Éxodo 39
39
C'u'uletic yu'un sacerdotehetic
1La sjalic ta yax, chi'in-yax soc tsajal estambre te c'u'uletic yu'un te a'tel ta ch'ul awilal; soc la spasic te ch'ul c'u'uletic yu'un Aarón, hich te bin ut'il halbot yu'un Jehová te Moisés.
2La sjal te efod ta oro, yax, chi'in-yax soc tsajal estambre, soc ta ts'otbil lino. 3La stenic ta martillo te lehchel oro soc la set'ic ta jujulihc te ya yich' jalel soc te yax, chi'in-yax soc tsajal estambre, soc ta ts'otbil lino, ha ya'tel te t'ujbil ta pasele. 4La spasbe spac'al snehquel te efod te la ya'be syom sba ta ts'isel ta schebal sti'il. 5Te schuhquil sch'uht te efod hich nix pasbil ta oro, ta yax, chi'in-yax soc tsajal estambre, soc ta ts'otbil lino, hich te bin ut'il halbot yu'un Jehová te Moisés.
6La swaluyic ónice te la yac'ticlanic ta stut yawil ta oro soc la sts'ihbayic ochel tey a te sbihilic te snich'nab Israel hich te bin ut'il sello. 7La yaq'uic ta snehquel te efod, ha tonetic scuenta sna'ojibal yu'un te snich'nab Israel, hich te bin ut'il halbot yu'un Jehová te Moisés.
8Buen t'ujbil la spas te bolsa pac' ya xc'oht ta stahn,#39.8 Ilawil nota ta 25.7 hich te bin ut'il pasbil te efod, ta oro, ta yax, chi'in-yax soc tsajal estambre, soc ts'otbil lino. 9Chanxuhc soc cha'lahm la spas te bolsa pac' ya xc'oht ta stahn, jtahn-c'abal#39.9 22 centímetros snahtil soc jtahn-c'abal sjamalil scha'lahmal. 10La yaq'uic chanchohl t'ujbil tonetic tey a. Te sba cholol ay rubí, topacio, soc esmeralda; 11te scha'chohlol ay granate, zafiro, soc diamante; 12te yoxchohlol ay c'an jacinto, ágata, soc amatista; 13te schanchohlol ay berilo, ónice, soc jaspe.#39.13 Ma na'biluc teme hich ay sbihil spisil te tonetique. Spisilic ac'otic ta yawilic pasbilic ta oro. 14Ay lahchayeb tonetic hich te bin ut'il sbihilic te lahchaychahp snich'nab Israel, ta jujun ton ts'ihbabil ochel hich te bin ut'il sello te jujun sbihil te lahchaychahp.
15Ta bolsa pac' ya xc'oht ta stahn la spasbeyic schuhquil quejomtic pasbil ta puro oro, ts'otbil hich te bin ut'il lazo. 16Soc la spasbeyic cheb yawil tonetic soc cheb ch'ocowil ta oro, soc la yaq'uic te cheb ch'ocowil ta schebal xuhc te bolsa pac' ya xc'oht ta stahn; 17la ya'beyic stsac sba te cheb schuhquil pasbil ta oro soc te cheb ch'ocowil ta schebal xuhc te bolsa pac' ya xc'oht ta stahn, 18soc te yan sni'il te schuhquil la yaq'uic ta schebal yawil tonetic ay ta snehquel te efod ta stojol stahn. 19La spasic cheb xan ch'ocowil ta oro te la yaq'uic ta schebal xuhc ta ye'tal te bolsa pac' ya xc'oht ta stahn te banti ya sta sba soc te efod. 20La spasic cheb xan ch'ocowil ta oro te la yaq'uic ta cha'jis spac'al snehquel te efod ta ye'tal te banti ts'isbil, ta yahc'olal te schuhquil sch'uht te efod. 21Te sch'ocowiletic te bolsa pac' ya xc'oht ta stahn la schuquic ta tut yaxal schuhquil soc te sch'ocowiletic te efod, scuenta yu'un ya xhil ta sba te schuhquil sch'uht te efod, scuenta yu'un ma ba ya snihc sba a te bolsa pac' ya xc'oht ta stahn, hich te bin ut'il halbot yu'un Jehová te Moisés.
22Soc la spas spisil ta yaxal pac' te snahtil-c'u'ul te efod, ha ya'tel te mach'a ya sna' jalab, 23hotbil ta yohlil, hich te bin ut'il spretinahul snuc' c'u'ul te mayuc sc'ab,#39.23 Ma mero chican bin ya yal ta hebreo. te sti'il te snuc' pacbil ta ts'isel scuenta yu'un ma ba ya xch'i' a. 24La sch'albeyic sti'il yoc te nahtil-c'u'ul ta sloc'omba granada pasbil ta yax, chi'in-yax soc tsajal estambre, soc ta ts'otbil lino. 25Soc la spasic tut campanahetic ta puro oro, la yac'ticlambeyic ta c'ubulc'ub te sloc'omba granadahetic ta sjoyobal sti'il te paq'ue, 26jun campana soc jun granada, hich ta hich ta sjoyobal sti'il te nahtil-c'u'ul te ya xtuhun ta spasel a'tel, hich te bin ut'il halbot yu'un Jehová te Moisés.
27Ha nix hich la spasbeyic ta t'ujbil lino te smuc'ul-c'u' te Aarón soc snich'nab, ha ya'tel mach'a ya sna' jalab; 28la spasic te spohtsil sjol ta t'ujbil lino, te schuhquil ta t'ujbil lino, soc te scomil wexic ta t'ujbil ts'otbil lino; 29soc nix te schuhquil sch'uht pasbil ta t'ujbil ts'otbil lino, ta yax, chi'in-yax soc tsajal estambre, ha ya'tel te mach'a ya sna' sch'ahlel ta ts'isel, hich te bin ut'il halbot yu'un Jehová te Moisés.
30La spasic te ch'ul lehchel taq'uin ta puro oro soc la sts'ihbayic ochel tey a hich te bin ut'il ta sello: CH'ULTESBIL TA STOJOL JEHOVÁ. 31La schuquic ta yaxal schuhquil yu'un ya yich' jihpanel ta spohtsil sjol, hich te bin ut'il halbot yu'un Jehová te Moisés.
Hu' ta pasel te Nahilpac' Templo
32Hich hu' spisil te a'tel yu'un te Nahilpac' Templo, ha te Nahilpac' Templo yu'un tahojibal. Te snich'nab Israel la spasic spisil hich te bin ut'il halbot yu'un Jehová te Moisés. 33La yich'ic tal te Nahilpac' Templo ta stojol Moisés, ha te nahilpac' soc spisil te bintic ya xtuhun tey a: te ganchohetic, tablahetic, sc'atal-te'eletic, oyetic, soc scajtajib yu'unic; 34te smuhquil pasbil ta snuhculel stat tuminchijetic bombilic ta tsaj, te smuhquil pasbil ta nuhculetic,#39.34 Ilawil 25.5 te tsalul pac'; 35te scaxahul te chapbil-c'op soc sq'uechojibal, te yawil stahel perdón; 36te mesa soc spisil te bintic ya xtuhun tey a, soc te pan ac'bil ta stojol Dios; 37te scajtajib c'ahc' pasbil ta puro oro soc te cholol yawilic c'ahc' yu'un, soc spisil te bintic ya xtuhun tey a, te aceite te ya xtuhun yu'un c'ahc' te ya sacubtes q'uinal; 38te scajtajib ta chiq'uel pom pasbil ta oro, te aceite yu'un ch'ultesel, te pom sumet yic', te pac' yu'un yochibal te Nahilpac' Templo; 39te scajtajib ta chiq'uel mahtanil potsbil ta bronce soc te bin jalbil ta bronce, te sq'uechojibal soc spisil te bintic ya xtuhun tey a, te yawil ha' soc scajtajib; 40te paq'uetic yu'un te amac', te oyetic yu'un soc scajtajib, te pac' yu'un te yochibal te amac', te lazohetic soc te ts'acticlambil yich'o-ip yu'une; soc spisil te bin ya xtuhun yu'un te a'tel ta Nahilpac' Templo, ha te Nahilpac' Templo yu'un tahojibal; 41soc te jalbil c'u'uletic te ya xtuhun yu'un te a'tel ta ch'ul awilal, te ch'ul c'u'uletic yu'un te sacerdote Aarón soc te c'u'uletic yu'un te snich'nab scuenta a'tel ta sacerdotehil.
42Te snich'nab Israel la spasic spisil te a'tel hich te bin ut'il halbotic yu'un Jehová te Moisés. 43Te Moisés c'alal la yil spisil te a'tel, te hich la spasic te bin ut'il yaloj ta mandar te Jehová, la yac'ticlambe bendición.
Currently Selected:
Éxodo 39: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.