2 Corintios 12
12
Je̱'e̱ mu̶dyiibu̶ je̱'e̱ Pablo je̱'e̱ Dios yaj'ijxu̶ju̶ñ y je̱'e̱ mu̶dyiibu̶ yajnejwu̶u̶yu̶ju̶ñ
1Ni tii du'un kya'ayaj'íxy kya'ayajpaady ko ku̶'u̶m nnaygyu'umaayu̶mu̶ch. Peru̶ nmu̶dya'age̱e̱mbyu̶ch je̱'e̱ mu̶dyiibu̶ u̶u̶ch je̱'e̱ Windzú̶n Jesucristo kuma'ayjyooty tu̶ xyaj'íxyu̶ñ y nan je̱'e̱ mu̶dyiibu̶ u̶u̶ch tu̶ xyajnejwu̶'u̶yu̶ñ. 2N'ixy'ajtypyu̶ch je̱'e̱ ja'ay tu'ug je̱'e̱ mu̶dyiibu̶ je̱'e̱ Cristo mu̶bu̶jkpu̶ñ y cham majmáktz jumu̶jt ñu̶kxnu̶ ma tzajpjooty yajnu̶kxyiiju̶ñ, ma je̱'e̱ mu̶du̶gu̶u̶kpu̶ tzajpu̶ñ. Peru̶ ka'p u̶u̶ch nnejwu̶'u̶y pu̶nu̶ du'undu̶ yajnú̶kxu̶ mu̶u̶d je̱'e̱ ñi'kx kyopt o pu̶nu̶ y'aanu̶mu̶du̶'ajtyu̶ je'eyu̶ yajnú̶kxu̶xu̶, Dios je'eyu̶ nejwu̶u̶by. 3Peru̶ nnejwu̶u̶ybyu̶ch du'un ko je̱'e̱ ja'ay jiiby y'ooy (je̱' u̶u̶ch tu̶y nga'anejwu̶u̶by neby jiiby yajnú̶kxu̶ju̶ñ, pu̶nu̶ mu̶u̶d je̱'e̱ ñi'kx kyopt o pu̶nu̶ y'aanu̶mu̶du̶'ajtyu̶ je'eyu̶ yajnú̶kxu̶xu̶, je̱'e̱ Dios je'eyu̶ nejwu̶u̶by) 4neby jiiby yajnú̶kxu̶ju̶ñ ma je̱'e̱ oybyu̶ ittu̶ñ, ma je̱'e̱ ayuuk mu̶dooyu̶ñ je̱'e̱ mu̶dyiibu̶ ka'p mu̶baad ni pu̶n ja'ay kapxy mu̶dya'agyu̶ñ. 5U̶u̶ch ngu'umaaybyu̶ch u̶xyu̶py je̱'e̱ du'umbu̶ ja'ay, peru̶ ka'p u̶u̶ch ku̶'u̶m nnaygyu'umayii, ni'igyu̶ u̶u̶ch ku̶'u̶m nnayñimu̶dya'agyii neby u̶u̶ch je̱'e̱ ayo'on nmu̶naxy ngu'ubú̶kyu̶ñ. 6Oy u̶u̶ch u̶xyu̶py nja'anaygyu'umaayu̶bu̶ ko u̶u̶ch jiiby tu̶ n'oy, ka'p u̶u̶ch naty du'un tzuugápxp pojkápxpu̶ch, je̱' ko je̱'e̱ tu̶y'ajt u̶u̶ch naty du'un nmu̶dyaakypy; peru̶ ka'p u̶u̶ch ku̶'u̶m nnaygyu'umayii, ka'pu̶ je̱'e̱ ja'ay myu̶na'anu̶ch ko u̶u̶ch mu̶j ku̶xp nayjyu̶wu̶'u̶yii y ka'p u̶u̶ch naty du'un nni'iku̶xu̶'kpu̶, o neby u̶u̶ch naty du'un nja'amu̶na'añu̶ñ. 7Y paady ka'pu̶ u̶u̶ch mu̶j ku̶xp nnayjyu̶wu̶'u̶wu̶u̶ju̶ch ko u̶u̶ch je̱'e̱ Windzú̶n Dios je̱'e̱ janch oybyu̶ ayuuk tu̶ xyajnejwu̶'u̶y, paady u̶u̶ch je̱'e̱ tzaachpyu̶ nyajmooy, du'un neby u̶u̶ch je̱'e̱ epty ni'kxjootypyu̶ nmu̶datyu̶ñ, du'un je̱'e̱ mu̶jku'u epty ni'kxjooty pu̶daaky neby u̶u̶ch du'un xychaachtyúnu̶chu̶ñ. 8Tu̶gu̶u̶g'ook u̶u̶ch je̱'e̱ Windzú̶n Dios tu̶ nja'amu̶bu̶jktzóy ko u̶u̶ch je̱'e̱ tzaachpyu̶ xypyu̶jku̶yu̶ch; 9peru̶ du'un u̶u̶ch je̱'e̱ Windzú̶n Dios tu̶ xyñu̶ma'ay: Je̱'e̱ ndzojku̶ñ nju̶wu̶u̶yu̶ñ miich xypyube̱jtp xypyudu̶gu̶u̶by du'uñdyu̶ miich mdimyyajmayjyátyu̶ñ, je̱' ko ni'igyu̶ u̶u̶ch je̱'e̱ nmu̶k'ajt jim ñi'igu̶xu̶'u̶gy ma je̱'e̱ mu̶dyiibu̶ je̱'e̱ ayo'on mu̶najxp ku'ubu̶jkku̶xpu̶ñ. Y du'unu̶tz xondaakpu̶ch ko u̶u̶ch je̱'e̱ ayo'on nmu̶naxy ngu'ubú̶ky wan je̱'e̱ Cristo myu̶k'ajt du'un ñi'igu̶xu̶'u̶gu̶ch ma u̶u̶chu̶ñ. 10Y nan xondaakpu̶ch nandu'un ko u̶u̶ch je̱'e̱ ayo'on xykya'ani'iwa'ach xykya'aku'uwa'ach, ko u̶u̶ch je̱'e̱ ja'ay xywyin'ojy xyjyu̶jp'ojy, ko u̶u̶ch oy tii nyajmayjyáty, ko u̶u̶ch nyaj'u̶xwu̶díty nyajpawu̶díty y nmu̶naxy ngu'ubú̶kyu̶ch je̱'e̱ tzaachpyu̶ ayo'on Cristo kyu̶xpu̶, je̱' ko u̶u̶ch je̱'e̱ tzaachpyu̶ ayo'on ni'igyu̶ mu̶k nmu̶naxy ngu'ubú̶ky, ni'igyu̶ u̶u̶ch mu̶k nayjyu̶wu̶'u̶yii mu̶u̶d je̱'e̱ mu̶k'ajt je̱'e̱ mu̶dyiibu̶ u̶u̶ch je̱'e̱ Cristo xymyoobyu̶ñ.
Pablo nidajy nimay je̱'e̱ Corinto mu̶bu̶jkpu̶du̶jk ajku̶xy
11Du'un u̶u̶ch tu̶ nja'ay'áty neby pojja'ayu̶ñ ko u̶u̶ch ku̶'u̶m nnaygyu'umayii, peru̶ miich du'un tu̶ xyaj'adu̶u̶tzku̶xy. Je̱' ko miich ijty xyjya'apaatku̶x xyñigapx xyñimu̶dyaakku̶xu̶chu̶ch miich oy yajxón, je̱' ko u̶u̶ch ni'igyu̶ ku'umáy ijtp, ni'igu̶ ka'p je̱'e̱ mu̶dyiibu̶ mu̶j apóstolestu̶jk naydyiju̶gu̶xpu̶ñ je̱'e̱ mu̶dyiibu̶ miich mbanú̶kxku̶xypyu̶ñ. ¡Y oy u̶u̶ch mu̶j nga'atzobaady! 12Je̱'e̱ ijxpe̱jt y je̱'e̱ mu̶jwinma'añ mu̶dyiibu̶ u̶u̶ch tu̶ nduñ mu̶u̶d u̶u̶ch je̱'e̱ nme̱kxtujku̶ñ ma miich ajku̶xyu̶ñ, je̱' du'un tu̶ yajni'igu̶xu̶'u̶gy ko u̶u̶ch jaanch n'apóstol'aty. 13Mu̶mé̱kxku̶ch ajku̶xy pu̶nu̶ tu̶ nyajjootma'tku̶xy ko miich tu̶ nga'a'ijxpe̱jtku̶xy ko ka'p tii tu̶ ngu'ubu̶jku̶ ajku̶xy neby u̶u̶ch je̱'e̱ wiingpu̶ mu̶bu̶jkpu̶du̶jk ku̶xyu̶ tii tu̶ ngu'ubu̶jku̶ju̶ñ, tu̶ n'ijxpétyu̶ch ajku̶xy.
14Ni'ixu̶'u̶ u̶u̶ch yam n'ijtnu̶ nu̶kxy mu̶du̶gu̶u̶g'ook ngu'ix nmu̶gapxaangu̶xy, y ni cham nga'a'ijxpe̱daangu̶xy. Ka'p u̶u̶ch miich je̱'e̱ mwit mmeeñ n'u̶xtaayu̶ ajku̶xy, miich ku̶'u̶m n'u̶xtaaygyu̶xypy; je̱' ko je̱'e̱ taj teedy je̱'e̱ myeeñ ni'igonu̶u̶ygyu̶xp, je̱'e̱ mu̶dyiibu̶ je̱'e̱ y'ung y'ana'k yajnigaaygyu̶xu̶byu̶ñ y ka'p y'ung y'ana'ku̶ch. 15Y u̶u̶ch jootkujku̶ch ku̶xyu̶ nyajtuunda'awu̶ch tijaty u̶u̶ch nmu̶dajtypyu̶ñ, u̶xtu̶ ngu̶'u̶mmu̶k'ajtu̶ch nyajtúnu̶py mu̶u̶d miich kyu̶xpu̶ m'oy'ajtu̶ñ ajku̶xy; oy du'un jya'aku̶xu̶'u̶gy ko miich ni'igyu̶ ndzojkku̶xy y miich ka'p u̶u̶ch miich xychojkku̶xy.
16Ka'p, ka'p miich tu̶ n'ijxpe̱jtku̶xy. Peru̶ du'un miich nije̱' mmu̶naangu̶xy ko u̶u̶ch njanchkuwinma'añdyu̶ch y du'un tu̶ nwin'u̶u̶ngu̶xy. 17¿Nej tu̶ miich nwin'u̶u̶ngu̶xy mu̶u̶d je̱'e̱ mu̶gu'uktu̶jk mu̶dyiibu̶ tu̶ nyajnigue̱jxku̶xy? 18Je̱'e̱ Tito u̶u̶ch ngue̱jx ko nu̶kxy xykyu'ijxku̶xy xymyu̶gápxku̶xy, y je̱' u̶u̶ch je̱'e̱ ja'adu'ukpu̶ mu̶gu'ug nyajpague̱jx. ¿Nej xywyin'u̶u̶ngu̶x je̱'e̱ Tito? ¿Nej ka'p du'un jyaanchu̶ch ko tu'ugyu̶ u̶u̶ch je̱'e̱ njoot nwinma'añ nime̱tzk nmu̶dajtku̶xy mu̶u̶d je̱'e̱ Tito?
19Wandu̶ miich du'un mmu̶naangu̶xy ko u̶u̶ch yam ngapxnukxtaakku̶xy ma miich ajku̶xyu̶ñ, peru̶ ka'p du'un jyaanchu̶ch. Y'ijxypy ñejwu̶u̶by je̱'e̱ Dios neby u̶u̶ch yam ngápxku̶xy nmu̶dyaakku̶xyu̶ñ, y du'unu̶ch ngápxku̶xy nmu̶dyaakku̶xy neby je̱'e̱ mu̶dyiibu̶ yajpaatku̶xpu̶ñ ma je̱'e̱ Crístoju̶ñ. Y ku̶xyu̶ adaa, miich mu̶gu'uktu̶jk, mu̶dyiibu̶ u̶u̶ch oy ndzojkku̶xypy nju̶wu̶u̶ygyu̶xypyu̶ñ nduungu̶xyu̶ch adaa du'un neby je̱'e̱ mmu̶bu̶jku̶ñ du'un jyakye̱e̱kku̶xu̶chu̶ñ. 20Je̱' ko tzu̶gu̶u̶ybyu̶ch ko naty nu̶kxy n'ijxku̶xy, nu̶kxy du'un nga'apaatku̶xy neby u̶u̶ch naty u̶u̶ch nja'aju̶jp'íxyu̶ñ, y nan nú̶kxyu̶ch oy nejpy n'adu̶'u̶ch neby naty miich mga'aju̶jp'ijxku̶xyu̶ñ. Tzu̶gu̶u̶ybyu̶ch nu̶kxy nbaatku̶xy mdziptuungu̶xy naty, mga'anayyajmu̶'oy'ijxu̶gu̶xy naty ku̶xyu̶ tii, mnayyaj'ama't mnayyajjootma'ttu̶gu̶xy naty, mnaymyu̶dzibu̶u̶yu̶gu̶xy naty, m'agapx'ajtku̶xy naty, mnayñi'oj mnayñiyaxu̶u̶yu̶gu̶xy naty, mnayjyu̶wu̶u̶yu̶gu̶xy naty mu̶j ku̶xp y mga'a'oknaymyu̶mu̶doowu̶gu̶xnu̶ naty. 21Nan tzu̶gu̶u̶ybyu̶ch nandu'un, je̱'e̱ mu̶'it ko naty nu̶kxy ngu'ijxku̶xy nmu̶gápxku̶xy, nú̶kxyu̶ch je̱'e̱ nDios xyajtzo'oydyúñ mu̶u̶d miich kyu̶xpu̶ ajku̶xy, y xyajju̶'u̶w xyajya'axu̶chu̶ch mu̶u̶d miich kyu̶xpu̶ nimay ajku̶xy ko jékyu̶p mdu̶gu̶'u̶ypyoktyuungu̶xpu̶ y ka'p je̱'e̱ ju̶bu̶k tzu̶naayu̶ñ m'u̶xmajtzku̶xyñu̶, neby je̱'e̱ to'oxyu̶jktu̶jk tu'ug tu'ug mu̶dtuundu̶gooygyu̶xyu̶ñ y neby je̱'e̱ ju̶bu̶kpu̶ axu̶u̶gpu̶ tu̶ mduungu̶xyu̶ñ.
Currently Selected:
2 Corintios 12: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005