Tito 1
1
Spatjibal-o'tanil
1Jo'on Pabloon te abaton yu'un te Diose, soc jpuc-c'opon yu'un te Jesucristoe, ticunbilon yu'un jich me ya staic xch'uunjel yo'tanic te mach'atic tsabilic yu'un te Diose, soc te jich ya cac'bey snopic te bit'il ay te smelelil c'ope, 2yu'un ya jmaliytic te jcuxlejaltic ta sbajt'el q'uinal. Te Dios te ma spas lote, jich yaloj ta jamal ta xjajch'ibal to tel. 3Ta ora to, te bit'il la staix yorail yu'une, jich la yaq'uix ta na'el te bila yaloj ta swenta te c'op ac'boton ta jwenta xcholele. Jich quich'oj mandal yu'un te Diose te Jcoltaywanej cu'untique. 4Ja'at Tito,#2 Co 8.23; Gá 2.3; 2 Ti 4.10. te jich c'oemat ta co'tan te bit'il mero jnich'anat ta swenta bit'il pajal ay xch'uunjel co'tantique, ac'a me yac'bat yutsil yo'tan te Jtatic Diose soc te Cajwaltic Cristo Jesuse te Jcoltaywanej cu'untique. Ac'a me xc'uxtayat, soc lamaluc me q'uinal ya awaiy yu'un spisil ora.
Te bila ya sc'an ya spas te anciano soc te jwolwaneje
5Te bit'il la quijq'uitayat jilel ta bay sq'uinal Creta, ja' swentail te ya me alajin ta chajbanel te bila quechel jilel ta chajbanele, soc ta juju-jpam lum ay me mach'atic ya awac'bey yich' yat'elic ta ancianoil yu'un te jch'uunjeletique, jich bit'il te la calbat jilel mandale. 6Te mach'a ya xju' ya yich' yat'el ta ancianoile, ja' me te mach'a ma'yuc bi quechel ta swentae, soc te jtul nax ants nujbinem ta q'uinal soque, soc te xch'uunejic Dios uuc te snich'nabe, soc te ma'yuc banti jchijil-joletic soc jch'ay-mandaletic xi' sc'oplal te snich'nabe. 7Melel te mach'a yich'oj yat'el ta jwolwanej yu'un te jch'uunjeletique, ja' swentainejbey sna sbiluc te Diose. Jich yu'un ya sc'an te ma'yuc bi quechel ta swentae, te ma toybauque, te ma jlemuc ta c'ope, te ma xyaiy yacubele, te ma c'aemuc ta xjajch'esel te c'ope, soc te ma smulan slo'layel te taq'uine. 8Ja' ya sc'an te ay yutsil yo'tan ya xnajc'anwane, te toyol yo'tan yu'un te bila lec ta pasele, te ma xjelawe, te toj yac'oj sba ta q'uinale, te ch'ulajem yo'tane, te ya sna' scomel sba ta stuquele. 9Soc ya sc'an te ma xyac' ch'ayuc ta yo'tan te lequil c'op te ac'bot snope, swenta yu'un jich me ya xju' yu'un stac'uyel a te yantic ta swenta te lequil p'ijubtesele. Soc jich me ya xju' yu'un scomel ta c'op te mach'atic ya scontroinic te lequil p'ijubtesele.#1 Ti 3.2-7.
10Melel ay tsobolic te jtoybaetique. Ya yalic jontol aiyejetic, soc ya xlo'laywanic, c'axem to xan te mach'atic yich'ojic circuncisione. 11Ya sc'an ya yich' maquel yeic te mach'atic jich ya spasique. Yu'un ay sjunal snaic te jnopojeletic te yantesbilix yo'tanic yu'unique. Yu'un ya yaq'uic ta nopel te bila ma lecuque. Scaj nax slo'layel taq'uin te jich ya spasique.
12Jich bit'il te la yalbey sc'oplal slumal te jtul j'alwanej yu'un te cretaetique: “Ta spisil te cretaetique stalel jpas-lotetic, bol chambalametic. Mero ch'ajetic, soc ja' nax ya xwe'-x'uch'ajic”, te xi' sc'oplalic yu'un. 13Melel nix a te bila la yal ta testigoe. Jich yu'un, tulan me xacom, swenta yu'un lec me ya xc'otic ta swenta xch'uunjel yo'tanic, 14soc jich ma xch'uunic jontol aiyejetic te jowil nopbil nax yu'un te judioetique, soc jich ma xch'uunic te bila smandal nax ants-winiquetic te ma ba yich'ojic ta muc' te smelelil c'ope.
15Te mach'atic utstesbil yo'tanique, yu'un nanix lec sc'oplal yu'unic spisil te bitic aye. Yan te mach'atic ma lecuc te yo'tanique, ma'yuc xch'uunjel yo'tanic, xujt' ma'yuc bi lec sc'oplal yu'unic, melel xujt' ma'yuc swentail te bila snopoj ta yo'tanique. 16Sna'ojbeyic sba ta sc'opic te Diose, ja'uc me to, chican ta yat'elic te ma ba sna'ojbeyic sbae. Boloben yo'tanic, toybaetic, xujt' ma'yuc swentail te yat'elique.
Currently Selected:
Tito 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.