1 Pedro 1
1
Spatil-o'tanil
1Pedro, jpuc-c'op yu'un te Jesucristo, ta stojol te mach'atic puhquemic bahel ta pueblohetic ta sq'uinal Ponto, Galacia, Capadocia, Asia, soc Bitinia, 2te tsahbilic ta scuenta te nahil na'bot sbahic yu'un te Jtatic Dios, ta scuenta te ch'ultesel yu'un te Espíritu, yu'un ya sch'uhumbeyic smandar te Jesucristo soc ya yich'ic tsihtsinel ta sch'ich'el: Bayeluc me yutsil-o'tanil soc lamal q'uinal ta atojolic.
Te muc'ul-o'tanil te ha cuxul
3Wocol yal te Dios te Stat te Cajwaltic Jesucristo, te ta scuenta smuc'ul sc'uxul yo'tan la yac' te cha'ayinotic ta scuenta te cha'cuxaj tal te Jesucristo ta yohlil te mach'atic chamenic, scuenta yu'un ay smuc'ul co'tantic te cuxul, 4soc scuenta yu'un ya x'ac'ot quich'tic te bin ma xjihn, te mayuc yabaquil soc te ma xtaquij, te q'uejbil ta ch'ulchan yu'un ha awu'unic ya xc'oht, 5ha'ex te ta scuenta sch'uhunel awo'tanic canantaybilex ta yu'el Dios ha to c'alal ya xtal te colel te chapalix te ya xchicnaj ta slajibal c'ahc'al.
6Tse'el awo'tanic yu'un, aunque jts'ihn xanix ya sc'an te ya xc'ax awocolic ta chahpal chahp tsajel, 7scuenta yu'un teme la yich'ix tsajel te sch'uhunel awo'tanic, te c'ax hich yutsil a te bin ut'il oro, (aunque ya xlaj, pero ya xtsajot ta c'ahc'), lec me sc'oblal ya xc'oht, soc ay me yutsilal soc ich'bil ta muc' ya xc'oht te c'alal ya xchicnaj tal te Jesucristo. 8Aunque ma ba awilojic, c'ux yac awa'iy ta awo'tanic; aunque ma ba yac awilic ta ora ini, yac ach'uhunic soc ay bayel yutsil te stse'elil awo'tanic te ma xhu' ta halbeyel sc'oblal, 9como yac awich'belic te bin scuentahil te sch'uhunel awo'tanic, ha te scolel ach'uhlelique.
10Te jalwanejetic te la yalbeyic sc'oblal te yutsil-o'tanil te yac awich'ic, la sc'an la sna'beyic scuentahil soc la stsahtayic ta lec te colel ini, 11yo'tanuc la sna'ic mach'a a soc bin ora ya xc'oht ta pasel, te la yac' ta na'el te Espíritu yu'un Cristo te ay ta yo'tanic, te ha nahil la yalbe sc'oblal te wocoletic ya xc'oht ta stojol Cristo soc te utsilal te ya xtal ta patil. 12A'bot sna'ic te ma ha'uc ya xc'oht ta scuentahic, ha ya xc'oht ta acuentahic te ha'exe. La yalbeyic sc'oblal te bintic la awa'iyiquix yu'un te mach'atic la yalbeyex te lec yach'il c'op ta scuenta te Ch'ul Espíritu ticombil tal ta ch'ulchan. Ha nix hich te ch'ul a'batetic, yo'tanuc xyilic te bin yac ta halbeyel sc'oblale.
Ch'ultesbiluc acuxlejalic
13Ha yu'un chahpana me apensaric; tsahtaya me abahic, ac'a smuc'ulin awo'tanic te yutsil-o'tanil yac awich'ic te c'alal ya xchicnaj tal te Jesucristo. 14Te bin ut'il al-nich'anex te yac ach'uhunic mandar, ma me pajaluc awo'tanic soc te bin la amulanic spasel ta nahil to te c'alal ma to ana'ojic q'uinal a. 15Pero, hich te bin ut'il ch'ultesbil te Mach'a la yiq'uex, hichuc ch'ultesbiluquex ta spisil bintic yac apasic. 16Como hich ts'ihbabil hilel: Ch'ultesbiluquex, como ho'on ch'ul Dioson, xchi.
17Teme yac awal te ha Atat te mach'a pajal ya yich' ta c'op ta tuhlutuhl ha chican bin yilel ya'tel, ha yu'un socuc me xiwel ya xcuxajex te jayeb c'ahc'al jbehyomex ta q'uinal; 18como ana'ojic te ma ha'uc ta scuenta bin ya xlaj, hich te bin ut'il oro o plata, te mambilex loq'uel tal ta apoco' talelic te mayuc scuentahil, te awich'ojic yu'un te ame'atatique, 19pero ta scuenta sch'ul sch'ich'el te Cristo, te hich c'ohem te bin ut'il tuminchij te mayuc yabaquil soc mayuc bin jihnem yu'un. 20Ha tsahbil te c'alal ma to pasbiluc a te bahlumilal, pero chicnaj ta slajibalix ayotic ini ta scuenta sc'uxulex ta yo'tan. 21Ha nix ta scuenta te yac ach'uhunic Dios, ha te mach'a la scha'cuxajtes ta yohlil mach'atic chamenic soc la ya'be yutsilal, ha scuentahil te awac'oj sch'uhunel awo'tanic soc smuc'ul awo'tanic ta stojol te Diose.
22Te bin ut'il la alecubtesbeyex ach'uhlelic ta scuenta te la ach'uhunic te smelelil c'op, ta scuenta te Espíritu, te hich c'ux yac awa'iy abahic ta awo'tanic ta melel, talel c'axel c'ux me xawa'iy abahic ta spisil awo'tanic, 23como cha'ayinemexix, ma ha'uc ta scuenta te ts'unubil te ya xlaj, ha ta scuenta te ts'unubil te ma xlaje, ha te sc'op Dios te cuxul soc te ma xlaj sbahtel q'uinal. 24Como hich ya yal:
Spisil ch'ich'-baq'uet
hich ay te bin ut'il ac,
soc spisil te yutsilal te ants-winic
hich ay te bin ut'il snich ha'mal;
ya xtaquij te ac
soc ya xluhbaj te nichim,
25yan te sc'op te Cajwaltic
stalel ay sbahtel q'uinal, xchi.
Ha te lec yach'il c'op ini te la yich' halel ta atojolique.
Currently Selected:
1 Pedro 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.