San Marcos 3
3
Jtul winic te sicuben xchial sc'ab
(Mt 12.9-14; Lc 6.6-11)
1Te Jesús och bael yan buelta ta sinagoga. Ay jtul winic c'o sta tey a te sicuben xchial te jch'ix sc'abe. 2Jich yu'un te ants-winiquetic la smaliy yilic teme ya scoltay ta sc'aalelal cux-o'tan te Jesuse, swenta yu'un jich ya xju' ya stabeyic smul ta sc'opic a. 3Te Jesús la sc'opon ts'iin te winic te sicuben xchial sc'abe:
—Jajch'an, tec'lan ta olilal —la yut.
4Soc ja' neel la sjojc'obey te yantique:
—¿Ya bal stac' ta pasel ta sc'aalelal cux-o'tan te bila leque, o ja' te bila amene? ¿Ja' bal lec te ayuc mach'a ya xcuxine, o ja' lec te ayuc mach'a ya xlaje? —xi'.
Ja'uc me to, jtul ma'yuc mach'a c'opoj. 5Te Jesús la yil ta sjoyobal te ants-winiquetic. Ilin yu'un soc la smel yo'tan yu'un te bit'il tulan te yo'tanique. La yalbey ts'iin te winique:
—Toya jajch'el te ac'abe —la yut.
La stoy jajch'el sc'ab te winique. Jich lecub te sc'abe. 6Jich yu'un loq'uic bael te fariseoetique. Ba snopic soc ta ora te mach'atic swinictac te Herodese te bi ya yut ya smilic te Jesuse.
Ay tsobol ants-winiquetic ta ti'mar
7Te Jesús bajt' ta ti'mar soc te jnopojeletic yu'une. Bayal ants-winiquetic la sts'aclinic bael te talemic ta spamal sq'uinal Galilea. 8Te c'alal la yaiyic stojol ta bayuc te bila muc' yac ta spasel te Jesuse, jich talic bayal ants-winiquetic ta bayuc. Ay talic ta sq'uinal Judea, soc ta muc'ul lum Jerusalén, soc ta bay sq'uinal Idumea, soc ta bay jejch' ja' Jordán, soc ta sjoylejal sq'uinal te lum Tiro soc te lum Sidone. Tal yilic te Jesuse. 9Jich yu'un te Jesús la yalbey te jnopojeletic yu'une te ya sleic junuc ch'in barco tey a ta bay te ti'mare, yu'un tey ya x'och a teme ay swocol ta tenel yu'un te ants-winiquetique. 10Melel stenten nax sbaic ta spiquel sc'u' te Jesuse, yu'un tsobol te mach'atic lamantesbilix xchamelic yu'une.#Mr 4.1; Lc 5.1-3. 11Te pucujetic te ochem ta yo'tan te ants-winiquetique, ora la squejan sbaic ta stojol te c'alal la yilic te Jesuse. Cajic ta aw:
—Ja'at Snich'anat te Diose —xiic.
12Ja'uc me to, te Jesús, tulan la scom te manchuc ya yalic ta jamal te bit'il ja' Snich'an te Diose.
Jesús la stsa lajchaytul jpuc-c'opetic yu'un
(Mt 10.1-4; Lc 6.12-16)
13Patil mo bael ta wits te Jesuse. La yic' tel ta stojol te mach'atic la sc'an yo'tan te ya yic' sjoine. Jich talic ta stojol. 14La yac'bey yich' yat'elic lajchaytul te winiquetique, swenta yu'un ya sjoin ta beel, soc yu'un ya sticun bael ta xcholel te sc'op Diose, 15soc la yac'bey tulan yat'elic ta slamantesel jchameletic soc ta sloq'uesel pucujetic. 16Te lajchaytule jich ay te sbiilique: Ja' te Simón te Pedro yan sbiile, 17soc Jacobo, soc te Juan te ijts'inale te ja' snich'nab te Zebedeoe. Boanerges sbiilic, ja' bi, “Snich'nab Chawuc”, xi' c'oem. 18Soc te Andrés, Felipe, Bartolomé, Mateo, Tomás, Jacobo te snich'an Alfeo, Tadeo, soc te Simón cananistae, 19soc te Judas Iscariote, te la yac' ta c'abal ta patil te Jesuse.
Te Jesús yich'ojbey yu'el pucuj ta sc'opic
(Mt 12.22-32; Lc 11.14-23; 12.10)
Te Jesús bajt' soc te jnopojeletic yu'une. 20La stsob sbaic tel yan buelta tsobol ants-winiquetic, jich ma spas ya xwe'iquix te Jesús soc te jnopojeletic yu'une. 21Te c'alal la yaiyic stojol te mach'atic ay yu'un te Jesuse, tal snitic bael, yu'un la yalic te soquem sjol ta sc'opic te Jesuse.
22Talic ta Jerusalén uuc te jts'ibojometique. Jich la yalic:
—Ja' in winic to, ay Beelzebú ta yo'tan, ja' te mero ajwalil yu'un te pucujetique. Ja' ta swenta te ya sloq'ues te pucujetique#Mt 9.34; 10.25. —xiic. 23Jich yu'un te Jesuse la yic' tel ta spisilic. La yalbey seña-c'op yaiyic:
—¿Ya bal stac' te ya scontroin sba stuquel te Satanase? 24Jich bit'il te mach'atic jtul nax muc' ajwalil ay yu'unique. Teme ya xat sbaique soc teme ya xjajch' scontroin sbaique, ma ba ya xjalajic ta q'uinal yu'un. 25Ja' nanix jich te mach'atic jun nax na ayique, teme ya xat sbaique, jich ma xju' ya xjalajic ta q'uinal. 26Jich nix te Satanase, teme ya xjajch' scontroin sbaique, ma xju' te ya xjalajic ta q'uinal, tey ya xlaj sc'oplalic a.
27“Soc ma'yuc mach'a jich nax ya yochintaybey sna te c'ajc'al winique. Teme yo'tan ya sc'an yelc'anbey loq'uel te sbiluque, puersa me neel ya sc'ol ta chuquel. Jich ya xju' yu'un ya yich'bey bael te sbiluque.
28“Jamal ya calbeyex, ya xju' ya spasbot perdón yu'un smulic te alnich'anetic soc spisil stoyba c'opic ya xloc' ta yeic. 29Yan te mach'a ya stoybac'optay te Ch'ul Espiritue, xujt' ma'yuc perdón yu'un stuquel.#Lc 12.10. Jich ya xcuch smul sbajt'el q'uinal —xi' te Jesuse.
30Jich la yal te Jesuse, ta scaj te yacalic ta yalel te ay pucuj ta yo'tane.
Te sme' te Jesuse soc te yijts'inabe
(Mt 12.46-50; Lc 8.19-21)
31C'ot te sme' soc te yijts'inab te Jesuse. Teq'uelic julel ta amac' soc la sticunic ta iq'uel te Jesuse. 32Te mach'atic sjoytayejic ta naclej te Jesuse, jich la yalbeyic:
—Te ame'e soc te awijts'inabe, ayic ta amac'. Ya me sleat —la yutic.
33Ja'uc me to, la yal te Jesuse:
—¿Mach'a a te jme'e soc te quijts'inab ya awalique? —xi'.
34La yil te mach'atic joytaybil ta naclej yu'unique. Jich la yal:
—Ja' jme' soc ja' quijts'inab ta spisilic in to. 35Melel te mach'a ya spasbey sc'anjel yo'tan te Diose, ja' quijts'inab soc ja' jme' abi —xi' te Jesuse.
Currently Selected:
San Marcos 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.