Números 35
35
Lumetic ac'bot yu'uninic levitaetic
1Te Cajwaltic la sc'opon Moisés ta spamlej q'uinal yu'un Moab ta sts'eel muc'ja' Jordán, ta jejch' ja' yu'un Jericó, jich la yalbey:
2—Pasa ta mandal te israeletic te ya yac'beyic lumetic te banti ya x'ainic te levitaetic. Soc ya me yac'beyic aquiltic te ay ta sjoylejal te lumetic swenta yu'un tey ya smac'linic a te xchamsbalamique. 3Te levitaetic tey me ya xnainic ta bay te lumetic ac'bot ta swentaique, soc ya me yac' swacaxic ta aquiltic tey a soc te yantic chambalametic yu'unique. 4Te aquiltic ya yac'beyic yu'un te xchamsbalamique, ja' te ay ta sjoylejal te juju-jpam lume. Lajuneb yoxwinic xcha'bajc' (450) metro ya me yich' p'isel bael awu'unic te ya xjajch' bael ta spat te sts'ajq'ue. 5Ta spisil te q'uinal pajal me sp'isol ta xchanxujc'ul ya xc'ot, jo'winic yoxbajc' (900) metro te juju-jxujq'ue. Te lume sepel me ya xjil ta yolilal te aquiltic ta sjoylejal ta bay ya smac'lin te xchamsbalamique.
6“Ta spisil ta jpam lum ya x'ac'bot yich'ic te levitaetic, ay me wacpam lum ya xtuun ta swenta anjibal. Tey me ya xju' ya xbajt' ta anel a teme ay mach'a la yaiy milawe. Soc ya me awac'beyic xan cheb yoxwinic (42) ta jpam lumetic. 7Jich yu'un ta spisil ya awac'beyic te levitaetic waxaqueb yoxwinic (48) ta jpam lum soc te aquiltic yu'un juju-jsejp ta banti ya smac'linic te xchamsbalamique. 8Te c'alal ya yac' lumetic chajbalchajp te israeletique, te juju-jchajp te muc' sq'uinal ac'bot ta swentaique, ya me yac' bayal ta jpam te lumetique. Yan te juju-jchajp te ma ba muc' sq'uinal, ma me sta jich yipal ya yac' stuquel#Jos 21.1-42. —xi' te Cajwaltique.
Lumetic yu'un anjibal
(Dt 19.1-13; Jos 20.1-9)
9Te Cajwaltic la sc'opon te Moisés, jich la yalbey:
10—Albeya te israeletic: “Te c'alal ya xc'axex bael ta muc'ja' Jordán te ya x'ochex bael ta sq'uinal Canaán, 11ya me atsaic lumetic yu'un anjibal#Jos 20.1-9. ta bay ya sle yanjib te mach'a ma snopojuc ta yo'tan ya smil te yane. 12Tey ma'yuc ta ochintayel yu'un a te yermano mach'a laj ta milel, teme ya sc'an sujt'esbey spacole. Te mach'a ya yaiy milawe, ma xju' te ya xmilot ja' to teme tejc'anot ta ich'el sc'op yu'un te lume. 13Te lumetic te ya yich'ic ac'beyel te levitaetic, wacpam lum ya x'ac'otic ta anjibal: 14Oxpam ta stojol sloq'uib c'aal yu'un te muc'ja' Jordán, soc oxpam lum ta sq'uinal Canaán. 15Te waqueb ta jpam lum, ja' me lumetic yu'un anjibal ta swenta te israeletic soc ta swenta te jyanlumetic te tey nainemic a o ja' te c'axel nax ayic ta awolilique. Tey me ya xbajt' ta anel a te mach'a ma snopojuc ta yo'tan ya smil te yane.
16“Teme ay mach'a ya yaiy ejch'enteswanej soc biluc a te pasbil ta taq'uin, teme laj te mach'a ejch'enaje, jmilawal me c'ot abi. Te jmilawale ya me yil swocol ta milel.
17“Teme ay mach'a la yejch'entes ta ch'ojel ta ton, teme ay ya xlaj bael yu'un te mach'a ejch'enaje, jmilawal me c'ot abi. Te jmilawale ya me yil swocol ta milel.
18“Teme ay mach'a la yejch'entes ta majel ta te', teme ay ya xlaj bael yu'une, jmilawal me c'ot abi. Te jmilawale ya me yil swocol ta milel.
19“Te yermano te mach'a laj baele, ja' me ay ta swenta smilel te jmilawal te c'alal ya stae.
20-21“Teme ay mach'a ya scotp'in bael yan te yu'un ay slab yo'tan ta stojole, soc teme ya xlaj bael yu'une, jich yu'un te mach'a la yaiy milaw ya me yil swocol ta milel, melel jmilawal abi. Ja' nix jich teme ay mach'a ay bila ya sjipbey bael ta stojol yan ta scaj te yu'unix ma lecuc bila snopoj ta yo'tane, soc ja' nix jich teme yu'unix scontroinej sba soc a te la smaj bael ta sc'abe. Te yermano ja' ay ta swenta smilel te jmilawal te c'alal ya stae.
22“Yan teme ma yolojuc la scotp'in bael te yane, te ma yu'unuc scontroinej sba soque, o teme yu'un ay bi la xch'oj bael te ma yu'unuc amen yo'tan ta stojol te mach'a taot ta ch'ojele, 23o teme ma yolojuc la xch'oj bael ton te ya yac' lajel te ay mach'a taot yu'un te tone, teme la smile, te bit'il ma ba scontroinej sba soc, te ma jichuc yo'tan te ya yuts'ine, 24jich yu'un te lum ya me xchajbanic te c'op te jajch'em yu'un te mach'a la yaiy milaw soc te mach'a ya sc'an sujt'esbey spacol te mach'a lajeme, jich bit'il ya yal te mandalile. 25Te lum ya me xc'opoj yu'un te mach'a ma ba snopoj ta yo'tan te la yaiy milawe, ma me xyaq'uic te ya sujt'esbey spacol te yermano te mach'a lajeme. Yan te mach'a la yaiy milaw, ya me yich' ticunel sujt'el ta bay lum yu'un anjibal, tey nix ta bay sleoje. Tey me ya xjil a ja' to me c'alal ya xlaj te muc' sacerdote te ochemix ta ch'ul at'ele. 26Ja'uc me to, teme ya xloc' bael ta sq'uinal te lume, 27te yermano te mach'a lajem, ma smuluc ya xc'ot teme la sta ta be teme la smile. 28Te mach'a la yaiy milaw, ya me xjil ta lum ta bay anjibal ja' to teme laj te muc' sacerdote. Ta patil ya me xju' ya sujt' bael ta slumal.
29“Ja' me te mandaliletic te ya xtuun awu'unique, ja' me ya xc'ax ta stojol te me'il-tatiletic soc te snich'nabic ta bayuc ya xnainex”, uta me —xi' te Cajwaltique.
Mandaliletic swenta testigo soc coltayel ta libre
30Soc jich la yal te Cajwaltique:
—Ja' nax ta swenta cha'oxtul testigoetic te ya xju' ya yil swocol ta milel te jmilawale. Teme jtul nax testigo, ma'yuc mach'a ya yil swocol ta milel yu'un.#Dt 17.6; 19.15.
31“Ma me xju' ya yich' tsaquel taq'uin swenta sjelol ta milel te jmilawal te chapalix ya yil swocol ta milele, melel te jmilawal ya me sc'an ya xlaj ta milel.
32“Ma me xju' ya yich' tsaquel taq'uin yu'un jtul jmilawal te sleoj anjibal ta jpamuc te lumetic te tsabil, te ya sc'an ya sujt' bael ta slumal, teme ma to xlaj a te muc' sacerdote.
33“Ma me xaboltesbeyic sc'oplal ta swenta smalel ch'ich' te lumq'uinal ta bay ya x'ainexe, melel te ch'ich' ya sboltesbey sc'oplal te lumq'uinale. Ma xju' te ya yac' taq'uin swenta scoltayel ta libre te jtul jmilawale, jich yu'un puersa me ya yich' milel te mach'a la smal ch'ich' swenta yu'un ya xlecub sc'oplal te lumq'uinale.
34“Ma me xaboltesbeyic sc'oplal te q'uinal ta bay ya x'ainex soc te bay ya x'ainon uuque, melel jo'on te Ajwalilon te ya x'ainon ta awolilic ja'ex te israelexe —xi' te Cajwaltique.
Currently Selected:
Números 35: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.