San Juan 16
16
1“Cham du'un nnu̶maaygyu̶xy ka'pu̶ je̱'e̱ mmu̶bu̶jku̶ñ myajtu̶gooygyu̶xu̶ch ma u̶u̶chu̶ñ. 2Xyajpu̶dzu̶u̶mgu̶xu̶p je̱' ma je̱'e̱ naymyujktaaktu̶ñ, y pyaadu̶py je̱'e̱ tiempo mu̶naa xyaj'o'kku̶xu̶ch y myu̶naangu̶xu̶ch ko je̱'e̱ Dios du'un ku'umáy neby naty y'adu̶u̶tzku̶xyu̶ñ. 3Du'un je̱'e̱ y'adu̶'u̶dzaangu̶xy, je̱' gyu̶xpu̶ ko je̱'e̱ Dios Teedy ka'p ixy'ajtku̶xy y ni u̶u̶ch xykya'a'ixy'ajtku̶xy. 4Cham du'un nnu̶maaygyu̶xy ko naty je̱'e̱ tiempo paady mu̶naa du'un mjajt m'abe̱jtku̶xu̶chu̶ñ, mu̶'it mja'aymye̱jtzpaatku̶xu̶ch ko u̶u̶ch miich naty du'un tu̶ nnu̶maaygyu̶xy.
Je̱'e̱ mu̶dyiibu̶ je̱'e̱ Espíritu Santo tyuumbyu̶ñ
“Ka'p adayaaba ayuuk du'un jékyu̶p n'awaanu̶ ajku̶xy, je̱' ko miich najty nmu̶d'ijtku̶xyñu̶. 5Peru̶ cham nnú̶kxnu̶byu̶ch; nnú̶kxyu̶ch n'idaanu̶ mu̶u̶d je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ, y miich ni tu'ug u̶u̶ch miich xykya'ayajtu̶u̶gu̶xy ma u̶u̶ch nnu̶kxyu̶ñ; 6ni'igyu̶ miich tu̶ mdajtu̶gu̶u̶y mmaaydyu̶gu̶u̶ygyu̶xy ko du'un tu̶ nnu̶maaygyu̶xy. 7Peru̶ cham timytyu̶y'ajtu̶ñ nnu̶maaygyu̶xy; ni'igu̶ oy mu̶u̶d miich ajku̶xy ko u̶u̶ch nnú̶kxu̶ch. Y pu̶nu̶ ka'p u̶u̶ch nnu̶kxy, ka'p je̱'e̱ Yajjootkujk'ajtpu̶ ñi'imínu̶ch ma miich ajku̶xyu̶ñ y miñ xymyu̶d'ijtku̶xy; peru̶ pu̶nu̶ nnú̶kxpu̶ch, u̶u̶ch miich je̱'e̱ nyajnigué̱xu̶py ajku̶xy. 8Ko naty je̱'e̱ Yajjootkujk'ajtpu̶ myiñ, je̱' je̱'e̱ oy wa'adz yajni'igu̶xu̶'u̶gaamb ma je̱'e̱ naaxwiiñjya'ay ajku̶xyu̶ñ je̱'e̱ poky ku̶dyeey, je̱'e̱ tu'uda'agy'ajtu̶ñ y ko je̱'e̱ Dios tyu̶ydyúñ. 9Je̱'e̱ pokytyunu̶u̶ jii je̱'e̱ ñi'igu̶xu̶'u̶gu̶ch ko u̶u̶ch je̱'e̱ n'ayuuk ndu̶y'ajt xykya'amu̶bu̶jku̶ ajku̶xy; 10je̱'e̱ tu'uda'agy'ajtu̶ñ, jii je̱'e̱ ñi'igu̶xu̶'u̶gu̶ch ko u̶u̶ch jiiby nnu̶kxy ma je̱'e̱ Dios Teedyu̶ñ, y miich ajku̶xy ka'p u̶u̶ch miich xy'ok'ijxku̶xnu̶ch; 11y ko je̱'e̱ Dios tyu̶ydyúñ, jii je̱'e̱ tu̶ ñi'igu̶xu̶'u̶gy ko je̱'e̱ Dios je̱'e̱ mu̶jku'u tu̶ yajpokykya'ay, je̱'e̱ mu̶dyiibu̶ adayaaba naaxwiiñ ane̱'e̱mbu̶ñ.
12“Janch may ayuuk u̶u̶ch miich nja'ayajmu̶dmu̶dya'agaangu̶xypy, peru̶ ka'p je̱'e̱ cham du'un'ajtpu̶ mwinju̶wu̶u̶ydyaaygyu̶xu̶ch. 13Ko naty je̱'e̱ Espíritu tu̶y'ajtpu̶ myiñ, je̱' je̱'e̱ tu̶y'ajtu̶ñ ku̶xyu̶ xyajwinju̶wu̶u̶ydya'awu̶p ajku̶xy; je̱' ko ka'p je̱'e̱ ku̶'u̶mjoot ku̶'u̶mwinma'añ kyapxa'añ myu̶dya'aga'añ, je̱' je̱'e̱ ku̶xyu̶ ñigapx ñimu̶dya'age̱e̱mby je̱'e̱ mu̶dyiibu̶ tu̶ mu̶doyu̶ñ, y je̱' xyajnejwu̶'u̶wu̶p ajku̶xy je̱'e̱ mu̶dyiibu̶ tunaan jadaanu̶bu̶ñ. 14U̶u̶ch xykyu'umáyu̶bu̶ch je̱'e̱ tu̶y'ajtpu̶ Espíritu Santo, je̱' ko je̱'e̱ tu̶y'ajt mu̶dyiibu̶ naty y'axaju̶u̶ybyu̶ñ, u̶u̶ch naty ndu̶y'ajt je̱'e̱ du'un, y je̱' u̶u̶ch je̱'e̱ ndu̶y'ajt miich xyajwinju̶wu̶u̶ygyu̶xu̶p. 15Ku̶xyu̶ tijaty je̱'e̱ Dios Teedy myu̶u̶d, u̶u̶ch nje̱' je̱'e̱ nandu'un, paady u̶u̶ch du'un tu̶ nmu̶na'añ ko je̱'e̱ Espíritu Santo axaju̶wa'añ je̱'e̱ ndu̶y'ajtu̶ch; y je̱' u̶u̶ch je̱'e̱ ndu̶y'ajt miich xyajwinju̶wu̶u̶ygyu̶xu̶p.
16“Ko we̱e̱nu̶ y'ídu̶ch ka'p u̶u̶ch miich xy'ok'ijxku̶xnu̶ch, peru̶ ko naty we̱e̱nu̶ tu̶ y'ijtnu̶, mu̶'it u̶u̶ch ja'adu'ook xy'íxu̶ch ajku̶xy.”#16.16 Nije̱' wiingpu̶ versión myu̶na'añ: je̱' ko u̶u̶ch jim nnu̶kxy ma je̱'e̱ Dios Teedyu̶ñ.
Je̱'e̱ jootmáy, xondaaku̶ñ je̱'e̱ nu̶kxy y'awimbity
17Mu̶'it je̱'e̱ Jesús dyiscípulotu̶jk nije̱' amíñ u̶xyu̶py ñayyajtu̶u̶wu̶gu̶xy:
—¿Ti da'a du'un jya'atije̱e̱mby? Ko du'un xyñu̶maayu̶m ajku̶xy ko we̱e̱nu̶ y'ídu̶ch ko ka'p n'ok'ijxu̶nu̶ch ajku̶xy, y ko naty we̱e̱nu̶ tu̶ y'ijtnu̶, mu̶'it ja'adu'ook n'ijxu̶mu̶ch ajku̶xy, y je̱' ko jiiby ñu̶kxy ma je̱'e̱ Dios Teedyu̶ñ. 18¿Ti da'a du'un jya'atije̱e̱mby? Ko du'un myu̶na'añ ‘ko we̱e̱nu̶ y'ídu̶ch.’ Ka'p yu̶'u̶ du'un nwinju̶wu̶u̶yu̶m ajku̶xy tii du'un jya'amu̶dyaakypyu̶ñ.
19Jesús ñejwu̶u̶y je̱' ko najty jya'ayajtu̶wa'añyii ajku̶xy, y chi ñu̶maayu̶gu̶xy:
—U̶u̶ch miich du'un tu̶ nnu̶maaygyu̶xy ko we̱e̱nu̶ y'ídu̶ch ka'p u̶u̶ch miich xy'ok'ijxku̶xnu̶ch, y ko naty we̱e̱nu̶ tu̶ y'ijtnu̶, mu̶'it u̶u̶ch ja'adu'ook xy'íxu̶ch ajku̶xy. ¿Adaa miich du'un nnayyajtu̶u̶wu̶gu̶xpu̶? 20Janch tu̶y'ajtu̶ñ du'un nnu̶maaygyu̶xy ko miich mju̶u̶ygyu̶x myaaxku̶xu̶ch y mdajku̶x mmaaygyu̶xu̶ch; cham naty je̱'e̱ naaxwiiñjya'ay xyondaakku̶xpu̶. Peru̶ miich ajku̶xy oy naty mja'ataj mja'amaaygyu̶xpu̶, je̱'e̱ mjootmáy ajku̶xy xondaaku̶ñ je̱'e̱ nu̶kxy y'awimbijtnu̶. 21Ko je̱'e̱ to'oxyu̶jk tu'ug y'ungpada'añ, taj maaby je̱' je̱' ko je̱'e̱ tiempo naty tu̶ paatnu̶ mu̶naa je̱'e̱ tzaachpyu̶ naty pada'añ; peru̶ ko naty je̱'e̱ y'ung tu̶ paatnu̶, jya'aydyu̶gooyñu̶py je̱'e̱ tzaachpyu̶, je̱' gyu̶xpu̶ ko naty jyootkujku̶ñu̶ch ko je̱'e̱ ma'axúng naty tu'ug tu̶ myiñ ya naaxwiiñ. 22Nandu'un miich ajku̶xy neby je̱'e̱ to'oxyu̶jk y'ungpada'añu̶ñ, du'un miich cham mdajku̶xy mmaaygyu̶xy, peru̶ u̶u̶ch n'íxu̶py miich ja'adu'ook ajku̶xy y mu̶'íttu̶tz mxondaakku̶xnu̶ch, tu'ug je̱'e̱ xondaaku̶ñ mu̶dyiibu̶ ka'p mu̶baad ni pu̶n xypyu̶jku̶ ajku̶xyu̶ñ.
23“Je̱'e̱ mu̶'it xu̶u̶ ka'p u̶u̶ch miich ni tii xy'ok'yajtu̶u̶gu̶xnu̶ch. Janch tu̶y'ajtu̶ñ du'un nnu̶maaygyu̶xy ko je̱'e̱ Dios Teedy xymyooygyu̶xu̶p ku̶xyu̶ tijaty naty myujkwaanu̶gyu̶xypyu̶ñ; cham u̶u̶ch je̱'e̱ nxu̶u̶ xykyapxpaattu̶ ajku̶xy. 24U̶xtu̶ chamnu̶baad, miich ajku̶xy ka'anu̶ ni tii myujkwaangu̶xyñu̶; cham u̶u̶ch je̱'e̱ nxu̶u̶ xykyapxpaattu̶ ajku̶xy; yujkwaangu̶x y myajmooygyu̶xu̶p je̱', wan du'un anaxy mjootkugu̶u̶ygyu̶xu̶ch.
Jesucristo je̱'e̱ mu̶dyiibu̶ je̱'e̱ ju̶bu̶kpu̶ ya naaxwiiñ ka'p tu̶ myu̶mada'agyiiju̶ñ
25“Du'un adaa ayuuk tu̶ nyajmu̶dmu̶dyaakku̶xy mu̶u̶d je̱'e̱ ijxpe̱jtu̶ñ, peru̶ pyaadu̶py je̱'e̱ tiempo, mu̶naa ka'p n'okmu̶dmu̶dyaakku̶xnu̶ch mu̶u̶d je̱'e̱ ijxpe̱jtu̶ñ, oy wa'adz je̱'e̱ Dios Teedy y'ayuuk tyu̶y'ajt nyajmu̶dmu̶dyaakku̶xnu̶ch. 26Je̱'e̱ mu̶'it xu̶u̶, miich ajku̶xy mu̶baad ku̶xyu̶ tijaty myujkwaangu̶xnu̶ ma je̱'e̱ Dios Teedyu̶ñ; cham u̶u̶ch je̱'e̱ nxu̶u̶ xykyapxpaattu̶ ajku̶xy, y xymyooygyu̶xu̶p je̱'. Y ka'p jyatytyimypyaadyii ko je̱'e̱ Dios Teedy u̶u̶ch nyujkwaanu̶ch mu̶u̶d miich kyu̶xpu̶ ajku̶xy, 27je̱' ko je̱'e̱ Dios Teedy miich ku̶'u̶m xychojkku̶xp. Xychojkku̶xp je̱' je̱' ko u̶u̶ch miich xychojkku̶xy y ko tu̶ mmu̶bu̶jkku̶xy ko u̶u̶ch jiiby tu̶ ndzooñ ma je̱'e̱ Diosu̶ñ. 28Jiiby u̶u̶ch tu̶ ndzooñ ma je̱'e̱ Dios Teedyu̶ñ; tu̶ nmíñu̶ch ma adayaaba naaxwiiñu̶ñ, y jada'achám n'u̶xmajtznu̶byu̶ch adayaaba naaxwiiñ y nwinbidaanu̶ch jiiby ma je̱'e̱ Dios Teedyu̶ñ.
29Mu̶'it je̱'e̱ dyiscípulotu̶jk myu̶naangu̶xy:
—Chámu̶tz tu̶y oy wa'adz mmu̶dyaaknu̶, ka'p je̱'e̱ ijxpe̱jt m'ok'yajtuunu̶. 30Jada'achám nnejwu̶u̶yñu̶byu̶ch ajku̶xy ko miich ku̶xyu̶ tijaty mnejwu̶ydya'ay y ka'p y'oktzojku̶nu̶ nu̶kxy miich pu̶n tijaty xyajtú̶y. Y paady u̶u̶ch tu̶ nmu̶bu̶jkku̶xnu̶ ko miich jiiby tu̶ mdzooñ ma je̱'e̱ Diosu̶ñ.
31Chi je̱'e̱ Jesús y'adzoowu̶ ajku̶xy:
—¿Nej mmu̶bu̶jkypytu̶m jada'achám ajku̶xyu̶ñu̶? 32Pues pyaatnu̶py je̱'e̱ tiempo, y chamdu̶n je̱'e̱ tiempo du'un tu̶ paady mu̶naa miich mgue̱e̱ktaaygyu̶xu̶chu̶ñ mbu̶jkku̶xu̶ch je̱'e̱ mgu̶jnu̶u̶ mgu̶jtu'u, y xy'u̶x'yo'oygyu̶xu̶ch miich naydyu'umbajk. Peru̶ u̶u̶ch ka'p u̶u̶ch nnaydyu'umu̶ch, je̱'e̱ Dios Teedy u̶u̶ch xymyu̶d'ijtp. 33Cham adaa du'un ku̶xyu̶ nyajmu̶dmu̶dyaakku̶xy wan je̱'e̱ jootkujk'ajtu̶ñ mbaatku̶xu̶ch ma u̶u̶chu̶ñ ko u̶u̶ch je̱'e̱ n'ayuuk ndu̶y'ajt tu̶ xymyu̶bu̶jku̶ ajku̶xy. Ma adayaaba naaxwiiñu̶ñ, miich ajku̶xy mbadaangu̶xypy je̱'e̱ tzaachpyu̶ ayo'on, peru̶ jootmú̶k naybyu̶daaku̶gu̶x; u̶u̶ch tu̶ u̶u̶ch je̱'e̱ ju̶bu̶kpu̶ ya naaxwiiñ nmu̶mada'agy.
Currently Selected:
San Juan 16: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005