2 Samuel 24
24
David ya yahtay te pueblo
1Te Jehová tihl xan yilimba ta stojol Israel. La shachbe yo'tan David ta scontrahinel Israel, hich la yal: Bahan, ahtaya te Israel soc Judá, xchi. 2Ha yu'un te ajwalil la yalbe te Joab, te jtsobaw yu'un te soldadohetic te sjoquinej: Behentayahic spisil ta chahp sts'umbal Israel ta Dan c'alal ta Beerseba, ahtaya te pueblo, scuenta yu'un ya jna' jayeb te yajwale, xchi.
3Te Joab la sjac'be sc'op te ajwalil: Ha'uc te Jehová te Dios awu'un te ya yac' p'ohluc xan ho'winic (100) buelta a te bin ut'il ay ta ora ini, soc te hich ya xhu' ya yil te ajwalil cu'une. Pero ¿bin yu'un te hich ya sc'an ya spas te ajwalil cu'un? xchi.
4Pero te bin la yal te ajwalil ha ich'bil ta cuenta c'oht, ha mayuc ta cuenta c'oht te bin la yal te Joab soc te capitanetic yu'un te soldadohetique. Hich loc' bahel ta stojol te ajwalil te Joab soc te capitanetic yu'un te soldadohetic ta yahtayel te pueblo yu'un Israel. 5Sohlic bahel ta muc'ul-ha' Jordán, la spasic campamento ta Aroer, ta stojol sur yu'un te pueblo te ay ta yohlil te spamlej yu'un Gad, soc nopol yiloj sba soc Jazer. 6Patil bahtic ta Galaad soc ta ahlan q'uinal Hodsi;#24.6 ta ahlan q'uinal Hodsi; O: ta Cades ta sq'uinal te hititahetic; patil bahtic ta Dan-jaan soc ta sjoyobal Sidón. 7Patil bahtic ta ahnibal ts'ahc yu'un Tiro, soc ta spisil te pueblohetic yu'un te heveohetic soc cananeohetic. Ta slajibal bahtic ta Neguev yu'un Judá, ta Beerseba. 8Te c'alal la sbehentayiquix spahmal te q'uinale, suhtic bahel ta Jerusalén, ay baluneb u soc jtahb (20) c'ahc'al sloq'uelic a. 9Te Joab la ya'be te ajwalil te jayeb loc' ta ahtayel te pueblo. Ay ta Israel ho'winic ta pic (800,000) winiquetic te ya xhu' yu'unic guerra; ta Judá ay j'ohlil yoxeb chanwinic ta pic (500,000) ta tuhl.
10Te c'alal laj yo'tan te David ta yahtayel te pueblo, pich'bot yo'tan yu'un, hich la yalbe te Jehová: Mero bayel la jta jmul yu'un te bin la jpas. Ya calbat wocol ta atojol, Jehová, te yacuc apasbe perdón te smul te awa'bate. Scaj jsonsohil te hich la jpase, xchi.
11Ta sab, c'alal hahch te David, te Jehová hich la yalbe te jalwanej Gad, te ha jalwanej yu'un David: 12Bahan, halbeya te David: Hich yaloj te Jehová: Ay oxeb te bin ya ca'bat atsa; ya me atsa junuc te ya jpasbat, xchi. 13Hich tal te Gad ta stojol David, la ya'be sna', hich la yalbe: ¿Ya bal ac'an te ya xtal huqueb ha'bil wi'nal ta aq'uinal? ¿o teme oxeb u ya x'ahnat ta stojol te acontratac te ya snutsat? ¿o teme oxeb c'ahc'al ay jmilawal-chamel ta aq'uinal? Nopa awa'iy, yu'un hich ya xc'oht calbe te mach'a sticonejon tal, xchi.
14Te David hich la yalbe te Gad: Mero ayon ta wocol ya ca'iy. Ac'a ochucotic ta sc'ab te Jehová como bayel sc'uxul yo'tan stuquel, manchuc ya x'ochotic ta sc'ab winiquetic, xchi.
15Ha yu'un te Jehová la sticon tal jmilawal-chamel ta stojol Israel ta sab ha to c'alal ts'acay te yorahil halbile. Ta Dan c'alal ta Beerseba chamic waxacpic soc ho'lajunbahc' (70,000) ants-winiquetic. 16C'alal la shach sc'ab te ch'ul a'bat ta stojol Jerusalén yu'un slajinel, te Jehová la sut sc'op, hich la yalbe te ch'ul a'bat te yac ta lajinwanej: Tiq'uix a; coma te ac'abe, xchi.
Te ch'ul a'bat yu'un Jehová ay ta sq'uiyojibal trigo yu'un te Arauna te jebuseo-winique. 17C'alal la yil David te ch'ul a'bat te yac ta slajinel te pueblo, hich la yalbe te Jehová: Ho'on la jta jmul, ho'on la jpas te bin chopole. ¿Bin la spasic te ants-winiquetic ini? Ya calbat wocol te ha'uc ya xc'oht ac'ab ta jtojol soc ta stojol te sna te jtate, xchi.
18Ha nix ta yorahil a, te Gad tal ta stojol David, hich la yalbe: Mohan bahel, pasa jun scajtajib ta chiq'uel mahtanil yu'un Jehová ta sq'uiyojibal trigo yu'un te Arauna te jebuseo-winic, xchi. 19Ha yu'un mo bahel te David hich te bin ut'il halbot yu'un Gad, hich te bin ut'il pasot ta mandar yu'un Jehová. 20Te Arauna la yil te ajwalil yac ta talel ta stojol soc te a'batetic yu'une, hich loc' bahel, la squejan sba ta lum ta stojol te ajwalil, 21hich la yal: ¿Bin yu'un te tal te ajwalil cu'un ta stojol te ya'bat? xchi.
La sjac' te David: Yu'un tal jmambat te yawil sq'uiyojibal trigo awu'un, yu'un ya jpasbe scajtajib ta chiq'uel mahtanil yu'un Jehová scuenta yu'un ya xquehchaj a te jmilawal-chamel ta stojol te pueblo, xchi.
22Te Arauna hich la yalbe te David: Ich'a, soc ac'a te mahtanil te ya sc'an yo'tan te ajwalil cu'un. Li' ay j'a'tel-wacaxetic scuenta scohtol chic'bil mahtanil, soc te swuyojbil spat trigo soc te yugohetic yu'un te j'a'tel-wacaxetic scuenta si'. 23Spisil ini, ajwalil, ha me ya ya'be te ajwalil te Arauna, xchi.
Soc te Arauna hich la yalbe xan te ajwalil: Ac'a yich'at ta cuenta te Jehová te Dios awu'un, xchi.
24Pero te ajwalil hich la yalbe te Arauna: Ma'uc, ya jtojbat, ha chican jayeb stojol. Ma ba ya ca'be smahtanin Jehová te Dios cu'un te mahtaniletic te ma tojbiluc cu'un, xchi.
Hich te David la sman te yawil sq'uiyojibal trigo soc te j'a'tel-wacaxetic ta lajuneb yoxwinic (50) ta sehp plata. 25Tey la spasbe a te scajtajib ta chiq'uel mahtanil yu'un Jehová soc la ya'be scohtol chic'bil mahtanil soc milbil mahtanil scuenta lamal q'uinal. Te Jehová la ya'iybe sc'op ta scuenta te q'uinal, hich quehchaj te jmilawal-chamel ta stojol Israel.
Currently Selected:
2 Samuel 24: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.