Jueces 21
21
Bit'il cha'jajch' xan sts'umbal Benjamín
1Te israeletic yalojic ta jamal ta Mizpa, te ma ba ya yac'beyic jtuluc yantsil-nich'nabic te ya xnujbinuc soc te benjaminetique. 2Ja'uc me to, la stsob sbaic ta Betel ta stojol Dios ja' to c'alal och ajc'ubal, la yoc'tay sbaic, jich la yalic ta stojol:
3—Cajwaltic, Dios yu'un Israel, ¿bistuc la awac'botic c'otuc ta pasel ta jtojoltic? ¿Bit'il ay a te ya xch'ay jchajbuc te Israele? —xiic.
4Ta yan c'aal te israeletic jajch'ic ta sab, la spasbeyic jun scajtijib smajt'an Cajwaltic, la yac'beyic chic'bil smajt'an soc milbil majt'anil ta swenta lamal-o'tanil. 5La sjojc'obey sbaic:
—¿Ta jpisiltic mach'atic a te ma ba c'otic ta tsoblej ta Mizpa? —xiic. Yu'un yalojic ta jamal te ya yich' milel te mach'atic ma ba c'otic ta tsobleje.
6Te israeletic mero bayal ayic ta mel-o'tan yu'un te bi c'oem ta pasel ta stojol te yermanotac, ja' te benjaminetique. Jich la yalic:
—Yo'tic loq'uix ta bulel jchajp sts'umbal Israel. 7¿Bi ya sc'an ya jpastic swenta yu'un ya jlebeytic yinamic te benjaminetic te cuxulic to jilele? Te jo'otic calojtic ta jamal ta stojol Cajwaltic te ma xju' cac'tic xnujbinuc soc te cantsil-nich'nabtique. 8¿Ay bal israeletic te ma ba stejc'anej sba ta stojol Cajwaltic ta Mizpa? —xiic.
La sna'ic te ja' ma ba bajt'ic ni jtuluc ta tsoblej te lum Jabes-yu'un-Galaad. 9Melel te c'alal c'ax lista, ma'yuc mach'a la sjac' sbiil te talemic ta Jabes. 10-11Jich yu'un ta spisil te israeletic la sticunic bael lajchayeb ta jmil (12,000) lequil soldadoetic, la yich'ic bael mandal ta smilel ta puñal ta spisilic te jabeseoetique, alaletic soc antsetic te nujbinemique. 12Te mach'atic ayic ta lum Jabes ja' nax taotic jbajc' (400) ta jtul ach'ixetic te ma'yuc bay tabilic ta winique. La yiq'uic tel ta campamento ta Silo te ay ta Canaán. 13Jich yu'un ta spisilic la sticunic ta leel te benjaminetic te ayic ta sba muc'ul ton Rimón, la yalbeyic te lamalix q'uinal yu'unic soque. 14Te benjaminetic talic. Te israeletic ja' la yac'beyic yinamin te ach'ixetic te la yiq'uic tel ta lum Jabes. Ja'uc me to, ma'yuc yipal, ma ba tic' ts'acajic spisilic a te ach'ixetique.
15Te israeletic la sna'beyic yo'bolil sba te sts'umbal Benjamín, melel te Cajwaltic la yac' jojch'ajuc jilel yawil te jchajp sts'umbal Israel. 16Te mamaletic yu'un Israel la sjojc'obey sbaic:
—¿Bit'il ya jlebeytic yinamic te yantic? Melel spisil lajic te yantsilel benjaminetique. 17Te benjaminetic ya sc'an te ay sts'umbal ta yolil te chajbalchajp jts'umbaltic ta swenta te mach'atic cuxajtic jilele. Jich me ma'yuc ya xch'ay jchajbuc te Israele. 18Te jo'otique ma xju' ya cac'tic xnujbinic soc cantsil-nich'nabtic, melel jpisiltic jo'otic te israelotic, calojtic ta jamal te boloben me sc'oplal te mach'a ya yac'bey yiname te benjaminetique —xiic.
19Ja'uc me to, jujun ja'wil ay muc'ul q'uin yu'un Cajwaltic ya xc'ax ta Silo,#1 S 1.3,21. te ay ta stojol norte yu'un Betel, soc ta stojol sloq'uib c'aal yu'un te be ya xjajch' ta Betel ya xbajt' c'alal ta Siquem, soc ta stojol sur yu'un Lebona. 20Jich te mamaletic yu'un Israel la sticunbeyic bael c'op te benjaminetic: “Baanic, nac'a abaic ta ts'usubiletic te nopol ayic ta Silo. 21P'ijanic me tey a, c'alal ya xloc' tel ta ajc'ot tsojboltsojp te ach'ixetic, loc'anic me bael te bay anac'oj abaique. Tsacaic bael juju-jtul, baanic ta aq'uinalic soc. 22Teme ya xtal sc'oponotic te sme'-static o yermanotac te ach'ixetique, ya me calbeytic: ‘Jo'otic ya caltic wocol ta atojolic te ya apasbotic perdón, yu'un ma la jtabeytic yinamic ta spisilic a te c'alal ba cac'beytic guerra te lum Jabes. Te bit'il ma ja'uc la awac'beyic te ja'ex, jich ma'yuc amulic yu'un’, ya me cutic”, xiic.
23Te benjaminetic la xch'uunic spasel te bi albotique. Jich juju-jtul la yelc'anic bael jtul ach'ix, sujt'ic bael ta sq'uinalic. La xcha'pasic xan te slumalique, tey ainic a.
24Te yantic israeletic bajt'ic, juju-jtul sujt'ic bael ta sq'uinalic ta bay chajbalchajp te sts'umbalique.
25Ja' me te c'alal ma'yuc muc' ajwalil yu'unic ta Israel, jich yu'un juju-jtul la spasic te bi la sc'an yo'tanique.#Jue 17.6.
Currently Selected:
Jueces 21: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.