2 Reyes 13
13
Yat'el Joacaz, muc' ajwalil yu'un Israel
1Ta oxeb xcha'winic (23) ja'wil yat'el ta muc' ajwalil yu'un Judá te Joás te snich'an Ocozías, te Joacaz snich'an Jehú och ta muc' ajwalil yu'un Israel ta Samaria. Jalaj juclajuneb ja'wil ta muc' ajwalil. 2Pero te yat'ele ma ba lec ta sit te Cajwaltique, yu'un ja' nix la spas te muliletic la yac' yaluc israeletic a te Jeroboam te snich'an Nabat. Ma'yuc banti la yijq'uitay spasel. 3Ja' yu'un ilin yo'tan ta stojol Israel te Cajwaltique. Bayal ja'wil la yac' ta sc'ab Hazael muc' ajwalil yu'un Siria, soc nix ta sc'ab Ben-adad te ja' nix snich'ane. 4Te Joacaz la sc'opon te Cajwaltique. Te Cajwaltic la yich'bey ta wenta te sc'op, melel la yil te bi la yut la yuts'in te israeletic te muc' ajwalil yu'un Siria. 5Te Cajwaltic la yac'bey jtul jcoltaywanej yu'unic te Israel, jich colic ta sc'ab te siriaetique. Jun xan yo'tanic cha'ainic ta snaic, jich nix te bit'il ayic ta neelal toe. 6Pero ma ba la yijq'uitayic te muliletic spasojic te patil alnich'anetic yu'un Jeroboam te la yac'bey sta smulic te israeletique, soc puersa tey ay a te sloc'omba Asera yu'unic ta Samaria. 7Te soldadoetic yu'un te Joacaz, ja' xanix jil yu'un lajuneb yoxwinic (50) soldadoetic te ayic ta caballo, soc lajuneb carretaetic yu'un guerra, soc lajunmil (10,000) soldadoetic te ya xbeenic ta yacanic, scaj te jc'axel lajinot yu'un te muc' ajwalil yu'un Siria. 8Te jayeb xan sc'oplal yat'el Joacaz soc spisil te bitic la spase, soc te bitic bayal sc'oplale, ts'ibubil ta libro yu'un yat'el muc' ajwaliletic ta Israel. 9Te c'alal laj, la smuquic ta Samaria. Patil ja' och jilel ta sjelol ta muc' ajwalil te snich'ane, ja' te Joás.
Yat'el Joás, muc' ajwalil yu'un Israel
10Ta sjuclajunebal xcha'winic (37) ja'wil yat'el ta muc' ajwalil yu'un Judá te Joás, te yan Joás sbiil te snich'an Joacaz, och ta muc' ajwalil yu'un Israel ta Samaria. Jalaj waclajuneb ja'wil ta at'el. 11Pero te yat'ele ma ba lec ta sit te Cajwaltique, melel ma ba la yijq'uitay te muliletic te la yac'bey sta smulic te israeletique te Jeroboam snich'an Nabat, yu'un ja' nix la spas bael te mulile. 12Te jayeb xan sc'oplal yat'el Joás, soc te bitic la spase, soc te bitic bayal sc'oplal la spase, soc te bit'il la yac'bey sba guerra soc Amasías te muc' ajwalil yu'un Judá, ts'ibubil ta libro yu'un yat'el te muc' ajwaliletic yu'un Israel. 13C'alal laj te Joás la smuquic ta Samaria, ta banti mucajtic te muc' ajwaliletic yu'un Israel. Patil ja' mo ta muc'ul nactijibal te Jeroboam.
Te bi la yal jilel ta swenta Dios c'alal laj Eliseo
14Te Eliseo taot ta chamel, te ja' ya xway sbaq'uetal yu'un. Te Joás muc' ajwalil yu'un Israel ba yil. La spet ta sc'ab, oc', jich la yal:
—Jtat, jtat, te jich c'oemat ta stojol Israel te bit'il jchajp soldadoetic te bayal bitic ya xju' yu'une#2 R 2.12. —xi'.
15Te Eliseo jich la yal:
—Tsaca jun t'imalte', soc che'oxeb yat'ejibal —xi'.
Te muc' ajwalil la stsac te t'imalte' soc che'oxebuc yat'ejibalul.
16Te Eliseo jich la yalbey te muc' ajwalile:
—Chajbana aba, yu'un ya awac' bael jun yat'ejibal at'imalte' —xi'.
Te c'alal yac ta spasel a te muc' ajwalil, te Eliseo la scajan sc'ab ta sc'ab te muc' ajwalile, 17jich la yalbey:
—Jama te ventana ay ta stojol sloq'uib c'aale —la yut.
Te muc' ajwalil la sjam. Jich la yal te Eliseo:
—T'imuya bael —xi'.
Te muc' ajwalil la yac' bael te yat'ejibal t'imalte'e. Te Eliseo jich la yal:
—Yat'ejibal t'imalte' yu'un Cajwaltic te ya xcoltaywane. Yat'ejibal t'imalte' jcoltaywanej swenta scontroinel Siria. Ja'at me ya xba atsal siriaetic ta lum Afec, ya me alajin ta jc'axel ta spisil —xi'.
18Patil jich la yalbey te muc' ajwalile:
—Tsaca te yat'ejibal t'imalte'etique —la yut.
C'alal la stsac te muc' ajwalile, te Eliseo jich la yal:
—Maja a te lume —la yut.
Te muc' ajwalil la smaj oxeb buelta te lume, patil la squejch'an. 19Te j'alwanej yu'un Dios ilin ta stojol, jich albot:
—Te lajuc amaj jo'eb waquebuc buelta te lume, ju' awu'un stsalel te siriaetic te jichuque, ja' to chican ya xlaj. Yo'tic ja' nax oxeb buelta ya atsal te siriaetique —xi' sc'oplal.
20Laj te Eliseo, la smuquic.
Spisil ora jujun ja'wil ya xchap sbaic jpoj-biluquetic moabetic te ya yochintayic te sq'uinal Judá. 21Te c'alal ay israeletic yacalic ta smuquel jtul lajem winic a, la yilic yacal ta talel ta stojolic te jpoj-biluquetique. La xch'ojic ochel ta xch'enal smuquenal Eliseo te lajem winic, loq'uic ta anel. C'alal c'o sta sba soc te sbaquel Eliseo, cha'cuxin xan, la stejc'an sba.
22Te Hazael muc' ajwalil yu'un Siria, mero bayal la yac'bey swocol te Israel te jayeb c'aal cuxul te Joacaz. 23Pero te Cajwaltic la sna'bey yo'bolil sbaic, soc tal xc'uxul ta yo'tan yu'un. Ta scaj te bi xchapoj soc Abraham, Isaac, Jacob te Cajwaltique, la sna' xan. Ma ba la sc'an slajin, soc ma ba la xch'ay ta yo'tan ta jc'axel. Jich nix ay yu'un Cajwaltic c'alal ora te Israel.
24C'alal laj te Hazael muc' ajwalil ta Siria, ja' och jilel ta sjelol te snich'ane, te Ben-adad sbiile. 25Te Joás, snich'an Joacaz, la scoltay sujt'el ta sc'ab Ben-adad te lumetic yu'unic pojbotic yu'un te c'alal tsalot ta guerra te Joacaz, te stat Joás. Oxeb buelta la stsal ta guerra te Ben-adad te Joás, soc la yich' xan ta swenta te lumetic yu'unique.
Currently Selected:
2 Reyes 13: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.