2 Reyes 12
12
Yat'el Joás, muc' ajwalil yu'un Judá
(2 Cr 24.1-27)
1Te c'alal och ta muc' ajwalil te Joás, juqueb ja'wil yochel ta muc' ajwalil uuc a te Jehú. Cha'winic (40) ja'wil jalaj ta muc' ajwalil ta Jerusalén te Joás. Te sme'e Sibia sbiil, talem ta Beerseba. 2Te yat'el te Joás toj ilbot yu'un te Cajwaltic, melel ja' p'ijtesot yu'un te sacerdote Joiada. 3Pero ma ba la yich' jinel stuquel te toyol ch'uunjibaletic, ja' te banti stalel ya yac'beyic milbil majt'anil soc te yacalic xchiq'uel pom spisil te lume.
4-5La sta yorail te jich la yalbey te sacerdoteetic te Joás:
—Tsobaic spisil te taq'uine yu'un te smajt'an Diose te la yich'ix ich'el bael ta templo yu'un Cajwaltic, jich te bit'il ay ta swentaic yaq'uel ta juju-jtule,#Ex 30.11-16. soc nix te spasemal yo'tanic ta juju-jtul te la yich'ic tele. C'anbeyaic te mach'atic swentainejic sq'uejel te taq'uine, swenta yu'un ya me yich' chajbanel xan ta spisil te banti chajbanel ya sc'an te templo —xi'.
6Pero loc' oxeb xcha'winic (23) ja'wil yochel ta muc' ajwalil te Joás, te sacerdoteetic ma ba xchajbanejic a te templo. 7Ja' yu'un te muc' ajwalil Joás la yic' tel te sacerdote Joiada soc te yantic sacerdoteetique, jich la yalbey:
—¿Bi yu'un ma ba achapanejic te templo? Yo'tic ma x'ac'anic xan taq'uin ta stojol te mach'atic swentainejic scanantayele. Te sacerdoteetic te ay yich'ojiquix, ya me yaq'uic, swenta yu'un ya me yich' chajbanel xan a te templo —xi'.
8Te sacerdoteetic lec la yaiyic te ma ba ya yich'beyiquix staq'uin te ants-winiquetique, soc te ma ba ya xjil ta swentaic xchajbanel xan te templo.
9Ja' yu'un te sacerdote Joiada la stsac jun cajón, la sjutbey te smajq'uile. La yac' ta swa'el te scajtijib ta chiq'uel smajt'an Dios, ta wa'el ya yilic te c'alal ya x'ochic ta templo yu'un Cajwaltique. Te sacerdoteetic yacalic ta scanantayel te yochibal templo, tey la yaq'uic spisil a te taq'uin ya yich' ich'el bael ta templo yu'un Cajwaltic. 10C'alal la yilic te ayix bayal taq'uin ta cajón, ya xc'otic te cronista yu'un muc' ajwalile soc te muc' sacerdote, ya x'och yajtayic te taq'uin ya staic ta templo yu'un te Cajwaltique. Patil la yaq'uic ta bolsa-paq'uetic te taq'uine. 11Te c'alal ajtaybilix a te jayeb te taq'uine, la yac'beyic te mach'atic swentainejic te j'at'eletic ta templo, swenta yu'un ya stojic a te carpinteroetic soc te maestroetic te yacalic ta at'el ta templo yu'un Cajwaltic, 12soc te albañiletic soc te mach'atic jwaluyej-tonetique. Soc la smanic te'etic soc walubil tonetic yu'un ya yich' chajbanel a te templo, soc la stojic spisil te yantic bitic la yich' lajinel a te taq'uine. 13Pero te taq'uin ya yich' ich'el bael ta templo, ma ba ya xtuun yu'un ya yich' pasel vasoetic ta plata a, soc ma yu'unuc la yich' pasel stup'jibal te smechail c'ajq'ue, muc'ul tazaetic, oq'uesetic, soc yantic bitic ya xtuun tey a te pasbil ta oro soc ta plata. 14Melel ja' ya yac'beyic ta sc'ab te mach'atic ay ta swentaic spasel te at'el, swenta yu'un jich ya yich' xan chajbanel a te templo yu'un te Cajwaltique. 15Pero ma ba la yich'beyic ta wenta te taq'uin ac'botic te winiquetic te la swentainic stojel te j'at'eletique, melel mero toj ya x'at'ejic. 16Te taq'uin swenta smajt'an Dios ya yaq'uic te mach'atic ya xjelawic ta stojol Dios soc te mach'atic ya sta smulique, ma ba la yich'ic bael ta templo stuquel, melel ja' yu'unic te sacerdoteetique.#Lv 7.7.
17Ja' ta yorail a, te Hazael muc' ajwalil yu'un Siria la yac'bey guerra te lum Gat, ju' yu'un stsalel. Patil ba yac'bey guerra te Jerusalén. 18Pero te Joás muc' ajwalil ta Judá la stsob spisil te bitic ch'ultesbilic te la yaq'uic ta tuuntesel ta templo te muc' ajwaliletic Josafat, Joram, soc Ocozías, te ja' sts'umbale, te at'ejic ta muc' ajwalil yu'un Judá, soc te ja' nix la yaq'uixe, soc ta spisil te oro la staic ta yawil sbiluquil te templo, soc nix te ayic ta sna muc' ajwalile. Ta spisil jun xanix la sticunbey te Hazael, jich ma ba la yac'beyix guerra te Jerusalén.
19Te jayeb xan sc'oplal yat'el Joás, soc spisil te bitic la spase, ay ta libro yu'un yat'el muc' ajwaliletic ta Judá. 20Ja' nix sjo'tac ta at'el te muquen la sjajch'esic c'op ta stojol soc la smilic ta na ta banti but'bil lum te ay ta coel ta Sila. 21Ja'ic te Josacar snich'an Simeat soc Jozabad snich'an Somer, ja' nix sjo'tac ta at'el te milot yu'une. C'alal laj, la yich' muquel yu'unic ta Lum-yu'un-David. Patil ja' och ta sjelol ta muc' ajwalil te Amasías te ja' nix snich'ane.
Currently Selected:
2 Reyes 12: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.