2 Corintios 4
4
1Paady u̶u̶ch ka'p njootme̱tzku̶u̶ygyu̶xy mu̶u̶d je̱'e̱ tuung je̱'e̱ mu̶dyiibu̶ u̶u̶ch je̱'e̱ Dios tu̶ xyajni'ipu̶jkku̶xyu̶ñ, je̱' ko u̶u̶ch tu̶ xypya'a''ayoogu̶xy. 2Tu̶ u̶u̶ch ku̶xyu̶ nnajtz'ixu̶u̶ydyaaygyu̶xy je̱'e̱ mu̶dyiibu̶ oymyu̶dzo'oydyuunu̶ju̶ñ, je̱'e̱ mu̶dyiibu̶ ayu'uch amechu̶ yajtuumb yaj'ijxpu̶ñ, y ka'p u̶u̶ch pu̶n nwin'u̶u̶ngu̶xy, ni nga'akapxma'tku̶xyu̶ch je̱'e̱ Dios y'ayuuk tyu̶y'ajt. Je̱'e̱ u̶u̶ch ni'igyu̶ ngapxwa'kxku̶xypy je̱'e̱ mu̶dyiibu̶ tu̶y'ajt, y y'ijxypy ñejwu̶u̶by je̱'e̱ Dios ko u̶u̶ch je̱'e̱ tu̶y'ajt ngápxku̶xypy nmu̶dyaakku̶xypy y oy yajxón je̱'e̱ ja'ay du'un nejwu̶u̶ydyaaygyu̶xy je̱'e̱ mu̶dyiibu̶ u̶u̶ch xy'ixy'ajtku̶xpu̶ñ. 3Y pu̶nu̶ je̱'e̱ ayuuk tu̶y'ajt u̶u̶ch ngapxwa'kxku̶xypy je̱'e̱ mu̶dyiibu̶ ka'p pu̶n winju̶wu̶'u̶yu̶ñ, paady je̱'e̱ ka'p winju̶wu̶u̶ygyu̶xy je̱' ko tu̶goydyuum yajpaatku̶xy. 4Je̱' ko ka'p je̱'e̱ ayuuk tu̶y'ajt mu̶bu̶jkku̶xy, je̱' ko je̱'e̱ mu̶jku'u je̱'e̱ jyoot wyinma'añ tu̶ yajjúnu̶xu̶ ajku̶xy, je̱'e̱ mu̶dyiibu̶ ya naaxwiiñ dios'ajtku̶xpu̶ñ, ka'pu̶ je̱'e̱ tu̶kxu̶ñ jaju̶ñ ijxku̶x paatku̶xu̶ch je̱'e̱ mu̶dyiibu̶ yajpaatp ma je̱'e̱ oybyu̶ Cristo y'ayuuk tyu̶y'ajtu̶ñ, je̱'e̱ Cristo mu̶dyiibu̶ du'un neby je̱'e̱ Dios y'agojnáxu̶ñ. 5Ka'p u̶u̶ch ngu̶'u̶m'ayuuk ngu̶'u̶mdu̶y'ajt ngapxwa'kxku̶xypy, je̱'e̱ Jesucristo u̶u̶ch y'ayuuk tyu̶y'ajt ngapxwa'kxku̶xypy ko je̱' Windzú̶n, u̶u̶ch tuumbu̶du̶jku̶ch je'eyu̶ ajku̶xy je̱'e̱ mu̶dyiibu̶ miich xymyu̶duungu̶xpu̶ñ je̱' ko u̶u̶ch je̱'e̱ Jesús ndzojkku̶xy nju̶wu̶u̶ygyu̶xy. 6Je̱' ko je̱'e̱ Dios je̱'e̱ mu̶dyiibu̶ jékyu̶p ane̱'e̱m ko je̱'e̱ ju̶u̶n y'adu̶kx y'ajaju̶ch ma najty y'agoodzu̶chu̶ñ, je̱' je̱' je̱'e̱ mu̶dyiibu̶ je̱'e̱ tyu̶y'ajt jootjooty winma'añjyooty tu̶ xymyooyu̶mu̶ñ ajku̶xy, neby je̱'e̱ Dios y'oy'ajtu̶ñ n'ijx nnejwu̶u̶yu̶mu̶chu̶ñ ajku̶xy je̱'e̱ mu̶dyiibu̶ ku̶xu̶'kp ma je̱'e̱ju̶ñ, du'un neby jimbu̶ kyu̶xu̶'u̶gyu̶ñ ma je̱'e̱ Jesucristo wyiiñjyu̶jpu̶ñ.
Je̱'e̱ jugy'ajtu̶ñ ko nmu̶bu̶jku̶m
7Peru̶ adayaaba oy'ajtu̶ñ jii je̱'e̱ nmu̶dajtu̶m ajku̶xy ma je̱'e̱ nni'kx ngopt ajtu̶m ajku̶xyu̶ñ, je̱'e̱ ka'pu̶ chobaady je̱'e̱ mu̶dyiibu̶ du'un neby tu'ug naaxpóch tyu'tz'amaaybyu̶ju̶ñ, neby du'un ñi'igu̶xu̶'u̶gu̶chu̶ñ ko je̱'e̱ mu̶k'ajt myu̶ju̶ch je̱'e̱ mu̶dyiibu̶ jim tzomb ma je̱'e̱ Diosu̶ñ y ka'p dyu'unu̶ch neby je̱'e̱ mu̶dyiibu̶ jim tzomb ma u̶u̶ch ajtu̶m ajku̶xyu̶ñ. 8Y du'unu̶tz, oy u̶u̶ch je̱'e̱ ayo'on jootmáy mu̶j may nmu̶najxku̶xy ngu'ubu̶jkku̶xy, ka'p u̶u̶ch nmu̶naangu̶xy ko u̶u̶ch ka'p n'oknejwu̶u̶ygyu̶xnu̶ tii u̶u̶ch nduungu̶xu̶byu̶ñ; y oy u̶u̶ch ndajku̶xy nmaaygyu̶xy, peru̶ ka'p u̶u̶ch je̱'e̱ nmu̶dzijpu̶gu̶xyu̶. 9Nyaj'u̶xwu̶dijt nyajpawu̶dijtku̶xyu̶ch, peru̶ ka'p u̶u̶ch je̱'e̱ Dios xyñajtz'ixu̶u̶ygyu̶xy; xykyujku̶xy xyjyu̶bijpku̶xyu̶ch; peru̶ ka'p u̶u̶ch xymyu̶madaakku̶xy. 10Oymya'eemby ma u̶u̶ch nnú̶kxku̶xyu̶ñ, o'kju̶jp'aam u̶u̶ch n'ijtku̶xy, du'un neby je̱'e̱ Jesús najty o'kju̶jp'aam y'ityu̶ñ majaty najty wyu̶dityu̶ñ, wan du'un nandu'un ñi'igu̶xu̶'u̶gu̶ch ndzu̶naay njugy'ajtu̶mu̶ch ajku̶xy neby je̱' tzokyu̶ñ ndzu̶naay njugy'ajtu̶mu̶chu̶ñ ajku̶xy. 11Pues u̶u̶ch ajtu̶m ajku̶xy, je̱'e̱ mu̶dyiibu̶ jakjugy'ajtu̶mnu̶ ajku̶xy, o'kju̶jp'aam je'emy nyajpaatu̶m ajku̶xy Jesús kyu̶xpu̶, wan du'un nandu'un ñi'igu̶xu̶'u̶gu̶ch ndzu̶naay njugy'ajtu̶mu̶ch ajku̶xy neby je̱' tzokyu̶ñ ndzu̶naay njugy'ajtu̶mu̶chu̶ñ ajku̶xy ma je̱'e̱ nni'kx ngopt ajtu̶m ajku̶xyu̶ñ, je̱'e̱ mu̶dyiibu̶ o'kp tu̶gooybyu̶ñ. 12Y du'unu̶tz, o'kju̶jp'aam u̶u̶ch nyajpaatku̶xy; cham miich je̱'e̱ jugy'ajtu̶ñ wiinu̶u̶xu̶u̶bu̶ naty mbaatku̶xpu̶.
13Du'un je̱'e̱ Dios ñaky myu̶na'añ: “Nmu̶bu̶jku̶ch y paady u̶u̶ch nnigapxy neby u̶u̶ch najty nmu̶bu̶kyu̶ñ.” Nandu'un u̶u̶ch ajku̶xy, ko u̶u̶ch nmu̶bu̶jkku̶xy, y paady u̶u̶ch nandu'un nnigápxku̶xy neby u̶u̶ch nmu̶bu̶jkku̶xyu̶ñ. 14Je̱' ko nnejwu̶u̶yu̶mby ajku̶xy ko je̱'e̱ Dios je̱'e̱ mu̶dyiibu̶ je̱'e̱ Windzú̶n Jesús yajjuugypyu̶jku̶ñ, nan xyajjugypyu̶jku̶bu̶ch je̱'e̱ u̶u̶ch nandu'un ajku̶xy mu̶u̶d je̱'e̱ Jesús, y kipxy mu̶u̶d miich Dios winduuy xyajnú̶kxu̶mu̶ch ajku̶xy. 15Ku̶xyu̶ neby u̶u̶ch tu̶ njajt tu̶ n'ayoogu̶xyu̶ñ, miich du'un tu̶ ngu'uját ngu'u'ayowu̶u̶ygyu̶xy neby je̱'e̱ m'oy'ajtu̶ñ du'un mbaatku̶xu̶chu̶ñ, neby je̱'e̱ Dios je̱'e̱ may'ajt du'un ni'igyu̶ may túnu̶chu̶ñ y nan neby je̱'e̱ Dioskujuuyu̶p nandu'un nimay ye̱jkku̶xyu̶ñ ma je̱'e̱ Diosu̶ñ, wan je̱'e̱ Dios du'un u̶u̶baady kapxpaady y'ídu̶ch.
16Paady u̶u̶ch ka'p njootme̱tzku̶u̶ygyu̶xy. Oy u̶u̶ch je̱'e̱ nni'kx ni'igú̶xp ku'uduuy jya'a''amu̶jja'ayyu̶u̶ygyu̶xpu̶, peru̶ ni'igyu̶ u̶u̶ch jaboom jaboom aajooty jootjooty nwinje̱e̱m'adu̶u̶tzku̶xy. 17Neby je̱'e̱ tzaachpyu̶ ayo'on ya nmu̶najx ngu'ubu̶jku̶mu̶ñ ajku̶xy ma adayaaba naaxwiiñu̶ñ, we̱e̱nu̶ je̱' y ka'p myu̶j kyu̶je̱e̱ju̶ch, y je̱' je̱' je̱'e̱ mu̶dyiibu̶ tzojku̶ kú̶xu̶p náxu̶bu̶ñ, peru̶ ko du'un n'okmu̶najx n'okku'ubu̶jku̶mu̶ch ajku̶xy, mu̶'it je̱'e̱ oy'ajtu̶ñ wiinu̶u̶xu̶u̶bu̶ ni'igu̶ mu̶j y mu̶j ku̶je̱e̱ nbaattu̶mu̶ch ajku̶xy je̱'e̱ mu̶dyiibu̶ ka'p nimu̶naxu̶u̶ kyu̶xy tyu̶goyu̶ñ. 18Je̱' ko ka'p u̶u̶ch je̱'e̱ nwinma'añ nbu̶daakku̶xy ma je̱'e̱ mu̶dyiibu̶ ya naaxwiiñ yaj'ijxpu̶ñ, jim u̶u̶ch je̱'e̱ nwinma'añ nbu̶daakku̶xy ma je̱'e̱ mu̶dyiibu̶ ka'p yaj'íxyu̶ñ. Je̱' ko tzojku̶ je̱'e̱ kyu̶xy tyu̶goy je̱'e̱ mu̶dyiibu̶ yaj'ijxpu̶ñ. Peru̶ je̱'e̱ mu̶dyiibu̶ ka'p yaj'íxyu̶ñ, je̱'e̱ju̶tz wiinu̶u̶xu̶u̶ ijtu̶u̶b y ka'p nimu̶naxu̶u̶ kyu̶xy tyu̶goy.
Currently Selected:
2 Corintios 4: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005