2 Corintios 10
10
Pablo y'ane̱'e̱mu̶ñ neby tu'ug apóstol
1U̶u̶ch, Pablo, cham miich nmu̶nukxtaakku̶xy mu̶u̶d je̱'e̱ yuungpu̶ naaxypyu̶ joot winma'añ, du'un neby u̶xyu̶py je̱'e̱ Cristo ku̶'u̶m tuñu̶ñ. Peru̶ du'un je̱'e̱ ja'ay myu̶naangu̶xy ko u̶u̶ch yuung naaxypy nnaybyu̶da'agyii ko u̶u̶ch naty nyajpaady ma miich ajku̶xyu̶ñ, y janch tu̶goy ko u̶u̶ch naty ju̶gue̱m nyajpaady. 2Pues oy, cham miich nmu̶nukxtaakku̶xy ko naty nu̶kxy n'ijxku̶xy, ka'p u̶u̶ch ndzoky xyaj'awa'andaakku̶xu̶ch miich je̱'e̱ mu̶dyiibu̶ u̶u̶ch du'un xyñigapxp xyñimu̶dyaakku̶xpu̶ñ ko u̶u̶ch janch tu̶goy nja'ay'áty neby je̱'e̱ oymyu̶dyii naaxwiiñjya'ay jya'ay'ajtku̶xyu̶ñ, je̱' ko ni'ixu̶'u̶ u̶u̶ch yam n'ity ko u̶u̶ch nmu̶dyaj'awingujku̶'u̶wu̶ch je̱'e̱ mu̶dyiibu̶ u̶u̶ch du'un xyñigapxp xyñimu̶dyaakku̶xpu̶ñ. 3Tu̶y'ajt ko ya naaxwiiñ ndzu̶naay njugy'ajtu̶m ajku̶xy, peru̶ ka'p ndziptuunu̶m ajku̶xy neby adayaaba naaxwiiñjya'ay chiptuungu̶xyu̶ñ. 4Je̱'e̱ mu̶k'ajt mu̶dyiibu̶ nyajtuunu̶mbyu̶ñ ajku̶xy ka'p je̱'e̱ jye̱'e̱ju̶ch je̱'e̱ mu̶dyiibu̶ je̱'e̱ naaxwiiñjya'ay yajtuungu̶xypyu̶ñ, je̱'e̱ Dios myu̶k'ajt je̱' je̱'e̱ mu̶dyiibu̶ je̱'e̱ ju̶bu̶kpu̶ myu̶k'ajt ku̶xyu̶ yajku'udu̶gooyu̶byu̶ñ je̱'e̱ mu̶dyiibu̶ je̱'e̱ Dios mu̶dzip'ajtku̶xpu̶ñ. Y du'un je̱'e̱ ju̶bu̶kpu̶ ku̶xyu̶ nmu̶madaaku̶m ajku̶xy nebyjyaty naty xyjya'atunaanu̶mu̶ñ ajku̶xy. 5Y ku̶xyu̶ je̱'e̱ ja'ay mu̶dyiibu̶ mu̶j ku̶xp nayjyu̶wu̶u̶yu̶gu̶xpu̶ñ, mu̶dyiibu̶ je̱'e̱ Dios y'ayuuk tyu̶y'ajt agapxtujkku̶xpu̶ñ ka'pu̶ yajmu̶bú̶gu̶ch. Ku̶xyu̶ je̱'e̱ naaxwiiñjya'ay winma'añ je̱'e̱ Cristo u̶u̶ch je̱'e̱ nyajku̶'u̶du̶gu̶u̶ygyu̶xypy, neby je̱'e̱ Cristo kapxymyu̶doogu̶xu̶chu̶ñ, 6y ni'ixu̶'u̶ u̶u̶ch yam n'ijtku̶xy neby u̶u̶ch ku̶xyu̶ nyajkumu̶doogu̶xu̶chu̶ñ je̱'e̱ mu̶dyiibu̶ ka'p kyapxymyu̶doogu̶xyu̶ñ, je̱'e̱ mu̶dyiibu̶ du'un mu̶naangu̶xpu̶ñ ko oy wa'adzu̶ kuydyuundaaygyu̶xy.
7Miich ajku̶xy je̱' miich je'eyu̶ mgweentu̶tuungu̶xypy neby je̱'e̱ ja'ay jya'ay'ajtku̶xyu̶ñ.#10.7 Miich ajku̶xy je̱' miich je'eyu̶ mgweentu̶tuungu̶xypy neby je̱'e̱ ja'ay jya'ay'ajtku̶xyu̶ñ: nije̱' wiingpu̶ jaaybyu̶du̶jk myu̶naangu̶xy: kweentu̶tuungu̶x oy yajxón neby je̱'e̱ ja'ay jaanch jya'ay'ajtku̶xyu̶ñ. Pu̶nu̶ jii pu̶n Cristo mu̶duumbu̶ ñayjyu̶wu̶'u̶yii, mu̶baad nandu'un nejwu̶'u̶y ko u̶u̶ch Cristo mu̶duumbu̶ u̶u̶ch nandu'un ajku̶xy. 8Y u̶u̶ch mu̶ktaakp u̶u̶ch ni'igyu̶ ko u̶u̶ch je̱'e̱ ane̱'e̱mu̶ñ nmu̶dajtku̶xy, ka'p u̶u̶ch mu̶baad nmu̶dzo'oydyúñ, je̱' ko je̱'e̱ windzú̶n Jesucristo u̶u̶ch je̱'e̱ ane̱'e̱mu̶ñ tu̶ xymyooygyu̶xy neby miich je̱'e̱ mmu̶bu̶jku̶ñ nyajye̱e̱ku̶yu̶chu̶ñ ajku̶xy, y ka'p neby miich nyajwinma'añdyu̶gooygyu̶xu̶chu̶ñ. 9Ka'p u̶u̶ch ndzoky mwinju̶wu̶u̶ygyu̶xu̶ch du'un ko yam n'adzu̶gu̶u̶ygyu̶xy mu̶u̶d je̱'e̱ naky mu̶dyiijáty nyajnigue̱jxku̶xypyu̶ñ. 10Nije̱' je̱'e̱ ja'ay myu̶naangu̶xy ko u̶u̶ch je̱'e̱ nnaky mu̶kjaty kyapxy je̱'e̱ mu̶dyiibu̶ nyajnigue̱jxku̶xypyu̶ñ, peru̶ ko u̶u̶ch wiinu̶ ju̶jpu̶ nyajpaady ma miich ajku̶xyu̶ñ, ka'p u̶u̶ch pu̶n xykyweentu̶túñ y ni xykya'atzu̶gu̶'u̶yu̶ch miich ajku̶xy ko u̶u̶ch ngapxy nmu̶dya'agy. 11Peru̶ je̱'e̱ ja'ay mu̶dyiibu̶ du'un mu̶naambu̶ñ, mu̶baad je̱'e̱ nandu'un nejwu̶'u̶y ko du'un neby naky'aam nnijayu̶u̶ygyu̶xyu̶ñ ko u̶u̶ch ju̶gue̱m nyajpaatku̶xy, du'un u̶u̶ch jim ngápxu̶ch nmu̶dyaakku̶xu̶ch ko u̶u̶ch naty jim wiinu̶ ju̶jpu̶ nyajpaatku̶xy ma miich ajku̶xyu̶ñ.
12Tu̶y'ajtu̶ñ ka'p u̶u̶ch je̱'e̱ nba'ijxku̶xy o ka'p u̶u̶ch nnayyajmu̶baattu̶gu̶xy mu̶u̶d je̱'e̱ du'umbu̶ ja'ay mu̶dyiibu̶ ku̶'u̶m naygyu'umaayu̶gu̶xpu̶ñ. Peru̶ je̱' ajku̶xy tzuuwinma'añ looku̶winma'añ je̱'e̱ du'un tyuungu̶xypy ko du'un ñay'ijxkípxu̶gu̶xyu̶ agu̶ je̱' y ñayyajmu̶baattu̶gu̶xyu̶ je̱' kyu̶'u̶m'ayuuk kyu̶'u̶mwinma'añ je̱'e̱ mu̶dyiibu̶ jyajtypy ñejwu̶u̶by ajku̶xyu̶ñ. 13U̶u̶ch ka'p u̶u̶ch nnaygyu'umaayu̶gu̶xy ma ka'p pyadyiiju̶ñ. Dios u̶u̶ch xy'awaanu̶py ajku̶xy mabaad u̶u̶ch je̱'e̱ nduung mu̶baad nduungu̶xyu̶ñ, y je̱' du'un tu̶ myu̶na'añ ko u̶u̶ch u̶xtu̶ jimbaad nduungu̶xu̶ch ma miich ajku̶xyu̶ñ jim Corinto. 14Paady u̶u̶ch je'eyu̶ nduungu̶xy ma u̶u̶ch je̱'e̱ Dios xykye̱jxku̶xyu̶ñ y ka'p ma u̶u̶ch ka'p xykye̱jxku̶xyu̶ñ, tu̶ u̶xyu̶py du'un jyaty ko u̶u̶ch u̶xyu̶py jim jayu̶jp'ajt nga'anú̶kxku̶xy ma miich ajku̶xyu̶ñ. U̶u̶ch je̱'e̱ oybyu̶ ayuuk tu̶y'ajt jim jayu̶jp'ajt nyajwa'kxtzóngu̶x ma miich ajku̶xyu̶ñ neby je̱'e̱ Cristo jékyu̶p jyajty y'abejtyu̶ñ. 15Y ka'p u̶u̶ch je̱'e̱ wiingpu̶ ja'ay tyuung nnayyajku'umaayu̶gu̶xyu̶ mu̶dyiibu̶ u̶u̶ch ka'p tu̶ nduungu̶xyu̶ñ, ma u̶u̶ch je̱'e̱ Dios y'ayuuk tyu̶y'ajt ka'p tu̶ ngapxwa'kxku̶xyu̶ñ, ma u̶u̶ch ka'p xypyaatku̶xy nnú̶kxku̶xu̶chu̶ñ. Ni'igyu̶ u̶u̶ch nju̶jp'ijxku̶xy nduungu̶xu̶chu̶ch ni'igyu̶ ma miich ajku̶xyu̶ñ, du'un neby je̱'e̱ mmu̶bu̶jku̶ñ naty miich mbaad'adu̶u̶tzku̶xyu̶ñ, jimdu̶'ajty je'eyu̶ ma u̶u̶ch je̱'e̱ nduung xypyaatku̶xyu̶ñ. 16Nju̶jp'ijxypy u̶u̶ch nandu'un ajku̶xy nnú̶kxku̶xu̶chu̶ch y nyajwa'kxku̶xu̶chu̶ch je̱'e̱ aanu̶mu̶ ni'idzooku̶ñ jakju̶gue̱m ma miich ajku̶xyu̶ñ, peru̶ ka'p u̶u̶ch jim ndu̶gu̶u̶ygyu̶xu̶ch ma je̱'e̱ wiingpu̶ ja'ay tu̶ yajtzondaakku̶xyu̶ñ, ka'pu̶ u̶u̶ch je̱'e̱ wiingpu̶ ja'ay tyuung nnayyajku'umaayu̶gu̶xu̶ch mu̶dyiibu̶ u̶u̶ch ka'p tu̶ nduungu̶xyu̶ñ, ma u̶u̶ch je̱'e̱ Dios y'ayuuk tyu̶y'ajt ka'p tu̶ ngapxwa'kxku̶xyu̶ñ.
17Pu̶nu̶ jii pu̶n ku̶'u̶m ñaygyu'umaya'añyii, wan je̱'e̱ Windzú̶n Jesucristo ku'umáy ko je̱' myu̶duumby. 18Je̱' ko ka'p je̱'e̱ Dios je̱' ku'umaayu̶p je̱'e̱ ja'ay mu̶dyiibu̶ ku̶'u̶m naygyu'umaayu̶bu̶ñ, je̱' je̱'e̱ Dios ku'umaayu̶p pu̶n je̱'e̱ Windzú̶n Jesucristo ku'umaaybyu̶ñ.
Currently Selected:
2 Corintios 10: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005