1 Corintios 4
4
Ya'tel jpuc-c'opetic
1Ha yu'un ya sc'an ya sna'ic te ants-winiquetic te ha ya'batotcotic Cristo te ho'otcotic soc jcuentahinejcotic te bin muquen ay yu'un Dios. 2Ya sc'an ya xchicnaj te jun yo'tanic jujutuhl te jcuentahinwanejetique. 3Te ho'one mayuc sc'oblal ta co'tan te ya quich' chahpanel awu'unic o ta chahpajibal yu'un ants-winiquetic. ¡Ni ma ho'ucon ya jchahpan jba! 4Aunque mayuc bin chopol ya yalbon te co'tan, ma ha'uc yu'un te mayuc jmul; te mach'a ya schahpanon ha te Cajwaltique. 5Ha yu'un ma me ayuc bin yac achahpanic te ma to stahoj yorahil, ha to c'alal ya xtal te Cajwaltic, te ha ya schicnajtes bintic muquen ay ta yihc'al q'uinal soc ya me yac' ta na'el te bin snopoj ta yo'tanique. Ha to me ya yich' jujutuhl a te bin lec sc'oblal ya xhalbot yu'un Dios.
6Quermanotac, ta scuenta sc'uxulex ta co'tan hich la jta ta halel bin u'til ayon soc te Apolos, scuenta yu'un hich yac anopic ta jcuentacotic te ma me xjelawex ta bin ts'ihbabil, te mayuc mach'a muc' xan ya xc'oht sc'oblal awu'unic a te bin ut'il sc'oblal te yane, 7como ¿mach'a ya yac'at te toyol ayat yu'un te yane? ¿Bin ay awu'un te ma ba awich'oj? Teme ha la awich'e ¿bin yu'un te yac atoy aba yu'un te sjel te ma ba awich'oje?
8Ayix awu'unic spisil, jc'uhlejexix, ochemex ta ajwalil, pero ma ha'uc ta jcuentacotic. ¡Co'tanuc te yacuc x'ochex ta ajwalil, scuenta yu'un pajal ya x'ochotic ta ajwalil a! 9como, te ya cal ho'on, slajibal ac'otcotic yu'un Dios ho'otcotic te jpuc-c'opotcotique, hich bin ut'il mach'atic chapal sc'oblalic ta milel. ¡Ayotcotic ta ilel ta comonsitil yu'un te bahlumilal, yu'un ch'ul a'batetic soc yu'un ants-winiquetic! 10Cuybilotcotic te mayuc bin jna'ojcotic ta scuenta Cristo, yan te ha'exe buen p'ijex ta scuenta Cristo; te ho'otcotic mayuc quipcotic, yan te ha'exe bayel awipic. Te ha'exe ich'bilex ta muc', yan te ho'otcotic p'ajbilotcotic. 11C'alal ora yo'tic ayotcotic ta wi'nal, ta taquinti'il, mayuc jcu'-jpac'cotic, quich'ojcotic majel, soc mayuc banti ya xnahinotcotic. 12Luhbenotcotic ta a'tel ta jc'abcotic; ya yalbotcotic chopol jc'oblalcotic, ya calbecotic lec sc'oblalic; c'alal ayotcotic ta uts'inel, ya xcuhch cu'uncotic. 13Ya sjin jc'oblalcotic, pero lec ya jc'oponcotic; c'alal ora hich c'ohemotcotic te bin ut'il c'a'pal yu'un te bahlumilal, jch'aybilotcotic yu'un spisilic.
14Ma ba hich ya jts'ihbay yu'un ya jq'uexlaltesex, pero yu'un hich ya jtojobtesex te bin ut'il cal-jnich'anex te c'uxex ta co'tane. 15Aunque ay jpic soc ho'bahc' (10,000) jp'ijubteswanejetic awu'unic ta stojol te Cristo, mayuc tsobol atatic; ho'on cal-jnich'anex ta scuenta Cristo Jesús te bin ut'il la jcalbeyex te lec yach'il c'ope. 16Ha yu'un ya calbeyex wocol, nopbonic co'tan. 17Ha scuentahil te la jticombeyex tal te Timoteo, ha te jnich'an te c'ux ta co'tan soc te jun yo'tan ta stojol te Cajwaltique. Ha ya ya'beyex ana'ic xan bin yilel te jcuxlejal ta stojol Cristo, bin ut'il la jcac' ta nopel ta bayuc soc ta spisil te iglesiahetique.
18Ay mach'atic te stoyoj sbahic, yu'un scuyojic te ma ba ya xtal quilex. 19Pero ya xtal quilex ta ora, teme hich ya sc'an te Cajwaltique, tey me ya jna'be sba a, ma ha'uc te sc'opic, ha te yipic ta spasel te mach'atic stoyoj sbahique, 20como te cuentahinel yu'un Dios ma ha'uc sc'oblal c'opetic, ha sc'oblal yip ta spasel. 21¿Bin yac ac'anic? ¿Ha bal yac ac'anic te ya xtal quilex soc xul, o te ya xtal quilex soc sc'uxul co'tan soc yutsil co'tan?
Currently Selected:
1 Corintios 4: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.