1 Samuel 2
2
Sc'ayoj Ana
1Te Ana la sc'opon Dios, hich la yal:
Mero tse'el co'tan ta stojol Jehová,
ya quich' xan quip ta scuenta Jehová;
ta que ya jtse'lay te jcontratac,
como tse'el co'tan yu'un te la acoltayon.
2Mayuc mach'a yan hich ch'ul Dios a te bin ut'il Jehová,
mayuc yan, ha'at nax atuquel;
mayuc yan ahnibal hich te bin ut'il te Dios cu'untique.
3Ma me xc'opojex soc atoybahilic,
ma me xloc' toyba-c'op ta awe'ic,
como te Jehová ha te Dios te ya sna' spisil,
soc ay ta scuenta stsahtayel te bintic ya yich' pasele.
4Wac'ticlambil ste'el st'ihmalte'ic
te mach'atic ay yipic,
yan te mach'atic mayuc yipic
ya me yich' yipic stuquelic.
5Te mach'atic nojel sch'uhtic
ya yac' sbahic ta jle-a'tel scuenta we'elil,
yan te mach'atic ayic ta wi'nal,
mayuquix swi'nalic.
Te ants te ma x'alaj,
ayinix huctuhl yal;
yan te mach'a ay bayel yalatac,
ay ta mel-o'tan.
6Te Jehová ya yac' lajel
soc ya yac' cuxlejal;
ya yac' cohuc ta muquenal
soc ya yac' loq'uel tal.
7Te Jehová ya x'ac'awan ta pobre
soc ya x'ac'awan ta jc'ulej;
ya spehc'ambe sc'oblal
soc ya stohytesbe sc'oblal.
8Ha ya shach mohel ta ts'u'lum te pobre,
ya shach ta sch'ayojibal c'a'pal
te mach'a mayuc bin ay yu'un,
scuenta yu'un ya yac' shuhcan sba soc príncipaletic
soc ya yac' x'ich'otuc ta muc'.
Como yu'un Jehová te yich'o-ip te lumq'uinal,
tey la snahcan a te bahlumilale.
9Ha ya scanantaybe yoc
te mach'atic yu'un te ch'uhltesbilique,
yan te mach'atic chopol yo'tanic
ya me xlajic ta yihc'al q'uinal;
como mayuc mach'a ya ya'iy tsalaw
ta scuenta te yip stuquel.
10Te mach'atic ya scontrahinic te Jehová ya me xlajinotic,
ha ya xt'ohm tal ta stojolic c'alal ta ch'ulchan.
Te Jehová ya me yich' ta c'op c'alal ta sti'il bahlumilal;
ya me ya'be yip te ajwalil yu'un,
soc ya me ya'be xan yip te Mach'a malbil ta aceite yu'une, xchi.
11Patil suht bahel ta sna ta Ramá te Elcana; te alal-querem hil ta a'batinel yu'un Jehová ta stojol te sacerdote Elí.
Smulic te snich'nab Elí
12Te snich'nab Elí mero chopol yo'tanic, ma ba la sna'beyic sba te Jehová. 13Hich la spasulanic te sacerdotehetic ta stojol te pueblo: teme ay mach'a ya yac' milbil mahtanil, te c'alal yac ta ta'ajel a te ti'bal, ya xtal jtuhl ya'bat te sacerdote, yich'oj ya xtal ta sc'ab jun trinche te oxeb ye, 14ya slap ochel ta perol, o ta oxom, caldero, o ta muc'ul sartén; spisil te bin ya stsac loq'uel ta trinche ha ya yich' te sacerdote. Hich ya spasbeyic spisil te israeletic te ya xtalic ta Silo. 15Ha nix hich, te c'alal ma to ba chic'bil a te sjuhp'el, ya xtal te ya'bat te sacerdote, hich ya xc'oht yalbe te mach'a ya yac' te milbil mahtanil: A'bon ti'bal yu'un ya jwobe sti' te sacerdote, como ma ba ya yich'bat ti'bal te ta'ajemix, stsehel ya sc'an, xchi. 16Teme ya xhalbot yu'un te winic: Ha nahil ya sc'an ya yich' chic'beyel te sjuhp'el, patil ich'a bahel te jayeb yac ac'an, teme xchihe, hich ya yal: Ma'uc, a'bon ta ora; teme ma'uque ya me jtsacbat bahel ta fuersa, xchi. 17Ha yu'un te smul te winiquetic ini mero muc' c'oht ta stojol Jehová, como mayuc scuentahil ta yo'tanic te mahtaniletic yu'un Jehová.
18Te querem Samuel yac yac'bel sba ta a'batinel ta stojol Jehová, sc'u'inej efod pasbil ta lino-pac'. 19Te snan ya spasbe stut muc'ul-c'u', ya yich'be tal jujun ha'bil c'alal ya xmo tal soc smamalal ta yaq'uel te milbil mahtanil te ya yaq'uic jujun ha'bil. 20Te Elí ya ya'be bendición te Elcana soc te yihnam, hich ya yal: Jehová ac'a ya'bat anich'nab soc te ants ini scuenta sjelol te la sc'ambe te Jehová, xchi. Patil ya suhtic bahel ta sna.
21Te Jehová la sna' te Ana, hich hahch yal, ayin xan oxeb squerem-al soc cheb yantsil-al. Te querem Samuel xquechcon ta muc'ubel ta stojol Jehová.
22Te Elí mero mamalix, soc ya'iyej te bin yacalic ta spasel te snich'nab ta stojol spisil Israel, soc te ya xwayic soc te antsetic yac'oj sbahic ta a'batinel ta yochibal te Nahilpac' Templo yu'un tahojibal. 23Ha yu'un hich la yalbe: ¿Bin yu'un te hich yac apasic? Spisil te pueblo ya yalbonic sc'oblal te chopol awa'telique. 24Ma'uc, jnich'nab, ma lecuc ac'oblalic yac ca'iybel te yac awa'beyic sle smul te pueblo yu'un Jehová. 25Teme ay mach'a ya sta smul ta stojol yan, Dios#2.25 O: te juecetic ya schahpanic ya xc'opoj yu'un, pero teme ay mach'a ya sta smul ta stojol Jehová, ¿mach'a ya xc'opoj yu'un stuquel? xchi. Pero ma ba la ya'iybeyic sc'op te statique, como te Jehová chapalix yu'un te ya smilticlan.
26Yan te querem Samuel xquechcon ta muc'ubel soc lec sc'oblal yac ta c'ohel ta stojol Dios soc ta stojol te ants-winiquetique.
27Tal jtuhl winic yu'un Dios ta stojol te Elí, hich la yalbe: Hich yaloj te Jehová: ¿Ma bal jamaluc la jcac' jba ta na'el ta stojol te mach'atic ay yu'un atat, te c'alal ayic to ta Egipto a te cuentahimbilic yu'un faraón? 28Ha la jtsa loq'uel ta yohlil spisil te jchahp yu'un Israel scuenta sacerdote cu'un ya xc'oht, yu'un ya yac' chic'bil mahtanil ta scajtajib cu'un, ya schic' pom, soc ya slap efod ta jtojol. La jca'be te mach'atic ay yu'un atat spisil te mahtaniletic chic'bilic ta c'ahc' te ya yaq'uic te snich'nab Israel. 29¿Bin yu'un te mayuc sc'oblal ta awo'tanic te chic'bil mahtaniletic soc te yantic mahtaniletic cu'un te la jpas ta mandar te ya yich' aq'uel ta Nahilpac' Templo; soc te c'ax hich yac awich' ta muc' a te anich'nab te bin ut'il te ho'one, ha te yac ajup'teslambel ta banti c'ax lec yu'un te mahtaniletic ya yaq'uic te pueblo Israel cu'un? xchi te Jehová.
30Ha scuentahil te hich ya yal te Jehová te Dios yu'un Israel: Calojix ta jamal te mach'atic ay awu'un soc te mach'atic ay yu'un atat ya me x'a'tejic ta jtojol spisil ora, te xchihe. Pero yo'tic ya yal te Jehová: Mayuc bin ora te hich ya jc'ohtes ta pasel, como ha ya quich' ta muc' te mach'atic ya yich'onic ta muc', yan te mach'atic mayuc jc'oblal ta yo'tanic, mayuc sc'oblal ya xc'oht cu'un. 31Ya xtal yorahil te ya jlajimbat awip soc te yip te mach'atic yu'un atat, scuenta yu'un ma me ayuc mamal ya xhil ta ana. 32Ya me awil te peq'uel ya xc'oht te mach'atic ay awu'un.#2.32 O ya yal: Ya me awil wocol ta jna. Aunque Dios ya spas bin lec ta stojol Israel, mayuc bin ora te ay mamal ya xhil ta ana. 33Te mach'a awu'un te ma ba ya jloq'ues ta a'tel ta stojol te scajtajib ta chiq'uel mahtanil cu'un, ha ya ya'bat te ya xlaj asit yu'un oq'uel soc te ya xnoj ta mel-o'tan te awo'tane; soc spisil mach'atic ya x'ayinic ta ana, jcolel winic to a ya me xchamic.
34Ha me seña awu'un ini te bin ya xc'oht ta pasel ta stojol te cha'tuhl anich'nab, ha te Ofni soc Finees: ta schebalic ya me xlajic ta junax c'ahc'al. 35Ya cotses yan sacerdote te jun yo'tan ta jtojol, te ya spas te bin ya sc'an co'tan. Ya cac' ya xhalaj te sts'umbal, soc ya me x'a'tej spisil ora ta stojol te mach'a tsahbil cu'une. 36Te mach'atic hilemic awu'un ya me xtal bic'tajuc ta stojol ta sc'anel jsehpuc plata o jxehtuc pan, soc ya me yalbe: Awocoluc a'bon biluc a'telil ta sacerdotehil scuenta yu'un hich ya xhu' ya jwe' jxeht'uc pan a, xchi te winic yu'un Dios.
Currently Selected:
1 Samuel 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.