Tito 3
3
Bila ya sc'an ya spasic te jch'uunjeletique
1Albeyaic xan te ya sc'an ya yich'ic ta muc' te ajwaliletique soc spisil te mach'a yich'oj yat'elique. Ac'a xch'uunbeyic smandal, soc toyoluc me yo'tanic ta spasel spisil te lequil at'elile. 2Ma me ayuc mach'a ya sboltesbeyic sc'oplal jtuluc. Ma me smulanic xjajch'esel c'op. Ayuc me yutsil yo'tanic ta stojol te ants-winiquetic te peq'uel yac'oj sbaique.
3Melel te jo'otique jichotic ta neelal uuc. Ma jna'tic q'uinal, jc'axintay-mandalotic, jowejemotic, mosoinbilotic yu'un te bila ya smulan te jbaq'uetaltique. Jich ayotic tel ta spasel spisil ta jten mulil, bic'tal-o'tanil, jex-o'tantaywanej, talel c'axel lab-o'tantayej jbajtic. 4Ja'uc me to, te Diose te Jcoltaywanej cu'untique la yac' ta ilel te bit'il ay yutsil yo'tan soc xc'uxul yo'tan ta jtojoltic soc spisil te ants-winiquetique. 5Melel te jo'otique, ma ta swentauc cat'eltic te la scoltayotique;#Dn 9.18. ta swenta nax xc'uxul yo'tan te la quich'tic atintesel yu'un,#Ef 5.26. la yac' cha'ayinucotic xan, soc la yac'botic quich'tic yach'il cuxlejal ta swenta te Ch'ul Espiritue. 6Ma p'isbiluc la spucbotic te Ch'ul Espíritu te Diose, Ja' la spuc ta swenta te Jesucristo te Jcoltaywanej cu'untique, 7swenta yu'un lec ya yilotic te Diose ta swenta nax te yutsil yo'tane. Jich me ay ta jwentatic te ya quich'tic jcuxlejaltic sbajt'el q'uinal, jich bit'il te maliybil cu'untique.
8Mero smelelil in c'op to, soc ya jc'an te ja' ya awat'elin yalel spisil ora ta stojol te mach'atic xch'uunejic te Diose, swenta yu'un jich me ya yat'elinic spasel spisil te bila lec ta pasele. Melel ja' lec te jich ya spasique, soc ja' ya xtuun yu'un spisil ants-winiquetic. 9Ijq'uitaya jilel ta bay jontol sjaq'uel c'opetic, soc te sc'oplal te antiguo me'il-tatiletique, soc ta bay jowil tsaltomba c'op ta swenta te mandalil yu'un te Moisese, te xujt' ma'yuc sc'oplale soc te ma'yuc swentail ta spisil.
10Soc teme ay mach'a ya xcaj yac' xat sbaic te jch'uunjeletique, coma jun chebuc buelta. Teme ma xch'uun comele, loq'uesa bael. 11Melel te mach'a jich yo'tane, tey me ya ana'ic stojol a te jc'axel yanajem ta sjol te c'ope. Ja' nix ta swenta smul te quechel ta swenta te castigoe.
Tac'uyel yu'un Tito
12Te c'alal ya jticunbat tel te Artemas, o teme ja' te Tíquico,#Hch 20.4; Ef 6.21-22; Col 4.7-8; 2 Ti 4.12. teme c'ote, talan me ta ora. Tey me ya xc'o jta jbajtic ta bay lum Nicópolis. Yu'un jnopoj te tey ya xc'ax cu'un a te inviernoe. 13Soc ya me awac'bey bael sbeib te Zenas te licenciadoe, soc uuc te Apolose,#Hch 18.24; 1 Co 16.12. swenta yu'un jich ma'yuc swocolic te ya xbeenique. 14Te mach'atic pajal jch'uunejtic Dios soque ac'a me snopic spasel te bila leque. Ya sc'an ya xc'uxtayic te mach'atic ay yo'bolil sbaic ta q'uinale, swenta yu'un ma tojoluc cuxul ta q'uinal te mach'atic xch'uunejic te Diose.
Spatjibal-o'tanil ta slajibal
15Spisil te mach'atic joinej li'to ya sticunbat spatjibal awo'tan. Soc albon spatjibal yo'tan te mach'atic c'uxotic ta yo'tanic ta swenta bit'il pajal ay xch'uunjel co'tantic soque. Ac'a yac'beyex yutsil yo'tan ta apisilic te Diose. Jichuc.
Currently Selected:
Tito 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.