Éxodo 33
33
Te Nahilpac' Templo yu'un tahojibal
1Te Jehová la yalbe te Moisés: Bahan, loc'an bahel soc te pueblo te la aloq'ues tal ta sq'uinal Egipto, bahan tey ta q'uinal te la jcalbe ta jamal te Abraham, Isaac soc Jacob: Ya ca'be te ats'umbal, te xchihone. 2Ya jticon bahel ta atojol ch'ul a'bat, soc ya jtenticlan loq'uel te cananeo, amorreo, heteo, ferezeo, heveo soc te jebuseo. 3Bahanic tey ta q'uinal te banti ya x'oquin leche soc chab. Yan te ho'one ma ba ya joquinex bahel, teme repente ya jlajinex hilel ta be, como ha'ex pueblohex te tulan awo'tanic, xchi.
4C'alal la ya'iyic te pueblo te bin ma lecuc ta a'iyel ini, la smel yo'tanic yu'un soc mayuc mach'a la sch'alix sbahic yu'un, 5como te Jehová la yalbeyix te Moisés: Halbeya te snich'nab Israel: Te ha'ex pueblohex te mero tulan awo'tanic; te yacuc xtal joquinex jts'ihnuc, ya jlajinex te hichuque. Ha yu'un loq'uesahic te ach'ahlelic, scuenta yu'un ya jnop bin ya cutex, xchi.
6Ha yorahil a te la sloq'ues sch'ahlelic te snich'nab Israel ta wits Horeb.
7Te Moisés namal la yac' te Nahilpac' ta sti'il bahel te campamento; la ya'be sbihilin Nahilpac' Templo yu'un tahojibal. Mach'ayuc a te ya sle te Jehová, ya xbaht ta Nahilpac' Templo yu'un tahojibal te ay ta sti'il te campamento. 8Te c'alal ya xloc' bahel ta Nahilpac' Templo te Moisés spisil te pueblo ya xhahchic, ya stehc'an sbahic ta sti'il snahilpaq'uic, ya st'ojan sitic ta yilel te Moisés ha to c'alal ya x'och bahel ta Nahilpac' Templo. 9Te c'alal ya x'och bahel te Moisés, ya xco tal te bahlal tocal soc ya xc'oht ta yochibal te Nahilpac' Templo. Te Jehová ya xc'opoj soc te Moisés. 10C'alal ya yilic te pueblo te ya stehc'an sba ta yochibal te Nahilpac' Templo te bahlal tocal, jujutuhl ya stehc'an sbahic ta sti'il te snahilpaq'uic soc ya sch'uhuntayic.
11Te Jehová ya snuhp'in sba ta c'op soc Moisés, hich te bin ut'il mach'a ya xc'opoj soc te smohlole. Patil te Moisés ya suht bahel ta campamento, yan te jcolel winic Josué snich'an Nun, te a'bat yu'un, ma ba ya yihquitay hilel te Nahilpac' Templo.
Te Moisés a'bot yil yutsilal Jehová
12Te Moisés la yalbe te Jehová: Ilawil, ha'at yac awalbon: Ic'a bahel te pueblo ini, xchihat, pero ma ba la awa'bon jna' mach'a a te yac awac' sjoquinon bahele. Pero awaloj: Ya jna'bat abihil, soc lec c'ohemat ta jtojol, xchihat. 13Ha yu'un teme lec c'ohemon ta atojol, awocoluc, a'bon jna' te bin ay ta awo'tan, scuenta yu'un ya jna'bat aba soc te lecuc ya xc'ohon ta atojol. Soc na'a me te ha pueblo awu'un te pueblo ini, xchi.
14Hich halbot yu'un Jehová: Ya joquinat bahel, soc ya ca'bat acux awo'tan, xchi.
15Hich la sjac' te Moisés: Teme ma ba yac ajoquinotcotic bahel, ma me xaloq'uesotcotic bahel li'i. 16¿Bin ut'il ya xchicnaj teme lec c'ohemon ta atojol soc te pueblo awu'une? ¿Ma bal ha'uc ya xchicnaj yu'un te ha'at yac ajoquinon bahel, soc te bin ut'il te ho'on soc te pueblo awu'un parte ac'bilotcotic ta yohlil spisil te yantic pueblohetic ta swohlol bahlumilal? xchi.
17Te Jehová la yalbe te Moisés: Ya jpas te bin la awal, te bin ut'il lec ac'oblal ta jtojol soc te ya jna'bat te abihile, xchi.
18Ha yu'un hich la yal te Moisés: Awocoluc, a'bon quilbat a te awutsilal, xchi.
19La sjac' te Jehová: Ya jc'asesbat ta atojol spisil te cutsilal, soc ya cal hilel ta atojol te jbihil, Jehová. Ho'on ya jc'uxultay te mach'a ya jc'an ya jc'uxultay, soc ya jna'be yo'bolil sba te mach'a ya jc'an ya jna'be yo'bolil sba. 20Pero ma xhu' yac awilbon te jsit quelaw, como mayuc mach'a ya xhu' ya yilon te cuxul ya xhil, xchi.
21Soc la yal xan te Jehová: Ilawil, ay jun lugar nopol ta banti ayon. Yac atehc'an aba ta sba te ton, 22te c'alal ya xc'ax bahel te cutsilal, ya cac'at ta banti hotol ochel te tone, ya jmacat ta jc'ab ha to teme c'axone. 23Patil ya jloq'ues te jc'ab, hich yac awilbon jpat; yan te jsit quelaw ma xhu' ta ilel stuquel, xchi.
Currently Selected:
Éxodo 33: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.