1 Pedro 2
2
1Ha yu'un jc'axel me ac'a hiluc awu'unic spisil bintic chopol, lo'loyel, chebal-o'tanil, ti'ti'o'tantaywanej, soc spisil lehaw ta c'op. 2C'anahic te lequil chu'ul yu'un te Espíritu, hich te bin ut'il alaletic te ayinelic to, yu'un hich me ya xmuc'ubex a ta scuenta te colel awu'unic, 3te bin ut'il la amulambeyiquix sbuhtste yutsil yo'tan te Cajwaltique.
Te cuxul ton
4Nopojanic ta stojol Cristo, ha te cuxul ton, te p'ajbil yu'un ants-winiquetic pero tsahbil yu'un Dios soc ha bayel sc'oblal ta yo'tan. 5Ha nix hichex, te bin ut'il cuxul tonex, ac'a abahic ta pasel ta na scuenta espíritu soc ta ch'ultesbil sacerdotehil, scuenta yu'un yac awaq'uic mahtaniletic scuenta espíritu te ich'bilic ta cuenta yu'un Dios ta scuenta te Jesucristo. 6Ha scuentahil te hich ts'ihbabil ta Shun Dios:
Ilawil, ya cac' ta Sión
te ton te ha yich'o-ip te xuhc na,
te ha tsahbil soc te bayel yutsil;
te mach'a ha ya sch'uhun,
ma ba ya sta q'uexlal, xchi.
7Te ha'ex te ach'uhunejic, ha bayel sc'oblal ta awo'tanic te tone; yan te mach'atic ma ba ya sch'uhunic:
Te ton te p'ajbil yu'un te jpas-nahetic,
ha sjol c'oht te yich'o-ip te xuhc nahe,#2.7 O ha nax: te yich'o-ip na xchi,
8soc:
Ha ton scuenta c'ohchinojibal
soc ha ton te ya xyahlteswan, xchi.
Ha ya sc'ohchin sbahic a ta scaj te ma ba ya sch'uhunic te c'ope. ¡Yu'un hich nix ya xc'ohtic ta loq'uel a!
Te pueblo yu'un Dios
9Yan te ha'exe tsahbil pueblohex, sacerdotehex yu'un ajwalil, ch'ul nacionex soc pueblohex yu'un Dios, scuenta yu'un yac apuquic ta halel te yutsilal te Mach'a la yiq'uex loq'uel ta yihc'al q'uinal soc la yaq'uex ta sacal q'uinal yu'un te bayel yutsil. 10Ta nahil to ma pueblohuquex yu'un Dios, pero yo'tic pueblohexix yu'un te Diose; ta namey tal mayuquex ta c'uxultayel, pero yo'tic awich'ojiquix c'uxultayel.
Hich ac'a cuxajuquex te bin ut'il a'batetic yu'un Dios
11Quermanotac te c'uxex ta co'tan, ya calbeyex wocol, te bin ut'il jyanlumex soc jbehyomex ta bahlumilal ini, te yacuc xhil awu'unic te bin mulambil ta pasel yu'un te abaq'uetalic te ya scontrahin te ach'uhlelique. 12Lecuc me bin yac apasic ta stojol mach'atic ma ba sch'uhunejic Dios, aunque ya yalbeyex ac'oblalic te ha chopol bintic yac apasic, ya me yilbeyex te lec awa'telic, hich ya yalbe yutsil sc'oblal te Dios te bin c'ahc'alil ya xtale.
13Ta scuenta Cajwaltic ac'a abahic ta cuentahinel yu'un spisil mach'atic yich'oj ya'telic ta bahlumilal, hich te bin ut'il te ajwalil te muc' ya'tel, 14soc te gobernadoretic te ha ticombilic yu'un ya'beyel castigo te mach'atic chopol bin ya spasic soc ta yalbeyel lec sc'oblal te mach'atic lec bin ya spasique. 15Como ha ya sc'an te Dios te yac apasic te bin lec scuenta yu'un hich yac amacbeyic ye a te mach'atic ma sna'ic q'uinal. 16Hich ac'a cuxajuquex te bin ut'il mach'a ay ta libre, pero ma me librehuc ayex ta spasel te bin chopole; hich ac'a cuxajuquex te bin ut'il a'batetic yu'un Dios. 17Ich'ahic ta muc' spisil yantic. C'ux me xawa'iy ta awo'tanic te awermanotac. Xi'ahic me te Diose. Ich'ahic me ta muc' te ajwalile.
18A'batetic, ch'uhumbeyahic smandar te ajwaliletic awu'unic, soc ich'ahic ta muc', ma ha'uc nax te mach'atic lec yo'tanic soc te ayex ta yo'tanique, ha nix hich te mach'atic tulan yo'tanic ta atojolique. 19Ha lec sc'oblal te mach'a ya xc'ax swocol aunque mayuc smul, te ya xchuhch yu'un ta scaj te ya sna' ta yo'tan te Diose. 20Pero ¿bin awutsilalic yac atahic a teme jun awo'tanic yac ac'ases awocolic ta scaj amulic? Yan teme yac ac'ases awocolic yu'un spasel te bin leque, ha lec yo'tan Dios yu'un. 21Ha scuentahil te ic'bilex, como ha nix hich c'ax swocol te Cristo ta acuentahic, hich la ya'beyex hilel anopic yu'un hich yac at'unic bahel. 22Mayuc la sle smul soc mayuc lotil c'op loc' ta ye. 23Te c'alal la yixta'c'optayic, ma ba la sutbe ta ixta'c'op; te c'alal c'ax swocol, ma ba la yal te ya sutbe spacol, ha la yac' sba ta sc'ab te mach'a toj ya xchahpanwan. 24Ha nix la scuchbotic jmultic ta sbaq'uetal ta te', scuenta yu'un ya xchamotic ta stojol te mulil soc ya xcuxajotic ta spasel te bin stojil ta pasele. ¡Ha ta scuenta te yehchen te lecubex! 25Como hichex te bin ut'il tuminchijetic te howiyemic, pero yo'tic suhtemexix tal ta stojol te Jcanantaywanej soc te Mach'a ya scanantaybeyex ach'uhlelique.#2.25 te Mach'a ya yilbeyex ach'uhlelique, o: Obisbo, o: Anciano, ha te mach'a ya yilbe ya'tel yan.
Currently Selected:
1 Pedro 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.