Matthew 2
2
De loomai o denga daane heiangi
1Dua de haanau o Iesu i Bethlehem, go dahi aduhale o Judea, i de masavaa o de hodooligi go Herod, gai tilo, hanu daane heiangi#2.1 daane heiangi, aabe ni Magi. ne loomai gi Jerusalem i baasi i dua, 2ga ssili ga hagataba, “I hee iai tama gu haanau laa, go de Hodooligi o de gau Ssuu? Gimaadeu ne gidee dono heduu i baasi dua, gai gimaadeu ga loomai ai nei e daumaha ange gi de ia.”
3De masavaa huu a de hodooligi go Herod ne langona ai alaadeu muna, gai gilaadeu ma dangada alodahi i Jerusalem gu dee paba olaadeu lodo. 4Gai ia ga hagabuni mai de gau haimeedabu maolunga alodahi ma de gau sisi o de gau Ssuu, ga ssili ange gi gilaadeu be go hee e haanau ai de Klisdo. 5Gilaadeu ne hai ange gi de ia, “Go Bethlehem i Judea. Deenei de hai a de pelaabisi gu sisi ai:
6‘Aagai koe, Bethlehem, i de henua o Judah,
koe e dee maolalo ange donu i denga aduhale maolunga o Judah;
go hiidinga e sula age naa i oo daha dahi dagi
gai ia ga dagi ai dogu huaadangada go Israel.’ ” #Mic 5.2
7Aagai Herod ne hagahi hagammuni de gau heiangi laa, ga ssili ga hagadonu i olaadeu daha de masavaa ne sobo age ai de heduu. 8Gai ia ga hai gilaadeu gi hulo gi Bethlehem, ga hai ange, “Goodou hulo hagaduu ngae saalaa tamaa gauligi, gai ga gidee naa huu e goodou ia, gai goodou hagailoo ina mai, gai au ga hanadu hogi e daumaha ange gi de ia.”
9Dua delaadeu langona muna a de hodooligi, gai gilaadeu ga hulo gee mai i kilaa; gai tilo, de heduu alaadeu ne gidee laa i baasi dua e hano i olaadeu mada i mua, ga noho i honga de mommee o tamaa gauligi iai. 10Gai de masavaa huu alaadeu ne gidee ai de heduu laa, gai gilaadeu gu malangilangi mmao. 11Gai de masavaa olaadeu ne ulu i de hale laa, gai gilaadeu gu gidee de gaagaa ma dono dinana go Mary. Gai gilaadeu ga duuduli ga daumaha ange gi de ia. Gai gilaadeu ga hhuge alaadeu mee hagamogomogo ga gaavange gi de ia mee ngadi gaavange: go goolo, ma frankincense, aama myrrh. 12Gai ne hagaago ange gi gilaadeu i de midi bolo gilaadeu gi dee aahe gi hulo gi daho Herod, gai gilaadeu ga aahe gi delaadeu henua i dahi haiava gee.
De hulo hagammuni gi Egypt
13Gai de masavaa o denga daane heiangi laa ne hulo gee ai, gai tangada de langi o Tagi Maolunga ga hakide ange gi Joseph i de midi, ga hai ange, “Hidi age gaavee tamaa gauligi ma dono dinana, ma goodou hulo gi Egypt ga nnoho ai, ga dae ai gi dagu hai adu koe gi ahe mai, go hiidinga Herod e ssala tamaa gauligi e daa gi magau.” 14Gai ia ga alahage ga kave tamaa gauligi ma dono dinana i de boo ga hulo ai gi Egypt. 15Gai ia ne noho i kilaa ga dae ai gi de magau o Herod. Mee nei ne hai e hagassula ai muna a Tagi Maolunga gu tala laa i daho de pelaabisi, e hagadaba, “Au ne hagahi dagu dama daane mai i Egypt.” #Hos 11.1
De daa ga maakau o denga gauligi daane
16De masavaa huu a Herod ne iloo ai bolo de gau heiangi laa gu daahanga ia, gai ia gu lili mmao, gai ia ga hai hanu gi hulo gi Bethlehem, gi daia ai gi maakau denga gauligi daane alodahi gu dagilua laa olaadeu ngadau ga hano iho ai, aama mommee alodahi e paa ange gi kilaa. Ia ne kumi ange gi dana masavaa ne hagadonu ai mee laa i daho denga daane heiangi. 17Gai mee nei ne hai e hagassula ai muna gu tala i daho de pelaabisi go Jeremiah, e hagadaba:
18“Dangada e langona de leo o dahi i Ramah,
e dangi ai ma de hinangalosaa.
Rachel e dangi i hiidinga o ana dama;
ia tee lodo gi hagaaneane ina ono lodo,
go hiidinga gilaadeu gu odi i de maakau.” #Gen 35.16-19; Jer 31.15
De aahe mai i Egypt
19Aagai dua huu de magau o Herod, gai tangada de langi o Tagi Maolunga ga hakide ange gi Joseph i de midi i Egypt, ga hai ange, 20“Hidi age gaavee tamaa gauligi ma dono dinana ma goodou aahe gi de henua go Israel, go hiidinga gu maakau dangada e saalaa tamaa gauligi e daa gi magau.”
21Gai Joseph ga hidi age ga kave tamaa gauligi ma dono dinana ga aahe ai gi Israel. 22Aagai ga langona huu e ia bolo go Archelaus e hodooligi i tuulanga o dono damana go Herod i Judea, aagai ia gu madagu i de hano gi kilaa. Gai de Maadua ne hagakana ange hogi ia i dahi midi, gai ia ga hano ga noho i Galilee, 23i de aduhale go Nazareth. Gai mee nei ne hai e hagassula ai muna gu tala laa i daho denga pelaabisi, e hai ange, “Ia e hagabinga naa bolo se dangada Nazareth.” #Mark 1.24; Luke 2.39; John 1.45
Currently Selected:
Matthew 2: DBD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.