2 Corintios 7
7
1Y du'unu̶tz mu̶gu'uktu̶jk ajku̶xy, je̱'e̱ mu̶dyiibu̶ u̶u̶ch oy ndzojkku̶xypy nju̶wu̶u̶ygyu̶xypyu̶ñ, adaa je̱' je̱'e̱ mu̶dyiibu̶ je̱'e̱ Dios tu̶ xyajwinwaanu̶u̶yu̶mu̶ñ ajku̶xy. Paady je̱'e̱ njoot nwinma'añ mu̶baad wa'adz nmu̶dajtu̶m ajku̶xy ma je̱'e̱ ju̶bu̶kpu̶ ku̶xyu̶, je̱'e̱ mu̶dyiibu̶ xyjya'ayajma'adaanu̶mbu̶ñ ajku̶xy, ma je̱'e̱ nni'kx ngopt y ma je̱'e̱ njoot n'aanu̶mu̶ ajtu̶m ajku̶xyu̶ñ, y tzu̶k je̱'e̱ Dios tzu̶gu̶u̶y o'owu̶dajtu̶m ajku̶xy y nnayyajku̶'u̶du̶gu̶u̶yu̶mu̶ch tu'ug'aa tu'ugjoot ku̶xyu̶ ajtu̶m ajku̶xy.
Neby je̱'e̱ corintioja'ay jyootwimbijtku̶xy ma je̱'e̱ Diosu̶ñ
2Ku'ubu̶jku̶ch ajku̶xy ko u̶u̶ch xychojkku̶xy xyjyu̶wu̶u̶ygyu̶xy. Ka'p u̶u̶ch mu̶naa pu̶n tu̶ nmu̶duundu̶gooygyu̶xy; ka'p u̶u̶ch mu̶naa pu̶n tu̶ nyajwinma'añdyu̶gooygyu̶xy; ka'p u̶u̶ch mu̶naa pu̶n tu̶ nwin'u̶u̶ngu̶xy. 3Ka'p yam du'un paady nnu̶maaygyu̶xy ko nni'oj nniyaxu̶'u̶waangu̶xy, je̱' ko tu̶ jékyu̶p nnu̶maaygyu̶xy ko miich ndzojkku̶xy nju̶wu̶u̶ygyu̶xy, tu'ugyu̶ ndzu̶naay njugy'ajtu̶m ajku̶xy y tu'ugyu̶ n'o'k ndu̶gooyu̶mu̶ch ajku̶xy. 4Cham je̱'e̱ tu̶y'ajtu̶ñ ku̶xyu̶ nyajmu̶dmu̶dyaakku̶xy y janch jootkujku̶ch mu̶u̶d miich kyu̶xpu̶ ajku̶xy. Oy ku̶xyu̶ tii ayo'on nmu̶najx ngu'ubu̶jku̶m ajku̶xy, peru̶ jootkujk u̶u̶ch nnayjyu̶wu̶'u̶yii y xondaakp u̶u̶ch.
5Maabu̶ u̶u̶ch ya Macedonia kajpt nja'tku̶xyu̶ñ, ka'p u̶u̶ch je̱'e̱ pokxu̶ñ nidu'uñdyu̶ nbaatku̶xy, xii yaa u̶u̶ch je̱'e̱ ayo'on jootmáy nbaadku̶xy n'ijxku̶xy, nmu̶najx ngu'ubu̶jkku̶xyu̶ch je̱'e̱ tzaachpyu̶ ayo'on ni'igú̶xp ku'uduuy, y ndzu̶gu̶u̶ygyu̶xyu̶ch jootjooty winma'añjyooty nandu'un. 6Peru̶ je̱'e̱ Dios je̱'e̱ mu̶dyiibu̶ yajjootkugu̶u̶by je̱'e̱ mu̶dyiibu̶ tajku̶xp maaygyu̶xpu̶ñ, tu̶ u̶u̶ch je̱'e̱ xyajjootkugu̶u̶ygyu̶xy ko je̱'e̱ Tito ya tu̶ myech ma u̶u̶ch ya ajku̶xyu̶ñ, 7y ka'p jye̱'e̱du̶'ajtyu̶ch ko ya tu̶ myech, nan tu̶ u̶u̶ch njootkugu̶u̶ygyu̶xy ko je̱' jyootkujku̶ch mu̶u̶d miich kyu̶xpu̶ ajku̶xy. Je̱' u̶u̶ch tu̶ xyajmu̶dmu̶dyaakku̶xy ko u̶u̶ch miich xyjya'aju̶jp'ijxku̶xy nu̶kxy ngu'ijxku̶xy nmu̶gápxku̶xy, nan tu̶ u̶u̶ch xyajmu̶dmu̶dyaakku̶xy ko u̶u̶ch miich xyñidaj xyñimaaygyu̶xy y mjootmay'ajtku̶xy mu̶u̶d u̶u̶ch, y tu̶ u̶u̶ch ni'igyu̶ njootkugu̶'u̶y mu̶u̶d adaa ko u̶u̶ch du'un tu̶ nmu̶doy.
8Oy je̱'e̱ naky xyjya'ayajjootmaydyu̶gu̶u̶ygyu̶xy, je̱'e̱ mu̶dyiibu̶ nyajnigue̱jxku̶xu̶ñ, ka'p u̶u̶ch je̱'e̱ cham nyajnú̶kxy nyajju̶wu̶'u̶y. Y pu̶nu̶ jékyu̶p u̶u̶ch je̱'e̱ nyajnú̶kxy nyajju̶wu̶u̶y ko je̱'e̱ naky najty tzojku̶ tu̶ xyajjootmaydyu̶gu̶u̶ygyu̶xy, 9jada'achám jootkujku̶chu̶ñ; ka'p jye̱' gyu̶xpu̶ch ko je̱'e̱ naky xyajjootmaydyu̶gu̶u̶ygyu̶xy, je̱' ko je̱'e̱ taju̶ñ maayu̶ñ gyu̶xpu̶ tu̶ mjootwimbijtku̶xy ma je̱'e̱ Diosu̶ñ. Miich mmu̶madaakku̶x je̱'e̱ taju̶ñ maayu̶ñ du'un neby je̱'e̱ Dios ku'umáyu̶ñ, y ka'p miich mu̶naa tu̶ nyajwinma'añdyu̶gooygyu̶xy. 10Je̱'e̱ taju̶ñ maayu̶ñ mu̶dyiibu̶ du'un yajmu̶madaakp neby je̱'e̱ Dios ku'umaayu̶ñ, je̱' yajjootwimbijtp ma je̱'e̱ Diosu̶ñ y xyajpaattu̶m je̱'e̱ aanu̶mu̶ ni'idzooku̶ñ ajku̶xy, y ka'p mu̶baad nyajnú̶kx nyajju̶wu̶u̶yu̶m ajku̶xy ko naty je̱'e̱ aanu̶mu̶ ni'idzooku̶ñ tu̶ nbaattu̶m ajku̶xy. Peru̶ je̱'e̱ taju̶ñ maayu̶ñ mu̶dyiibu̶ ya yajpaatp ma adayaaba naaxwiiñu̶ñ, je̱' je̱'e̱ o'ku̶ñ ye̱jkp. 11Miich mmu̶madaakku̶x je̱'e̱ taju̶ñ maayu̶ñ du'un neby je̱'e̱ Dios ku'umaayu̶ñ, ¡y chiiju̶tz cham m'ijxku̶xy neby je̱'e̱ tu'uda'agy'ajtu̶ñ tu̶ mbaatku̶xyu̶ñ! Ko je̱'e̱ taju̶ñ maayu̶ñ tu̶ mmu̶najx tu̶ mgu'ubu̶jkku̶xy paady tu̶y tu'uda'agy mja'ay'ajtku̶xnu̶ y xyñiwaangu̶xyu̶ch; je̱' xyaj'ama't xyajjootma'tku̶x, y xyajtzu̶gu̶u̶ybyu̶jkku̶xy. Ko najty du'un tu̶ m'okjajt m'ok'abe̱jtku̶xy, chi u̶u̶ch najty xy'ixaangu̶xnu̶, mnayjyootmu̶kmooyu̶gu̶xy ko myajkumu̶dowaangu̶xy je̱'e̱ mu̶dyiibu̶ najty tu̶ tyuundu̶góyu̶ñ. Ku̶xyu̶ neby du'un tu̶ m'adu̶u̶tzku̶xyu̶ñ, je̱' du'un yajni'igu̶xu̶'kp ko ka'p miich tii poky tu̶ mduungu̶xy ma adayaaba winma'añdyu̶ñ. 12Y du'unu̶tz, ko je̱'e̱ naky nyajnigue̱jxku̶xy, ka'p u̶u̶ch je̱'e̱ je̱' nyajnigue̱jx je̱'e̱ mu̶dyiibu̶ najty tu̶ tyuundu̶góy ni je̱'e̱ mu̶dyiibu̶ najty tu̶ yajmu̶duundu̶góy, paady je̱'e̱ nyajnigue̱jxku̶xy wan du'un ñi'igu̶xu̶'u̶gu̶ch ma je̱'e̱ Diosu̶ñ ko u̶u̶ch miich xyñidaj xyñimaaygyu̶xy. 13Y adaa u̶u̶ch tu̶ xyajjootkugu̶u̶ygyu̶xy.
Peru̶ jootkujk u̶u̶ch ni'igyu̶ ajku̶xy ko je̱'e̱ Tito jyanchjootkujku̶ch mu̶u̶d miich kyu̶xpu̶ ajku̶xy; miich je̱'e̱ nigu̶xyu̶ tu̶ myajjootkugu̶u̶ydyu̶gajtzku̶xy. 14U̶u̶ch tu̶ u̶u̶ch najty je̱'e̱ Tito du'un nnu̶ma'ay ko u̶u̶ch janch jootkujk nnayjyu̶wu̶'u̶yii mu̶u̶d miich ajku̶xy, y ka'p miich mu̶naa tu̶ nwin'u̶u̶ngu̶xy. Du'un neby je̱'e̱ tu̶y'ajt ku̶xyu̶ tu̶ nyajmu̶dmu̶dyaakku̶xyu̶ñ, nan tu̶y'ajt je̱'e̱ du'un neby u̶u̶ch je̱'e̱ Tito nnu̶maaygyu̶xyu̶ñ: ko u̶u̶ch njanchjootkujk u̶u̶ch ajku̶xy mu̶u̶d miich ajku̶xy. 15Y je̱'e̱ Tito ni'igyu̶ xychojkku̶xp xyjyu̶wu̶u̶ygyu̶xp ko xyjya'aymye̱jtzpaatku̶xy ko miich nigu̶xyu̶ mgapxymyu̶doogu̶xy neby xy'ane̱'e̱mgu̶xyu̶ñ y neby mgu'ubu̶jkku̶xyu̶ñ, y neby myajmu̶j'ajtku̶xyu̶ñ. 16Xondaak u̶u̶ch je̱' ko nejwu̶u̶ybyu̶ch ko miich mdu̶y mdu'uda'agyu̶ch ajku̶xy.
Currently Selected:
2 Corintios 7: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad BÃblica de México, A.C. 2005