1 Tesalonicenses 2
2
Ya'tel Pablo ta Tesalónica
1Ha'ex nix, quermanotac, ana'ojic te ma tojoluc c'oht quilexcotic. 2Ana'ojic te c'alal la jquich'cotic uts'inel soc q'uexlaltesel ta Filipos, te Dios cu'untic la ya'botcotic yip co'tancotic yu'un ya calbeyexcotic te lec yach'il c'op yu'un Dios, aunque ay bayel contrahinel. 3Como te c'op la jcalcotic ta tsitsaw ta atojolic ma ta scuentahuc howil c'op o te bin chopol ay ta co'tancotic o ma ta scuentahuc lo'loywanej. 4Hich ya xc'opojotcotic te bin ut'il mach'atic lec yo'tan Dios yu'un, te hich ac'ot ta jcuentacotic te lec yach'il c'ope. Ma ha'uc ya jc'ancotic te lec yo'tan cu'uncotic te ants-winiquetic, ha'uc me lec yo'tan cu'uncotic te Dios, te ya ya'iybotic co'tantic stuquel. 5Ana'ojic te mayuc bin ora c'opojotcotic ta bahba-c'op soc mayuc bin ora muquen la jlo'loycotic taq'uin. Ha testigo cu'uncotic te Diose. 6Ma ba la jlehcotic te ya yalbotic yutsil jc'oblalcotic te ants-winiquetic, teme ha'ex o yantic, aunque hu' cu'uncotic ya'belex awihcatsic te bin ut'il jpuc-c'opotcotic yu'un Cristo. 7Pero la jc'uxultayexcotic, hich te bin ut'il nanil ya sc'uxultay yalatac. 8Te bin ut'il lom bayel c'uxex ta co'tancotic, ma ha'uc nax la jcalbeyexcotic te lec yach'il c'op yu'un Dios, ha ya c'an cac' jcuxlejalcotic ta acuentahic, como bayel c'uxex ta co'tancotic. 9Ana'ojic, quermanotac, te luhbotcotic ta a'tel; bin ut'il a'tejotcotic c'ahc'al ahc'abal scuenta yu'un mayuc mach'a ya ca'becotic swocol te c'alal la jcalbeyexcotic te lec yach'il c'op yu'un te Diose.
10Ha'ex testigohex, soc ha nix testigo te Dios, te bin ut'il ch'ultesbil soc toj soc mayuc bin chopol jpasojcotic te ayinotcotic ta atojolic te jayebex ach'uhunejique. 11Soc ana'ojic bin ut'il la jtsitsexcotic soc la jmuc'ubtesbeyexcotic q'uinal awa'iyic ta jujutuhlex, hich te bin ut'il ya spas te tatil ta stojol te snich'nabe. 12Soc tulan sc'oblal la jcalbeyexcotic te hich me ya x'ayinex te bin ut'il ya sc'an ta stojol Dios, te la yiq'uex ochel ta banti te cuentahinel yu'un soc ta yutsilal.
13Ha yu'un spisil ora ya calbecotic wocol Dios, como te c'alal la awich'ic ta muc' te sc'op Dios te la jcalbeyexcotic, ma ba la awich'ic hich te bin ut'il sc'op winiquetic, hich la awich'ic te bin ut'il sc'op Dios, te melel ha nix a, te ha ya x'a'tej ta awo'tanic ha'ex te ach'uhunejique. 14Ha'ex, quermanotac, la anopbeyic yo'tanic te iglesiahetic yu'un Dios te ayic ta Judea, te ayic ta scuenta Cristo; c'ax awocolic ta uts'inel yu'un alumalic hich te bin ut'il c'ax swocolic ta uts'inel yu'un te judíohetic, 15ha te mach'atic la smilic te Cajwaltic Jesús soc te jalwanejetic yu'unic, soc te la stenotcotic loq'uel te ho'otcotique. Ma ba lec yo'tan Dios yu'unic, soc ya scontrahinic spisil ants-winiquetic, 16ha ya scomotcotic te manchuc ya calbecotic te jyanlumetic scuenta yu'un ma xcolic. Hich ya xtohy xan smulic a, tulan castigo c'ohemix ta stojolic.
Pablo yo'tanuc ya yil te tesalonicahetic
17Pero, quermanotac, te bin ut'il ma ba joquinejex cheb oxeb c'ahc'al, (ma ba la jquilexcotic ta jsitcotic, pero ayex ta co'tancotic) mero co'tancotic te la quilbeyexcotic xan asitic. 18Ha yu'un la jc'ancotic te ya xtal quilexcotic, (ho'on Pablohon, cheb oxeb buelta c'an taluc quilex), pero ha la smacotcotic te Satanás. 19Como ¿bin a te smuc'ul co'tancotic, te stse'elil co'tancotic soc te corona te ya jtoy q'uinal ca'iycotic yu'un ta stojol te Cajwaltic Jesucristo te c'alal ya xtale? ¿Ma bal ha'uquex? 20Melel ha'ex te cutsilalexcotic soc stse'elilex co'tancotic.
Currently Selected:
1 Tesalonicenses 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.