2 Reyes 6
6
Chicnaj yu'el Dios ta echej
1Ay jun c'aal te j'alwanejetic jich la yalbeyic te Eliseo:
—Ila awil, te banti nainemotic, mero lats'alotic ta jpisiltic a. 2Ac'awotic bael ta muc'ja' Jordán, ta juju-jtulotic ya quich'tic juju-jch'ix te', yu'un ya me jpastic junuc na, swenta yu'un ya me xnainotic tey a —xiic.
—Baanic jiche —xi' te Eliseo.
3La yal te jtule:
—Wocoluc, ba joinawotic —xi'.
La sjac' te Eliseo:
—Lec ay, ya xba joinex —xi'.
4Jich bajt' soc, c'alal ta muc'ja' Jordán. Tey ochic ta sts'etel a te te'etique. 5Pero ay bi c'ot ta pasel yu'un te jtule. C'alal yac ta sts'etel a te te'e, bots' bael te yecheje, c'ot ta yut ja'. Te winique jajch' ta aw:
—¡Ay, maestro! ¡Majanbil cu'un te echeje! —xi'.
6—¿Banti yal coel? —xi' ta sjojc'oyel te j'alwanej yu'un te Diose.
Te winique la yac' ta ilel te banti yal coele. Te Eliseo la xot' jun te', la xch'oj ochel tey ta banti coe, jich lichot moel ta ba ja' te echeje.
7—Tsaca me —xi' te Eliseo.
Te winique la yac' bael sc'ab, la stsac loq'uel te yecheje.
Eliseo soc siriaetic
8Te muc' ajwalil yu'un Siria la yac'bey sbaic guerra soc Israel. La stsob sba soc te capitanetic yu'un soldadoetic yu'un ta xchapel c'opetic yu'unic; soc la yal te banti ya xc'o spas te scampamentoique. 9Te Eliseo la sticunbey ta alel te muc' ajwalil yu'un Israel, te ma me xc'axic tey a ta bay yacalic ta beel te siriaetique. 10Te muc' ajwalil yu'un Israel jich la sticun bael te soldadoetic yu'un tey ta bay neel albot yu'un te j'alwanej yu'un Dios. Jich la sta coltayel bayal buelta.
11Te muc' ajwalil yu'un Siria mero jowejem sjol ta scaj te jich la spasic te israeletique. Ja' yu'un la yic' te capitán-soldadoetique, jich la yalbey:
—¡Albonic mach'a a te li' ay cu'untic te jun yo'tan soc te muc' ajwalil yu'un Israel! —xi'.
12Jtul la sjac':
—Ma'yuc, muc' ajwalil. Pero Eliseo te j'alwanej yu'un Dios te ay ta Israel, ja' te ya yalbey yaiy te muc' ajwalil yu'un Israel te bi ya achape, asta soc te bi ya awal ta muquen ta acuarto —xi'.
13Te muc' ajwalil yu'un Siria la yal mandal:
—Jojc'o awaiyic ta lec banti ay, swenta yu'un ya me jticun winiquetic yu'un ya xba stsaquic tel —xi'.
Te c'alal albot te ay ta lum Dotán, 14la sticun soldadoetic te cajajtic ta caballo, soc te ayic ta carretaetic yu'un guerra, soc bayal yacalic ta beel ta yacanic. Ta ajc'ubal c'otic ta Dotán ta sjoytayel te lume. 15C'alal sacub q'uinal, jajch' te abat yu'un Eliseo. Loc' bael ta na, la yil soldadoetic ta caballoetic soc ta carretaetic te sjoytayejic te lume. Jich ba yalbey te Eliseo:
—Yo'tic maestro, ¿bi ya jpastic? —xi'.
16Jich albot yu'un te Eliseo:
—Ma xiwat, melel ja' bayal te mach'atic sjoinejotic te jo'otique; ma'yuc tsobol stuquelic —xi'.
17La sc'opon te Cajwaltic te Eliseo, jich la yalbey:
—Ya calbat wocol, Cajwal, jambeya sit te querem, swenta yu'un ya me yil —xi'. Te Cajwaltic la sjambey sit te abate. Te abate la yil te wits te nojel ta bayal caballoetic soc carretaetic yu'un c'ajc', joytabil yu'un te Eliseo.
18Te c'alal ya x'ochiquix ta yaq'uel guerra a te siriaetique, te Eliseo la yalbey wocol te Cajwaltique:
—Ya jc'anbat te yacuc xc'atp'uj ta ma'sit te winiquetique —xi'.
Te Cajwaltic la yac' tup'uc sitic, jich te bit'il la sc'an te Eliseo. 19Te Eliseo jich la yalbeyic:
—Ma ja'uc sbelal in to, soc ma ja'uc te lum te yacalex sleele. T'unawonic, jo'on ya quiq'uex bael, asta ya quiq'uex bael ta stojol te winic ya aleique —la yut.
La yic' bael ta Samaria. 20C'alal c'ot ta Samaria te Eliseo, jich la yal ta sc'oponel Dios:
—Yo'tic Cajwal, jambeyaix te sitique, swenta yu'un jich me ya xju' ya yilic q'uinal a —xi'. Jich la yilic te siriaetic te ayiquix ta yutil lum Samaria. 21C'alal ilotic yu'un te muc' ajwalil yu'un Israel, la sjojc'obey te Eliseo:
—¿Ya bal jmil, tatic, ya bal jmil spisil? —xi'.
22Pero la sjac' te Eliseo:
—Ma'uc, ma xamil. ¿Yu'un bal jich c'aemat te ya amil te mach'atic ya atsac ta guerra ta swenta apuñal soc ta swenta at'imalte'? Ac'beya swe'el-yuch'elic, patil ticuna sujt'el ta stojol yajwalic —xi'.
23Jich la yich'ic pasel buen q'uin, we'-uch'ic. Patil te muc' ajwalil la sticun bael. Jich sujt'ic bael ta stojol yajwalic. Te c'alal jich c'ot ta pasele, te siriaetic la squejch'anic bael ta spojel te sq'uinal israeletic.
Sc'oplal Eliseo, soc joytayot lum Samaria
24Ta patil Ben-adad te muc' ajwalil yu'un Siria la stsob spisil te soldadoetic yu'une, ba sjoytayic te Samaria yu'un ya yac'beyic guerra. 25Jich jajch' bayal wi'nal ta Samaria, scaj te mero sjoyobal macale. Toy stojol asta chanwinic (80) ta jsejp plata c'ot stojol te jun jol burro, soc jun cuarto litro stsa' stsumut ta jo'sejp plata.
26Ay jun c'aal te muc' ajwalil yu'un Israel yac ta c'axel ta sba sts'ajc'ul te lume. Awtayot yu'un jtul ants:
—¡Muc' ajwalil, coltayawon! —xi'.
27La sjac' te muc' ajwalile:
—Teme ma ba ya scoltayat te Cajwaltic, ¿bi ya cut ya jcoltayat jo'on? ¿Yu'un bal ya xju' cu'un ya cac'bat trigo jiche, o vino? 28¿Bi la apas? —xi'.
La sjac' te antse:
—Te ants in to la yalbon: “Ac'a te aquerem-ale, yu'un ja' ya jti'tic yo'tic. Te pajel ya me jti'tic uuc te cale”, xi'. 29Jich la jpas jti'tic te cale.#Dt 28.57. Ta xchebal c'aal la calbey te ya yac' te squerem-ale, swenta yu'un te ya jti'tique, pero la snaq'uix te yale —xi'.
30C'alal la yaiy te muc' ajwalil te bi la yal te antse, la sjats sc'u' swenta seña slab yo'tan. Te bit'il ay ta toyol ta sba te sts'ajc'ul te lume, ilot yu'un te mach'atic tey ayic a te slapoj ch'ixal pac' ta sbaq'uetal ta ye'tal te sc'u'e. 31Te muc' ajwalil jich la yal:
—¡Ac'a yac'bon tulan castigo te Diose, teme ma ba ya jbojbey loq'uel sjol yo'tic te Eliseo snich'an Safat! —xi'.
32Te Eliseo ay ta sna a, nacal soc te mamaletic yich'oj yat'elic. Te muc' ajwalil ja' yorail yac ta sticunel jtul swinic a. Pero te c'alal ma to ba c'oem a te mach'a la sticun te muc' ajwalile, te Eliseo jich la yalbey te mamaletique:
—Ila awilic te jmilawale, ay mach'a la sticunix tel yu'un ya sc'ocbon loq'uel jol. Pero aiya awaiyic ta lec, teme jul tel te mach'a la sticun tele, tenbeyaic me te ti'naile, yu'un ta spat ya xchicnaj tel sbeel te yajwale —xi'.
33C'alal jich yacal ta yalbel a te mamaletique, te muc' ajwalil c'ot ta stojol Eliseo. Jich la yal:
—Te bit'il ja' nix Cajwaltic te la sticunbotic wocole, ¿bila yan ya jmaliy xan ta stojol jiche? —xi'.
Currently Selected:
2 Reyes 6: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.