ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴᤏᤧ ᤑᤠ᤹ᤃᤪ ᤂᤧᤴ ᤔᤏᤠᤴ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤖᤥ. ᤜᤧᤰᤁᤩᤠᤱ ᤂᤧᤸᤗᤥ ᤛᤧᤰᤂᤠᤴ ᤜᤥᤵᤗᤥ 5ᤁᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤀᤣ ᤛᤠ᤹ᤖᤡᤰ ᤔᤡ᤺ᤶᤈᤡ ᤔᤧᤳᤋᤢ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤠᤘᤠ᤹ ᤁᤧᤗ᤹ᤒᤠᤴ ᤀᤠᤏᤡᤛᤢᤶᤗᤥ॥ 6ᤏᤡᤱᤘᤠ᤹ᤑᤢᤔᤠᤱᤅᤥ ᤘᤠ᤹ᤀᤠ ᤗ᤹ᤖᤡᤰ ᤁᤧᤒᤠ᤺ᤵᤐᤠᤸᤗᤧ ᤕᤧᤛᤢᤖᤧ ᤆᤥᤃᤢᤒᤠ ᤁᤢᤀᤡᤛᤡᤰ ᤆᤥᤃᤢᤖ ᤘᤠ᤹ᤖ ᤐᤥᤱᤗᤥ॥
ᤁᤢᤛᤱ ᤀᤡᤱᤈᤠᤱ
7ᤀᤠᤔᤡ᤺ᤶ ᤀᤠᤴᤈᤢᤶᤛᤣ. ᤁᤴ ᤛᤠᤵᤋᤢᤱᤒᤠ ᤀᤡᤱᤈᤠᤱᤅᤡᤴ ᤁᤢᤛᤱ ᤀᤡᤱᤈᤠᤱᤃ ᤔᤣ᤺ᤴᤗᤥ॥ ᤁᤱᤃ ᤀᤢᤴᤇᤥ᤺ᤴᤏᤠᤱᤎᤥ ᤂᤡᤏᤡ᤹ᤏᤢᤀᤣ ᤁᤧᤘᤠ᤹ᤒᤠ ᤁᤧᤕᤢ᤺ᤒᤠ ᤀᤡᤱᤈᤠᤱᤗᤥ॥ ᤁᤴ ᤀᤢᤴᤇᤥ᤺ᤴᤒᤠ ᤀᤡᤱᤈᤠᤱᤅᤡᤱᤃ ᤁᤧᤄᤧᤵᤛᤢᤶ ᤁᤧᤛᤢᤖᤢᤶᤒᤠ ᤐᤠ᤺ᤴᤈᤠᤰᤗᤥ॥ 8ᤜᤧᤰᤁᤣᤛᤠᤱ ᤁᤴ ᤛᤠᤵᤋᤢᤱᤒᤠ ᤀᤡᤱᤈᤠᤱᤅᤡᤱᤃ ᤁᤢᤛᤱ ᤜᤧᤰᤋᤱᤒᤠ ᤆᤥᤰ—ᤂᤧᤸᤗᤧ ᤁᤢᤛᤧᤰᤂᤠ᤺ᤱᤃ ᤂᤪᤡᤛ᤻ᤋᤀᤥ ᤏᤢ ᤂᤡᤏᤡ᤹ᤀᤥ ᤏᤡᤎᤠ᤺ᤒᤧᤀᤠᤱ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤴ ᤗᤧᤰᤐᤣ᤺ᤰᤗ ᤐᤳ. ᤜᤧᤰᤁᤩᤠᤱ ᤛᤧᤰᤂᤠᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤋᤃᤡᤏᤢᤀᤣ ᤀᤥ᤺ᤳᤗ ᤘᤠ᤹ᤖᤥ॥ 9ᤀᤡᤱᤃᤠ᤹ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤘᤠ᤹ᤀᤠ ᤗ᤹ᤖᤡᤰ ᤁᤧᤒᤠ᤺ᤵᤐᤠᤸᤗᤧ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤆᤡ᤺ᤳᤋᤢᤛᤡ᤹ᤏᤧ ᤑᤠ᤹ᤃᤪ ᤂᤧᤱᤃ ᤀᤠᤸᤗ ᤌᤠᤖᤡᤰᤛᤠᤱ ᤔᤠᤰᤆᤡᤃᤧᤴ ᤂᤠᤍᤠᤶᤔᤥᤀᤣ ᤘᤠ᤹ᤖᤥ॥ 10ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤐᤧᤱᤃ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡᤀᤥ ᤘᤠ᤹. ᤜᤧᤰᤁᤩᤠᤱ ᤘᤣ᤹ᤜᤠ᤹ ᤁᤧᤄᤒᤠ ᤐᤠᤴ ᤂᤢᤏᤧ᤹ᤀᤥ ᤌᤣᤀᤠᤱ ᤜᤥᤵᤗᤥ॥ 11ᤁᤖ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ ᤁᤧᤈᤡ᤺ᤵᤐᤠᤱᤃ ᤂᤠᤍᤠᤶᤔᤥ ᤘᤠ᤹. ᤜᤧᤰᤁᤩᤠᤱ ᤂᤠᤍᤠᤶᤔᤥ ᤗᤠᤱᤄᤣ᤺ᤰᤁᤡᤸᤗᤧ ᤂᤢᤏᤧ᤹ ᤀᤠᤳᤋᤠᤴ ᤗᤧᤵᤔᤠᤱ ᤐᤣ᤺ᤰᤗ ᤐᤳ ᤌᤣᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤠᤍᤠᤶᤔᤠᤸᤗᤧ ᤂᤧᤴ ᤂᤠᤔᤧᤴᤏᤡ᤺ᤔᤏᤠᤒᤠ ᤆᤥᤃᤢᤍᤣᤛᤢᤀᤠᤱ ᤘᤠ᤹ᤖᤥ॥
12ᤀᤠᤔᤡ᤺ᤶ ᤜᤡᤴᤈᤠ᤹ᤒᤡᤳᤇᤠᤛᤣ. ᤂᤪᤡᤛ᤻ᤋᤖᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤗᤠᤶ ᤂᤡᤏᤡ᤹ ᤗᤠᤕᤥᤴ ᤗᤧᤵᤔᤡ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥
13ᤐᤠᤏᤢᤍᤡᤱ ᤐᤠᤛᤣ. ᤋᤥᤗᤡᤱᤛᤥᤔᤢᤀᤠᤱᤎᤥᤀᤣ ᤁᤧᤘᤠ᤹ᤒᤠ ᤂᤪᤡᤛ᤻ᤋᤧᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥
ᤌᤠᤱᤒᤧᤴ ᤔᤧᤴᤇᤡᤕᤠ᤹ᤛᤣ. ᤔᤠᤑᤧᤴᤛᤠᤶᤔᤡᤴ ᤂᤡᤏᤡ᤹ ᤁᤧᤏᤠ᤺ᤴᤍᤢᤶᤔᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥
14ᤀᤠᤔᤡ᤺ᤶ ᤀᤠᤛ᤻ᤛᤠᤛᤣ. ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤔᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥
ᤐᤠᤏᤢᤍᤡᤱ ᤐᤠ᤺ᤛᤣ. ᤋᤥᤗᤡᤱᤛᤥᤔᤢᤀᤠᤱᤎᤥ ᤁᤧᤘᤠ᤹ᤒᤠ ᤂᤪᤡᤛ᤻ᤋᤧᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤄᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥
ᤌᤠᤱᤒᤧᤴ ᤔᤧᤴᤇᤡᤕᤠ᤹ᤛᤣ. ᤂᤡᤏᤡ᤹ ᤁᤧᤎᤢᤶᤒᤠ ᤁᤧᤈᤥᤃᤡ᤹. ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤡᤏᤡ᤹ᤀᤥ ᤘᤠ᤹. ᤜᤧᤰᤁᤩᤠᤱ ᤔᤠᤑᤧᤴᤛᤠᤶᤔᤡᤴ ᤁᤧᤏᤠ᤺ᤴᤍᤢᤶᤔᤠᤱ ᤁᤧᤘᤕᤡᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤛᤰᤀᤡᤱᤅᤡᤴ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗ ᤐᤳᤋᤠᤖᤥ॥
ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤡ᤺ᤶ ᤔᤧᤵᤔᤠ ᤔᤣ᤺ᤴᤗᤥ
15ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠ ᤆᤡᤃᤰᤘᤠᤜᤠ᤹ ᤔᤡ᤺ᤶᤈᤡ ᤔᤧᤔᤧᤳᤋᤧᤶᤔᤡᤴᤏᤧ᤹ᤀᤥ॥ ᤀᤠᤳᤋᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤡ᤺ᤶᤈᤡ ᤔᤧᤳᤋᤢ᤹. ᤂᤧᤸᤗᤧ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡ᤺ᤶᤈᤡ ᤔᤧᤵᤔᤠ ᤔᤧᤛᤢᤰᤋᤢᤴᤗᤥ॥ 16ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤠᤕᤥᤒᤠ ᤕᤠᤶᤏᤡᤱᤘᤠ᤹ᤀᤡᤴ. ᤔᤡᤰᤗᤥ ᤗᤠᤶᤔᤠᤴ. ᤜᤧᤰᤁᤩᤠᤱ ᤁᤵᤔᤏᤠᤒᤠ ᤏᤢ ᤆᤥ᤺ᤰᤔᤏᤠᤒᤠ ᤐᤠ᤺ᤴᤏᤥ ᤜᤧᤴᤇᤡᤱᤔᤠᤴ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤔᤧᤍᤠᤏᤧᤴ. ᤁᤖ ᤂᤧᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶᤒᤠᤏᤧ ᤋᤠᤖᤥ॥ 17ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤧᤰᤁᤠᤱ ᤐᤣᤰ. ᤜᤧᤰᤁᤩᤠᤱ ᤂᤧᤸᤗᤧ ᤆᤥᤃᤢᤱ ᤑᤠ᤹ᤀᤠᤱ ᤀᤡ᤺ᤳᤋᤢ ᤛᤥ᤺ᤰᤋᤢᤒᤠ ᤐᤠ᤺ᤴᤜᤠ᤹ᤀᤠᤱ ᤗᤧᤰᤁᤠᤱ ᤐᤣᤰ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤁᤢᤀᤡᤛᤡᤰ ᤁᤧᤈᤥ᤺ᤰᤐᤠᤱᤃ ᤛᤍᤠᤍᤡᤱ ᤘᤠ᤹ᤖᤥ॥
ᤂᤪᤡᤛ᤻ᤋᤖᤧ ᤁᤢᤒᤡᤑᤩᤢᤱᤒᤠᤜᤠ᤹
18ᤀᤠᤔᤡ᤺ᤶ ᤀᤠᤛ᤻ᤛᤠᤛᤣ. ᤁᤢᤏᤢᤵᤔᤠ ᤕᤧᤶᤔᤡᤱᤃ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥ ᤂᤪᤡᤛ᤻ᤋᤖᤧ ᤁᤢᤒᤡᤑᤩᤢᤱᤅᤡᤱᤃ ᤋᤠ ᤗ᤹ᤖᤡᤰ ᤁᤧᤄᤧᤵᤛᤢᤶᤔᤠᤱ ᤁᤧᤘᤕᤡ᤹॥ ᤀᤠᤸᤗᤥᤛᤠ ᤂᤧᤴ ᤜᤧᤰᤋᤱᤒᤠ ᤂᤪᤡᤛ᤻ᤋᤖᤧ ᤁᤢᤒᤡᤑᤩᤢᤱᤜᤠ᤹ ᤕᤖᤡᤰ ᤔᤧᤍᤩᤧ ᤔᤧᤈᤢᤖᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤁᤴ ᤐᤠ᤺ᤴᤏᤥᤗᤠᤶ ᤁᤢᤏᤢᤵᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱᤅᤣ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤗᤥ॥ 19ᤂᤧᤱᤜᤠ᤹ᤃ ᤀᤠᤏᤡ᤹ᤗᤠᤶ ᤔᤧᤗ᤺ᤴᤍᤧ ᤔᤧᤒᤣ. ᤁᤖ ᤛᤧᤰᤂᤠ᤺ᤸᤗᤧᤃ ᤂᤧᤱᤜᤠ᤹ ᤀᤠᤏᤡ᤹ ᤔᤏᤠᤜᤠ᤹ ᤔᤧᤴᤘᤕᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤏᤡ᤹ ᤔᤏᤠᤜᤠ᤹ ᤔᤧᤘᤕᤧᤸᤗᤧᤃ ᤂᤧᤱᤜᤠ᤹ ᤀᤠᤏᤡ᤹ᤏᤢᤀᤣ ᤔᤧᤕᤠ᤺ᤰᤋᤧᤒᤠ ᤔᤣ᤺ᤴᤗᤥ॥ ᤁᤖ ᤂᤧᤱᤜᤠ᤹ᤖᤧ ᤐᤰᤀᤠᤶᤎᤩᤧᤀᤠᤱ ᤔᤧᤒᤣᤒᤠᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤀᤠᤏᤡ᤹ᤜᤠ᤹ ᤔᤧ᤺ᤴᤇᤡ ᤁᤧᤗ᤹ᤒᤠᤴ ᤀᤥᤛᤣ᤺ᤴᤍᤠᤱ ᤐᤥ᤺ᤰᤂᤧᤖᤥ॥ 20ᤁᤖ ᤂᤡᤏᤡ᤹ᤃ ᤛᤣᤛᤣᤒᤠ ᤂᤪᤡᤛ᤻ᤋᤖᤧ ᤛᤣᤛᤣᤔᤠᤱ ᤁᤧᤒᤡᤖᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰᤗᤧ ᤛᤧᤰᤂᤠᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ 21ᤂᤡᤏᤡ᤹ ᤛᤧᤰᤂᤠᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴ ᤑᤠ᤹ᤀᤠᤱ ᤔᤣ᤺ᤴ. ᤁᤖ ᤛᤧᤰᤂᤠᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶ ᤑᤠ᤹ᤀᤠᤱ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤗᤥ॥ ᤜᤧᤰᤁᤩᤠᤱ ᤗᤳᤇᤠ ᤀᤡᤱᤗᤧᤰ ᤐᤠ᤺ᤴᤎᤡᤰᤁᤠᤱ ᤛᤧᤰᤂᤠᤗᤠᤶ ᤔᤧᤍᤠᤏᤧᤴ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ 22ᤀᤡᤱᤃᤧᤗᤧᤰᤐᤧᤴ ᤜᤠ᤺ᤵᤐᤣ᥅ ᤕᤧᤛᤢᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤣ᤺ᤴ ᤑᤠ᤹ᤀᤠᤱ ᤁᤧᤒᤠ᤺ᤵᤐᤧᤴᤏᤣ ᤀᤡᤱᤗᤧᤰᤐᤠᤖᤥ॥ ᤀᤠᤳᤋᤡᤸᤗᤧ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤀᤠᤒᤢᤃᤧᤴ ᤁᤢᤛ᤻ᤛᤠᤴ ᤏᤠ᤹ᤖᤢᤛᤡ᤹ ᤒᤠ ᤂᤧᤴᤏᤣ ᤂᤪᤡᤛ᤻ᤋᤖᤧ ᤁᤢᤒᤡᤑᤩᤢᤱᤒᤠᤖᤥ॥ 23ᤀᤠᤒᤢᤃᤧᤴ ᤁᤢᤛ᤻ᤛᤠᤴ ᤁᤧᤏᤠ᤹ᤒᤧᤸᤗᤧ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤠ᤹ᤖᤢ᤹. ᤁᤖ ᤀᤠᤒᤢᤃᤧᤴ ᤁᤢᤛ᤻ᤛᤠᤴ ᤋᤧᤴᤍᤡᤱ ᤁᤧᤈᤥ᤺ᤰᤐᤠᤸᤗᤧ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤋᤧᤴᤍᤡᤱ ᤆᤥᤃᤢ᤹ᤖᤥ॥
24ᤜᤧᤰᤁᤣ᤺ᤸᤗᤧ ᤏᤛᤠᤏᤡᤒᤠ ᤁᤧᤒᤥ᤺ᤰᤂᤡᤀᤠᤱᤎᤥᤀᤣ ᤁᤧᤄᤧᤵᤛᤢᤶᤒᤠ ᤛᤢᤏᤠᤀᤡᤱᤅᤡᤴ ᤂᤡᤏᤡ᤹ ᤛᤡᤰᤗᤢᤱᤔᤥ ᤏᤢᤖᤡᤰᤁᤠᤱ ᤕᤢᤰᤂᤧᤶᤔᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤁᤧᤕᤢᤰᤂᤢᤶᤏᤧ ᤑᤠ᤹ᤃᤪ ᤛᤍᤠᤍᤡᤱ ᤐᤠᤏᤢᤍᤡᤱ ᤐᤠ᤺ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤜᤧᤰᤁᤩᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤴᤏᤢ ᤛᤥᤖᤡᤰ ᤁᤧᤘᤕᤡ᤹ᤖᤥ॥ 25ᤜᤧᤰᤁᤩᤠᤱ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤐᤡᤏᤡᤱ ᤑᤠ᤹ᤀᤠᤱ ᤆᤥᤃᤢᤒᤠ ᤔᤠᤱᤜᤧᤰᤁᤡᤱᤃ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤥ॥
26ᤀᤡᤱᤃᤠ᤹ᤃ ᤂᤡᤏᤡ᤹ ᤀᤡᤱᤗᤧᤰ ᤁᤧᤔᤧᤵᤐᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤛᤠᤵᤋᤢᤱᤅᤠᤱ ᤜᤠᤰᤏᤡᤱᤅᤠᤱ ᤘᤠ᤹ᤖᤥ॥ 27ᤁᤖ ᤂᤡᤏᤡ᤹ᤀᤥᤃ ᤂᤪᤡᤛ᤻ᤋᤖᤧ ᤁᤧᤒᤡᤖᤡᤒᤠ ᤛᤣᤛᤣᤔᤠᤱᤅᤡᤸᤗᤧᤴ ᤔᤠᤱᤎᤢᤰᤏᤠ᤺ᤴ ᤘᤠ᤹ ᤕᤠ᤺ᤰᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤜᤢ᤹ᤒᤠ ᤜᤠ᤺ᤳᤋᤠᤱ ᤆᤠᤜᤠᤒᤠ ᤁᤧᤴᤈᤥᤃᤡᤴ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤧᤜᤢ᤹ᤖᤡ᤹॥ ᤂᤧᤴ ᤁᤧᤜᤢ᤹ᤖᤡᤒᤠ ᤐᤠ᤺ᤴᤏᤡᤱᤃ ᤀᤡᤱᤗᤧᤰ ᤔᤣ᤺ᤴᤗᤥ. ᤁᤖ ᤛᤧᤰᤂᤠᤀᤣᤖᤥ॥ ᤜᤧᤰᤁᤣ᤺ᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤁᤧᤜᤢ᤹ᤖᤡᤒᤠ ᤏᤡᤛᤠᤶᤔᤡᤴ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹ᤀᤠᤱ ᤂᤪᤡᤛ᤻ᤋᤧᤴ ᤔᤧᤸᤗᤧᤳᤋᤣ ᤘᤕᤧᤶᤔᤧ᤹ᤀᤥ॥ 28ᤀᤠᤸᤗ ᤀᤠᤔᤡ᤺ᤶ ᤀᤠᤛ᤻ᤛᤠᤛᤣ. ᤕᤧᤛᤢᤴ ᤕᤢ᤺ᤸᤗᤧ ᤔᤧᤱᤃᤡᤀᤣ ᤏᤢ ᤛᤡᤖᤡᤱ ᤔᤧᤶᤔᤀᤣ ᤂᤢᤏᤧ᤹ᤀᤥ ᤋᤥ᤺ᤴᤇᤡᤱᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤂᤪᤡᤛ᤻ᤋᤧᤴ ᤔᤧᤸᤗᤧᤳᤋᤣ ᤘᤕᤧᤶᤔᤧ᤹ᤀᤥ॥ 29ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤶᤕᤥᤒᤠ ᤆᤥᤰ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤏᤡᤛᤢᤶᤗᤥ॥ ᤜᤧᤰᤁᤣ᤺ᤸᤗᤧ ᤁᤠᤰ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥᤰᤐᤧᤴ ᤏᤡᤱᤘᤠ᤹ᤑᤢᤛᤠ ᤐᤥ᤺ᤰᤂᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴᤏᤠᤱ ᤂᤡᤏᤡ᤹ ᤁᤧᤏᤡᤛᤢᤶᤗᤥ॥
Currently Selected:
᥇ ᤕᤢᤜᤢᤴᤏᤠ 2: LIFOTNT
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.