Tito 3
3
Ta scuenta yutsil yo'tan Dios te toj ya x'ilotic
1A'beya xan sna'ic te ac'a yac' sbahic ta cuentahinel yu'un te ajwaliletic soc te mach'atic ay ya'telic, ac'a sch'uhumbeyic smandar, te chapaluc ta spasel spisil lequil a'teliletic. 2Ma me ayuc mach'a ya sbohlobtesbeyic sc'oblal, soc ma me xya'iyic hach-c'op, ayuc me yutsil yo'tanic, yacuc yaq'uic ta ilel te manso yo'tanic ta stojol spisil ants-winiquetic.
3Ta nahil to ha nix hichotic, ma ba la jna'tic q'uinal, jc'axun-c'opotic, howiyemotic, mosohimbilotic yu'un chijil-o'tanil soc spisil ta chahp bintic mulambil cu'untic spasel, ca'telinejtic lablab-o'tantaywanej soc ti'ti'o'tantaywanej, ihlaybilotic soc talel c'axel la jquihlay jbahtic. 4Pero te c'alal chicnaj te lec yo'tan soc te sc'uxul yo'tan Dios, te Jcoltaywanej cu'untic, ta stojol spisil ants-winiquetic, 5la scoltayotic, ma ha'uc yu'un te lec ca'tel jpasojtic, ha nax ta scuenta sc'uxul yo'tan, ta scuenta te poquel yu'un cha'ayinel soc ta scuenta te ach'ubtesel yu'un te Ch'ul Espíritu. 6Te Dios bayel la smal ta jtojoltic te Ch'ul Espíritu ta scuenta Jesucristo, te Jcoltaywanej cu'untic, 7scuenta yu'un, te bin ut'il lec ilotiquix yu'un Dios ta scuenta yutsil yo'tan, ya xc'oht ta jcuentatic yich'el te cuxlejal scuenta sbahtel q'uinal te yacotic ta smahliyel.
8Ha stojil c'op ini, soc ya jc'an te tulan sc'oblal yac awa'be sna'ic, scuenta yu'un te mach'atic sch'uhunejic Dios ya me ya'telinic spasel lequil a'teliletic, te ha lec soc te ya xtuhun yu'un te ants-winiquetique. 9Pero ma me xawac' aba a te tentamba ta c'op te mayuc scuentahil, te xtiq'uet ta halel bihililetic yu'un ts'umbalil, tijtamba c'op soc shach c'op ta scuenta te Ley, como ma xtuhun soc mayuc bin ya xloc' a.
10Teme ay mach'a ya yac' jatamba, teme la atsits jun cheb buelta, loq'uesa, 11como yac ana' te bohloben, soc te ay smul soc ha nix ya yac' sba ta stojel te smule.
Slajibal bin a'bot sna'
12Te c'alal ya jticon tal ta atojol te Artemas o Tíquico, ayuc te ya xtal awilon ta ora ta Nicópolis, yu'un jnopoj te tey ya xc'ax cu'un a te yorahil sic. 13Coltaya ta spisil bintic ya xtuhun yu'unic te Zenas te maestro yu'un Ley, soc te Apolos, scuenta yu'un mayuc bin ya xpasotic falta yu'un. 14Te mach'atic pajal jch'uhunejtic Dios soc ya sc'an ya snopic spasel lequil a'teliletic ta stojol te mach'atic ay falta yu'unic, scuenta yu'un hich ay scuentahil te scuxlejalique.
15Xcoltanucat laj yu'un spisil te mach'atic li' joquinej. Halbon xcoltanuc te mach'atic c'uxotic ta yo'tanic ta scuenta bin ut'il pajal ay sch'uhunel co'tanic. Ac'a sjoquinex te yutsil yo'tan te Diose. Hichuc.
Currently Selected:
Tito 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.