Sofonías 1
1
Sc'aalelal yilimba Cajwaltic
1Ja' sc'op Cajwaltic te la yalbey te Sofonías, te c'alal ay ta muc' ajwalil ta Judá te Josías#2 R 22.1—23.30; 2 Cr 34.1—35.27. te snich'an Amón. Te Sofonías ja' snich'an Cusi, te ja' snich'an Gedalías, te ja' snich'an Amarías, te ja' snich'an te Ezequías.
2Tulan ya yal te Cajwaltique:
—Jc'axel me ya jlajin ta spisil
te bitic ay ta sba te balumilale.
3Ya jlajin te ants-winiquetic soc te chambalametique;
ya jlajin te mutetic soc te chayetique.
Ya sc'ojch'in sba te mach'atic amen yo'tanique;
soc ya jch'ay ta balumilal te ants-winiquetique —xi'.
Tulan ya yal xan te Cajwaltique:
4—Ya me jtoy bael jc'ab ta scontroinel te lum Judá
soc ta scontroinel spisil te mach'atic nainemic ta Jerusalén.
Ya jch'ay ta jc'axel te lotil dios Baal,
soc sbiilic te sacerdoteetic yu'une.
5Ya jlajin te mach'atic ya xmoic ta sba sna
te ya xch'uunic te eq'uetique,
soc te mach'atic ya squejan sbaic
te ay bila ya yalic ta jamal te ya stabonic ta alel jbiil a
soc sbiil te lotil dios Milcom.#2 R 23.4-14.
6Ja' nix jich ya jlajin te mach'atic ya xchebaj yo'tanic ta jtojole,
te mach'atic ma ba ya sleonic
soc ma xnoptsajic tel ta sjojc'oyel te jc'ope —xi'.
7Ch'abanic ta stojol te Cajwaltique;#Hab 2.20; Zac 2.13.
melel te sc'aalelal Cajwaltic nopol ayix tel.
Te Cajwaltic xchajbanej milbil majt'anil
soc xchajbanejbey te mach'atic yic'oje.
Jich ya yal te Cajwaltique:
8—Te sc'aalelal te milbil majt'anile
ja' ya cac'bey castigo a te jtsobwanejetic,
te mach'atic snich'nab te muc' ajwalil,
soc spisil te mach'atic ya slapic jchajp c'u'iletique.
9Ja' nix jich ja' sc'aalelal ya cac'bey castigo a
te mach'atic ya swiluntay c'axel te smarcoil ti'naile
(ja' sc'oplal te mach'atic ya yich'ic ta muc' te loc'ombae);
soc te mach'atic ya snojesic ta uts'inel soc ta lo'laywanej
te sna yajwalique —xi'.
10Tulan ya yal te Cajwaltique:
—Te bi c'aalil ya cale ya me x'aiyot stojol awetic
yu'un sc'anel coltayel c'alal ta Ti'nail yu'un Chayetic.
Ya me x'awunic te yajwal Xchebal Barrio,
soc ay me xpumlajan nax sc'op te ya xjem coel te ch'in witsetique.
11Ajc'anajanic me te ja'exe, yajwal Barrio yu'un Mortero,
melel spisil te jchonbajeletic ya me xlajic;
spisilic te mach'atic ya yaiyic manbajel ta taq'uin ya me yich'ic lajinel.
12“Ja' me yorail te ya jtsac yawil c'ajc',
yu'un ya quil spamal a te Jerusalén.
Jich me ya cac'bey castigo te ants-winiquetic
te lamal q'uinal ya yaiyic ta sc'opique,
jich bit'il vino te slamoj sbae,
te ya yal ta yo'tanic:
“Te Cajwaltic ma'yuc bila ya spas,
ni lec ni amen”, te xiique.
13Jich yu'un te sc'ulejal ya me yich' pojel loq'uel,
soc te snaic ya me yich'ic jinel.
Ya spas snaic, ja'uc me to, ma ba ya snainic;
ya sts'unic ts'usubiletic, ja'uc me to, ma ba ya yuch'beyic ya'lel —xi'.
14Nopol ayix tel smuc'ul sc'aalelal te Cajwaltique;#Is 13.6; Ez 30.2-3; Jl 1.15; Am 5.18,20; 8.9-14; Mal 3.2.
nopol ayix tel, animal nax me ya xtal.
Muc' me ya xbulan sc'opic te c'alal ya yilbeyic sc'aalelal te Cajwaltique.
Ya me xch'aub q'uinal yaiyic yu'un
asta ya x'awunic te mach'atic tulanique.
15Ja' me sc'aalelal ilimba,
mel-o'tan soc woclajel,
jinel ta jc'axel,
ijc' q'uinal soc ajc'ubal,
potsel ta tocal soc pimil axinal.
16Ja' me sc'aalelal ta oq'uesinel oq'ues soc aw
ta scontroinel te lumetic te tulanic sts'ajc'ul
soc te ay toyol balal ts'ajq'uetic yu'unique.
17Ya yal te Cajwaltique:
—Ya me cac'bey swocol te ants-winiquetique.
Jich me ya xbeenic te bit'il ma'sitetic,
melel la sle smulic ta jtojol.
Bayuc nax ya xmal xch'ich'elic jichuc tan,
soc te sbaq'uetalic jich me ya yich' tsobel
te bit'il stsa' chambalametic —xi'.
18Ta sc'aalelal yilimba te Cajwaltique,
te ants-winiquetic ma xcoltayotic yu'un te plata soc te oro yu'unique.
Melel te sc'aal yilimba Cajwaltic
ya xlilaj ta c'ajq'uel yu'un spisil te lumq'uinale.
Spisilic te mach'atic ayic ta balumilal
ajc' nax ya yich'ic jinel ta jyalel.
Currently Selected:
Sofonías 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.