San Mateo 28
28
Jich cha'cux tel te Jesuse
(Mr 16.1-8; Lc 24.1-12; Jn 20.1-10)
1C'axemix a te sc'aalelal cux-o'tane, yaquix ta sacubel q'uinal a ta sbabial c'aal yu'un te semanae, ba yilic te muquenal te María Magdalena soc te yan Mariae. 2Tal tulan nijq'uel, melel coj tel ta ch'ulchan jtul ch'ul abat yu'un Cajwaltic te c'ot ta muquenale. La stsel loq'uel te muc'ul ton macal sti' a. Tey la snajc'an sba ta sba te tone. 3Te ch'ul abate jich xojobil te bit'il tsantsewale. Buen sac te sc'u'-spaq'ue jich bit'il te toiwe. 4Te c'alal la yilic te soldadoetique, nijq'uic yu'un te xiwele, jich c'otic te bit'il animaetique. 5Te ch'ul abate la yalbey te antsetique:
—Ma me xiwex. Ya jna' te ja' ya aleic te Jesús te la yich' milel ta cruz. 6Ma ba li' ayix to, melel cha'cuxix jich te bit'il la yale. La', ilawilic te banti la yac'beyic te sbaq'uetale. 7Baanic ta ora, albeya yaiyic te jnopojeletic yu'un te bit'il cha'cuxix tel ta bay te animaetic, soc te ya xneelaj bael awu'unic ta sq'uinal Galilea. Tey me ya xc'o awilic a. La me calbeyex —xi' te ch'ul abate.
8Jich te antsetique la yijq'uitayic te muquenale. Bajt'ic ta ora. Ayic ta xiwel soc ay bayal sbujts' yo'tanic yu'un te bila la yaiyiquix stojole. Animajic bael yu'un ba yalbey yaiyic te jnopojeletique. 9Ja'uc me to, Jesús la sta sba soc ta be, soc c'oponotic yu'un:
—Talon —xi'.
Jich noptsajic tel ta stojol Jesús te antsetique. La squejan sbaic ta yich'el ta muc' soc la spetbeyic te yacane. 10Jich la yal te Jesuse:
—Ma me xiwex. Baan, albeyaic te quermanotac te bila yach'il c'ot ta pasele, swenta yu'un ya me xbajt'ic ta sq'uinal Galilea. Tey me ya xc'o yilonic a —xi' te Jesuse.
Te bila c'o yalic te soldadoetique
11Te c'alal yacalic ta beel bael ta be te antsetique, ay ochic bael ta lum uuc te soldadoetic te ayic ta scanantayel te muquenale. C'o xcholbey yaiyic te jwolwanej-sacerdoteetic spisil te bila c'ot ta pasele. 12Jich te jwolwanej-sacerdoteetique ba spaj sc'opic soc te principaletic yu'un te lume. Jich la yac'beyic bayal taq'uin te soldadoetique 13soc la spasic ta mandal:
—Jich me xawalic: “Te bit'il wayalotic ta ajc'ubale, tal te jnopojeletic yu'un te Jesuse. La yelc'anbeyic bael te sbaq'uetale”, xaex me. 14Soc teme la yaiy stojol te ajwalile, jo'otic me ya xba c'opojucotic awu'unic. Jich me ma'yuc awocolic ya xc'oex —xiic.
15Jich te soldadoetique la yich'ic te taq'uine, soc jich caj yalic te bit'il pasotic ta mandale. Te judioetique jich nix ya yalbeyic sc'oplal c'alal ta ora to.
Jesús la yac'bey jilel yat'el te jnopojeletique
(Mr 16.14-18; Lc 24.36-49; Jn 20.19-23)
16Jich te buluchtul jnopojeletic yu'un te Jesús, bajt'ic ta sq'uinal Galilea#Mt 26.32; Mr 14.28. ta bay wits, jich te bit'il pasotic ta mandal yu'une. 17Te c'alal la yilic tey a te Jesuse, la squejan sbaic ta stojol ta yich'el ta muc', ja'uc me to, ay cha'oxtulic te ma spisiluc yo'tanic te la xch'uunic te ja' te Jesuse. 18Te Jesús noptsaj tel tey a ta banti ayique. Jich la yal:
—Spisil ac'botonix tulan cat'el ta swentainel ch'ulchan soc balumilal. 19Jich yu'un, baanic, soc albeyaic te ya x'ochic ta jnopojel cu'un#Hch 1.8. spisil ta jchajp te nacionetic, soc ac'beya yich'ic ja' ta swenta te Tatile, soc ta swenta te Nich'anile, soc ta swenta te Ch'ul Espiritue. 20P'ijubtesaic te ya yat'elinic spasel spisil te jmandal calojbeyexe. Ma me xch'ay ta awo'tanic te joinejex spisil ora ja' to c'alal ta slajibal te balumilale —xi' te Jesuse. Jichuc.
Currently Selected:
San Mateo 28: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.