2 Corintios 2
2
1Paady u̶u̶ch tu̶ nwinmay nu̶kxy ka'p n'o'kku'ijxtu̶gajtzku̶xnu̶ ka'pu̶ nigoo njootmaymyooygyu̶xu̶ch. 2Pu̶nu̶ u̶u̶ch miich njootmaymyooygyu̶xypy, y pu̶nu̶ ka'p u̶u̶ch miich xyajjootkugu̶u̶ygyu̶xy je̱'e̱ mu̶dyiibu̶ u̶u̶ch naty tu̶ njootmaymyo'oyu̶ñ, ¿pu̶n u̶u̶ch da'a xyajjootkugu̶'u̶wu̶p? 3Y paady nnijayu̶u̶ygyu̶xy ko u̶u̶ch ka'p ndzojknu̶kxa'añ ma miich ajku̶xyu̶ñ, ka'pu̶ u̶u̶ch miich xyajjootmaydyu̶gu̶u̶ygyu̶xu̶ch ajku̶xy ma jya'apadyii xyajjootkugu̶'u̶wu̶chu̶ch ajku̶xy. U̶u̶ch nnejwu̶u̶ybyu̶ch najty ko miich mjootkugu̶u̶ygyu̶xu̶ch ko u̶u̶ch naty jootkujk xy'ijxku̶xy, 4peru̶ ko je̱'e̱ naky nyajnigue̱jxku̶xy, mu̶k u̶u̶ch najty ndajy nmay y u̶xtu̶ yaaxp u̶u̶ch najty. Peru̶ ka'p je̱'e̱ naky paady nyajnijayu̶u̶ygyu̶xy neby nyajjootmaydyu̶gu̶'u̶waangu̶xyu̶ñ, paady je̱'e̱ nyajnijayu̶u̶ygyu̶xy neby m'ijxku̶x mnejwu̶u̶ygyu̶xu̶chu̶ñ ko mu̶k ndzojkku̶xy nju̶wu̶u̶ygyu̶xy.
Yajwinmékxy je̱'e̱ mu̶dyiibu̶ je̱'e̱ Pablo najty tu̶ mu̶duundu̶góyu̶ñ
5Pu̶nu̶ jii je̱'e̱ jootmáy pu̶n yeky, ka'p je̱'e̱ u̶u̶chtyu̶'ajty xyjyootmaymyooby, u̶xtu̶ miich pyaad je̱'e̱ nigu̶xyu̶ xyjyootmaymyooygyu̶xy. Nmu̶na'añu̶ch du'un “ko u̶xtu̶ miich pyaad” ka'pu̶ u̶u̶ch du'un nigoo nyajni'igyu̶ju̶'u̶wu̶ch. 6Du'un neby miich je̱'e̱ du'umbu̶ ja'ay je̱'e̱ pyoky tu̶ myajkumu̶doogu̶xyu̶ñ, wan du'un'ajtnu̶, ka'p m'ok'yajkumu̶doogu̶xnu̶. 7Winmé̱kxku̶x neby tu̶ tyuundu̶góyu̶ñ y pube̱jtku̶x, ka'p jyékyu̶ch ko naty du'un mu̶k tyajy myay nu̶kxy tu'ook tu̶goyu̶ wyinma'añdyu̶góy. 8Paady nmu̶nukxtaakku̶xy ko yajni'igu̶xu̶'u̶kku̶x ja'adu'ook ko mdzojkku̶xy mju̶wu̶u̶ygyu̶xy. 9Paady miich jayu̶jp'ajt nnijayu̶u̶ygyu̶xy mu̶u̶d adayaaba winma'añ, neby du'un nwinma'añ'ixaangu̶xyu̶ñ y nnejwu̶'u̶wa'añu̶ch pu̶nu̶ xykyuydyunaanu̶bu̶ch je̱'e̱ n'ayuuk ajku̶xy. 10Y du'unu̶tz, pu̶n miich je̱'e̱ pyoky mwinmé̱kxu̶py ajku̶xy, nan nwinmé̱kxu̶byu̶ch je̱'e̱ u̶u̶ch nandu'un. Y pu̶nu̶ nwinmé̱kxu̶byu̶ch je̱'e̱ pyoky pu̶nu̶ tu̶ naty tii tuundu̶góy, miich kyu̶xpu̶ u̶u̶ch naty je̱'e̱ du'un nwinme̱kxu̶ ajku̶xy y y'ijxypy ñejwu̶u̶by je̱'e̱ Cristo. 11Y ko du'un nduunu̶mu̶ch ajku̶xy, ka'p je̱'e̱ mu̶jku'u du'un xymyu̶madaaku̶mu̶ch ajku̶xy, je̱' ko nnejwu̶u̶yu̶mby ajku̶xy neby je̱'e̱ winma'añ mu̶u̶du̶chu̶ñ.
Pablo kya'ajootkujk'áty jim Troas
12Ko u̶u̶ch jim nja'ty ma je̱'e̱ Troas kajptu̶ñ ngapxwa'kxa'añu̶ch je̱'e̱ Cristo y'ayuuk tyu̶y'ajt, nbaattu̶ch je̱'e̱ tu̶gu̶u̶ydyaakt jim mu̶j neby u̶u̶ch je̱'e̱ Windzú̶n Jesucristo tyuung ndúnu̶chu̶ch. 13Peru̶ ka'p u̶u̶ch najty ndimyjyootkujku̶ch, je̱' ko u̶u̶ch je̱'e̱ Tito jim nga'apaaty, je̱'e̱ nmu̶gu'ug ajtu̶m ajku̶xy. Paady u̶u̶ch je̱'e̱ mu̶bu̶jkpu̶du̶jk njakmu̶gápxku̶xy, y ndzóñu̶ch jim ma je̱' ajku̶xy y nnú̶kxyu̶ch jim Macedonia.
Mu̶daaku̶ñ ma je̱'e̱ Crístoju̶ñ
14Dioskujuuyu̶p je̱'e̱ Dios ko je'emy xypyube̱jtu̶m ajku̶xy neby je̱'e̱ ju̶bu̶kpu̶ nmu̶madaaku̶mu̶ch ajku̶xy ma je̱'e̱ Cristo Jesúsu̶ñ#2.14 Neby je̱'e̱ ju̶bu̶kpu̶ ma je̱'e̱ Cristo Jesúsu̶ñ: nije̱' je̱'e̱ wiingpu̶ jaaybyu̶du̶jk myu̶naangu̶xy: neby xyajmu̶daaku̶mu̶ñ ajku̶xy ma je̱'e̱ ju̶bú̶kpu̶ju̶ñ ko tu'ugyu̶ nyajpaatu̶mu̶ch ajku̶xy ma je̱'e̱ Cristo Jesúsu̶ñ. y ko mu̶u̶d u̶u̶ch kyu̶xpu̶ ajtu̶m ajku̶xy je̱'e̱ naax kajpt y'ayuuk tyu̶y'ajt yaj'íxy yajnejwu̶'u̶y, je̱'e̱ mu̶dyiibu̶ xii yaa wu̶dijtp ma je̱'e̱ naax kajpt kú̶xyu̶ju̶ñ, du'un neby tii oy pya'akxuugyu̶ñ y y'aboju̶'u̶y xii yaa. 15Je̱' ko du'un u̶u̶ch ajtu̶m ajku̶xy neby je̱'e̱ poom xyuugyu̶ñ je̱'e̱ mu̶dyiibu̶ je̱'e̱ Cristo yejkypy ma je̱'e̱ Diosu̶ñ, y wya'kxy ma je̱'e̱ mu̶dyiibu̶ aanu̶mu̶ ni'idzooku̶ñ padaangu̶xpu̶ñ y ma je̱'e̱ mu̶dyiibu̶ tu̶goyaangu̶xpu̶ñ je̱'e̱ ka'pu̶ je̱'e̱ aanu̶mu̶ ni'idzooku̶ñ padaangu̶xy. 16Wan je̱'e̱ poom xyuku̶ñ o'ogy'aam wyimbídu̶ch ma je̱'e̱ mu̶dyiibu̶ tu̶goyaangu̶xpu̶ñ, je̱'e̱ ka'pu̶ je̱'e̱ aanu̶mu̶ ni'idzooku̶ñ padaangu̶xy, peru̶ je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ padaangu̶xpu̶ñ, je̱'e̱ jugy'ajtu̶ñ wiinu̶u̶xu̶u̶bu̶ je̱'e̱ poom xyuku̶ñ wyimbídu̶ch. ¿Y pu̶n adayaaba tuung da'a mu̶baad okmu̶mada'agy? 17U̶u̶ch ajku̶xy ka'p u̶u̶ch je̱'e̱ Dios y'ayuuk tyu̶y'ajt meeñ'aam ngapxwa'kxu̶ ajku̶xy neby je̱'e̱ ja'ay may y'adu̶u̶tzku̶xyu̶ñ; y'ijxypy ñejwu̶u̶by je̱'e̱ Dios ko ni'igyu̶ u̶u̶ch je̱'e̱ y'ayuuk tyu̶y'ajt ngapxwa'kxu̶ ajku̶xy mu̶u̶d je̱'e̱ tu'uda'agypyu̶ joot winma'añ, je̱' ko je̱' u̶u̶ch tu̶ xykye̱jxku̶xy ayuuk kapxwa'kxpu̶ je̱' ko u̶u̶ch tu'ugyu̶ nyajpaatku̶xy ma je̱'e̱ Crístoju̶ñ.
Currently Selected:
2 Corintios 2: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005