2 Reyes 14
14
Yat'el Amasías, muc' ajwalil yu'un Judá
(2 Cr 25.1-28)
1Ta xchebal ja'wil yat'el ta muc' ajwalil ta Israel a te Joás snich'an Joacaz, te Amasías snich'an te yan Joás och ta muc' ajwalil ta Judá. 2Te Amasías ay jo'eb xcha'winic (25) ya'wilal a te och ta muc' ajwalile. Jalaj ta muc' ajwalil ta Jerusalén baluneb xcha'winic (29) ja'wil. Te sme'e Joadán sbiil, ja' slumal te Jerusalén. 3Te yat'el Amasías lec ta sit te Cajwaltique, pero ma la spajbey yat'el te antiguo David te ja' sts'umbale. Ja' nix jich la spas te bit'il te state, ja' te Joás. 4Ja'uc me to ma ba la sloq'ues te toyol ch'uunjibaletic, te banti stalel ayic ta yaq'uel milbil majt'aniletic soc yacalic ta xchiq'uel pom spisil te yajwal te lume.
5C'alal toy xan yat'el te Amasías, la smil te swinictac milbot yu'un te state. 6Pero ma ba la smilbey stuquel te snich'nab te jmilawetic, melel jich ts'ibubil ta slibroil mandaliletic yu'un Moisés te jich la yal mandal te Cajwaltique: “Te tatiletic ma xju' ya yich'ic milel yu'un smul ya sle te snich'anique, soc ja' nix jich ma xju' ya yich'ic milel yu'un smul ya sle static te nich'aniletique. Ta juju-jtul ya xlaj yu'un te smulique”,#Dt 24.16; Ez 18.2-4. te xie.
7Te Amasías la smil lajunmil (10,000) edom-winiquetic ta Spamlej Xatal Q'uinal yu'un Ats'am. Soc la yu'unin te lum Sela, Jocteel sbiil la yac'bey, jich nix sbiilinej c'alal ora.
8Te Amasías patil la sticunbey c'op te Joás muc' ajwalil yu'un Israel te ja' snich'an Joacaz, smam te Jehú. Jich la yalbey: “La', ya me quilbey jba jsitic”, xi'. 9Pero te Joás jich la yac'bey sujt'ib: “Te jch'ix itaj la sticun ta alel te cedro ta Líbano: ‘Ac'beya te awantsil-nich'an te jquerem-nich'ane, yu'un ya yinamin’, xi'. Pero jcojt' ja'mal chambalam c'ax tey a, tenot jilel te jch'ix itaj, xi' te sloc'ombail c'ope. 10Puersa ya quich' ta muc' te bit'il la atsalix te edometique. Teme ja' ya atoy aba yu'une, lec ay, toya aba. Pero ja' lec ainan ta ana. ¿Bi yu'un te ja'at nix ya ale te awocole, soc te ya alebey swocol te Judá?” xi' sc'oplal.
11Pero te Amasías ma ba la yich' ta wenta. Jich yu'un te Joás jajch' ta beel, ba sta sba soc te Amasías. Ta Bet-semes te ay ta sq'uinal Judá, c'o sta sbaic. 12Te Judá tsalot yu'un Israel, ta juju-jtul bajt'ic ta anel ta snaic. 13Te Joás, muc' ajwalil yu'un Israel, la xchuc ta Bet-semes te Amasías, muc' ajwalil yu'un Judá. Patil bajt' ta Jerusalén, c'o sjinbey sts'ajc'ul, la sjambey balunwinic (180) metro, jajch' ta yochibal lum Efraín sbiil, c'ot c'alal ta yochibal lum Xujc' sbiil. 14Soc xan, la yu'unin spisil te oro soc plata, soc spisil xan te bitic ayic ta templo yu'un Cajwaltic, soc nix te sc'ulejal ta sna te muc' ajwalile. Patil ay la yic' bael winiquetic yu'un prendal. Jich sujt' bael ta Samaria.
15Te jayeb xan sc'oplal yat'el Joás, soc te bitic la spase, soc nix te bitic bayal sc'oplal la spas, soc te guerra la yac'bey sba soc Amasías, te muc' ajwalil ta Judá, ts'ibubil ta libroetic yu'un yat'el muc' ajwaliletic ta Israel. 16C'alal laj, la smuquic ta Samaria ta smuquenal te yantic muc' ajwaliletic yu'un Israel. Patil ja' och jilel ta sjelol te snich'ane, ja' te Jeroboam.
17Te Amasías snich'an Joás muc' ajwalil yu'un Judá, cuxin xan jo'lajuneb ja'wil ta patil, te c'alal lajix a te Joás snich'an Joacaz, te muc' ajwalil yu'un Israel. 18Te jayeb xan sc'oplal yat'el Amasías, ts'ibubil ta libro yu'un yat'el muc' ajwaliletic ta Judá. 19Ta Jerusalén la xchap sbaic ta scontroinel te Amasías. Jich loc' ta anel, bajt' ta lum Laquis. Pero la snutsic bael, tey c'o smilic a. 20Patil la yiq'uic sujt'el ta caballo, la smuquic ta Jerusalén soc te antiguo sme'-stat ta Lum-yu'un-David.
21Jich yu'un te yajwal te Judá la yiq'uic te Azarías, la yaq'uic ochel ta muc' ajwalil swenta sjelol Amasías, ja' te state. Te Azarías ay waclajuneb ya'wilal a te och yat'ele. 22Te c'alal lajix a te state, ja' la xcha'pas xan te lum Elat, la yac' sujt'uc xan ta stojol Judá.
Yat'el muc' ajwalil xchebal Jeroboam ta Israel
23Ta yo'lajunebal ja'wil yochel ta muc' ajwalil Amasías snich'an Joás ta Judá, och ta muc' ajwalil yu'un Israel ta Samaria te Jeroboam snich'an Joás. Jalaj yu'unic ta muc' ajwalil jun yoxwinic (41) ja'wil. 24Pero te yat'ele ma lecuc ta sit te Cajwaltic, melel ma'yuc la yijq'uitay ni junuc te muliletic la spas Jeroboam snich'an Nabat, te la yac'bey sta smulic te israeletique.
25Te Jeroboam la yac'bey xan sta te sti'il sq'uinal Israel, jajch' ta yochibal Hamat c'ot c'alal ta mar yu'un Arabá, jich nix te bit'il yaloj Cajwaltic te Dios yu'un Israel, te la yal ta swenta te yabate, ja' te Jonás#Jon 1.1. te snich'an Amitai, te j'alwanej talem ta lum Gat-hefer. 26Melel te Cajwaltic la yil te c'ux obol sba te Israel, te spisilic c'ux obol sbaique, te ma'yuc mach'a ya xcoltayotic yu'une. 27Ja' yu'un la scoltay ta swenta bit'il ja' la yabatin te Jeroboam snich'an Joás, melel ma to ba ya stup' ta balumilal a te sbiil Israel.
28Te jayeb xan sc'oplal yat'el Jeroboam soc spisil te bitic spasoj, soc te bitic bayal sc'oplale, soc te guerraetic la spase, soc te bi la yut la yich' xan te Damasco soc te Hamat, te la yac'bey yu'unin xan te Israel, spisil in to ts'ibubil ta libro yu'un yat'el muc' ajwaliletic ta Israel. 29C'alal laj te Jeroboam, la smuquic ta banti mucul yantic muc' ajwaliletic yu'un Israel. Patil ja' och ta sjelol te snich'ane, ja' te Zacarías.
Currently Selected:
2 Reyes 14: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.