Rut 4
4
Booz ya xnuhpun soc Rut
1Patil, te Booz baht ta yochibal te pueblo, la shuhcan sba tey a. Ha yorahil te c'ax tey a te winic te ma yanuc parte yu'un te Rut, te halbot sc'oblal yu'un Booz. Hich la yalbe: A'iya awa'iy, la', huhcana aba, xchi. Hich tal shuhcan sba te winique.
2Hich te Booz la yic' tal lajuntuhl mamaletic yu'un te pueblo, hich la yalbe: Huclanic li'i, xchi. Hich la shuhcan sbahic. 3Te Booz hich la yalbe te winic te ma yanuc parte yu'une: Te Noemí, te suhtemix tal ta sq'uinal Moab, ya schon sq'uinal te quermanotic Elimelec. 4Ya jc'an ya ca'bat ana' yu'un yac aman te q'uinal ta stojol te mach'atic li' huhcajtic ini soc te mamaletic yu'un te pueblo cu'une. Teme yac ac'an yac aman te q'uinal, mana hiche; yan teme ma xac'an, halbon ca'iy scuenta yu'un hich ya jna' a, como mayuc yan mach'a ay ta scuenta te ya sman, ha'at nax, patil te ho'one, xchi.
Ya jman, xchi.
5Ha yu'un te Booz la yalbe xan: Te bin ora yac amambe te sq'uinal Noemí, ya me awic' te Rut te moab-ants, te yihnam chawinic, scuenta yu'un yac acha'hachbe sbihil ta sq'uinal te chawinic, xchi.
6Hich la sjac' te mach'a ma yanuc parte yu'un: Ma xhu' ya jman, teme repente ya ya'bon jwocol soc te bintic ay cu'un. Mana ha'at, ich'a te bin ay ta jcuenta, como ma xhu' ya jman, xchi.
7Ta namey hich ay te costumbre ta Israel, teme ya sman q'uinal soc teme ya xc'oht ta stojol yan, te jtuhle ya sloq'ues step, ya ya'be te yane, scuenta yu'un ya xchicnaj te chahpaj te c'ope; ha testigo ya xc'oht ta Israel.
8Ha yu'un te winic te ma yanuc parte yu'un hich la yalbe te Booz: Mambeya ha'at, xchi. Hich la sloq'ues te step.
9Te Booz la yalbe te mamaletic soc spisil te mach'atic tey ayic a: Ha'ex testigohex yo'tic te la jmambe te Noemí spisil te bintic ay yu'un Elimelec soc spisil te bintic ay yu'un te Quelión soc Mahlón. 10Soc ha nix hich ya quic' quihnamin te Rut te moab-ants, te yihnam Mahlón, scuenta yu'un ya jcha'hachbe sbihil ta sq'uinal te chawinic, yu'un ma ba ya xch'ay sbihil ta yohlil te yermanotac o ta pueblo yu'une. Ha'ex testigohex yo'tic, xchi.
11Spisil te mach'atic ayic ta yochibal te pueblo soc te mamaletic hich la sjaq'uic: Ho'otcotic testigohotcotic yu'un. Te ants te ya x'och ta ana, hichuc ac'a c'ohtuc yu'un Jehová te bin ut'il Raquel soc Lea te la shachbeyic sna te Israel. Soc te ha'ate muc'uc me ac'oblal ta Efrata, soc na'biluc aba ta Belén. 12Ta scuenta te ats'umbal ya ya'bat Jehová ta scuenta te ants ini, hich ac'a c'ohtuc ana te bin ut'il te sna Fares te yal-snich'an Tamar soc Judá, xchihic.
13Hich te Booz la yic' te Rut, ha yihnam c'oht; la sjoquin ta wayel. Te Jehová la yac' te ya xhahch yal, hich ayin tut querem yu'un.
14Te antsetic hich la yalbeyic te Noemí: Bayel me yutsil te Jehová te la yac' te ay mach'a ma yanuc parte awu'un te ya scoltayat; muc' me sc'oblal sbihil ac'a c'ohtuc ta Israel te alale. 15Ha ya smuc'ubtesbat awo'tan soc ya scoltayat te c'alal me'elatix a; como ha alatayotix yu'un te awalib te c'uxat ta yo'tan, te c'ax hich yutsilal ta atojol a te bin ut'il huqueb aquerem-al, xchihic.
16Te Noemí la yic' te tut querem, la spet soc la scoltes. 17Te antsetic te ha spat-xuhc hich la yalic: ¡Ayinix squerem-al te Noemí! xchihic.
La ya'beyic sbihil Obed. Ha stat te Isaí, te ha stat te David.
Sts'umbal tal David
18Hich ay te cajalcaj sts'umbal Fares: Te snich'an Fares, ha Hezrón; 19te snich'an Hezrón, ha Ram; te snich'an Ram, ha Aminadab; 20te snich'an Aminadab, ha Naasón; te snich'an Naasón, ha Salmón; 21te snich'an Salmón, ha Booz; te snich'an Booz, ha Obed; 22te snich'an Obed, ha Isaí; te snich'an Isaí, ha David.
Currently Selected:
Rut 4: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.