San Juan 20
20
Jesús jyuugypyu̶jky
(Mt 28.1-10; Mc 16.1-8; Lc 24.1-12)
1Je̱'e̱ sumaan u̶xtu̶gu̶'u̶ je̱'e̱ Domingo xu̶u̶, janch jopyñu̶ je̱'e̱ María je̱'e̱ mu̶dyiibu̶ najty Magdala kugajptu̶ñ ñu̶kxy ma je̱'e̱ o'kpu̶ jutu̶ñ, ka'p najty oy xyu̶u̶mu̶'u̶yñu̶. Y chi ijxy ko je̱'e̱ tzaa najty tu̶ yajju̶du̶guéky je̱'e̱ mu̶dyiibu̶ je̱'e̱ jut'aa najty mu̶u̶d y'agu̶'u̶yu̶chu̶ñ. 2Y ko du'un ijxy, mu̶'it poyu̶'u̶gyu̶ wyimbijty ñu̶kxy ma je̱'e̱ Simón Pedro y je̱'e̱ ja'adu'ukpu̶ discípulo najtyu̶ñ, je̱'e̱ mu̶dyiibu̶ je̱'e̱ Jesús najty ni'igyu̶ chojkypy jyu̶wu̶u̶ybyu̶ñ, y chi nu̶maay ajku̶xy:
—¡Tu̶ je̱'e̱ nWindzú̶n ajtu̶m ajku̶xy je̱'e̱ ñi'kx oy jutjooty yajpu̶dzu̶u̶mu̶xu̶, y ka'p nnejwu̶u̶yu̶m ajku̶xy maa tu̶ pu̶daakku̶xyu̶ñ!
3Mu̶'it je̱'e̱ Pedro y je̱'e̱ ja'adu'ukpu̶ discípulo nime̱tzk chóngu̶xy y ñú̶kxku̶xy ma je̱'e̱ o'kpu̶ jutu̶ñ. 4Nime̱tzk najty po'oyu̶'u̶gyu̶ kipxy ñú̶kxku̶xy; peru̶ je̱'e̱ ja'adu'ukpu̶ discípulo y'u̶xpuyu̶'k je̱'e̱ Pedro y jayu̶jp je̱'e̱ jim jya'ty ma je̱'e̱ o'kpu̶ jutu̶ñ. 5Chi wyindaaky kyu'ixu̶u̶y jiiby jutjooty, chi jiiby jutjooty ijxy je̱'e̱ mo'onwít y'oxna'ay, peru̶ ka'p jiiby tyu̶gu̶u̶y. 6Y u̶x'aam je̱'e̱ Simón Pedro pyaja'ttu̶, y je̱' ja'ani'itu̶gu̶u̶ygyoj je̱'e̱ jiiby jutjooty, y nan y'ijx je̱'e̱ mo'onwít nandu'un y'oxna'ay jiiby jutjooty; 7y nan y'ijx je̱'e̱ wit je̱'e̱ mu̶dyiibu̶ je̱'e̱ Jesús najty mu̶u̶d tu̶ yajku'umu̶guityii, peru̶ ka'p najty je̱'e̱ tu'ugyu̶ y'awijtzmúkyu̶ch mu̶u̶d je̱'e̱ mo'onwít, abu̶ky najty je̱' y ane'egy abu̶ky oy yajxón y'oxna'ay. 8Mu̶'it je̱'e̱ ja'adu'ukpu̶ discípulo nandu'un tyu̶gu̶u̶y jutjooty, je̱'e̱ mu̶dyiibu̶ najty jayu̶jp tu̶ jya'adyu̶ñ, y chi ijxy neby najty tu̶ tyuñ tu̶ jyadyii y mu̶bu̶jky ko najty je̱'e̱ Jesús ñi'kx jiiby ka'p. 9Je̱' ko ka'anu̶ najty je̱'e̱ Dios ñaky winju̶wu̶u̶yu̶ ajku̶xy ma du'un myu̶na'añu̶ñ, ko je̱'e̱ Jesús najty jyuugypyu̶ga'añ ko naty tu̶ y'o'ogy. 10Chi je̱'e̱ nime̱tzkpu̶ discípulos wyimbijtku̶xnu̶ ma je̱'e̱ tyu̶jk ajku̶xyu̶ñ.
Jesús ñayyajni'igu̶xu̶'ku̶ ma je̱'e̱ María je̱'e̱ mu̶dyiibu̶ najty Magdala kugajptu̶ñ
(Mc 16.9-11)
11Je̱'e̱ María jim je̱'e̱ wyu̶'u̶mu̶u̶y, ka'p je̱'e̱ jutjooty tyu̶gu̶u̶y, jut'aguuy najty je̱'e̱ jyu̶'u̶y ya'axy. Ju̶u̶by yaaxp najty neby najty tu̶ tyuñ tu̶ jyadyii, cham jutjooty kyu'ixu̶'u̶y, 12y chi je̱'e̱ ángelestu̶jk me̱tzk ijxy agu̶ poob wit mu̶u̶d, y'u̶ñaaygyu̶xy ma je̱'e̱ Jesús ñi'kx najty tu̶ kyu̶u̶yña'ayu̶ñ; tu'ug ku'uduuy y tu'ug teky u̶x'aam. 13Chi je̱'e̱ ángelestu̶jk yajtu̶u̶gu̶xy je̱'e̱ María:
—To'oxyu̶jk, ¿ti ko mya'axy?
Chi je̱'e̱ María y'adzooy:
—Je̱' ko u̶u̶ch je̱'e̱ nWindzú̶n ñi'kx tu̶ xyajpu̶dzu̶u̶mu̶ ajku̶xy y ka'p u̶u̶ch nnejwu̶'u̶y maa tu̶ pu̶daakku̶xyu̶ñ.
14Du'un najty tyimykyapxta'ay ko ñayjyu̶'ijxu̶, y chi je̱'e̱ Jesús ijxy tyu̶na'ay, peru̶ ka'p u̶xkajpy pu̶nu̶ je̱' je̱'e̱ najty. 15Chi je̱'e̱ Jesús yajtu̶u̶wu̶:
—To'oxyu̶jk, ¿ti ko mya'axy? ¿Pu̶n m'u̶xtaaby?
Je̱'e̱ María, du'un najty je̱'e̱ myu̶naambu̶ je̱'e̱ kam kweentu̶'ajtpu̶ ndijy je̱', chi nu̶maay:
—Windzú̶n, pu̶nu̶ miich tu̶ myajpu̶dzú̶my, awaanu̶gyu̶ch maa tu̶ mbu̶da'agy wan u̶u̶ch nnu̶kxy nyajpu̶du̶'u̶gy.
16Mu̶'it je̱'e̱ Jesús ñu̶maayu̶:
—¡María!
Chi je̱'e̱ María y'ijxwimbijty y nu̶maay hebreo'eemby:
—¡Rabuni! (mu̶dyiibu̶ du'un wimbu̶dzu̶u̶mbu̶ñ: “Windzú̶n”).
17Chi je̱'e̱ Jesús je̱'e̱ María nu̶maay:
—Ka'p u̶u̶ch xyñi'idóñ, je̱' ko u̶u̶ch ka'p nba'ttu̶gu̶'u̶yñu̶ ma u̶u̶ch je̱'e̱ nDeedy yajpaadyu̶ñ. Peru̶ nú̶kxu̶ch je̱'e̱ nmu̶gu'ugtu̶jk nu̶maayu̶ky ajku̶xy ko nu̶kxaambu̶ch y je̱'e̱ nDeedy nmu̶dnaybyada'añyii, u̶u̶ch je̱'e̱ nDeedy y miich je̱'e̱ mDeedy ajku̶xy, u̶u̶ch je̱'e̱ nDios y miich je̱'e̱ mDios ajku̶xy.
18Mu̶'it je̱'e̱ María je̱'e̱ mu̶dyiibu̶ najty Magdala kugajptu̶ñ ñu̶kxy, y yajmu̶dmu̶dyaaky je̱'e̱ discípulotu̶jk ajku̶xy ko je̱'e̱ Windzú̶n najty tu̶ ixy, y nan yajmu̶dmu̶dyaak nandu'un ajku̶xy neby je̱'e̱ Windzú̶n najty tu̶ ñu̶ma'ayiiju̶ñ.
Jesús ñayyajni'igu̶xu̶'ku̶ ma je̱'e̱ dyiscípulotu̶jku̶ñ
(Mt 28.16-20; Mc 16.14-18; Lc 24.36-49)
19Ko kyoodzu̶u̶yñu̶ je̱'e̱ mu̶'it xu̶u̶, je̱'e̱ sumaan u̶xtu̶gu̶'u̶ je̱'e̱ Domingo xu̶u̶, je̱'e̱ discípulotu̶jk tu̶ najty je̱'e̱ ñayyo'oymyujku̶gu̶xy y ku'u'aku̶'u̶y najty je̱'e̱ jiiby tu̶gooty ajku̶xy, je̱' ko je̱'e̱ judío ja'ay najty tzu̶gu̶u̶ygyu̶xy. Chi je̱'e̱ Jesús tyu̶jktu̶gu̶u̶y, y ñaybyu̶daaku̶ kujkjooty ma je̱'e̱ dyiscípulotu̶jk najty ajku̶xyu̶ñ, chi yajpókxu̶ ajku̶xy, ñu̶maayu̶ ajku̶xy:
—¡Jootkugu̶u̶ygyu̶x miich ajku̶xy!
20Ko du'un myu̶naañ, chi je̱'e̱ Jesús je̱'e̱ kyu̶'u̶ y je̱'e̱ kyach yaj'ijxu̶ ajku̶xy ma najty jyúttu̶chu̶ñ. Chi je̱'e̱ discípulotu̶jk jyootkugu̶u̶ygyu̶xy ko ijxku̶xy ko jye̱'e̱ju̶ch je̱'e̱ Wyindzú̶n ajku̶xy. 21Chi je̱'e̱ Jesús ja'adu'ook ñu̶maayu̶ ajku̶xy:
—¡Jootkugu̶u̶ygyu̶x miich ajku̶xy! Du'un neby u̶u̶ch je̱'e̱ Dios Teedy ya naaxwiiñ tu̶ xykyexyu̶ñ, nandu'un u̶u̶ch miich yam ngue̱jxku̶xy.
22Y chi je̱'e̱ dyiscípulotu̶jk ni'ibu̶xujy ku'ubu̶xujy ajku̶xy, y nu̶maaygyu̶xy:
—Wan je̱'e̱ y'Espíritu Santo xy'adu̶gu̶u̶y xyjyoottu̶gu̶u̶ygyu̶xy. 23Pu̶n naty je̱'e̱ pyoky miich mwinmé̱kxu̶py ajku̶xy, nan winmé̱kxu̶xu̶p je̱'e̱ Dios Teedy je̱'e̱ pyoky ajku̶xy; y pu̶n naty je̱'e̱ pyoky miich ka'p mwinmé̱kxu̶yu̶ ajku̶xy, nan ka'p je̱'e̱ Dios Teedy je̱'e̱ pyoky wyinmé̱kxu̶xu̶ch ajku̶xy.
Tomás ixy ko je̱'e̱ Windzú̶n tu̶ jyuugypyú̶ky
24Tomás, nidu'ugtu̶ je̱'e̱ nimajmé̱tzkpu̶ Jesús dyiscípulotu̶jk ajku̶xy, je̱'e̱ mu̶dyiibu̶ najty tyijku̶xypyu̶ñ je̱'e̱ Xeeñ'úng, ka'p najty je̱'e̱ chooñu̶ch mu̶naaba je̱'e̱ Jesús timyjyayu̶jp'ajt ñayyajni'igu̶xu̶'u̶gyiiju̶ñ. 25Mu̶'it je̱'e̱ jaknimaybyu̶ discípulotu̶jk ñu̶maayu̶ ajku̶xy:
—Tu̶ u̶u̶ch je̱'e̱ Windzú̶n n'ijxku̶xy.
Peru̶ chi je̱'e̱ Tomás y'adzooy:
—Pu̶nu̶ ka'p u̶u̶ch je̱'e̱ chu̶chu̶'u̶'aa n'ijxu̶ ma je̱'e̱ kyu̶'u̶ju̶ñ ma je̱'e̱ claavo kyuumu̶ju̶ñ, y pu̶nu̶ ka'p u̶u̶ch je̱'e̱ ngu̶'u̶wa'axk jiiby nbu̶da'agy ma chu̶chu̶'u̶wu̶chu̶ñ y je̱'e̱ ngu̶'u̶ju̶ch ma je̱'e̱ kyach jyúttu̶chu̶ñ, ka'p u̶u̶ch nmu̶bú̶gu̶ch ko du'un jyaanchu̶ch.
26Kuduktujk xu̶u̶, chi je̱'e̱ discípulotu̶jk ja'adu'ook ñayyo'oymyujku̶gu̶xnu̶ba ma tu'ug tu̶jku̶ñ, y je̱'e̱ mu̶'it, jiiby najty je̱'e̱ Tomás chooñu̶chu̶ñ. Ku'u'aku̶'u̶y najty ajku̶xy, peru̶ chi je̱'e̱ Jesús tyu̶jktu̶gu̶u̶y; ñaybyu̶daaku̶ kujkjooty ma je̱' ajku̶xyu̶ñ y chi yajpókxu̶ ajku̶xy, ñu̶maayu̶ ajku̶xy:
—¡Jootkugu̶u̶ygyu̶x miich ajku̶xy!
27Chi je̱'e̱ Tomás nu̶maay:
—Pu̶da'ag yu̶'u̶ mgu̶'u̶wa'axk yeeby ma u̶u̶ch je̱'e̱ ngu̶'u̶joottu̶ñ ma u̶u̶ch je̱'e̱ claavo xykyuumyu̶ñ, y ijxu̶gyu̶ch adaa ngu̶'u̶; y ok'yajmín yu̶'u̶ mgu̶'u̶ y pu̶da'ag ma u̶u̶ch je̱'e̱ ngach jyúttu̶chu̶ñ. Ka'p du'un mmu̶na'añ ko ka'p mmu̶bu̶ga'añ; ¡miich cham mu̶bu̶jknu̶!
28Mu̶'it je̱'e̱ Tomás y'adzooy:
—¡Miich nWindzu̶n'ajtypy y miich nDios'ajtypy!
29Chi je̱'e̱ Jesús je̱'e̱ Tomás nu̶maay:
—Ko u̶u̶ch miich tu̶ xy'ixy, paady je̱'e̱ du'un tu̶ mmu̶bu̶ky. ¡Jootkujk je̱' ajku̶xy je̱'e̱ mu̶dyiibu̶ mu̶bu̶jkku̶xyu̶ñ oy u̶u̶ch tu̶ xykya'a'ijxku̶xy!
Tii adayaaba liibro du'un ñigapxypyu̶ñ
30Jesús tyuun je̱'e̱ ijxpe̱jt mu̶jwinma'añbyu̶ mayñax ma je̱'e̱ dyiscípulotu̶jk wyinduuy ajku̶xyu̶ñ, peru̶ ka'p je̱'e̱ yam ku̶xyu̶ kyujaaydya'ayu̶ch ma adayaaba liibroju̶ñ. 31Peru̶ adaa paady adaa tu̶ yajkuja'ay neby du'un miich mmu̶bu̶jkku̶xu̶chu̶ñ ko je̱'e̱ Jesús je̱' je̱'e̱ Cristo, je̱'e̱ Dios y'Ung, y ko mmu̶bu̶jkku̶xu̶ch y mbaatku̶xu̶py je̱'e̱ juugy'ajtu̶ñ wiinu̶u̶xu̶u̶bu̶.
Currently Selected:
San Juan 20: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005