Deuteronomio 2
2
Te jayeb ja'wil jalajic ta jochol taquin q'uinal
1“Patil bootic ta jochol taquin q'uinal, tojotic bael ta sbelal Mar Rojo, jich nix te bit'il la yalbon mandal te Cajwaltique. Jalajotic bayal c'aal ta beel ta witstiquil yu'un Seir.#Nm 21.4. 2Te Cajwaltic jich la yalbon: 3“Mero bayalix c'aal te yacalex joyetel li'to ta witsetic in to. Yo'tic ya me xbaexix ta stojol norte. 4Albeya jmandal te lume: ‘Ya me xc'axex ta slum-sq'uinal patil alnich'anetic yu'un Esaú, te nainemic ta Seir,#Gn 36.8; Nm 20.14-21. ja'ic nix achapomal. Bayal yacalic ta xiwel ta atojolic, pero tsajtaya me abaic, 5ma me xawac'beyic guerra ta stojolic, melel ma me ayuc jxujt'uc ya cac'beyex stuquel te lumq'uinal yu'unique. Melel te witstiquil yu'un Seir ja' yu'unic stuquel te patil alnich'anetic yu'un Esaú, jo'on la cac'bey yu'uninic stuquelic. 6Te ja'exe ya me atojbeyic te we'elil ya ac'anbeyic teme tuun awu'unique, soc ya me atojbeyic te ja' ya awuch'ique’, uta me”, xi' te Cajwaltique. 7Te Cajwaltic Dios awu'unique, yac'ojbeyex bendición ta spisil a te bitic apasojique. Te cha'winic (40) ja'wil ma la spijt'esex, la scanantayex ta beel tey ta muc'ul jochol taquin q'uinal, ma'yuc bila la spasex falta tey a.
8“Ta patil jajch'otic xan ta beel, bootic ta sbelal Arabá, te talem ta Elat soc Ezión-geber. Jich c'axotic ta lumq'uinaletic yu'unic te jchapomaltic, te patil alnich'anetic yu'un Esaú, te ayic ta witstiquil Seir. Tey la jsujt'es jbajtic a, la jtsactic bael te be yu'un jochol taquin q'uinal yu'un Moab. 9Te Cajwaltic jich la yalbon: “Ma me xawuts'inic soc ma me xawac'beyic guerra te moabetic, melel ja' me patil alnich'anetic yu'un te Lot.#Gn 19.37; Nm 21.10-20. Ma me xju' ya cac'beyex ni jxujt'uc te sq'uinalique. Jo'on cac'ojbey yu'uninic te q'uinal te Ar sbiile”, xi'. 10(Te lumq'uinal in to, ta namey ja' la slumalinic te emitaetic, te c'ax muq'uic soc te mero tsobolique, najt'ic jichic te bit'il sts'umbal Anac te c'ax najt'il winique. 11Te ants-winiquetic la scuyic ta sts'umbal refaimetic, ja'uc me to te moabetique, emitaetic sbiil c'ot yu'unic. 12Te jsejp q'uinal Seir ja' yu'unic ta namey te horeoetic, pero te patil alnich'anetic yu'un Esaú jc'axel la slajinic te mach'atic nainemic tey a, ja' la yich'ic te lumq'uinale. Tey jilic ta nainel a, jich nix te bit'il la spas te israeletic tey ta lumq'uinal ac'botic yu'un te Cajwaltique.) 13Soc la yal xan te Cajwaltique: “Ta ora jajch'anic ta beel, c'axanic bael ta jejch' ja' ta Zered”, xi'.
14“Te c'alal loc'otic jajch'el ta Cades-barnea, asta c'alal te bi c'aalil c'axotic ta beja' Zered, c'ax waxaclajuneb xcha'winic (38) ja'wil. Ta ora to, spisil lajiquix te winiquetic te ya x'at'ejic ta guerra te ayic ta campamento a, jich nix te bit'il jc'axel jamal albotic yu'un te Cajwaltique.#Nm 14.28-35. 15Jul ta stojolic yu'el te Cajwaltic, jich laj spisilic.
16“Te c'alal ma'yuquix cuxul jtuluc a te winiquetic ya x'at'ejic ta guerra, 17te Cajwaltic la sc'oponon, jich la yalbon: 18“Yo'tic nix ya me xc'axat bael ta sti'il sq'uinal Moab, toj me ya xbaat ta Ar. 19Pero te c'alal ya ata aba soc te amonetic, te ja' nix patil alnich'anetic yu'un Lot,#Gn 19.38. ma me xawuts'in soc ma me xawac'beyic guerra, melel ma ba ya cac'bat ni jtsaluc te lumq'uinale, melel jo'onix la cac'bey yu'uninic stuquelic”, xi'. 20(Ja' nix jich te lumq'uinal, ay ta alel te ja' yu'un refaimetic a, melel ta namey nainic tey a te refaimetique, zomzomeoetic sbiilic yu'un te amonetique. 21Muc'ul lum te mero bayalic, mero najt'ic, jichic te bit'il patil alnich'anetic yu'un Anac, pero te Cajwaltic la yac'bey slajin te amonetique. Te c'alal laj yu'unic, stalel jilic ta nainel tey ta slum-sq'uinalique. 22Te la spasique, ja' pajal soc te bila la spasic te sts'umbal Esaú, te nainemic ta Seir, te la slajinic te horeoetic, tey jilic ta nainel ta yawilic. 23Jich nix pasbotic te heveoetique, tey nainemic ta nanatic ta nopol Gaza, jc'axel la yich'ic lajinel yu'un te filisteoetic, ja' te talic ta Creta, tey jilic ta nainel a.)
24La yal xan te Cajwaltic: “¡Conic, jajch'anic ta beel, c'axanic bael ta jejch' ja' Arnón! Jo'on me ya cac'beyex ta ac'abic te amorreo-winic te Sehón sbiile, te ja' muc' ajwalil yu'un lum Hesbón, soc nix ta spisil te slum-sq'uinale. ¡Ochanic bael ta sq'uinal, ac'beya guerra ta ora! 25Ta ora bael in to ya me cac' xiwuc yo'tanic ta atojolic te yajwal lumetic ta spamal balumilale. C'alal ya xchicnaj ta alel ac'oplalic ya yaiyique, ya me xjajch'ic ta nijq'uel yu'un xiwel, ya me x'u'uninbot yo'tanic yu'un mel-o'tan”, xi'.
Israel la stsal muc' ajwalil Sehón
(Nm 21.21-30)
26“Ta jochol taquin q'uinal ta Cademot, la jticunbey c'op te Sehón te muc' ajwalil yu'un lum Hesbón, yu'un ay bi la calbey ta lec nax. 27Jich la calbey: “Ya jc'an ya xc'axon ta aq'uinal, ja' ya jt'un te muc'ul be, ma ba ya x'ochon ta yutil aq'uinal. 28Ya me jtojbat ta taq'uin te we'elil, teme ay ya xtuun cu'untic a, soc nix te ja' ya cuch'tique. Ja' nax ya jc'anbat te yacuc awac'otic c'axele, 29jich te bit'il la yac'otic c'axel te patil alnich'anetic yu'un Esaú te nainemic ta Seir, soc te moabetic nainemic ta Ar, asta ja' to teme c'axotic bael ta jejch' muc'ja' Jordán, soc teme c'ootic tey ta lumq'uinal te ya yac'botic te Cajwaltic te Dios cu'untique”, xoon ta stojol.
30“Pero te muc' ajwalil Sehón, ma ba la sc'an la yac'otic c'axel ta sq'uinal, melel ja' nix te Cajwaltic Dios cu'untic te la stulantesbey yo'tan, swenta yu'un jich ya yac'botic ta jc'abtic a, jich te bit'il c'alal ora ay to ta jwentatic.
31“Te Cajwaltic jich la yalbon: “Ta ora in to, ya me cac'bat ta ac'ab te Sehón soc ta spisil te slum-sq'uinale. Ochanix bael ta sq'uinal, u'uninbeyaic te sq'uinale”, xi'.
32“Te Sehón loc' tel soc spisil soldadoetic yu'un, tal staotic, tal yac'botic guerra ta Jahaza. 33Pero te Cajwaltic te Dios cu'untic la yac' ochuc ta jc'abtic, jich la jtsaltic soc snich'nab, soc ta spisil te soldadoetic yu'une. 34Ta spisil te lumetic yu'un och ta jc'abtic. Jich jajch'otic ta slajinel ta jc'axel, la jmiltic winiquetic, antsetic, soc alaletic, ma'yuc mach'a cuxul la quijq'uitaytic. 35Ja' nax la cu'unintic te chambalametic, soc te bitic bayal stojol la jtatic ta lumetic te la quich'tique. 36Jajch' ta lum Aroer te ay ta nopol muc'ja' Arnón, soc te lum ay ta stenlej xatal q'uinal, c'alal ta Galaad, ma'yuc ni junuc lum te ju' yu'un scoltaybel sba ta jc'abtique. Ja' te Cajwaltic Dios cu'untic te la yac'otic ta stsalaw ta stojolic ta spisilique. 37Te q'uinal te ma ba la cac'beytic guerra, ja' te sq'uinal amonetic, spisil te q'uinal te ay ta sti'il muc'ja' Jaboc, te lumetic ta witstiquil, soc ta spisil te q'uinal te la yalbotic mandal te Cajwaltic te Dios cu'untic te ma ba ya cac'beytic guerra.
Currently Selected:
Deuteronomio 2: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.