2 Corintios 9
9
Mu̶bu̶jkpu̶du̶jk pyube̱jtu̶ñ ajku̶xy
1Ka'p pyadyii ko miich njatytimyñijayu̶u̶ygyu̶xu̶ch ko je̱'e̱ mu̶bu̶jkpu̶du̶jk pube̱jtu̶ñ mmooygyu̶xu̶ch, 2je̱' ko nejwu̶u̶ybyu̶ch du'un ko miich je̱'e̱ tzojku̶ñ du'un mmu̶dajtku̶xy ko mbube̱daangu̶xy. Je'emy u̶u̶ch je̱'e̱ mu̶bu̶jkpu̶du̶jk du'un jootkujk nnu̶maaygyu̶xy je̱'e̱ mu̶dyiibu̶ Macedonia tzu̶naaygyu̶xpu̶ñ, ko moongtu̶u̶yu̶p miich je̱'e̱ mdu̶gu̶'u̶y pube̱jtku̶xpu̶ je̱'e̱ mu̶dyiibu̶ Acaya tzu̶naaygyu̶xpu̶ñ, y tu̶ je̱'e̱ nimaybyu̶ mu̶bu̶jkpu̶du̶jk du'un nandu'un myu̶naangu̶xy je̱'e̱ mu̶dyiibu̶ Macedonia tzu̶naaygyu̶xpu̶ñ ko je̱'e̱ myu̶gu'ugtu̶jk pube̱daangu̶xy ko du'un ijxku̶xy tú̶kxku̶xy neby miich je̱'e̱ mmu̶gu'ugtu̶jk mbube̱jtku̶xyu̶ñ. 3Peru̶ cham adayaaba mu̶gu'uktu̶jk nyajnigue̱jxku̶xy ka'pu̶ u̶u̶ch anu̶u̶ nbu̶dzú̶mu̶ch neby miich oy yajxón nnigapx nnimu̶dyaakku̶xyu̶ñ ma adayaaba winma'añdyu̶ñ, wan jim ni'ixu̶'u̶ m'ijtku̶xu̶ch tu̶ naty je̱'e̱ pube̱jtu̶ñ myajmujkku̶xy ko jim jya'tku̶xu̶ch, 4ka'p jékyu̶ch ñú̶kxu̶ch je̱'e̱ Macedonia ja'ay jim nije̱' mu̶u̶d u̶u̶ch ko u̶u̶ch naty jim nu̶kxy ma miich ajku̶xyu̶ñ y paatku̶xu̶ch ka'p naty ni'ixu̶'u̶ m'ijtku̶xy. Chi u̶u̶ch je̱'e̱ mu̶jtzo'oydyu'un du'un mbaatku̶xu̶ch ko naty oy yajxón tu̶ n'oknigapx n'oknimu̶dyaakku̶xy y nan mu̶jtzo'oydyu'un miich nandu'un mbaatku̶xu̶py. 5Paady u̶u̶ch du'un tu̶ njatytimywyyinmay ngue̱xa'añu̶ch adaa mu̶gu'uktu̶jk ma miich ajku̶xyu̶ñ wan nu̶kxy jayu̶jp xy'okku'ijx xy'okmu̶gápxku̶xy, y xypyube̱jtku̶xu̶ch xyjyakmu̶d'yajka'pxku̶xu̶ch je̱'e̱ pube̱jtu̶ñ je̱'e̱ mu̶dyiibu̶ miich jékyu̶p m'awaanu̶u̶ygyu̶xu̶ñ ko mye̱gaangu̶xy. Y du'un je̱'e̱ pube̱jtu̶ñ mu̶dyiibu̶ miich mye̱jkku̶xypyu̶ñ, ñi'igu̶xu̶'u̶gu̶ch ko du'un tu'ug'aa tu'ugjoot mye̱jkku̶xy ko je̱'e̱ tzojku̶ñ du'un mmu̶dajtku̶xy, y ka'p ko miich du'un u̶u̶ch adzip nyajmu̶guwaanu̶u̶ygyu̶xypy.
6Ja'aymye̱jtzku̶x adaa: Pu̶n we̱e̱nu̶ niip tuumbu̶ñ, nan we̱e̱nu̶ je̱'e̱ pyu̶da'agy yajpu̶du̶'u̶gy; pu̶n may niip tuumbu̶ñ, nan may je̱'e̱ pyu̶da'agy yajpu̶du̶'u̶gy. 7Du'un je̱'e̱ mbube̱jtu̶ñ nidu'ug nidu'ug mye̱jkku̶xu̶ch neby naty jootjooty winma'añjyooty tu̶ mniwinmayu̶u̶ygyu̶xyu̶ñ, oy'aa oyjyoot y ka'p y'adzip y'ama'adu̶ch, je̱' ko je̱' je̱'e̱ Dios chojkypy jyu̶wu̶u̶by je̱'e̱ mu̶dyiibu̶ je̱'e̱ pube̱jtu̶ñ xi'ig xon ye̱jkpu̶ñ. 8Mu̶baad je̱'e̱ Dios miich xymyooygyu̶xy mu̶j ku̶je̱e̱ ku̶xyu̶ je̱'e̱ oy'ajtu̶ñ, neby mu̶baad mmu̶dajtu̶u̶gu̶xyu̶ñ ku̶xyu̶ tijaty myajmayjyajtku̶xypyu̶ñ y nan xyñadu̶gu̶u̶yu̶ch ajku̶xy neby je̱'e̱ mmu̶gu'ugtu̶jk mu̶baad mbube̱jtku̶xyu̶ñ, mduungu̶xu̶ch ku̶xyu̶ oyjya'ay'ajtu̶ñ. 9Du'un je̱'e̱ Dios ñaky myu̶na'añ:
“Je̱'e̱ tu'uda'agyjya'ay ñi'imooygyu̶xypy je̱'e̱ ayoobu̶ja'ay ku̶xyu̶ tii du'umbu̶,
y je̱'e̱ tyu'uda'agy'ajtu̶ñ ka'p je̱'e̱ nimu̶naaxu̶u̶ kyú̶xu̶ch tyu̶góyu̶ch, ijtu̶wu̶p je̱'e̱ wiinu̶u̶xu̶u̶.”
10Dios, je̱'e̱ mu̶dyiibu̶ je̱'e̱ tu̶u̶md ye̱jkp je̱'e̱ mu̶dyiibu̶ yajniipu̶ñ y je̱'e̱ kaayu̶ñ uuku̶ñ mu̶dyiibu̶ yajkaaby yaj'uukpu̶ñ, je̱' xymyooygyu̶xu̶p ku̶xyu̶ tii myajmayjyajtku̶xypyu̶ñ ma je̱'e̱ mgam mdu'u ajku̶xy, y yajmayu̶'u̶wu̶ch, y xymyooygyu̶xu̶p neby je̱'e̱ oyjya'ay'ajtu̶ñ mu̶j mduungu̶xu̶chu̶ñ. 11Y ko du'un mduungu̶xu̶ch mu̶'it je̱'e̱ oy'ajtu̶ñ ku̶xyu̶ may mbaatku̶xu̶ch y mbube̱jtku̶xu̶ch je̱'e̱ mmu̶gu'ugtu̶jk. Y je̱'e̱ pube̱jtu̶ñ mu̶dyiibu̶ naty miich mgue̱jxku̶xypyu̶ñ, mu̶'it je̱'e̱ mmu̶gu'ugtu̶jk jyootkugu̶u̶ygyu̶xu̶ch mu̶u̶d u̶u̶ch kyu̶xpu̶ ajku̶xy y ye̱jkku̶xu̶ch je̱'e̱ Dioskujuuyu̶p ma je̱'e̱ Diosu̶ñ ko u̶u̶ch naty je̱'e̱ pube̱jtu̶ñ nyajku̶'u̶du̶gu̶u̶ygyu̶xy. 12Ko je̱'e̱ nmu̶gu'ugtu̶jk nbube̱jtu̶m ajku̶xy, ka'p je̱'e̱ je̱'e̱du̶'ajty nyajnigue̱jxu̶mby ajku̶xy je̱'e̱ mu̶dyiibu̶ yajmayjyajtku̶xypyu̶ñ, nan nyajjootkugu̶u̶yu̶mby ajku̶xy neby je̱'e̱ Dioskujuuyu̶p mu̶baad nandu'un mu̶j may ye̱jkku̶xy ma je̱'e̱ Diosu̶ñ. 13Y je̱' kyu'umaay jya'aymye̱jtzku̶xu̶py je̱'e̱ xu̶u̶ Dios, je̱' ko adaa pube̱jtu̶ñ mu̶dyiibu̶ miich mgue̱jxku̶xypyu̶ñ yajni'igu̶xu̶'u̶gu̶p ko miich je̱'e̱ Cristo y'ayuuk tyu̶y'ajt mguydyuunu̶ ajku̶xy. Nan wyindzu̶gu̶u̶y y'o'owu̶dajtku̶xu̶py je̱'e̱ xu̶u̶ Dios ko je̱'e̱ pube̱jtu̶ñ naty mye̱jkku̶xy ma je̱' ajku̶xyu̶ñ, y ma ku̶xyu̶ pu̶njaty naty je̱'e̱ pube̱jtu̶ñ paatku̶xpu̶ñ. 14Y nan chi ja'adu'knáx, myu̶bu̶jktzoogu̶xu̶py je̱'e̱ Dios mu̶u̶d miich kyu̶xpu̶ ajku̶xy ko xychojkku̶xy xyjyu̶wu̶u̶ygyu̶xy, ko je̱'e̱ Dios mu̶j'oyjya'ay'ajtu̶ñ tu̶ yajni'igu̶xu̶'u̶gy ma miich ajku̶xyu̶ñ. 15¡Dioskujuuyu̶p je̱'e̱ Dios, ko janch mu̶j je̱'e̱ kunukxu̶ñ je̱'e̱ mu̶dyiibu̶ tu̶ xyñi'imooyu̶mu̶ñ ajku̶xy, ka'p je̱'e̱ kapxy ayuuk yaj'íxy yajpaady neby nnigapx nnimu̶dyaaku̶mu̶chu̶ñ ajku̶xy!
Currently Selected:
2 Corintios 9: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005