Efesios 6
6
1Pi'k'ana'ktu̶jk mu̶dyiibu̶ je̱'e̱ Windzú̶n Jesucristo mu̶bu̶jkku̶xpu̶ñ kapxymyu̶doogu̶x je̱'e̱ mdaj mdeedy ajku̶xy, je̱' ko du'un tyu̶y'ajtu̶ch. 2Je̱'e̱ jayu̶jpu̶ Dios y'ane̱'e̱mu̶ñ mu̶dyiibu̶ je̱'e̱ waandaaku̶ñ nigapxpu̶ñ adaa je̱': “Yajmu̶j'át je̱'e̱ mdaj mdeedy, 3wan jootkujk myajpaadu̶ch y mdzu̶na'awu̶ch jeky ya naaxwiiñ.”
4Y miich ungtaj ungteedy ajku̶xy, ka'p je̱'e̱ m'ung nigoo myaj'ama't myajjootma'tku̶xy, oy yajxón yaj'ye̱e̱kku̶x, wingapx ju̶jpkapxu̶u̶ygyu̶x neby je̱'e̱ windzú̶n Jesucristo tzokyu̶ñ y mu̶gapx ane̱'e̱mgu̶x oy yajxón du'un neby je̱'e̱ Windzú̶n Jesucristo tzokyu̶ñ.
5Miich tuumbu̶du̶jk ni'idoogypyu̶ ajku̶xy, u̶u̶mu̶doogu̶x kapxymyu̶doogu̶x je̱'e̱ mu̶dyiibu̶ ya naaxwiiñ mwindzu̶n'ajtku̶xypyu̶ñ. Mmu̶duungu̶x mu̶u̶d je̱'e̱ windzu̶gu̶'u̶ñ mu̶u̶d je̱'e̱ yajmu̶j'ajtu̶ñ y tu'uda'agy'ajtu̶ñ, neby it naty je̱'e̱ Cristo du'un mmu̶duungu̶xypyu̶ñ. 6Mmu̶duungu̶x oy yajxón, ka'p myu̶'ittu̶'ajtyu̶ch ko naty jim xywyindu̶kxnaaygyu̶xy, neby m'oybyu̶dzu̶maangu̶xyu̶ñ ma je̱' ajku̶xyu̶ñ. Du'un tuungu̶x neby je̱'e̱ mu̶dyiibu̶ je̱'e̱ Cristo mu̶duungu̶xpu̶ñ, tuungu̶x ku̶xyu̶ tu'ug'aa tu'ugjoot neby je̱'e̱ Dios tzokyu̶ñ. 7Tuungu̶x je̱'e̱ mduung xi'ig xon y ka'p y'adzip y'ama'adu̶ch, du'un neby it naty je̱'e̱ Windzú̶n Jesucristo du'un mmu̶duungu̶xypyu̶ñ y ka'p dyu'unu̶ch neby je̱'e̱ ja'ay mmu̶duungu̶xypyu̶ñ. 8Miich tu̶ du'un mnejwu̶u̶ygyu̶xy ko nidu'ug nidu'ug ajtu̶m ajku̶xy, wan tuumbu̶ ni'idoogypyu̶ju̶ch o ka'p ñi'idoogypyu̶ju̶ch, xymyooyu̶mu̶p je̱'e̱ Windzú̶n Jesucristo ku'umaayu̶ñ ajtu̶m ajku̶xy, du'un neby naty je̱'e̱ oybyu̶ tu̶ nduunu̶mu̶ñ ajku̶xy.
9Y miich windzu̶ndu̶jk ajku̶xy oy yajxón je̱'e̱ mduumbu̶du̶jk ane̱'e̱mgu̶x, ka'p nigoo m'adzu̶gu̶u̶y m'aju̶wu̶u̶ygyu̶xu̶ch. Ja'aymye̱jtzku̶x ko nandu'un miich ajku̶xy y je̱' ajku̶xy je̱'e̱ Windzú̶n Jesucristo xytyuumbu̶'ajtku̶xy, je̱'e̱ mu̶dyiibu̶ jiiby tzajpjooty yajpaatpu̶ñ, y je̱' ka'p je̱'e̱ ja'ay win'ixy tzoky, y'agu̶tzojktaaby je̱'e̱ ku̶xyu̶ wanpú̶nu̶ch.
Je̱'e̱ mu̶k'ajt mu̶dyiibu̶ je̱'e̱ mu̶bu̶jkpu̶du̶jk pyaatku̶xypy ko je̱'e̱ Cristo mu̶bu̶jkku̶xy
10Y jada'achám mu̶gu'uktu̶jk ajku̶xy, paatku̶x je̱'e̱ mu̶k'ajt ma je̱'e̱ Windzú̶n Jesucrístoju̶ñ, je̱' ko tu'ugyu̶ myajpaatku̶xy mu̶u̶d je̱', mu̶u̶d je̱'e̱ mu̶jpu̶ myu̶k'ajtu̶ñ. 11Nayñiwaanu̶gu̶x mu̶u̶d je̱'e̱ tuumbe̱jtk ku̶xyu̶ je̱'e̱ mu̶dyiibu̶ je̱'e̱ Dios tu̶ xymyooygyu̶xyu̶ñ, du'un neby je̱'e̱ tziptuumbu̶tu̶jk ñayñiwaanu̶gu̶xyu̶ñ mu̶u̶d je̱'e̱ tuumbe̱jtk ku̶xyu̶ mu̶dyiibu̶ naty tu̶ yajmooygyu̶xyu̶ñ ko naty chiptunaangu̶xy, wan mu̶k mwindu̶naaygyu̶xu̶ch nebyjyaty je̱'e̱ mu̶jku'u naty xywyin'u̶u̶ngu̶xyu̶ñ. 12Je̱' ko ka'p je̱' xymyu̶dzip'ajtp ajtu̶m ajku̶xy je̱'e̱ naaxwiiñjya'ay ajku̶xy, je̱' xymyu̶dzip'ajtp ajtu̶m ajku̶xy je̱'e̱ ju̶bu̶kpu̶ ka'a'óybyu̶ mu̶k'ajtmu̶u̶dpu̶ jiiby tzajpjootypyu̶, je̱'e̱ mu̶dyiibu̶ je̱'e̱ mu̶k'ajt mu̶dajtp, je̱'e̱ ane̱'e̱mu̶ñ y je̱'e̱ mu̶daaku̶ñ ma adayaaba naaxwiiñ pokymyu̶u̶dpu̶ju̶ñ. 13Paady yajtuungu̶x je̱'e̱ tuumbe̱jtk ku̶xyu̶ je̱'e̱ mu̶dyiibu̶ je̱'e̱ Dios tu̶ xymyooygyu̶xyu̶ñ, du'un neby je̱'e̱ tziptuumbu̶tu̶jk je̱'e̱ tyuumbe̱jtk ku̶xyu̶ yajtuungu̶xyu̶ñ je̱'e̱ mu̶dyiibu̶ naty tu̶ yajmooygyu̶xyu̶ñ ko naty chiptunaangu̶xy, wan je̱'e̱ ka'a'óybyu̶ mwindu̶naaygyu̶xu̶ch ko naty xyajtuundu̶goyaangu̶xy, y ko naty du'un tu̶ mduungu̶xy, mu̶'it je̱'e̱ mmu̶bu̶jku̶ñ tu'ug'aa tu'ugjoot mmu̶dajtku̶xu̶ch y ka'p m'u̶xtu̶gu̶'u̶wa'kku̶xu̶ch.#6.13 Y ko naty du'un tu̶ mduungu̶xy ka'p m'u̶xtu̶gu̶'u̶wa'kku̶xu̶ch: nije̱' wiingpu̶ jaaybyu̶du̶jk myu̶naangu̶xy: y ko naty tu̶ mmu̶madaakku̶xy, y mu̶'íttu̶tz je̱'e̱ mmu̶bu̶jku̶ñ tu'ug'aa tu'ugjoot mmu̶dajtku̶xu̶ch y ka'p m'u̶xtu̶gu̶'u̶wa'kku̶xu̶ch.
14Y du'unu̶tz mmu̶dajtku̶x je̱'e̱ mmu̶bu̶jku̶ñ tu'ug'aa tu'ugjoot y ka'p m'u̶xtu̶gu̶'u̶wa'kku̶xu̶ch, nayñi'ixu̶u̶yu̶gu̶x mu̶u̶d je̱'e̱ Dios tyu̶y'ajt, du'un neby je̱'e̱ tziptuumbu̶tu̶jk mu̶k ñaywyu̶nda'tzu̶gu̶xyu̶ju̶ñ ko naty chiptunaangu̶xy y nayñiwaanu̶gu̶x mu̶u̶d je̱'e̱ tu'uda'agypyu̶ tzu̶naayu̶ñ, du'un neby je̱'e̱ tziptuumbu̶tu̶jk ñayñiwaanu̶gu̶xyu̶ñ mu̶u̶d je̱'e̱ pyujxkni'ijé̱n ma je̱'e̱ kyach y ma je̱'e̱ jyu̶u̶xku̶ñ ko naty chiptunaangu̶xy. 15Ni'ixu̶'u̶ ijtu̶u̶gu̶x mu̶u̶d je̱'e̱ Dios y'ayuuk,#6.15 Ni'ixu̶'u̶ ijtu̶u̶gu̶x: je̱' du'un tyijpy: Yajtu̶gu̶u̶ygyu̶x je̱'e̱ mgu̶'u̶g. neby je̱'e̱ Dios y'ayuuk tyu̶y'ajt je̱'e̱ mu̶dyiibu̶ je̱'e̱ jootkujk'ajtu̶ñ ye̱jkpu̶ñ mu̶baad mu̶dzóngu̶xyu̶ñ nu̶kxy mgapxwa'kxku̶xy, du'un neby je̱'e̱ tziptuumbu̶tu̶jk ni'ixu̶'u̶ y'ijtku̶xyu̶ñ ko je̱'e̱ kyu̶'u̶g yajtu̶gu̶u̶ygyu̶xy ko naty chonaangu̶xy. 16Jatytimymyu̶dajtku̶x je̱'e̱ mmu̶bu̶jku̶ñ, je̱'e̱ mu̶dyiibu̶ xyñiwaangu̶xu̶bu̶ñ ma je̱'e̱ ju̶bu̶kpu̶ ka'a'óybyu̶ju̶ñ, du'un neby je̱'e̱ tziptuumbu̶tu̶jk je̱'e̱ escudo mu̶u̶d ñayyaj'agu̶u̶ydyujku̶gu̶xy ñiwaanu̶gu̶xyu̶ ka'pu̶ je̱'e̱ myu̶dzip je̱'e̱ tu̶p ju̶u̶nmu̶u̶dpu̶ yajtu̶ppú̶gu̶xu̶ch. 17Mmu̶dajtku̶x je̱'e̱ mni'idzooku̶ñ, du'un neby je̱'e̱ tziptuumbu̶tu̶jk je̱'e̱ pyujxkku'ujúp ñiwaanu̶gu̶xyu̶ñ, y mmu̶dajtku̶x je̱'e̱ Dios y'ayuuk tyu̶y'ajt, du'un neby je̱'e̱ espaadu̶ je̱'e̱ mu̶dyiibu̶ je̱'e̱ Espíritu Santo xymyooygyu̶xpu̶ñ. 18Mu̶bu̶jktzo'adu̶u̶tzku̶x je̱'e̱ Dios: mu̶nukxtaakku̶x y mu̶yujkwaangu̶x jaboom jaboom du'un neby je̱'e̱ Dios y'Espíritu a'ixu̶'u̶yu̶ñ. Ni'ixu̶'u̶ ijtku̶x, ka'p mmu̶dzijpu̶gu̶xu̶ch, y mmu̶bu̶jktzoogu̶x je̱'e̱ Dios mu̶u̶d je̱'e̱ Dios jya'ay gyu̶xpu̶ nigu̶xyu̶ ajku̶xy. 19Nan mu̶bu̶jktzoogu̶x je̱'e̱ Dios nandu'un mu̶u̶d u̶u̶ch kyu̶xpu̶, wan u̶u̶ch je̱'e̱ ayuuk xymyo'owu̶ch neby u̶u̶ch mu̶baad nmu̶na'añu̶ñ, y wan u̶u̶ch je̱'e̱ ayuuk tu̶y'ajt aamú̶k jootmú̶k nigápxu̶chu̶ch je̱'e̱ mu̶dyiibu̶ aanu̶mu̶ ni'idzooku̶ñ ye̱jkpu̶ñ, je̱'e̱ mu̶dyiibu̶ ijty jékyu̶p yu'uch ijtpu̶ñ. 20Dios u̶u̶ch kugapxy'ajtpu̶ tu̶ xykyexy ko u̶u̶ch je̱'e̱ y'ayuuk tyu̶y'ajt nyajwa'kxu̶yu̶ch, paadyu̶ch yaa jada'achám nbujxtu̶jk'u̶ña'ay. Peru̶ mmu̶bu̶jktzoogu̶x je̱'e̱ Dios mu̶u̶d u̶u̶ch kyu̶xpu̶, wan u̶u̶ch je̱'e̱ y'ayuuk tyu̶y'ajt aamú̶k jootmú̶k nimu̶dyaaku̶yu̶ch ka'p tzu̶gu̶'u̶ñ ju̶wu̶'u̶ñ maa.
Pablo myu̶gu'ugtu̶jk yajpókxu̶ñ jak'yajniguéxy
21Je̱'e̱ Tíquico, je̱'e̱ nmu̶gu'ug ajtu̶m, je̱'e̱ mu̶dyiibu̶ oy ndzojkpy nju̶wu̶u̶by ajtu̶m y je̱'e̱ mu̶dyiibu̶ u̶u̶ch mu̶j tu̶ xypyubetyu̶ñ ma je̱'e̱ Windzú̶n Jesucristo tyuungu̶ñ, je̱' xyajmu̶dmu̶dyaakta'awu̶p ajku̶xy neby u̶u̶ch yaa nyajpaady y tii u̶u̶ch yaa nduumbyu̶ñ. 22Paady yam nyajnigue̱jxku̶xy ma miich ajku̶xyu̶ñ, wan ku̶xyu̶ xy'awaandaayu̶ch ajku̶xy neby u̶u̶ch yam nyajpaatku̶xyu̶ñ y wan du'un xyajjootkugu̶u̶ygyu̶xu̶ch.
23Wan je̱'e̱ Dios Teedy y je̱'e̱ Windzú̶n Jesucristo je̱'e̱ mu̶bu̶jkpu̶du̶jk mooygyu̶xy je̱'e̱ jootkujk'ajtu̶ñ, je̱'e̱ tzojk'ajtu̶ñ y je̱'e̱ mu̶bu̶jk'ajtu̶ñ, 24y wan je̱'e̱ oy'ajt may'ajt tuñ ma miich nigu̶xyu̶ ajku̶xyu̶ñ, mu̶dyiibu̶ je̱'e̱ Windzú̶n Jesucristo tzojkku̶xp ju̶wu̶u̶ygyu̶xpu̶ñ mu̶u̶d je̱'e̱ tzojku̶ñ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ. Jaanch adaa du'un.
Currently Selected:
Efesios 6: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005