Génesis 20
20
Abraham soc Abimelec
1Te Abraham loc' bahel tey a, baht ta sq'uinal Neguev; c'oht spas snahil-pac' ta Gerar te ay ta ohlil yu'un Cades soc Shur. Nahin ta Gerar hich te bin ut'il jyanlum. 2Te Abraham la yal tey a te ha yihts'in te Sara. Ha yu'un te Abimelec ajwalil yu'un Gerar la sticon ta iq'uel te Sara. 3Pero ta ahc'abal c'oponot yu'un Dios ta swayich te Abimelec, hich halbot: Ya me xlajat ta scaj te ants awic'oje, yu'un nuhpunem, ay smamalal, xchi sc'oblal.
4Pero te Abimelec ma to ba stahoj sba soc, ha yu'un la yal: Cajwal, ¿ya bal amil te mach'a mayuc smul? 5¿Ma bal lajuc yalbon te ha yihts'in te ants, soc te laj yalbon te ants te ha sbanquil? Ha yu'un jun co'tan soc mayuc mulil ta jc'ab a la jpas ini, xchi.
6Hich halbot ta swayich yu'un te Diose: Ya jna' te jun awo'tan la apas ini. Ha yu'un la jcomat ta slehel mulil ta jtojol, ha scuentahil te ma ba la jca'bat apic. 7Ha yu'un ticona bahel te ants ta stojol te smamalal, como ha jalwanej, ya xc'opoj awu'un ta jtojol scuenta yu'un cuxul ya xhilat. Yan teme ma ba yac aticon bahel, na'a me te ya xlajat soc spisil mach'atic ay awu'un, xchi.
8Ha yu'un sab hahch te Abimelec, la sticon ta iq'uel te a'batetic yu'un, la yalbe ya'iyic spisil te bin halbot. Te winiquetic bayel xiw yo'tanic yu'un. 9Patil te Abimelec la yic' tal te Abraham, hich la yalbe: ¿Bin la apasbotic? ¿Bin mulil jtahoj ta atojol yu'un te la awich' tal te muc'ul mulil ta jtojol soc ta stojol ban c'alal jcuentahinej? La apasbon te bin ma hichuc pasel ya sc'an, la yut.
10Te Abimelec la yalbe xan te Abraham: ¿Bin yacat ta snopel a te hich la apas? la yut.
11La sjac' te Abraham: La jcal ta co'tan: Melel li' ta lugar ini mayuc ta xi'el te Diose, ya me smilonic ta scaj quihnam. 12Soc melel nix a te ha quihts'in, como ha yantsil-nich'an te jtat pero ma ha'uc yal te jnane; ha la jquic' quihnamin. 13Te c'alal Dios la yic'on loq'uel tal ta sna jtat, hich la jcalbe: Hich me xac'uxultayon: Bayuc ya xbohotic ya me awal te ho'on abanquilon, xchihon.
14Ha yu'un te Abimelec la yic' tal tuminchijetic, wacaxetic soc a'bat ants-winiquetic, la ya'be te Abraham, soc la suhtbe te Sara te yihname. 15Soc hich la yal te Abimelec: Ilawil, ay ta atojol spisil te jq'uinale, nahinan te banti yac amulan ya xnahinat, xchi.
16Soc la yalbe te Sara: La jca'beyix lajunwinic yoxbahc' (1,000) ta sehp plata te abanquile, ha smahquil aq'uexlal ya xc'oht awu'un ta sit spisil yantic mach'atic ajoquinej, hich lec ac'oblal ya xc'ohat, xchi.
17Ha yu'un te Abraham la sc'opombe Dios, hich lecubtesot yu'un Dios te Abimelec, te yihnam soc te scriadahetique; hich alajic, 18como te Jehová jc'axel la smacbe yalajib te antsetic ayic ta sna Abimelec ta scaj te Sara te yihnam Abraham.
Currently Selected:
Génesis 20: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.