Filipenses 1
1
Je̱'e̱ yajpókxu̶ñ
1U̶u̶ch Pablo y mu̶u̶d je̱'e̱ Timoteo je̱'e̱ Jesucristo tyuumbu̶ ajku̶xy. Cham u̶u̶ch adaa naky ngue̱jxku̶xy jim Filipos kajpt ma je̱'e̱ mu̶dyiibu̶ yajpaatku̶xpu̶ñ ma je̱'e̱ Dios jya'ayu̶ñ y mu̶dyiibu̶ tu'ugyu̶ yajpaatku̶xpu̶ñ ma je̱'e̱ Cristo Jesúsu̶ñ, je̱' u̶u̶ch du'un ndijpy nigu̶xyu̶ je̱'e̱ mu̶bu̶jkpu̶du̶jk ajku̶xy mu̶u̶d je̱'e̱ nigu'ubajk'ajtpu̶ ajku̶xy y mutzk tuungmu̶u̶dpu̶ ajku̶xy. 2Wan je̱'e̱ Dios u̶u̶ch je̱'e̱ nDeedy ajtu̶m y je̱'e̱ Windzú̶n Jesucristo je̱'e̱ oy'ajt may'ajt tuñ ma miich ajku̶xyu̶ñ y xyajjootkujk'ajtku̶xu̶ch.
Pablo Dios mu̶bu̶jktzóy mu̶u̶d je̱'e̱ mu̶bu̶jkpu̶du̶jk kyu̶xpu̶ ajku̶xy
3Naag'ook naag'ook u̶u̶ch miich nja'aymyéch ajku̶xy njatytimyejkypyu̶ch je̱'e̱ Dioskujuuyu̶p ma je̱'e̱ Diosu̶ñ mu̶u̶d miich kyu̶xpu̶ ajku̶xy. 4Y ko u̶u̶ch je̱'e̱ Dios nmu̶bu̶jktzóy, xi'ig xon u̶u̶ch je̱'e̱ je'emy nmu̶bu̶jktzóy mu̶u̶d miich kyu̶xpu̶ ajku̶xy. 5Je̱' ko tu'ugyu̶ tu̶ nduunu̶m ajku̶xy ko je̱'e̱ ayuuk tu̶y'ajt tu̶ ngapxwa'kxu̶m ajku̶xy, maabu̶ nyajtzondaaku̶m ajku̶xy u̶xtu̶ chamnu̶baad. 6Nejwu̶u̶ybyu̶ch oy yajxón ko je̱'e̱ Dios, je̱'e̱ mu̶dyiibu̶ je̱'e̱ oybyu̶ tyuung tu̶ yajtzonda'agy ma miich ajku̶xyu̶ñ, jyakyajtu'uyo'oy'adu̶'u̶dze̱e̱mbyñu̶ je̱' ma miich ajku̶xyu̶ñ, u̶xtu̶ koonu̶ je̱'e̱ Jesucristo naty ja'adu'ook wyimbity. 7Adaa, tu̶y'ajt adaa du'un neby u̶u̶ch nmu̶na'añu̶ñ mu̶u̶d miich kyu̶xpu̶ nigu̶xyu̶ ajku̶xy, je̱' ko miich oy ndzojkku̶xy nju̶wu̶u̶ygyu̶xy y je̱' ko je̱'e̱ Dios may'ajt tu̶ tuñ ko tu'ugyu̶ nduun n'ayoowu̶mu̶ch ajku̶xy, oy myaaju̶ch ma u̶u̶ch naty nyajpaadyu̶ñ, wan pujxtu̶gootyu̶ch o tuungmu̶u̶dpu̶du̶jk winduuy neby u̶u̶ch mu̶baad niwa'añu̶ñ y ni'igapxpétyu̶ñ je̱'e̱ ayuuk tu̶y'ajt mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 8Ñejwu̶u̶by je̱'e̱ Dios neby nigu̶xyu̶ mu̶j ku̶je̱e̱ ndzojkku̶xy nju̶wu̶u̶ygyu̶xyu̶ñ, du'un neby je̱'e̱ Jesucristo xychojku̶m xyjyu̶wu̶u̶yu̶mu̶ñ ajku̶xy. 9Nmu̶bu̶jktzooybyu̶ch je̱'e̱ Dios mu̶u̶d miich kyu̶xpu̶ ajku̶xy, wan ni'igyu̶ mnaychojk'adu̶u̶tzu̶gu̶xu̶ch, y mmu̶dajtku̶xu̶ch je̱'e̱ wij'ajt ke̱j'ajt mu̶j may y je̱'e̱ joot winma'añ, 10neby je̱'e̱ oybyu̶ mu̶baad mwin'ijxku̶xyu̶ñ. Y du'un mu̶baad mdzu̶naaygyu̶xy mjuugy'ajtku̶xy mu̶u̶d je̱'e̱ oybyu̶ wa'adzpu̶ tzu̶naayu̶ñ jugy'ajtu̶ñ, y ka'p naty ni tii poky mmu̶dajtku̶xnu̶ ko naty je̱'e̱ Cristo ja'adu'ook wyimbity. 11Miich myajni'igu̶xu̶'kku̶xu̶py ko naty je̱'e̱ oybyu̶ tuung mduungu̶xy; Dioskujuuyu̶p je̱'e̱ Jesucristo, wan je̱'e̱ Dios du'un windzu̶gu̶'u̶y y ku'umáy y'ídu̶ch.
Mu̶u̶d u̶u̶ch, je̱'e̱ Cristo u̶u̶ch njugy'ajtu̶ñ'ajtypy
12Mmu̶gu'ugtu̶jk, u̶u̶ch dzojkypyu̶ch ko miich mnejwu̶u̶ygyu̶xu̶ch ko du'un neby u̶u̶ch yam njaty n'abetyu̶ñ, ni'igyu̶ u̶u̶ch je̱'e̱ yam xypyubety neby u̶u̶ch je̱'e̱ ayuuk tu̶y'ajt ni'igyu̶ oy ngapxwa'kxu̶chu̶ñ, je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 13Ku̶xyu̶ je̱'e̱ mayjya'ay du'un nejwu̶u̶ygyu̶xy y je̱'e̱ tziptuumbu̶tu̶jk, je̱'e̱ mu̶dyiibu̶ jiiby adu̶naaygyu̶xpu̶ñ ma je̱'e̱ gobernador romano myu̶jtu̶jku̶ñ ko paady u̶u̶ch nbujxtu̶jk'u̶ña'ay ko u̶u̶ch je̱'e̱ Cristo y'ayuuk tyu̶y'ajt nbanu̶kxu̶. 14Y ko u̶u̶ch du'un xy'ijxku̶xy nbujxtu̶jk'u̶ña'ayu̶ch, chi je̱'e̱ nimaybyu̶ nmu̶gu'ugtu̶jk tu̶ jyootmu̶kkojku̶xy kapxwa'kxku̶xy je̱'e̱ ayuuk tu̶y'ajt, ka'p maa chu̶gu̶u̶ygyu̶xy jyu̶wu̶u̶ygyu̶xy y myu̶bu̶jkku̶xypy je̱'e̱ Windzú̶n Jesucristo.
15Tu̶y'ajt je̱'e̱ du'un ko je̱'e̱ ja'ay nije̱' kapxwa'kxku̶xy je̱'e̱ Cristo y'ayuuk tyu̶y'ajt, je̱' ko u̶u̶ch ka'p xyajmu̶'oy'ijxku̶xy y ko u̶u̶ch xyajmu̶dzip'ajtku̶xy, peru̶ nije̱' kapxwa'kxku̶xy mu̶u̶d je̱'e̱ oyjyoot oywyinma'añ. 16Y nije̱' je̱'e̱ Cristo y'ayuuk tyu̶y'ajt kapxwa'kxu̶ ajku̶xy, je̱' ko u̶u̶ch xychojkku̶xy xyjyu̶wu̶u̶ygyu̶xy y ñejwu̶u̶ygyu̶xypy ko u̶u̶ch je̱'e̱ Dios ya tu̶ xypyu̶da'agy neby u̶u̶ch je̱'e̱ ayuuk tu̶y'ajt mu̶baad niwa'añu̶ñ, je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 17Peru̶ nije̱' paady je̱'e̱ kapxwa'kxku̶xy, je̱' ko ku̶'u̶m ñaygyu'umaayu̶gu̶xy y ka'p tyu'uda'agyu̶ch ajku̶xy, je̱' je̱'e̱ du'un y'u̶xtaaygyu̶xypy neby u̶u̶ch ndaju̶ch nmáyu̶chu̶ñ ma u̶u̶ch yam nbujxtu̶jk'u̶ña'ayu̶ñ. 18Peru̶ ka'p u̶u̶ch tii ngweentu̶ju̶ch. Wan nejpyu̶ch pu̶nu̶ kyapxwa'kxku̶xypy je̱'e̱ Cristo y'ayuuk tyu̶y'ajt tu̶y tu'uda'agy o pu̶nu̶ ka'p tu̶y tu'uda'agy kapxwa'kku̶xy; xondaakpu̶ch du'un ko du'un kapxwa'kxku̶xy.
Y jakjootkugu̶'u̶wu̶bu̶ch ni'igyu̶, 19je̱' ko nejwu̶u̶ybyu̶ch ko ku̶xyu̶ adaa mu̶dyiibu̶ u̶u̶ch yam nmu̶najxypy nyajnajxypyu̶ñ nmu̶mada'agu̶byu̶ch adaa, Dioskujuuyu̶p je̱'e̱ Dios ko je̱'e̱ Dios miich mmu̶bu̶jktzoogu̶xy mu̶u̶d u̶u̶ch kyu̶xpu̶ y je̱'e̱ pube̱jtu̶ñ mu̶dyiibu̶ u̶u̶ch je̱'e̱ Jesucristo y'Espíritu xymyoobyu̶ñ. 20Nju̶jp'ijxypyu̶ch tu'ug'aa tu'ugjoot ko u̶u̶ch je̱'e̱ Dios ka'p tzo'oydyu'unduum xyajwu̶'u̶mu̶ch y ko ngapxwa'kxu̶byu̶ch je̱'e̱ Jesucristo y'ayuuk tyu̶y'ajt aamú̶k jootmú̶k ma je̱'e̱ ja'ay winduuy nigu̶xyu̶ ajku̶xyu̶ñ, cham y neby je'emyu̶ñ yaj'íxu̶p je̱'e̱ Cristo myu̶j'ajtu̶ñ ni'igyu̶ ma u̶u̶chu̶ñ, ka'p ñejpyu̶ch pu̶nu̶ jaktzu̶naaybyu̶ch o pu̶nu̶ o'kpu̶ch. 21Je̱' ko mu̶u̶d u̶u̶ch je̱'e̱ Cristo u̶u̶ch njugy'ajtu̶ñ'ajtypy y pu̶nu̶ o'kpu̶ch, tu̶ u̶u̶ch naty du'un nmu̶da'agy. 22Peru̶ pu̶nu̶ jaktzu̶naaybyu̶ch mu̶baad u̶u̶ch je̱'e̱ Dios njakmu̶duun'adu̶'u̶ch mu̶u̶d je̱'e̱ ja'ay y'oy'ajtu̶ñ gyu̶xpu̶ ajku̶xy, ka'p u̶u̶ch n'oknejwu̶u̶yñu̶ mu̶dyiibu̶ u̶u̶ch nwin'ixu̶u̶ybyu̶ñ. 23Janch tzip nwin'íxu̶chu̶ch adaa me̱jtzpú̶kypyu̶: ja'adu'knáx, ja'a'o'ogaanu̶byu̶ch it neby u̶u̶ch jiiby tzajpjooty nu̶kxy mu̶baad n'ityu̶ñ mu̶u̶d je̱'e̱ Cristo, je̱'e̱ju̶tz ni'igyu̶ ja'ajak'óy mu̶u̶d u̶u̶ch. 24Peru̶ ja'adu'knáx, kuaanu̶ u̶u̶ch mu̶baad njaktzu̶na'ay mu̶u̶d miich kyu̶xpu̶ m'oy'ajtu̶ñ ajku̶xy. 25Y je̱' ko nejwu̶u̶ybyu̶ch du'un ko njakpube̱daangu̶xy y nan nejwu̶u̶ybyu̶ch ko u̶u̶ch njaktzu̶na'awu̶ch mu̶u̶d miich ajku̶xy neby je̱'e̱ Dios y'ayuuk tyu̶y'ajt mu̶baad myajtu'uyo'oy'adu̶u̶tzku̶xyu̶ñ y neby je̱'e̱ xondaaku̶ñ mu̶baad ni'igyu̶ mjakmu̶dajtku̶xyu̶ñ ma je̱'e̱ mmu̶bu̶jku̶ñ ajku̶xyu̶ñ. 26Y du'un u̶u̶ch jim ja'adu'ook nyajpaadu̶ch ma miich ajku̶xyu̶ñ y mjootkugu̶u̶ygyu̶xu̶ch mu̶u̶d je̱'e̱ Cristo Jesús kyu̶xpu̶.
27Peru̶ jatytimychu̶naay jatytimyjyuugy'ajtku̶x oy yajxón du'un neby je̱'e̱ Cristo y'ayuuk tyu̶y'ajt y'ane'emyu̶ñ. Y du'un pu̶nu̶ nu̶kxp u̶u̶ch naty ma miich ajku̶xyu̶ñ o pu̶nu̶ ka'p, ndzojkypyu̶ch xypyaadu̶chu̶ch je̱'e̱ ayuuk ko je̱'e̱ Dios y'ayuuk tyu̶y'ajt naty myajtu'uyo'oy'adu̶u̶tzu̶ ajku̶xy y myajpaatku̶xy naty tu'ugyu̶, mnaybyube̱jtu̶gu̶xy nigu̶xyu̶ tu'ugyu̶ nixim niyam ma je̱'e̱ mmu̶bu̶jku̶ñ ajku̶xyu̶ñ je̱'e̱ mu̶dyiibu̶ yajpaatp ma je̱'e̱ ayuuk tu̶y'ajt, je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 28Y ka'p mnayye̱jku̶gu̶xu̶ch nu̶kxy je̱'e̱ mmu̶dziptu̶jk xy'adzu̶gu̶u̶ygyu̶xy. Adaa je̱'e̱ wa'adzpu̶ tu̶y'ajt ko je̱'e̱ tu̶goydyuum ñu̶kxaangu̶xy y nan adaa je̱'e̱ tu̶y'ajt ko je̱'e̱ aanu̶mu̶ ni'idzooku̶ñ miich mbadaangu̶xy. Y adaa jim je̱'e̱ yajpaady ma je̱'e̱ Diosu̶ñ. 29Cristo kyu̶xpu̶ je̱'e̱ Dios may'ajt tu̶ tuñ mu̶u̶d miich ajku̶xy neby je̱'e̱ Cristo mu̶baad mmu̶bu̶jkku̶xyu̶ñ, nan ka'p jye̱'e̱du̶'ajtyu̶ch neby je̱' mmu̶bu̶jkku̶xu̶chu̶ñ, nan neby je̱'e̱ tzaachpyu̶ mu̶baad mmu̶najxku̶xy myajnajxku̶xyu̶ñ mu̶u̶d je̱' gyu̶xpu̶. 30Miich ajku̶xy y u̶u̶ch, kipxy du'un njajt n'ayoowu̶m ajku̶xy. Tu̶ du'un mnejwu̶u̶ygyu̶xy neby u̶u̶ch jékyu̶p njajty n'ayooyu̶ñ, y jada'a mnejwu̶u̶ygyu̶xypy du'un neby u̶u̶ch chambaad njaty n'ayooyñu̶ju̶ñ.
Currently Selected:
Filipenses 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005