Proverbios 2
2
Bin lec ta tahel ta p'ijil-o'tanil
1Jnich'an, teme yac awich' ta cuenta
te c'opetic cu'un
soc teme yac aq'uej ta awo'tan
te mandariletic cu'un,
2teme yac awa'iy te p'ijil-o'tanil
soc teme yac awac' awo'tan ta sna'beyel scuentahil,
3teme yac awawtay te bin ay ta na'el
soc tulan ya xc'opojat yu'un te yac ana'be scuentahil;
4teme yac ale hich te bin ut'il plata
soc teme yac ale ta lec hich te bin ut'il c'ulejalil,
5hich me yac ana' a te xi'el te Jehová
soc hich me yac ana'be sba a te Diose.
6Como Jehová ya yac' te p'ijil-o'tanil,
soc ya xloc' tal ta ye te p'ijil-o'tanil
soc te bin ay ta na'el.
7Ha ya sq'uejbe lequil p'ijil-o'tanil
te mach'atic toj yo'tanic;
ha smahquil te mach'atic toj ya xbehenic.
8Ha ya scanantay te behetic
yu'un te mach'atic toj bin ya spasic,
soc ya scanantay te be
yu'un te mach'atic yu'un te ch'ultesbilique.
9Hich me yac ana' te bin toj, te stojil chahpanel,
soc te spisil pajal ya x'ich'ot ta cuenta,
soc spisil lequil behetic.
10Como ya x'och ta awo'tan te p'ijil-o'tanil,
soc lec ya ya'iy ach'uhlel te bin ay ta na'el.
11Ya me scanantayat te tsahtayel,
soc ya me scanantayat te bin ay ta na'el;
12yu'un ya yac'at ta libre yu'un te chopol be,
ta stojol winiquetic te chopol sc'opic,
13ha te mach'atic ya yihquitayic te stojil behetic,
yu'un ya xbehenic ta behetic ta yihc'al q'uinal,
14te mach'atic tse'el yo'tanic yu'un
spasel bin chopol
soc bayel ya smulanic
te bin chopol ay ta pasel,
15te ha chuhcul te behetic yu'unic,
ma tojuc te sbehique.
16Ya me scoltayat ta sc'ab te j'antsinel-ants,
te ants te ya xmonawan ta sc'op,
17te ya sch'ay hilel
te smohlol c'alal ach'ix to a,
soc ya sch'ay ta yo'tan
te bin c'opil la schap soc te Dios yu'une.
18Te sna te ants yac ta cohel bahel ta lajel,
te behetic yu'un
ya xbahtic ta banti ay mach'atic chamenic.
19Te mach'atic ya xbahtic banti ay,
ma ba ya suhtiquix tal,
ma ba ya st'uniquix te behetic yu'un cuxlejal.
20Hich me ya xbehenat ta be
yu'un te mach'atic lec yo'tanic
soc yac at'un bahel te behetic
yu'un te mach'atic toj yo'tanique.
21Como te mach'atic toj yo'tanic
ya me xnahinic ta q'uinal,
ya me xhalajic tey a
te mach'atic jun yo'tanic.
22Yan te mach'atic chopolic
ya me yich'ic loq'uesel ta q'uinal,
soc ya me yich'ic bulel loq'uel
te jchebal-o'tanetique.
Currently Selected:
Proverbios 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.