Deuteronomio 1
1
Xjajch'ibal
1Te Moisés la sc'opon spisil te israeletic, ja' te c'alal ayic ta jochol taquin q'uinal a, te ay ta stojol sloq'uib c'aal yu'un muc'ja' Jordán. Ja' te ay ta suclej Arabá te nopol yiloj sba soc Suf, te ay ta olil yu'un Parán, Tofel, Labán, Hazerot soc Dizahab. 2Jajch'em ta wits Horeb c'alal ta Cades-barnea, ay bulucheb c'aal ta beentayel. Ja' ya yich' t'unel te sbelal wits Seir. 3-4Ta sbabial c'aal sjajch'el a te sbuluchebal u te sloq'uel cha'winic (40) ja'wil, te c'alal Moisés la stsalix te Sehón, te muc' ajwalil yu'un amorreoetic#Nm 21.21-30. te nainem ta lum Hesbón a, soc te Og, te muc' ajwalil yu'un lumq'uinal Basán#Nm 21.31-35. sbiil te nainem ta Astarot soc ta Edrei, te Moisés la yalbey yaiyic te israeletic spisil te bila mandalil albot yu'un Cajwaltic te ya sc'an ya spasique. 5Te c'alal ayic ta stojol sloq'uib c'aal yu'un muc'ja' Jordán a, ta slum-sq'uinal Moab, te Moisés jajch' ta yalel te mandaliletic, jich la yal:
6—Te Cajwaltic te Dios cu'untic la yalbotic ta Horeb: “Te ja'exe bayalix c'aal te li' ayex to ta witse. 7Tsoba abiluquic, baanic ta witsetic yu'un amorreoetic soc ta spisil q'uinaletic te slac'oj sba soque: ja'ic te suclej Arabá, te toyol witstiquil, te peq'uel witstiquil, te sq'uinal Néguev, te sti'il mar, te slum-sq'uinal cananeoetic, te Líbano soc c'alal ta muc'ja' Éufrates. 8Jo'on ya cac'beyexix awu'uninic te q'uinale. Baanic, ich'a ta awentaic, u'uninaic te q'uinal, te jo'on Ajwalilon awu'unic jc'axel la cal ta jamal te ya cac'bey te antiguo ame'-atatic, ja' te Abraham, Isaac soc Jacob, soc te patil alnich'anetic yu'unique”, xi' te Cajwaltique —xi' te Moisese.
La yich' yat'el juecetic
(Ex 18.13-27)
9La yal xan te Moisés:
—Ja' nix ta yorail te jich la calbeyexe: “Jo'on ta jtuquel ma ba ya xju' jwentainbelex ta apisilic. 10Melel mero bayal awal-anich'nabic la yac'beyexix te Cajwaltic te Dios cu'untique, yo'tic mero muc'ul lumexix, jich awipal c'oemex te bit'il eq'uetic ayic ta ch'ulchane. 11Te Cajwaltic te Dios yu'un te antiguo jme'-jtatic, ac'a yac' esmajanic bayal buelta xan a te bit'il ayex ta ora in to, soc ac'a yac'beyex bendición jich nix te bit'il yalojbotique. 12Pero te jo'one mero al ijc'atsil c'oem ta jwenta jtuquel ta chajbanwanej ta atojolic ta swenta te c'opetic soc tsactomba awu'unique. 13Ja' yu'un, tsaaic ta juju-jchajbex winiquetic te ay sp'ijilic, te yilojiquix spisil, soc te ay snopjibal yu'unique, swenta yu'un ya me cac'bey yat'elic ta jwentainwanej awu'unic”,#Nm 11.14-17. xoon ta atojolic.
14“Buen lec ya caiytic te bila ya awalbotique”, xaex yu'un.
15“Jich la quich' ta wenta ta juju-jchajp awu'unic te winiquetic ay sp'ijilic soc te yilojiquix spisil. La cac'bey swentainic jmil (1000) ta jtul winiquetic, ay yantic la cac'bey swentainic jo'winic (100) ta jtul, ay yantic la swentainic lajuneb yoxwinic (50) ta jtul, ay lajuntul winiquetic la swentainic, soc ay yantic la cac'bey yat'elic ta banti juju-jchajp te alumale. 16Ja' nix ta yorail a, te juecetic awu'unic la cac'bey snopic te bit'il ya x'at'ejique, jich la calbey: “Chajbanaic ta spisilic, mero stojil me xachajbanic, teme ja'ic te jun alumalic soc, o ja'ic te jyanlumetique. 17Te c'alal ya awaiyic chajbanwanej, ma me x'awaiyic tsaojel ta stojolic: pajal xachajbanic te mach'atic me'baetic soc te mach'atic jc'ulejetique, ma me ayuc mach'a x'axi'ic, melel te chajbanwanej ja' yu'un te Diose. Teme ay bila chujc'ul ya ataic ta stojolique, ticunbonic tel ta jtojol, swenta yu'un jo'on me ya jchajban”, xoon ta atojolic.
18“Ja' in to, tsobol bitic la cac'beyex anopic ta swenta te bila ya awut ya apas te at'ele.
Yat'el lajchaytul jtsajtaywanejetic
(Nm 13.1—14.4)
19“Te c'alal loc'otic tel ta Horeb, tojotic bael ta witsetic yu'un amorreoetic, jich la jch'uunbeytic a te smandal te Cajwaltic te Dios cu'untique. La jbeentaytic spisil te xiweltic sba jochol taquin q'uinal te la awilique, asta c'ootic ta Cades-barnea. 20Te c'alal tey ayotic a, jich la calbeyex: “Julotiquix tel ta witsetic yu'un amorreoetic, ja' te ya yac'botic te Cajwaltic te Dios cu'untique. 21Ja' ya yac'beyex te lumq'uinale. Ja' yu'un ochanic me jiche, nainanic a, jich nix te bit'il yaloj te Cajwaltic, ja' te Dios yu'un te antiguo jme'-jtatique. Ma me xiwex soc ma me xpejc'aj awo'tanic”, xoon. 22Pero ja'ex jich tal awalbonic: “Ja' wan lec te ayuc ya xneelajotic bael ta yoclinel te lumq'uinale. Te c'alal ya sujt' tel ta jtojoltic, te yacuc xtal yalbotic banti beil ya sc'an ya xbootic, soc banti lumil ya sc'an ya x'ochotic bael”, xaex.
23“Te bi la awalbonic, la jmulan. Jich ora la jtsaex lajchaytulex, juju-jtul ta juju-jchajp te ats'umbale. 24Ja'ic te beenic bael ta stojol te witstiquile, c'otic ta stenlej xatal q'uinal Escol. La sbeentayic sejpel te q'uinale. 25La yich'botic tel te sit ts'unubil te ay ta lumq'uinale. Jich la yalbeyic sc'oplal: “Mero lec te q'uinal ya yac'botic te Dios cu'untique”, xiic. 26Pero te ja'exe, ma la ac'an te baexe, jich la ac'axintaybeyic te mandal yu'un te Cajwaltic te Dios cu'untique.#Dt 9.23; Heb 3.16. 27Ta anaic jajch'ex ta muquen aiyej, jich la awalic: “Te Cajwaltic ma sc'anotic. La sloq'uesotic tel ta Egipto yu'un ja' nax tal yac'otic ta sc'ab te amorreoetic, swenta yu'un ya slajinotic ta jc'axel. 28Yo'tic ¿banti ya xbootic? Te mach'atic jun jlumaltic soc, ya yalic te mero bayal yipic soc te mero najt'ic te mach'atic tey ayic a, c'axem laj jichic a te bit'il jo'otique. Soc niwac lumetic laj ay yu'unic soc mero toyolic laj sjoyob ts'ajc'ul, soc ay laj la yilbeyic sts'umbal te c'ax najt'il winic Anac tey a. Ta spisil, jc'axel ya spejc'anbotic co'tantic”, xaex.
29“Te jo'one jich la calbeyex: “Ma xamel awo'tanic, ma xiwex yu'un. 30Te Cajwaltic te Dios cu'untic, ja' neel yac ta beel ta atojolic. Ja' me ya x'och ta guerra awu'unic stuquel, jich nix te bit'il la spas la awilic ta Egipto, 31soc te la spas ta jochol taquin q'uinale.#Hch 13.17-18. Te Cajwaltic te Dios cu'untic spetojex ta beel ta be li' c'alal ta banti ayotic ta ora in to, jich te bit'il tatil ya spet ta beel snich'ane”, xoon ta atojolic. 32Pero ma ba la smuc'ulin awo'tanic te Cajwaltic Dios cu'untique,#Heb 3.19. 33ja' te neelajem awu'unic te la stsa te banti ya yaq'uex ta cux-o'tane. Ta ajc'ubal chicnaj c'ajc' ta toyol yu'un la yac'beyex awilic a te be te ya at'unic baele; ta c'aaleltic la yac'beyex awilic ta swenta tocal.
Ilin Cajwaltic ta stojol Israel
(Nm 14.20-35)
34“Te c'alal la yaiybeyex ac'opic te Cajwaltique, mero bayal ilin yu'un soc jc'axel jich la yal: 35“Ma me ayuc jtuluc te amen ants-winiquetic te ya xju' ya yil te lumq'uinal la calbey ya cac'bey te antiguo sme'-statique.#Heb 3.18. 36Ja' nax ma jichuc sc'oplal cu'un stuquel te Caleb snich'an Jefone. Ja' nax me stuquel ya xju' ya cac'bey yil soc te patil alnich'anetic yu'une. Ya me xju' ya cac'bey yich'ic te q'uinal te la stec' ta yacan stuquel, swenta bit'il mero jun yo'tan la yac' sba ta jtojol jo'on te Yajwalone”, xi' te Cajwaltique.
37“Ta awentaic ja'ex, ilin ta jtojol uuc te Cajwaltique, jich la yalbon: “Ni ja'ucat ya xju' ya cac'at ochel tey ta lumq'uinal. 38Ja' me ya x'och bael ta ajelol te ajoy ta at'el Josué, te snich'an Nun. Ac'beya xan yich' yip yo'tan ta lec, melel ja' me ya yac'bey te israeletic te lumq'uinale. 39Manchuc me la awalic te ya stsaquic bael te awinamic soc te alaletic awu'unic te acontroique, pero ja'ic me te alaletic te ma to sna'ic q'uinal te ya cac' ochel ta lumq'uinale, jo'on me ya cac'bey yu'uninic. 40Yan te ja'exe, ¡sujt'anic bael ta jochol taquin q'uinal! ¡Baanic xan ta Mar Rojo!” xi' te Cajwaltique.
Tsalot c'axin-c'op israeletic
(Nm 14.39-45)
41“Te ja'exe jich la awalbonic: “La jta jmultic ta stojol te Cajwaltic, pero yo'tic ya me xbootic, ya me cac'tic guerra jich nix te bit'il yaloj mandal te Cajwaltique”, xaex. Jich la atsaquic te awat'ejibic yu'un guerra, la acuyic te ma wocoluc ya xmoex ta witse. 42La yalbon te Cajwaltic te ya calbeyex te ma xbaex ta guerra. “Ya me stsalex te acontroique, melel ma ba ya sjoinexix ta guerra te Cajwaltique”, la cutex.
43“Jo'on la calbeyex, pero ma ba la awich'bonic ta wenta. Jich la atoy abaic soc la ac'axintaybeyic smandal te Cajwaltique. Soc atoybailic moex bael ta witstiquil. 44Jich te amorreoetic, te nainemic ta witstiquile, loq'uic tel ta atojolic, jich la snutsex te bit'il xchanul xux. La stsalex ta Seir c'alal ta Horma. 45Te c'alal sujt'ex tele, la awoq'uetay abaic ta stojol te Cajwaltic, pero ma ba la yich'beyex ta wenta te awocolique. 46Ja' yu'un jilex ta nainel bayal c'aal ta jsejp q'uinal te Cades sbiile.
Currently Selected:
Deuteronomio 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.