1 Timoteo 6
6
1Ku̶xyu̶ je̱'e̱ tuumbu̶du̶jk mu̶dyiibu̶ ni'idoogy ijtku̶xpu̶ñ, wan je̱'e̱ wyindzú̶n oy yajxón yajmu̶j'ajtku̶xy, ka'pu̶ je̱'e̱ wiingja'ay je̱'e̱ Dios ju̶bu̶k axu̶u̶g ni'oj niyaaxu̶u̶ygyu̶xu̶ch je̱'e̱ n'u̶xpu̶jku̶ñ ajtu̶m ajku̶xy. 2Pu̶nu̶ myu̶u̶d je̱'e̱ tuumbu̶du̶jk wyindzú̶n ajku̶xy mu̶dyiibu̶ je̱'e̱ Dios y'ayuuk tyu̶y'ajt mu̶bu̶jkku̶xpu̶ñ, ka'p du'un y'óyu̶ch ko je̱'e̱ wyindzú̶n ka'ayajmu̶j'ajtku̶xu̶ch. Ni'igu̶ oy yajxón je̱'e̱ wan ni'igyu̶ yajmu̶j'ajtku̶xy, je̱' ko Dios jya'ay je̱'e̱ ajku̶xy y mu̶bu̶jkpu̶du̶jk mu̶dyiibu̶ oy mu̶u̶d ñaychogyii, je̱' ko je̱'e̱ mu̶dyiibu̶ niwindzu̶n'ajtpu̶ñ ajku̶xy pyadaangu̶xypy y'oybyu̶ je̱' mu̶u̶d mu̶dyiibu̶ je̱'e̱ tyuumbu̶du̶jk tyuungu̶xypyu̶ñ.
Jim je̱'e̱ jootkujk'ajtu̶ñ nbaattu̶m ma je̱'e̱ Dios tyu̶y'ajtu̶ñ
Adaa tu̶y'ajt yaj'u̶xpú̶k y kapxwa'kx. 3Pu̶nu̶ jii je̱'e̱ wiingpu̶ u̶xpu̶jku̶ñ pu̶n yaj'u̶xpú̶ky, mu̶dyiibu̶ ka'p ñaybyadyii mu̶u̶d je̱'e̱ oybyu̶ wa'adzpu̶ Jesucristo y'ayuuk tyu̶y'ajt, y ni kya'anaybyadyii mu̶u̶d je̱'e̱ u̶xpu̶jku̶ñ mu̶dyiibu̶ u̶u̶ch nmu̶bu̶jkypy ajtu̶m ajku̶xy; 4je̱'e̱ ja'ay naty je̱'e̱ ajku̶xy mu̶dyiibu̶ mu̶j ku̶xp nayjyu̶wu̶u̶yu̶gu̶xpu̶ñ, mu̶dyiibu̶ ka'p tii nejwu̶u̶ygyu̶xyu̶ñ. Je'eyu̶ janch yajtzibu̶u̶y janch yajma'adu̶u̶ygyu̶xy mu̶dyiibu̶ nigoo kapxy'ajtp mu̶dya'agy'ajtpu̶ñ, y je̱' je̱'e̱ du'un ka'ayajnayjyu̶wu̶u̶yu̶gu̶xp, paady je̱'e̱ myu̶gu'ugtu̶jk ku̶xyu̶ tijaty ka'ayajmu̶'oy'ijxku̶xy, du'un je̱'e̱ ajku̶xy neby je̱'e̱ yuu pa'amu̶ñ yaj'ama't yajjootma'tku̶xy, ojku̶xy yaaxku̶xy, y kapx'iingu̶xy. 5Je̱'e̱ du'umbu̶ ja'ay mu̶dyiibu̶ je̱'e̱ Dios tyu̶y'ajt ka'p mu̶bu̶kyu̶ñ ajku̶xy, je̱'e̱ tzip ma'ad je̱'e̱ je'eyu̶ agu̶ je̱' yajpu̶du̶'kku̶xypy mu̶dyiibu̶ ka'p kyu̶xy tyu̶goyu̶ñ, tu̶ jyoot wyinma'añ je̱'e̱ tyu̶gooygyu̶xnu̶ y ka'p je̱'e̱ tu̶y'ajt winju̶wu̶u̶ygyu̶xy, paady je̱'e̱ Dios y'ayuuk tyu̶y'ajt du'un ni'i''íxy yaj'u̶xpú̶ky ajku̶xy ko jyanchkumeeñgyojaangu̶xy.#6.5 Nije̱' jaaybyu̶du̶jk myu̶naangu̶xy: puyo'oydyu'ut je̱'e̱ du'umbu̶ ja'ay ajku̶xy. 6Y oy wa'adz adaa du'un yajwinju̶wu̶'u̶y ko je̱'e̱ Dios y'ayuuk tyu̶y'ajt nguydyuunu̶mu̶ch ajku̶xy, mu̶'it jootkujk ndzu̶naay njugy'ajtu̶mu̶ch ajku̶xy, nmu̶jootkujk'ajtu̶mu̶ch mu̶dyiibu̶ naty nmu̶dajtypy ajtu̶m ajku̶xy. 7Ni tii ya naaxwiiñ nga'amu̶miiñ ajtu̶m ajku̶xy ko yajma'axung'ajty, nan ni tii nga'amu̶nú̶kxu̶mu̶ch ajku̶xy ko naty n'o'ku̶nu̶ ajtu̶m ajku̶xy. 8Pu̶nu̶ nmu̶dajtu̶mby je̱'e̱ kaayu̶ñ uuku̶ñ y je̱'e̱ wit tukxy, mu̶baad njootkujk'ajtu̶m ajku̶xy mu̶u̶d je̱'e̱du̶'ajty. 9Je̱'e̱ ja'ay ajku̶xy mu̶dyiibu̶ je̱'e̱ kumeeñ'adu̶u̶ janch nijoot'ajtku̶xpu̶ñ, ka'p je̱'e̱ tzaachpyu̶ ayo'on mu̶madaakku̶xy, je̱' je̱'e̱ jyanchtune̱e̱mby ajku̶xy, mu̶dyiibu̶ ka'p y'oywyinma'añdyu̶chu̶ñ y mu̶dyiibu̶ janch jootmaydyuumbu̶ñ. Je̱'e̱ du'umbu̶ axu̶u̶g winma'añ je̱' je̱'e̱ ja'ay ju̶bu̶ktuum yajka'ab y ayo'onduum y'aanu̶mu̶ je̱'e̱ ñu̶kxaangu̶xy. 10Je̱'e̱ meeñ'adzojku̶ñ je̱' je̱'e̱ ju̶bu̶kwinma'añ ku̶xyu̶ kopt'ajtp, mu̶u̶d je̱'e̱ meeñ'adzogu̶u̶ may je̱'e̱ ja'ay je̱'e̱ Dios y'ayuuk tyu̶y'ajt tu̶ yajtu̶gooygyu̶xnu̶ y du'un je̱'e̱ chu̶naay jyugy'ajtu̶ñ tu̶ yajma'tku̶xnu̶ mu̶u̶d je̱'e̱ taju̶ñ maayu̶ñ.
Timoteo, amuumdu'ugjoot je̱'e̱ mmu̶bu̶jku̶ñ pu̶da'ag ma je̱'e̱ Dios tyu̶y'ajtu̶ñ
11Peru̶ miich Timoteo, je̱'e̱ Dios myu̶duumbu̶, ku'ugue̱'e̱g je̱'e̱ ja'ay mu̶dyiibu̶ je̱'e̱ du'umbu̶ ju̶bu̶kwinma'añ ku̶xyu̶ mu̶dajtku̶xpu̶ñ. Tu̶ytu'uda'agy mdzu̶na'awu̶ch mjuugy'ádu̶ch, mmu̶dún je̱'e̱ Dios oy yajxón, mmu̶bu̶jku̶ je̱'e̱ y'ayuuk tyu̶y'ajt, tun je̱'e̱ oyjya'ay'ajtu̶ñ, windu̶na'a je̱'e̱ mduung, mmu̶dat je̱'e̱ mjoot mwinma'añ yuung naaxypy. 12Amuumdu'ugjoot je̱'e̱ mmu̶bu̶jku̶ñ pu̶da'ag ma je̱'e̱ Dios tyu̶y'ajtu̶ñ; ka'p je̱'e̱ jugy'ajtu̶ñ wiinu̶u̶xu̶u̶bu̶ myajtu̶góy mu̶dyiibu̶ je̱'e̱ m'aanu̶mu̶ pyade̱e̱mby ma je̱'e̱ Diosu̶ñ. Je̱' ko mu̶u̶d adaa gyu̶xpu̶ je̱'e̱ Dios du'un tu̶ xyajni'idijy neby je̱'e̱ jugy'ajtu̶ñ wiinu̶u̶xu̶u̶bu̶ mu̶baad mbaadyu̶ñ, y paady du'un mayjya'ayjyooty mnigapxy neby oy yajxón mmu̶bu̶kyu̶ñ. 13Dios je̱'e̱ mu̶dyiibu̶ ku̶xyu̶ yajjugy'ajtaaby mu̶dyiijáty ya yajpaatp, y je̱'e̱ Jesucristo je̱'e̱ mu̶dyiibu̶ je̱'e̱ tu̶y'ajt nandu'un wa'adzu̶ ye̱jk ma je̱'e̱ Poncio Pilato wyinduuyu̶ñ. Je̱' nidu̶y'ajt'ajtp ko adaa ayuuk y'óyu̶ch mu̶dyiibu̶ yam nyajnu̶maaybyu̶ñ, cham n'ane'emy 14ko adaa ayuuk mguydyúnu̶ch neby yam nyajni'ipú̶kyu̶ñ, oy wa'adz myaj'u̶xpú̶gu̶ch y ka'p maa myajtu̶gátzu̶ch ka'pu̶ myajpoky'íxu̶ch. Y du'un mdúnu̶ch u̶xtu̶ koonu̶ je̱'e̱ nWindzú̶n Jesucristo ajtu̶m ajku̶xy ja'adu'ook myínu̶ch ya naaxwiiñ. 15Dios yajmu̶baad'adaamb mu̶naa je̱'e̱ Jesucristo ja'adu'ook kyu̶daaktu̶gáchu̶ñ ya naaxwiiñ, je̱' ko je̱' je'eyu̶ tu'kpajk je̱'e̱ kunukxy Mu̶jmu̶k'ajtmu̶u̶dpu̶, je̱'e̱ Mu̶j'ane̱'e̱mbu̶ mu̶dyiibu̶ ku̶xyu̶ ane̱'e̱mdaaybyu̶ñ y je̱'e̱ Windzú̶n mu̶dyiibu̶ ku̶xyu̶ niwindzu̶n'ajttaaybyu̶ñ. 16Je̱' je̱'e̱ tu'kpajk mu̶dyiibu̶ ka'p nimu̶naaxu̶u̶ y'o'ogy tyu̶goy, je̱' ijtp ma je̱'e̱ tu̶kxu̶ñ jaju̶ñ je̱'e̱ mu̶dyiibu̶ ka'p mu̶baad ni pu̶n nineby'eemby mu̶wingoñu̶ñ. Ni tu'ug je̱'e̱ ja'ay Dios ka'a'íxyñu̶ y nan ka'p mu̶baad ijxku̶xy. ¡Je̱' je̱'e̱ kyu'umaayu̶ñ y je̱'e̱ myu̶k'ajtu̶ñ wiinu̶u̶xu̶u̶ ídu̶p! Jaanch adaa du'un.
17Je̱'e̱ kumeeñjya'aydyu̶jk mu̶dyiibu̶ jada'achámbu̶ tiempo tzu̶naaygyu̶xp jugy'ajtku̶xpu̶ñ, nnu̶maaygyu̶x ko ka'p mu̶baad mu̶j ku̶xp ñayjyu̶wu̶u̶yu̶gu̶xy y ka'p je̱'e̱ myeeñ a'ijx ju̶jp'ijxku̶xu̶ch ko je̱' ñi'idzook'adaangu̶xypy, je̱' ko je̱'e̱ kumeeñ'adu̶u̶ ka'p je̱'e̱ wiinu̶u̶xu̶u̶ y'ijtu̶y. Wan je̱'e̱ Dios ni'igyu̶ a'ijx ju̶jp'ijxku̶xy je̱'e̱ mu̶dyiibu̶ ku̶xyu̶ xymyooby ajtu̶m ajku̶xy mu̶j may mu̶j ku̶je̱e̱, neby mu̶baad nnigaay nni'uuku̶mu̶ñ ajku̶xy jootkujk. 18Nnu̶maaygyu̶x ko je̱'e̱ oybyu̶ wan tuungu̶xy, wan ku'umáy pu̶dzu̶u̶mgu̶xy ko je̱'e̱ oybyu̶ naty tuungu̶xy, y wan je̱'e̱ myu̶gu'ugtu̶jk pa'a''ayoogu̶xy y yajwa'kxku̶xy ku̶xyu̶ tijaty myu̶dajtku̶xypyu̶ñ mu̶u̶d je̱'e̱ ja'ay mu̶dyiibu̶ ka'p tii mu̶u̶du̶chu̶ñ ajku̶xy. 19Ko je̱'e̱ du'un kuydyuungu̶xu̶ch mu̶'it je̱'e̱ oy'ajtu̶ñ paatku̶xu̶ch mu̶dyiibu̶ miimb ku̶daakpu̶ñ, y paatku̶xu̶ch je̱'e̱ jaanchpyu̶ jugy'ajtu̶ñ.#6.19 Je̱'e̱ jaanchpyu̶ jugy'ajtu̶ñ: nije̱' jaaybyu̶du̶jk myu̶naangu̶xy: je̱'e̱ jugy'ajtu̶ñ wiinu̶u̶xu̶u̶bu̶.
Mu̶dyiibu̶ je̱'e̱ Pablo jyakyajni'ipu̶jku̶ñ je̱'e̱ Timoteo
20Timoteo, kuydyún adaa u̶xpu̶jku̶ñ mu̶dyiibu̶ je̱'e̱ Dios tu̶ xyajni'ipú̶kyu̶ñ. Ka'p mu̶jpu̶da'agy je̱'e̱ nigoobu̶ kyapxy'aty y'ayuuk'áty y je̱'e̱ ka'pu̶ chobaady. Ka'p je̱'e̱ ja'ay y'ayuuk mgweentu̶tuunu̶ mu̶dyiibu̶ du'un naybyu̶daaku̶bu̶ñ ajku̶xy neby je̱'e̱ janch kuwinma'añbyu̶ju̶ñ, ka'p y'u̶xpu̶jku̶ñ je̱'e̱ y'óyu̶ch ajku̶xy, 21du'un neby je̱'e̱ ja'ay u̶xpu̶jku̶ñ nije̱' panú̶kxku̶xyu̶ñ je̱'e̱ ka'pu̶ tyu̶y'ajtu̶ch, y tu̶ je̱'e̱ Dios y'ayuuk tyu̶y'ajt du'un yajtu̶gooyu̶ ajku̶xy.
Wan je̱'e̱ Dios oy'ajt may'ajt tuñ ma miich ajku̶xyu̶ñ. Jaanch adaa du'un.
Currently Selected:
1 Timoteo 6: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005